ਸੱਜਣਾਂ ਨੇ ਫੁੱਲ ਮਾਰਿਆ ……..!
***ਸ਼੍ਰੋਮਣੀ ਅਕਾਲੀ ਦਲ ਦੇ ਹਲਕਾ ਇੰਚਾਰਜ ਕੁਲਵੰਤ ਸਿੰਘ ਕੀਤੂ ਵੱਲੋਂ ਜਦੋਂ ਬਰਨਾਲਾ ਹਲਕੇ ਤੋਂ ਜ਼ਿਮਨੀ ਚੋਣ ਆਜ਼ਾਦ ਲੜਨ ਦੀਆਂ ਖ਼ਬਰਾਂ ਆਈਆਂ ਤਾਂ ਚੋਣ ਮੈਦਾਨ ਵਿੱਚ ਨਿਤਰੇ ਬਾਕੀ ਮੁੱਖ ਉਮੀਦਵਾਰਾਂ ਦੇ ਚਿਹਰੇ ਗੁਲਾਬ ਦੇ ਫੁੱਲ ਵਾਂਗੂੰ ਖਿੜ ਗਏ ਪਰ ਜਦੋਂ ਕੁਲਵੰਤ ਸਿੰਘ ਕੀਤੂ ਦੇ ਆਜ਼ਾਦ ਚੋਣ ਨਾ ਲੜਨ ਦਾ ਫੈਸਲਾ ਸਾਹਮਣੇ ਆਇਆ ਤਾਂ ਮੁੱਖ ਉਮੀਦਵਾਰਾਂ ਦੇ ਚਿਹਰੇ ਇਉਂ ਹੋ ਗਏ ਜਿਵੇਂ ਆਥਣੇ ਜਹੇ ਸੂਰਜਮੁਖੀ ਦਾ ਫੁੱਲ ਹੋ ਜਾਂਦਾ ਹੈ। ਦਰਅਸਲ ਬਰਨਾਲਾ ਦੀ ਜ਼ਿਮਨੀ ਚੋਣ ਕਈ ਪੱਖਾਂ ਤੋਂ ਦਿਲਚਸਪ ਬਣੀ ਹੋਈ ਹੈ। ਸੱਤਾਧਾਰੀ ਪਾਰਟੀ ਦੇ ਇੱਕ ਤਕੜੇ ਆਗੂ ਜ਼ਿਲ੍ਹਾ ਪ੍ਰਧਾਨ ਵੱਲੋਂ ਬਗਾਵਤ ਕਰਕੇ ਆਜ਼ਾਦ ਉਮੀਦਵਾਰ ਦੇ ਤੌਰ ‘ਤੇ ਮੈਦਾਨ ਵਿੱਚ ਨਿਤਰ ਜਾਣ ਕਰਕੇ ਆਪ ਉਮੀਦਵਾਰ ਦੀ ਚੋਣ ਮੁਹਿੰਮ ਵਿੱਚ ਮੀਤ ਹੇਅਰ ਦੀ ਚੋਣ ਮੁਹਿੰਮ ਵਾਲਾ ਰੰਗ ਵੇਖਣ ਨੂੰ ਨਹੀਂ ਮਿਲ ਰਿਹਾ। ਚੋਣ ਪ੍ਰਚਾਰ ਦੌਰਾਨ ਸੱਤਾਧਾਰੀ ਪਾਰਟੀ ਨੂੰ ਅਕਸਰ ਵਿਰੋਧੀ ਪਾਰਟੀਆਂ ਪਾਣੀ ਪੀ-ਪੀ ਕੋਸਦੀਆਂ ਹਨ ਪ੍ਰੰਤੂ ਬਾਗੀ ਉਮੀਦਵਾਰ ਗੁਰਦੀਪ ਸਿੰਘ ਬਾਠ ਨੇ ਵਿਰੋਧੀ ਪਾਰਟੀਆਂ ਦੇ ਉਮੀਦਵਾਰਾਂ ਦਾ ਕੰਮ ਸੌਖਾ ਕਰ ਦਿੱਤਾ ਹੈ। ਅਜੇ ਤੱਕ ਵੇਖਣ ਵਿੱਚ ਆ ਰਿਹਾ ਹੈ ਕਿ ਆਪ ਵਿਰੋਧੀ ਪਾਰਟੀਆਂ ਦੇ ਉਮੀਦਵਾਰਾਂ ਨਾਲੋਂ ਆਪ ਦਾ ਬਾਗੀ ਉਮੀਦਵਾਰ ਗੁਰਦੀਪ ਸਿੰਘ ਬਾਠ ਵਧੇਰੇ ਤਿੱਖੇ ਨਿਸ਼ਾਨੇ ਲਾ ਰਿਹਾ ਹੈ। ਘਰ ਦਾ ਭੇਤੀ ਹੋਣ ਕਰਕੇ ਗੁਰਦੀਪ ਸਿੰਘ ਬਾਠ ਵੱਲੋਂ ਛੱਡੇ ਜਾ ਰਹੇ ਸ਼ਬਦਾਂ ਦੇ ਗੋਲੇ ਆਪ ਦੀ ਲੰਕਾ ਦੀਆਂ ਕੰਧਾਂ ਵਿੱਚ ਅਜਿਹੇ ਵੱਡੇ ਮਘੋਰੇ ਕਰ ਰਹੇ ਹਨ ਕਿ ਕੰਧ ਦੇ ਅੰਦਰਲੇ ਪਾਸੇ ਬਹੁਤ ਕੁਝ ਦਿਖਾਈ ਦੇਣ ਲੱਗ ਪਿਆ ਹੈ। ਗੁਰਦੀਪ ਸਿੰਘ ਬਾਠ ਵੱਲੋਂ ਛੱਡੇ ਸ਼ਬਦਾਂ ਦੇ ਗੋਲਿਆਂ ਨਾਲ ਆਪ ਦੀ ਲੰਕਾ ਦੀਆਂ ਕੰਧਾਂ ਦੇ ਮਘੋਰਿਆਂ ਵਿੱਚੋਂ ਦੇਖਦੇ ਹੋਏ ਕੇਵਲ ਸਿੰਘ ਢਿੱਲੋ, ਕਾਲਾ ਢਿੱਲੋ ਅਤੇ ਗੋਬਿੰਦ ਸਿੰਘ ਸੰਧੂ ਸੱਤਾਧਾਰੀ ਪਾਰਟੀ ਦੇ ਵਿਹੜੇ ਵਿੱਚ ਉਹ ਦ੍ਰਿਸ਼ ਦੇਖ ਰਹੇ ਹਨ ਜਿਨਾਂ ਬਾਰੇ ਸ਼ਾਇਦ ਪਹਿਲਾਂ ਉਹਨਾਂ ਨੂੰ ਜਾਣਕਾਰੀ ਨਹੀਂ ਸੀ ਤੇ ਇਹਨਾਂ ਦ੍ਰਿਸ਼ਾਂ ਨੂੰ ਫਿਲਮੀ ਢੰਗ ਤਰੀਕੇ ਨਾਲ ਉਕਤ ਆਗੂਆਂ ਵੱਲੋਂ ਚੋਣ ਸੱਥਾਂ ਵਿੱਚ ਗੁਰਸ਼ਰਨ ਸਿੰਘ ਭਾਅ ਜੀ ਦੇ ਡਰਾਮੇ ਵਾਂਗ ਪੇਸ਼ ਕੀਤਾ ਜਾ ਰਿਹਾ ਹੈ। ਹੁਣ ਤੱਕ ਦੇ ਹਾਲਾਤ ਕੁਝ ਇਹੋ ਜਿਹੇ ਬਣੇ ਹੋਏ ਹਨ ਕਿ ਸੱਤਾਧਾਰੀ ਪਾਰਟੀ ਬਚਾਅ ਦੀ ਸਥਿਤੀ ਵਿੱਚ ਨਜ਼ਰ ਆ ਰਹੀ ਹੈ। ਗੁਰਦੀਪ ਸਿੰਘ ਬਾਠ ਦੇ ਸਿਆਸੀ ਹਮਲਿਆਂ ਤੋਂ ਬਾਅਦ ਸੱਤਾ ਵਾਲੇ ਪਾਸੇ ਮੁਹੰਮਦ ਸਦੀਕ ਦੇ ਗੀਤ “ਸੱਜਣਾਂ ਵੱਲੋਂ ਮਾਰੇ ਫੁੱਲਾਂ ਦੀ ਪੀੜ… ਵਰਗੇ ਬਣੇ ਹੋਏ ਹਨ। ਬਰਨਾਲਾ ਹਲਕੇ ‘ਚ ਆਮ ਆਦਮੀ ਪਾਰਟੀ ਲਈ ਇੱਕ ਵੱਡੀ ਕਮੀ ਇਹ ਵੀ ਰੜਕ ਰਹੀ ਹੈ ਕਿ ਪਾਰਟੀ ਦਾ ਕਮਾਂਡਰ ਮੀਤ ਹੇਅਰ ਬਿਮਾਰੀ ਦੇ ਕਾਰਨ ਚੋਣ ਮੈਦਾਨ ਵਿੱਚੋਂ ਕੁਝ ਸਮੇਂ ਲਈ ਬਾਹਰ ਹੈ। ਅਸਲ ਵਿੱਚ ਜਦੋਂ ਕਮਾਂਡਰ ਖੁਦ ਚੋਣ ਮੈਦਾਨ ਵਿੱਚ ਹੋਵੇਗਾ ਤਾਂ ਸਥਿਤੀ ਹੋਰ ਵੀ ਵਧੇਰੇ ਦਿਲਚਸਪ ਹੋਵੇਗੀ। ਵੇਖਣਯੋਗ ਹੋਵੇਗਾ ਕਿ ਮੀਤ ਹੇਅਰ ਆਪਣੇ ਹੀ ਜ਼ਿਲ੍ਹਾ ਕਮਾਂਡਰ ਦੇ ਛੱਡੇ ਸ਼ਬਦਾਂ ਦੇ ਗੋਲਿਆਂ ਨਾਲ ਆਪਣੀ ਸਿਆਸੀ ਲੰਕਾ ਦੀਆਂ ਕੰਧਾਂ ‘ਚ ਹੋਏ ਮਘੋਰਿਆਂ ਨੂੰ ਭਰਨ ਦਾ ਸਿਆਸੀ ਯਤਨ ਕਰਨਗੇ ਜਾਂ ਫਿਰ ਇਹ ਜਵਾਬੀ ਤੀਰ ਛੱਡਣਗੇ। ਬਰਨਾਲਾ ਜ਼ਿਮਨੀ ਚੋਣ ਦਾ ਇੱਕ ਦਿਲਚਸਪ ਪੱਖ ਹੋਰ ਵੀ ਹੈ ਕਿ ਇਸ ਵਾਰ ਸ਼੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ ਵੱਲੋਂ “ਨਾਨਾ ਜੀ” ਆਪਣੇ ਦੋਹਤੇ ਨੂੰ ਚੋਣ ਮੇਲਾ ਵਿਖਾਉਣ ਲਈ ਉਂਗਲੀ ਫੜਾ ਕੇ ਲੈ ਕੇ ਆਏ ਹਨ। ਇਹ ਵੀ ਵੇਖਣਯੋਗ ਹੋਵੇਗਾ ਕਿ “ਦੋਹਤਾ ਆਪਣੇ ਨਾਨੇ” ਦੀ ਸਾਰੀ ਉਮਰ ਦੀ ਸਿਆਸੀ ਕਮਾਈ ‘ਤੇ ਚੋਣ ਮੇਲੇ ਦੇ ਕਿੰਨੇ ਕੁ ਨਜ਼ਾਰੇ ਲਵੇਗਾ। ਬਰਨਾਲਾ ਜ਼ਿਮਨੀ ਚੋਣ ਵਿੱਚ “ਵੱਡਾ ਅਤੇ ਛੋਟਾ ਢਿੱਲੋਂ”ਆਪਣੀ ਚੋਣ ਮੁਹਿੰਮ ਨੂੰ ਰਾਵਾਨਗੀ ਦੇਣ ਵਿੱਚ ਹੁਣ ਤੱਕ ਕਾਮਯਾਬ ਰਹੇ ਹਨ ਅਤੇ ਇਹ ਦਿਵਾਲੀ ਤੋਂ ਬਾਅਦ ਸਪੱਸ਼ਟ ਹੋ ਜਾਵੇਗਾ ਕਿ ਕਿਹੜੇ ਢਿੱਲੋਂ ਦੀ ਰਫਤਾਰ ਦੂਜੇ ਨਾਲੋਂ ਤੇਜ਼ ਹੋਈ ਹੈ। ਬਹਰਹਾਲ ! ਬਰਨਾਲਾ ਜ਼ਿਮਨੀ ਚੋਣ ਦੇ ਚੋਣ ਮੈਦਾਨ ਵਿੱਚ ਸਿਆਸੀ ਸ਼ੌਂਕਣਾਂ ਦੋਹੇ, ਸਿੱਠਣੀਆਂ, ਗੀਤ ਅਤੇ ਲੌਲੀਪੋਪ ਲੈ ਕੇ ਗਲੀ, ਮੁਹੱਲਿਆਂ,ਚੋਣ ਸੱਥਾਂ ਵਿੱਚ ਨਿਤਰ ਆਈਆਂ ਹਨ… ਵੋਟਰਾਂ ਨੂੰ ਨਿਮਰਤਾ ਸਹਿਤ ਅਪੀਲ ਹੈ ਕਿ ਇਹਨਾਂ ਦੋਹੇ, ਸਿੱਠਣੀਆਂ, ਸਿਆਸੀ ਗੀਤਾਂ ਦੇ ਨਜ਼ਾਰੇ ਲਵੋ…ਲੋਲੀਪੌਪਾਂ ਦਾ ਆਨੰਦ ਮਾਣੋ…ਦੇਖਿਓ ਕਿਤੇ… ਪੰਜਾਬ, ਪੰਜਾਬੀ ਅਤੇ ਪੰਜਾਬੀਅਤ ਦੇ ਅਸਲ ਮੁੱਦਿਆਂ ਤੇ ਆਪਣੇ ਬੁਨਿਆਦੀ ਹੱਕਾਂ ਦੀ ਗੱਲ ਕਰਕੇ ਨਜ਼ਾਰਾ ਖ਼ਰਾਬ ਨਾ ਕਰ ਦਿਓ…!
-- ਨਿਰਮਲ ਸਿੰਘ ਪੰਡੋਰੀ, ਪੱਤਰਕਾਰ।
