ਬਰਨਾਲਾ,23 ਨਵੰਬਰ-ਸਿਹਤ ਵਿਭਾਗ ਵਿੱਚ ਜਦੋਂ ਕੋਈ ਡਾਕਟਰ ਸਰਕਾਰੀ ਪੱਧਰ ‘ਤੇ ਐਮਡੀ ਕਰਨ ਲਈ ਜਾਂਦਾ ਹੈ ਤਾਂ ਉਸਨੂੰ ਵਿਭਾਗ ਨਾਲ ਇੱਕ ਬਾਂਡ ਸ਼ਰਤ ਵਜੋਂ ਭਰਨਾ ਪੈਂਦਾ ਹੈ ਕਿ ਜਾਂ ਤਾਂ ਉਹ ਸਿਹਤ ਵਿਭਾਗ ਵਿੱਚ 10 ਸਾਲ ਦੀ ਨੌਕਰੀ ਕਰੇਗਾ ਜਾਂ ਫਿਰ 50 ਲੱਖ ਰੁਪਏ ਵਿਭਾਗ ਨੂੰ ਦੇਵੇਗਾ। ਸਿਵਲ ਹਸਪਤਾਲ ਬਰਨਾਲਾ ਵਿਖੇ ਨੌਕਰੀ ਕਰਨ ਵਾਲੇ ਇੱਕ ਡਾਕਟਰ ਨੇ ਜਦ ਐਮਡੀ ਕਰਨ ਸਬੰਧੀ ਉਕਤ ਸ਼ਰਤ ਦੀ ਉਲੰਘਣਾ ਕੀਤੀ ਤਾਂ ਵਿਭਾਗ ਨੇ ਡਾਕਟਰ ਦੇ ਖ਼ਿਲਾਫ਼ ਸ਼ਿਕੰਜਾ ਕਸ ਦਿੱਤਾ। ਇਸ ਸਬੰਧੀ ਵਧੇਰੇ ਜਾਣਕਾਰੀ ਦਿੰਦੇ ਹੋਏ ਸਿਵਲ ਸਰਜਨ ਡਾਕਟਰ ਜਸਬੀਰ ਸਿੰਘ ਔਲਖ ਨੇ ਦੱਸਿਆ ਕਿ ਜੁਲਾਈ 2020 ‘ਚ ਇੱਕ ਡਾਕਟਰ ਨੇ ਸਿਵਲ ਹਸਪਤਾਲ ਬਰਨਾਲਾ ਵਿਖੇ ਬਤੌਰ ਰੇਡੀਓਲੋਜਿਸਟ ਜੁਆਇਨ ਕੀਤਾ ਸੀ ਜਿਸ ਨੇ ਆਪਣੀ ਐਮਡੀ ਸਰਕਾਰੀ ਕੋਟੇ ਤਹਿਤ ਕੀਤੀ ਸੀ ਅਤੇ ਸਰਕਾਰ ਨੂੰ ਬਾਂਡ ਭਰਕੇ ਦਿੱਤਾ ਸੀ ਕਿ ਉਹ ਜਾਂ ਤਾਂ ਸਿਹਤ ਵਿਭਾਗ ਵਿੱਚ 10 ਸਾਲ ਦੀ ਨੌਕਰੀ ਪੂਰੀ ਕਰੇਗਾ ਜਾਂ 10 ਸਾਲ ਤੋਂ ਪਹਿਲਾਂ ਨੌਕਰੀ ਛੱਡਣ ਦੀ ਸੂਰਤ ਵਿੱਚ 50 ਲੱਖ ਦੀ ਰਾਸ਼ੀ ਭਰੇਗਾ ਪ੍ਰੰਤੂ ਉਕਤ ਡਾਕਟਰ ਜੁਲਾਈ 2021 ਤੋਂ ਬਾਅਦ ਬਿਨਾਂ ਕਿਸੇ ਕਾਰਨ ਦੱਸੇ ਗ਼ੈਰਹਾਜ਼ਰ ਹੋ ਗਿਆ। ਡਾਕਟਰ ਔਲਖ ਨੇ ਦੱਸਿਆ ਕਿ ਉਹਨਾਂ ਨੂੰ ਇਸ ਮਾਮਲੇ ਵਿੱਚ ਗੁਪਤ ਸੂਚਨਾ ਮਿਲੀ ਕਿ ਜੋ ਡਾਕਟਰ ਗੈਰਹਾਜ਼ਰ ਚੱਲ ਰਿਹਾ ਹੈ ਉਹ ਹਰਿਆਣੇ ਦੇ ਕਿਸੇ ਸਕੈਨ ਸੈਂਟਰ ਵਿੱਚ ਨੌਕਰੀ ਕਰ ਰਿਹਾ ਹੈ। ਸਿਵਲ ਸਰਜਨ ਡਾਕਟਰ ਔਲਖ ਨੇ ਗੁਪਤ ਸੂਚਨਾ ਦੇ ਅਧਾਰ ‘ਤੇ ਹਰਿਆਣੇ ਦੇ ਸੰਬੰਧਿਤ ਸਕੈਨ ਸੈਂਟਰ ਵਿੱਚ ਪੜ੍ਹਤਾਲ ਕੀਤੀ ਤਾਂ ਉਕਤ ਡਾਕਟਰ ਦੇ ਸਕੈਨ ਸੈਂਟਰ ਵਿੱਚ ਨੌਕਰੀ ਦੀ ਗੱਲ ਸਹੀ ਸਾਬਤ ਹੋਈ ਜਿਸ ਤੋਂ ਬਾਅਦ ਸਬੰਧਿਤ ਡਾਕਟਰ ਦੀ ਵੀਡੀਓਗ੍ਰਾਫੀ ਅਤੇ ਤਸਵੀਰਾਂ ਵੀ ਸਬੂਤ ਵਿੱਚੋਂ ਖਿੱਚੀਆਂ ਗਈਆਂ ਅਤੇ ਡਾਕਟਰ ਦੀ ਸਕੈਨ ਸੈਂਟਰ ਵਿੱਚ ਦਸਤਖ਼ਤ ਕੀਤੀ ਰਿਪੋਰਟ ਵੀ ਸਬੂਤ ਵਜੋਂ ਇਕੱਤਰ ਕੀਤੀ ਗਈ। ਹਰਿਆਣਾ ਵਿਖੇ ਸਕੈਨ ਸੈਂਟਰ ਵਿੱਚ ਨੌਕਰੀ ਦੇ ਸਾਰੇ ਸਬੂਤ ਇਕੱਠੇ ਕਰਨ ਤੋਂ ਬਾਅਦ ਸਿਵਲ ਸਰਜਨ ਵੱਲੋਂ ਉਕਤ ਡਾਕਟਰ ਨੂੰ ਦੁਬਾਰਾ ਨੌਕਰੀ ਜੁਆਇਨ ਕਰਨ ਲਈ ਕਿਹਾ ਗਿਆ ਪ੍ਰੰਤੂ ਡਾਕਟਰ ਵੱਲੋਂ ਮੁੜ ਜੁਆਇਨ ਕਰਨ ਦੀ ਬਜਾਏ ਤਿੰਨ ਮਹੀਨਿਆਂ ਦੀ ਤਨਖ਼ਾਹ ਸਮੇਤ ਅਸਤੀਫ਼ਾ ਵਿਭਾਗ ਨੂੰ ਭੇਜ ਦਿੱਤਾ ਜੋ ਕਿ ਵਿਭਾਗ ਵੱਲੋਂ ਨਾਮਨਜ਼ੂਰ ਕਰ ਦਿੱਤਾ ਗਿਆ। ਇਸ ਤੋਂ ਬਾਅਦ ਉਕਤ ਡਾਕਟਰ ਨੇ ਹਾਈਕੋਰਟ ਤੱਕ ਵੀ ਪਹੁੰਚ ਕੀਤੀ ਪ੍ਰੰਤੂ ਉਥੋਂ ਵੀ ਉਸ ਨੂੰ ਕੋਈ ਰਾਹਤ ਨਾ ਮਿਲੀ। ਇਸੇ ਦੌਰਾਨ ਸਿਹਤ ਤੇ ਪਰਿਵਾਰ ਭਲਾਈ ਵਿਭਾਗ ਨੇ ਉਕਤ ਡਾਕਟਰ ਦੇ ਖ਼ਿਲਾਫ਼ ਇੱਕ ਰੈਗੂਲਰ ਪੜ੍ਹਤਾਲ ਵੀ ਸ਼ੁਰੂ ਕਰ ਦਿੱਤੀ ਅਤੇ ਬਰਨਾਲਾ ਦੀ ਜ਼ੁਡੀਸ਼ੀਅਲ ਕੋਰਟ ਵਿੱਚ ਰਿਕਵਰੀ ਵਾਸਤੇ ਸਿਹਤ ਵਿਭਾਗ ਵੱਲੋਂ ਡਾਕਟਰ ਦੇ ਖ਼ਿਲਾਫ਼ ਕੇਸ ਵੀ ਦਾਇਰ ਕੀਤਾ ਗਿਆ। ਸਿਹਤ ਵਿਭਾਗ ਵੱਲੋਂ ਸਿਕੰਜਾ ਕਸਣ ਤੋਂ ਬਾਅਦ ਉਕਤ ਡਾਕਟਰ ਨੇ ਆਖ਼ਰ ਬੀਤੇ ਦਿਨ ਬਾਂਡ ਦੀ ਰਕਮ 50 ਲੱਖ ਵਿੱਚੋਂ 25 ਲੱਖ ਚਲਾਨ ਰਾਸ਼ੀ ਸੀਨੀਅਰ ਮੈਡੀਕਲ ਅਫਸਰ ਸਿਵਲ ਹਸਪਤਾਲ ਬਰਨਾਲਾ ਦੇ ਖ਼ਾਤੇ ਵਿੱਚ ਜਮਾਂ ਕਰਵਾ ਦਿੱਤੀ ਅਤੇ ਬਾਕੀ ਦੇ 25 ਲੱਖ ਫਰਵਰੀ 2024 ਤੱਕ ਜਮਾਂ ਕਰਵਾਉਣ ਦੀ ਹਾਮੀ ਭਰੀ।
ਫੋਟੋ ਕੈਪਸ਼ਨ-ਜਾਣਕਾਰੀ ਦਿੰਦੇ ਹੋਏ ਸਿਵਲ ਸਰਜਨ ਡਾ. ਜਸਬੀਰ ਸਿੰਘ ਔਲਖ
