ਬਿਮਾਰੀ ਦੇ ਬਹਾਨੇ ਹਸਪਤਾਲ ਗਿਆ ਜੇਲ੍ਹ ‘ਚ ਬੰਦ ਕਾਂਗਰਸੀ ਆਗੂ ਪਰ ਵਿਆਹ ‘ਚ ਪਾਇਆ ਜੰਮ ਕੇ ਭੰਗੜਾ..ਵੀਡੀਓ ਹੋ ਗਈ ਵਾਇਰਲ

ਲੁਧਿਆਣਾ,12 ਦਸੰਬਰ-ਆਪਣੀ ਬਿਮਾਰੀ ਦਾ ਚੈੱਕਅੱਪ ਕਰਵਾਉਣ ਲਈ ਪੀਜੀਆਈ ਜਾਣ ਦੇ ਬਹਾਨੇ ਜੇਲ੍ਹ ਵਿੱਚ ਬੰਦ ਇੱਕ ਕਾਂਗਰਸੀ ਆਗੂ ਦੀ ਵਿਆਹ ‘ਚ ਭੰਗੜਾ ਪਾਉਂਦੇ ਦੀ ਵਾਇਰਲ ਵੀਡੀਓ ਨੇ ਜੇਲ ਪ੍ਰਸ਼ਾਸਨ ‘ਤੇ ਇੱਕ ਵਾਰ ਫਿਰ ਸਵਾਲ ਖੜੇ ਕਰ ਦਿੱਤੇ ਹਨ। ਸਥਾਨਕ ਜੇਲ੍ਹ ਵਿੱਚ ਬੰਦ ਕਾਂਗਰਸੀ ਆਗੂ ਲੱਕੀ ਸੰਧੂ ਦੀ ਵਿਆਹ ਵਿੱਚ ਨੱਚਦੇ ਦੀ ਵੀਡੀਓ ਵਾਇਰਲ ਹੋਈ ਹੈ । ਲੱਕੀ ਸੰਧੂ ਕਈ ਸੰਗੀਨ ਮਾਮਲਿਆਂ ‘ਚ ਜੇਲ੍ਹ ‘ਚ ਬੰਦ ਹੈ। ਲੱਕੀ ਸੰਧੂ ਜੇਲ੍ਹ ਤੋਂ ਬਿਮਾਰੀ ਦਾ ਚੈੱਕਅਪ ਕਰਵਾਉਣ ਲਈ ਪੀਜੀਆਈ ਗਿਆ ਸੀ ਪਰ ਬਾਅਦ ‘ਚ ਉਹ ਵਿਆਹ ‘ਤੇ ਚਲਿਆ ਗਿਆ ਜਿਥੇ ਉਸ ਦੀ ਇਹ ਵੀਡੀਓ ਬਣ ਗਈ। ਹੁਣ ਤੱਕ ਜੋ ਜਾਣਕਾਰੀ ਸਾਹਮਣੇ ਆਈ ਹੈ ਕਿ ਜੇਲ੍ਹ ਪ੍ਰਸ਼ਾਸਨ ਨੇ ਪੀਜੀਆਈ ਤੋਂ ਚੈੱਕਅਪ ਕਰਵਾਉਣ ਲਈ ਲੱਕੀ ਸੰਧੂ ਨੂੰ ਜ਼ਿਲ੍ਹਾ ਪੁਲਿਸ ਹਵਾਲੇ ਕੀਤਾ ਸੀ, ਪ੍ਰੰਤੂ ਉਸ ਨੇ ਪੁਲਿਸ ਨਾਲ ਮਿਲੀਭੁਗਤ ਕੀਤੀ ਤੇ ਰਾਏਕੋਟ ਦੇ ਇੱਕ ਵਿਆਹ ਸਮਾਗਮ ‘ਚ ਪੁੱਜ ਗਿਆ। ਇਸ ਵਿਆਹ ਸਮਾਗਮ ‘ਚ ਉਹ ਕਾਫੀ ਸਮਾਂ ਹਾਜ਼ਰ ਰਿਹਾ ਅਤੇ ਉਸਨੇ ਜੰਮ ਕੇ ਭੰਗੜਾ ਵੀ ਪਾਇਆ। ਉਸ ਨਾਲ ਉਸ ਦਾ ਭਰਾ ਵੀ ਵਿਆਹ ‘ਚ ਮੌਜੂਦ ਰਿਹਾ। ਇਸ ਵੀਡੀਓ ਦੇ ਸਾਹਮਣੇ ਆਉਣ ਤੋਂ ਬਾਅਦ ਮਾਮਲੇ ‘ਚ ਗੁਰਵੀਰ ਸਿੰਘ ਗਰਚਾ ਨਾਮ ਦੇ ਵਿਅਕਤੀ ਨੇ ਸਾਰੇ ਸਬੂਤਾਂ ਨਾਲ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ, ਪੰਜਾਬ ਡੀਜੀਪੀ ਗੌਰਵ ਯਾਦਵ, ਜੇਲ੍ਹ ਪ੍ਰਸ਼ਾਸਨ ਅਤੇ ਕਮਿਸ਼ਨਰੇਟ ਪੁਲਿਸ ਨੂੰ ਇਸ ਦੀ ਸ਼ਿਕਾਇਤ ਕੀਤੀ ਹੈ। ਜੇਲ ਪ੍ਰਸ਼ਾਸਨ ਨੇ ਇਸ ਮਾਮਲੇ ਚ ਪੱਲ੍ਹਾ ਝਾੜਦੇ ਹੋਏ ਜ਼ਿਲ੍ਹਾ ਕਮਿਸ਼ਨਰੇਟ ਪੁਲਿਸ ਨੂੰ ਜ਼ਿੰਮੇਵਾਰ ਠਹਿਰਾਇਆ ਹੈ।