-ਕਿਹਾ..ਨਜ਼ਰਾਂ ਵਿੱਚ ਅਸ਼ਲੀਲਤਾ ਨਹੀਂ ਹੋਣੀ ਚਾਹੀਦੀ
ਚੰਡੀਗੜ੍ਹ, 6 ਜੂਨ-ਅਸ਼ਲੀਲਤਾ ਅਤੇ ਨਗਨਤਾ ਵਿੱਚ ਫਰਕ ਦਰਸਾਉਣ ਵਾਲਾ ਇਕ ਵੱਡਾ ਫੈਸਲਾ ਦਿੰਦੇ ਹੋਏ ਕੇਰਲਾ ਹਾਈਕੋਰਟ ਨੇ ਕਿਹਾ ਕਿ ਔਰਤ ਦੇ ਸਰੀਰ ਦੇ ਕਿਸੇ ਨਗਨ ਹਿੱਸੇ ਨੂੰ ਅਸ਼ਲੀਲਤਾ ਭਰੀਆਂ ਨਜ਼ਰਾਂ ਨਾਲ ਨਹੀਂ ਵੇਖਿਆ ਜਾਣਾ ਚਾਹੀਦਾ । ਆਪਣੇ ਇਸ ਫ਼ੈਸਲੇ ਦੇ ਨਾਲ ਹੀ ਅਦਾਲਤ ਨੇ ਔਰਤ ਦੇ ਖਿਲਾਫ਼ ਅਸ਼ਲੀਲਤਾ ਦੇ ਲੱਗੇ ਦੋਸ਼ ਹੇਠ ਦਰਜ ਇੱਕ ਅਪਰਾਧਿਕ ਕੇਸ ਨੂੰ ਖਾਰਜ ਕਰ ਦਿੱਤਾ । ਮਾਨਯੋਗ ਅਦਾਲਤ ਦੇ ਇਹਨਾਂ ਹੁਕਮਾਂ ਦਾ ਇਹੋ ਭਾਵ ਲਿਆ ਜਾ ਰਿਹਾ ਹੈ ਕਿ ਅਸ਼ਲੀਲਤਾ, ਨਗਨਤਾ ਵਿੱਚ ਨਹੀਂ ਹੁੰਦੀ ਸਗੋਂ ਨਜ਼ਰਾਂ ਵਿੱਚ ਹੁੰਦੀ ਹੈ । ਸਮੁੱਚੇ ਮਾਮਲੇ ਦੇ ਵੇਰਵੇ ਅਨੁਸਾਰ ਇਕ ਔਰਤ ਨੇ ਆਪਣੇ ਹੀ ਬੱਚਿਆਂ ਤੋਂ ਆਪਣੇ “ਸੇਮੀ ਨਿਊਡ ਸਰੀਰ” ਉਪਰ ਪੇਂਟਿੰਗ ਕਰਵਾ ਕੇ ਉਸ ਦੀ ਵੀਡੀਓ ਬਣਾਈ । ਜਿਸ ਤੋਂ ਬਾਅਦ ਕਿਸੇ ਵੀ ਸ਼ਿਕਾਇਤ ਉਪਰ ਉਸ ਔਰਤ ਦੇ ਖਿਲਾਫ਼ ਅਸ਼ਲੀਲਤਾ ਫੈਲਾਉਣ ਦੇ ਦੋਸ਼ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਸੀ । ਔਰਤ ਨੇ ਦਲੀਲ ਦਿੱਤੀ ਕਿ ਉਸ ਨੇ ਇਹ ਵੀਡੀਓ ਔਰਤ ਦੇ ਸਰੀਰ ਬਾਰੇ ਮਰਦ ਪ੍ਰਧਾਨ ਸਮਾਜ ਦੀਆਂ ਧਾਰਨਾਵਾਂ ਨੂੰ ਚੁਣੌਤੀ ਦੇਣ ਲਈ ਅਤੇ ਆਪਣੇ ਬੱਚਿਆਂ ਨੂੰ ਸੈਕਸ ਸਿੱਖਿਆ ਦੇਣ ਲਈ ਬਣਾਈ ਹੈ । ਅਦਾਲਤ ਨੇ ਕਿਹਾ ਕਿ ਔਰਤਾਂ ਦੇ ਉੱਪਰਲੇ ਸਰੀਰ ਦੀ ਨਗਨਤਾ ਨੂੰ ਜਿਨਸੀ ਜਾਂ ਅਸ਼ਲੀਲਤਾ ਨਹੀਂ ਕਿਹਾ ਜਾ ਸਕਦਾ ਹੈ। ਅਦਾਲਤ ਨੇ ਕਿਹਾ ਕਿ ਔਰਤ ਨੇ ਆਪਣੇ ਬੱਚਿਆਂ ਨੂੰ ਆਪਣੇ ਸਰੀਰ ਨੂੰ ਕੈਨਵਸ ਵਾਂਗ ਪੇਂਟ ਕਰਨ ਦੀ ਇਜ਼ਾਜਤ ਦਿੱਤੀ ਹੈ ਅਤੇ ਉਹ ਆਪਣੇ ਸਰੀਰ ਨੂੰ ਲੈ ਕੇ ਖ਼ੁਦਮੁਖ਼ਤਿਆਰ ਹੋ ਸਕਦੀ ਹੈ । ਜਸਟਿਸ ਕੌਸਰ ਐਡਪਗਥ ਨੇ ਕਿਹਾ ਕਿ ਇਹੋ ਜਿਹੇ ਸਵਾਲ ਅਕਸਰ ਪੁਰਸ਼ਾਂ ਦੇ ਨੰਗੇ ਸਰੀਰ ‘ਤੇ ਵੀ ਉਠਦੇ ਹਨ ਪ੍ਰੰਤੂ ਔਰਤਾਂ ‘ਤੇ ਲਗਾਤਾਰ ਸਵਾਲ ਉਠਾਉਣਾ ਪੁਰਖੀ ਢਾਂਚੇ ਦੀ ਨਿਸ਼ਾਨੀ ਹੈ। ਅਦਾਲਤ ਦਾ ਤਰਕ ਹੈ ਕਿ ਉਸ ਨੇ ਇਹ ਫੈਸਲਾ ਸਮਾਜ ਵਿਚ ਔਰਤ-ਮਰਦ ਪ੍ਰਤੀ ਸਮਾਜ ਦੇ ਦੋਹਰੇ ਮਾਪਦੰਡਾਂ ਨੂੰ ਲੈ ਕੇ ਦਿੱਤਾ ਹੈ ।
