-ਪ੍ਰਸ਼ਾਸਨਿਕ ਜ਼ਿੰਮੇਵਾਰੀ : ਕੋਈ ਮਰੇ ਕੋਈ ਜੀਵੇ, ਸੁਥਰਾ ਘੋਲ ਪਤਾਸੇ ਪੀਵੇ…!
-ਟਰਾਲਾ ਚਾਲਕ ਤੇ ਦੁਕਾਨਦਾਰ ਦੀ ਲਾਪਰਵਾਹੀ ਸੜਕਾ 28 ਵਰ੍ਹਿਆਂ ਦੇ ਨੌਜਵਾਨ ਦੀ ਮੌਤ
ਬਰਨਾਲਾ 21 ਅਪ੍ਰੈਲ ( ਨਿਰਮਲ ਸਿੰਘ ਪੰਡੋਰੀ)-
ਲੋਕਾਂ ਵੱਲੋਂ ਅਤੇ ਕੁਝ ਵੱਡੇ ਦੁਕਾਨਦਾਰਾਂ ਵੱਲੋਂ ਸੜਕ ਦੇ ਕਿਨਾਰੇ ਰੱਖੇ ਸਮਾਨ ਕਾਰਨ ਟ੍ਰੈਫਿਕ ਸਮੱਸਿਆ ਅਤੇ ਹਾਦਸਿਆਂ ਤੋਂ ਲੋਕਾਂ ਨੂੰ ਨਿਜਾਤ ਦਿਵਾਉਣ ਲਈ ਪ੍ਰਸ਼ਾਸਨ ਤੇ ਉੱਚ ਪੁਲਸ ਅਧਿਕਾਰੀਆਂ ਦੀਆਂ ਮੀਟਿੰਗਾਂ ਤਾਂ ਹੁੰਦੀਆਂ ਹਨ ਪ੍ਰੰਤੂ ਇਹ ਮੀਟਿੰਗਾਂ “ਚਾਹ ਦੀ ਪਿਆਲੀ” ਤੱਕ ਹੀ ਸੀਮਤ ਹੋ ਕੇ ਰਹਿ ਜਾਂਦੀਆਂ ਹਨ ਜਦਕਿ ਅਮਲ ਵਿਚ ਕਾਰਵਾਈ ਕੋਈ ਨਹੀਂ ਕੀਤੀ ਜਾਂਦੀ । ਅਧਿਕਾਰੀਆਂ ਦੀ ਲਾਪਰਵਾਹੀ ਸਦਕਾ ਬੇਸ਼ਕੀਮਤੀ ਜਾਨਾਂ ਦਾ ਸੜਕ ਹਾਦਸਿਆਂ ਵਿਚ ਚਲੇ ਜਾਣਾ ਬਦਸਤੂਰ ਜਾਰੀ ਹੈ । ਅਜਿਹੀ ਇੱਕ ਦਰਦਨਾਕ ਘਟਨਾ ਬਰਨਾਲਾ-ਹੰਡਿਆਇਆ ਰੋਡ ‘ਤੇ ਗੁਰਦੁਆਰਾ ਪ੍ਰਗਟਸਰ ਸਾਹਿਬ ਨੇੜੇ ਵਾਪਰੀ ਜਿਸ ਵਿਚ 28 ਵਰ੍ਹਿਆਂ ਦਾ ਨੌਜਵਾਨ, ਇਕ ਦੁਕਾਨਦਾਰ ਅਤੇ ਉਸ ਦੀ ਦੁਕਾਨ ‘ਤੇ ਸੀਮਿੰਟ ਲਾਹੁਣ ਆਏ ਟਰਾਲਾ ਚਾਲਕ ਦੀ ਲਾਪਰਵਾਹੀ ਸਦਕਾ ਆਪਣੇ ਮਾਪਿਆਂ ਨੂੰ ਰੋਂਦੇ ਕੁਰਲਾਉਂਦੇ ਛੱਡ ਕੇ ਚਲਾ ਗਿਆ ।
