ਚੰਡੀਗੜ੍ਹ, 21 ਦਸੰਬਰ, Gee98 News service
-ਪੰਜਾਬ ਦੇ ਸਰਕਾਰੀ ਹਸਪਤਾਲਾਂ ਦੇ ਡਾਕਟਰਾਂ ਦੀਆਂ ਮਨਮਾਨੀਆਂ ਸਬੰਧੀ ਖ਼ਬਰਾਂ ਅਕਸਰ ਪ੍ਰਸਾਰਿਤ ਹੁੰਦੀਆਂ ਰਹਿੰਦੀਆਂ ਹਨ ਪ੍ਰੰਤੂ ਸਰਕਾਰ ਨੇ ਇਹਨਾਂ ਖ਼ਬਰਾਂ ਸਬੰਧੀ ਆਪਣੀਆਂ ਅੱਖਾਂ ‘ਤੇ ਪੱਟੀ ਬੰਨੀ ਹੋਈ ਹੈ ਤੇ ਇਹ ਡਾਕਟਰ ਆਪਣੀ ਮਨਮਰਜ਼ੀ ਕਰਦੇ ਹੋਏ ਗਰੀਬ ਪਰਿਵਾਰ ਦੇ ਮਰੀਜ਼ਾਂ ਨੂੰ ਵੀ ਲੁੱਟੇ ਜਾਣ ਲਈ ਨਿੱਜੀ ਹਸਪਤਾਲਾਂ ਦੇ ਹਵਾਲੇ ਕਰ ਦਿੰਦੇ ਹਨ। ਅਜਿਹੀ ਇੱਕ ਵੀਡੀਓ ਅੱਜਕੱਲ੍ਹ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਰਹੀ ਹੈ, ਇਹ ਵੀਡੀਓ ਸਿਵਲ ਹਸਪਤਾਲ ਜਗਰਾਉਂ ਦੀ ਦੱਸੀ ਜਾ ਰਹੀ ਹੈ। ਵੀਡੀਓ ਵਿੱਚ ਇੱਕ ਪੱਤਰਕਾਰ ਇੱਕ ਮਹਿਲਾ ਡਾਕਟਰ ਨੂੰ ਲੇਟ ਆਉਣ ਸਬੰਧੀ ਸਵਾਲ ਕਰ ਰਿਹਾ ਤਾਂ ਮਹਿਲਾ ਡਾਕਟਰ ਉਲਟਾ ਪੱਤਰਕਾਰ ‘ਤੇ ਭੜਕ ਗਈ। ਜਗਰਾਉਂ ਦੇ ਸਿਵਲ ਹਸਪਤਾਲ ਵਿੱਚ ਡਾਕਟਰਾਂ ਦੀ ਲੇਟਲਤੀਫੀ ਦੀਆਂ ਖ਼ਬਰਾਂ ਅਤੇ ਸ਼ਿਕਾਇਤਾਂ ਇਸ ਤੋਂ ਪਹਿਲਾਂ ਵੀ ਉੱਚ ਅਧਿਕਾਰੀਆਂ ਕੋਲ ਪੁੱਜਦੀਆਂ ਰਹੀਆਂ ਹਨ ਪ੍ਰੰਤੂ ਕਿਸੇ ‘ਤੇ ਕੋਈ ਕਾਰਵਾਈ ਨਹੀਂ ਹੋ ਰਹੀ। ਆਪਣੀ ਡਿਊਟੀ ‘ਤੇ ਲੇਟ ਪੁੱਜੀ ਡਾਕਟਰ ਮਨੀਸ਼ਾ ਮੈਨੀ ਨੂੰ ਜਦ ਪੱਤਰਕਾਰ ਨੇ ਸਵਾਲ ਕੀਤੇ ਤਾਂ ਉਹਨਾਂ ਨੇ ਪੱਤਰਕਾਰ ਨਾਲ ਹੀ ਬੁਰਾ ਵਿਵਹਾਰ ਕੀਤਾ। ਵੀਡੀਓ ਵਾਇਰਲ ਹੋਣ ਤੋਂ ਬਾਅਦ ਇਹ ਮਾਮਲਾ ਐਸਐਮਓ ਹਰਜੀਤ ਸਿੰਘ ਕੋਲ ਪੁੱਜਾ ਤਾਂ ਉਹਨਾਂ ਕਿਹਾ ਕਿ ਡਾਕਟਰਾਂ ਨੂੰ ਪਹਿਲਾਂ ਵੀ ਲੇਟ ਆਉਣ ਸਬੰਧੀ ਚੇਤਾਵਨੀ ਦਿੱਤੀ ਗਈ ਪਰੰਤੂ ਡਾਕਟਰ ਬਹੁਤ ਢੀਠ ਹਨ ਤੇ ਉਹਨਾਂ ਦੀ ਗੱਲ ਨਹੀਂ ਮੰਨ ਰਹੇ। ਇਹ ਮਾਮਲਾ ਜਦ ਸਿਵਿਲ ਸਰਜਨ ਪ੍ਰਦੀਪ ਮਹਿੰਦਰਾ ਦੇ ਧਿਆਨ ਵਿੱਚ ਲਿਆਂਦਾ ਤਾਂ ਉਹਨਾਂ ਨੇ ਵੀ ਮੰਨਿਆ ਕਿ ਡਾਕਟਰ ਅਕਸਰ ਲੇਟ ਆਉਂਦੇ ਹਨ। ਹੈਰਾਨੀ ਇਸ ਗੱਲ ਦੀ ਵੀ ਹੈ ਕਿ ਹਲਕਾ ਵਿਧਾਇਕ ਸਰਬਜੀਤ ਕੌਰ ਮਾਣੂੰਕੇ ਵੱਲੋਂ ਪਹਿਲਾਂ ਰੱਖੀ ਮੀਟਿੰਗ ਸਬੰਧੀ ਜਦ ਐਸਐਮਓ ਦੇ ਕਮਰੇ ‘ਚ ਪੁੱਜੇ ਤਾਂ ਉਹਨਾਂ ਸਾਰੇ ਡਾਕਟਰਾਂ ਨੂੰ ਬੁਲਾ ਕੇ ਸਮੇਂ ਸਿਰ ਆਉਣ ਬਾਰੇ ਕਿਹਾ ਤਾਂ ਮੌਕੇ ‘ਤੇ ਹਾਜ਼ਰ ਡਾਕਟਰ ਮਨੀਸ਼ਾ ਮੈਨੀ ਨੇ ਵਿਧਾਇਕ ਮਾਣੂੰਕੇ ਨੂੰ ਠੋਕਵਾਂ ਜਵਾਬ ਦੇ ਦਿੱਤਾ ਕਿ “ਉਹ ਸੱਜ ਧੱਜ ਕੇ 9 ਵਜੇ ਨਹੀਂ ਬੈਠ ਸਕਦੀ, ਉਹ ਤਾਂ ਇਸੇ ਤਰ੍ਹਾਂ ਹੀ ਆਵੇਗੀ”। ਡਾਕਟਰ ਮਨੀਸ਼ਾ ਮੈਨੀ ਨੇ ਜਦ ਵਿਧਾਇਕ ਮਾਣੂੰਕੇ ਨੂੰ ਇਹ ਠੋਕਵਾਂ ਜਵਾਬ ਦਿੱਤਾ ਤਾਂ ਉਸ ਵੇਲੇ ਐਸਐਮਓ ਦੇ ਕਮਰੇ ‘ਚ ਜਗਰਾਉਂ ਦੇ ਕੁਝ ਮੋਹਤਬਰ ਵਿਅਕਤੀ ਅਤੇ ਹੋਰ ਡਾਕਟਰ ਵੀ ਹਾਜ਼ਰ ਸਨ। ਡਾਕਟਰ ਮਨੀਸ਼ਾ ਮੈਣੀ ਦੇ ਜਵਾਬ ਤੋਂ ਬਾਅਦ ਵਿਧਾਇਕ ਸਰਬਜੀਤ ਕੌਰ ਮਾਣੂੰਕੇ ਦੇ ਚਿਹਰੇ ਦੇ ਬਦਲੇ ਰੰਗ ਸਾਫ ਵੇਖੇ ਜਾ ਸਕਦੇ ਸਨ ਜਿਸ ਤੋਂ ਲੱਗਦਾ ਸੀ ਕਿ ਉਹ ਇਸ ਮਾਮਲੇ ‘ਚ ਕੋਈ ਸਖ਼ਤ ਕਦਮ ਚੁੱਕਣਗੇ।
