ਬਰਨਾਲਾ,16 ਅਗਸਤ ( ਨਿਰਮਲ ਸਿੰਘ ਪੰਡੋਰੀ )-ਸਬ-ਡਵੀਜ਼ਨ ਬਣਨ ਤੋਂ ਬਾਅਦ ਮਹਿਲ ਕਲਾਂ ਵਿਖੇ ਪਹਿਲੀ ਵਾਰ ਕਰਵਾਇਆ ਗਿਆ ਸੁਤੰਤਰਤਾ ਦਿਵਸ ਸਮਾਗਮ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਹੈ । ਸਮਾਗਮ ਵਿੱਚ ਜਿੱਥੇ ਸਨਮਾਨਿਤ ਕੀਤੀਆਂ ਗਈਆਂ ਕੁਝ ਸਖਸੀਅਤਾਂ ਦੇ ਨਾਵਾਂ ਉੱਪਰ ਉਂਗਲ ਉੱਠ ਰਹੀ ਹੈ, ਉੱਥੇ ਸਬ-ਡਵੀਜ਼ਨ ਮਹਿਲ ਕਲਾਂ ਨਾਲ ਸਬੰਧਤ ਪਿੰਡਾਂ ਦੀਆਂ ਕੁਝ ਹਸਤੀਆਂ ਜਿਨ੍ਹਾਂ ਨੇ ਆਪਣੇ ਵਿਸ਼ੇਸ਼ ਕਾਰਜਾਂ ਕਰਕੇ ਦੇਸ਼-ਵਿਦੇਸ਼ ਵਿੱਚ ਮਹਿਲ ਕਲਾਂ ਅਤੇ ਜ਼ਿਲ੍ਹੇ ਦਾ ਨਾਮ ਰੌਸ਼ਨ ਕੀਤਾ, ਨੂੰ ਪ੍ਰਸ਼ਾਸਨ ਵੱਲੋਂ ਅੱਖੋਂ-ਪਰੋਖੇ ਕਰਨ ‘ਤੇ ਵੀ ਸਵਾਲ ਖੜ੍ਹੇ ਹੋ ਰਹੇ ਹਨ । ਦੂਜੇ ਪਾਸੇ ਸਬ-ਡਵੀਜ਼ਨ ਬਣਨ ਤੋਂ ਬਾਅਦ ਮਹਿਲ ਕਲਾਂ ਵਿਖੇ ਸੁਤੰਤਰਤਾ ਦਿਵਸ ਦੇ ਏਸ ਪਹਿਲੇ ਸਮਾਗਮ ਵਿੱਚ ਹਲਕਾ ਵਿਧਾਇਕ ਦੀ ਗੈਰ ਹਾਜ਼ਰੀ ਵੀ ਰੜਕਦੀ ਰਹੀ । ਭਾਵੇਂ ਕਿ ਹਲਕਾ ਵਿਧਾਇਕ ਦੀ ਟੀਮ ਨੇ ਉਹਨਾਂ ਦੇ ਪੀਏ ਦੀ ਅਗਵਾਈ ਹੇਠ ਸਮਾਗਮ ਵਿੱਚ ਉਚੇਚੇ ਤੌਰ ‘ਤੇ ਸ਼ਮੂਲੀਅਤ ਕੀਤੀ ਪਰੰਤੂ ਲੋਕਾਂ ਨੂੰ ਉਸ ਵੇਲੇ ਹੈਰਾਨੀ ਹੋਈ ਜਦੋਂ ਸਮਾਗਮ ਦੀ ਸਮਾਪਤੀ ਤੋਂ ਪਹਿਲਾਂ ਹੀ, ਚਲਦੇ ਸਮਾਗਮ ਦੌਰਾਨ ਹੀ ਵਿਧਾਇਕ ਦੀ ਟੀਮ ਦੇ ਸਟੇਜ ‘ਤੇ ਬੈਠੇ ਸਾਰੇ ਮੈਂਬਰ ਅਚਾਨਕ ਉੱਠ ਕੇ ਚਲੇ ਗਏ। ਇਹ ਵੀ ਜਾਣਕਾਰੀ ਮਿਲੀ ਹੈ ਕਿ ਮਹਿਲ ਕਲਾਂ ਵਾਲਾ ਸਮਾਗਮ ਵਿਚਾਲੇ ਛੱਡ ਕੇ ਹਲਕਾ ਵਿਧਾਇਕ ਦੀ ਟੀਮ ਦੇ ਮੈਂਬਰ ਬਰਨਾਲਾ ਵਿਖੇ ਜ਼ਿਲ੍ਹਾ ਪੱਧਰੀ ਸਮਾਗਮ ਵਿੱਚ ਬਤੌਰ ਮੁੱਖ ਮਹਿਮਾਨ ਪੁੱਜੇ ਸਿਹਤ ਤੇ ਪਰਿਵਾਰ ਭਲਾਈ ਮੰਤਰੀ ਬਲਵੀਰ ਸਿੰਘ ਦਾ “ਅਸ਼ੀਰਵਾਦ” ਪ੍ਰਾਪਤ ਕਰਨ ਗਏ ਸਨ ਜਿੱਥੇ ਹਲਕਾ ਵਿਧਾਇਕ ਪਹਿਲਾਂ ਹੀ ਹਾਜ਼ਰ ਸੀ । ਜ਼ਿਕਰਯੋਗ ਹੈ ਕਿ ਗਣਤੰਤਰਤਾ ਦਿਵਸ ਅਤੇ ਸੁਤੰਤਰਤਾ ਦਿਵਸ ਦੇ ਸਮਾਗਮ ਮੁੱਖ ਮਹਿਮਾਨ ਦੀ ਆਮਦ ਨਾਲ ਸ਼ੁਰੂ ਹੁੰਦੇ ਹਨ ਅਤੇ ਅਖੀਰ ਵਿੱਚ “ਰਾਸ਼ਟਰੀ ਗੀਤ” ਦੇ ਗਾਇਨ ਕਰਨ ਤੋਂ ਬਾਦ ਸਮਾਗਮ ਦੀ ਪੂਰੇ ਤਰੀਕੇ ਨਾਲ ਸਮਾਪਤੀ ਕੀਤੀ ਜਾਂਦੀ ਹੈ। ਇਸ ਦੌਰਾਨ ਕੋਈ ਆਮ ਵਿਅਕਤੀ ਸਮਾਗਮ ਨੂੰ ਵਿਚਾਲੇ ਛੱਡ ਕੇ ਚਲਾ ਜਾਵੇ ਤਾਂ ਵੱਖਰੀ ਗੱਲ ਹੈ ਪ੍ਰੰਤੂ ਕਿਸੇ ਜ਼ਿੰਮੇਵਾਰ ਵਿਅਕਤੀ ਦਾ ਸਮਾਗਮ ਨੂੰ ਵਿਚਾਲੇ ਛੱਡ ਕੇ ਚਲੇ ਜਾਣਾ ਹੈਰਾਨੀਜਨਕ ਹੈ।