ਪ੍ਰਾਪਤ ਜਾਣਕਾਰੀ ਅਨੁਸਾਰ ਸੀਮੈਂਟ ਸਟੋਰ ‘ਤੇ ਸੀਮਿੰਟ ਲਾਹੁਣ ਆਇਆ ਇਹ ਟਰਾਲਾ ਸੜਕ ‘ਤੇ ਖੜ੍ਹਾ ਸੀ ਅਤੇ ਹਾਦਸੇ ਦਾ ਸ਼ਿਕਾਰ ਹੋਇਆ ਨੌਜਵਾਨ ਈਸ਼ਵਰ ਸਿੰਘ ਬਠਿੰਡਾ ਤੋਂ ਆਪਣੇ ਇਕ ਸਾਥੀ ਨਾਲ ਮੋਟਰਸਾਈਕਲ ‘ਤੇ ਬਰਨਾਲਾ ਆ ਰਿਹਾ ਸੀ ਜੋ ਸੜਕ ‘ਤੇ ਖੜੇ ਟਰਾਲੇ ਨਾਲ ਟਕਰਾ ਗਿਆ ਅਤੇ ਉਸ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ ਤੇ ਉਸਦਾ ਸਾਥੀ ਗੰਭੀਰ ਜ਼ਖਮੀ ਹੋ ਗਿਆ। ਮੌਕੇ ‘ਤੇ ਹਾਜ਼ਰ ਕੁਝ ਲੋਕਾਂ ਨੇ ਦੱਸਿਆ ਕਿ ਇਥੇ ਰੇਤੇ-ਬਜਰੀ ਦੇ ਵੱਡੇ ਢੇਰ ਅਕਸਰ ਲੱਗੇ ਹੀ ਰਹਿੰਦੇ ਹਨ । ਪਤਾ ਲੱਗਾ ਹੈ ਕਿ ਇਹ ਸੀਮੈਂਟ ਸਟੋਰ ਸ਼ਹਿਰ ਦੇ ਅਸਰ-ਰਸੂਖ਼ ਵਾਲੇ ਇੱਕ ਸਿਆਸੀ ਆਗੂ ਦੇ ਪਰਿਵਾਰ ਨਾਲ ਸੰਬੰਧਿਤ ਹੈ ਜਿਸ ਕਰਕੇ ਮ੍ਰਿਤਕ ਨੌਜਵਾਨ ਦੇ ਪਰਿਵਾਰਕ ਮੈਂਬਰਾਂ ਨੇ ਖਦਸ਼ਾ ਜ਼ਾਹਰ ਕੀਤਾ ਹੈ ਕਿ ਪੁਲਿਸ ਸਿਰਫ਼ ਟਰਾਲਾ ਚਾਲਕ ‘ਤੇ ਕਾਰਵਾਈ ਕਰਕੇ ਹੀ ਲਿਪਾਪੋਚੀ ਕਰੇਗੀ । ਬਰਨਾਲਾ ਧਨੌਲਾ ਰੋਡ ‘ਤੇ ਰਹਿਣ ਵਾਲੇ ਮ੍ਰਿਤਕ ਨੌਜਵਾਨ ਦੇ ਮਾਤਾ ਪਿਤਾ ਨੇ ਕਿਹਾ ਕਿ ਟਰਾਲਾ ਚਾਲਕ ਦੇ ਨਾਲ-ਨਾਲ, ਦੁਕਾਨ ਮਾਲਕ ਅਤੇ ਅਜਿਹੀਆਂ ਸਮੱਸਿਆਵਾਂ ਨੂੰ ਅੱਖੋਂ-ਪਰੋਖੇ ਕਰਨ ਵਾਲੇ ਅਧਿਕਾਰੀਆਂ ਖ਼ਿਲਾਫ਼ ਵੀ ਕਾਰਵਾਈ ਹੋਣੀ ਚਾਹੀਦੀ ਹੈ ।
ਦੂਜੇ ਪਾਸੇ ਥਾਣਾ ਸਿਟੀ-2 ਦੇ SHO ਗੁਰਮੇਲ ਸਿੰਘ ਨੇ ਕਿਹਾ ਕਿ ਜ਼ਿੰਮੇਵਾਰ ਭਾਵੇਂ ਕੋਈ ਵੀ ਹੋਵੇ ਸਭ ਦੇ ਖ਼ਿਲਾਫ਼ ਬਣਦੀ ਕਾਨੁੰਨੀ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ ।
ਘਟਨਾ ਸਥਾਨ ‘ਤੇ ਮ੍ਰਿਤਕ ਨੌਜਵਾਨ ਦੀ ਮਾਤਾ ਵਿਰਲਾਪ ਕਰ ਕੇ ਕਹਿ ਰਹੀ ਸੀ ਕਿ “ਜੇਕਰ ਸੜਕਾਂ ‘ਤੇ ਲੋਕਾਂ ਨੂੰ ਦਰਪੇਸ਼ ਆ ਰਹੀਆਂ ਸਮੱਸਿਆਵਾਂ ਬਾਰੇ ਅਧਿਕਾਰੀ ਸਮੇਂ ਸਮੇਂ ‘ਤੇ ਧਿਆਨ ਦਿੰਦੇ ਰਹਿਣ ਤਾਂ ਮੇਰਾ ਸੋਨੇ ਵਰਗਾ ਪੁੱਤ ਮੇਰੀ ਬੁੱਕਲ ਦੇ ਵਿੱਚ ਹੁੰਦਾ । ਮਾਂ ਹਰਦੀਪ ਕੌਰ ਧਾਹਾਂ ਮਾਰ ਮਾਰ ਕੇ ਦੱਸ ਰਹੀ ਸੀ ਕਿ “ਉਸ ਦੇ ਪੁੱਤਰ ਦਾ ਘਟਨਾ ਤੋਂ ਕੁਝ ਸਮਾਂ ਪਹਿਲਾਂ ਆਇਆ ਸੀ ਅਤੇ ਉਸ ਨੇ ਫੋਨ ‘ਤੇ ਕਿਹਾ ਸੀ ਕਿ ਮੈਂ ਥੋੜ੍ਹੇ ਸਮੇਂ ‘ਚ ਘਰ ਆ ਜਾਵਾਂਗਾ ਪਰ ਉਹ ਹੁਣ ਕਦੇ ਨਹੀਂ ਆਵੇਗਾ”। ਇਹੋ ਜਿਹੇ ਮਸਲੇ ਸਮੇਂ-ਸਮੇਂ ‘ਤੇ ਉੱਠਦੇ ਰਹੇ ਹਨ ਕਿ ਸੜਕ ਹਾਦਸਿਆਂ ‘ਚ ਹੋਣ ਵਾਲੀਆਂ ਮੌਤਾਂ ਨੂੰ ਪ੍ਰਸ਼ਾਸਨਿਕ ਅਧਿਕਾਰੀ ਗੰਭੀਰਤਾ ਨਾਲ ਨਹੀਂ ਲੈਂਦੇ। ਸਿੱਟੇ ਵਜੋਂ ਲੋਕਾਂ ਦੇ ਕੱਲੇ-ਕੱਲੇ ਪੁੱਤਰ ਵੀ ਹਾਦਸਿਆਂ ਦਾ ਸ਼ਿਕਾਰ ਹੋ ਰਹੇ ਹਨ ਪਰ ਅਸਲੀਅਤ ਇਹੀ ਹੈ ਕਿ “ਕੋਈ ਮਰੇ ਕੋਈ ਜੀਵੇ…ਸੁਥਰਾ ਘੋਲ ਪਤਾਸੇ ਪੀਵੇ…!
