ਚੰਡੀਗੜ੍ਹ, 28 ਜਨਵਰੀ, Gee98 News service
-ਕਿਸਾਨ ਯੂਨੀਅਨਾਂ ਦਾ ਗਠਨ ਖੇਤੀਬਾੜੀ ਦੇ ਲਾਹੇਵੰਦ ਧੰਦੇ ਨੂੰ ਬਚਾਉਣ ਲਈ ਅਤੇ ਖੇਤੀਬਾੜੀ ਨਾਲ ਸਬੰਧਿਤ ਸਮੱਸਿਆਵਾਂ ਨੂੰ ਸਰਕਾਰ ਨਾਲ ਗੱਲਬਾਤ ਕਰਕੇ ਜਾਂ ਦਬਾਅ ਪਾ ਕੇ ਹੱਲ ਕਰਵਾਉਣ ਦੇ ਮਕਸਦ ਨਾਲ ਹੋਇਆ ਸੀ ਪਰੰਤੂ ਪਿਛਲੇ ਕੁਝ ਸਮੇਂ ਤੋਂ ਵੇਖਿਆ ਜਾ ਰਿਹਾ ਹੈ ਕਿ ਕੁਝ ਕਿਸਾਨ ਯੂਨੀਅਨਾਂ ਦੇ ਕੁਝ ਆਗੂਆਂ ਵੱਲੋਂ ਲੋਕਾਂ ਦੇ ਨਿੱਜੀ ਮਸਲਿਆਂ ਵਿੱਚ ਕੁਝ ਇਸ ਤਰੀਕੇ ਨਾਲ ਦਖਲਅੰਦਾਜ਼ੀ ਕੀਤੀ ਜਾ ਰਹੀ ਹੈ ਕਿ ਕਾਨੂੰਨ ਨੂੰ ਵੀ ਆਪਣੇ ਹੱਥ ਵਿੱਚ ਲਿਆ ਜਾ ਰਿਹਾ ਹੈ। ਇਹ ਚਰਚਾ ਅਕਸਰ ਹੁੰਦੀ ਰਹਿੰਦੀ ਹੈ ਕਿ ਕਿਸਾਨ ਯੂਨੀਅਨਾਂ ਨੂੰ ਲੋਕਾਂ ਦੇ ਨਿੱਜੀ ਮਸਲਿਆਂ ਵਿੱਚ ਦਖ਼ਲਅੰਦਾਜ਼ੀ ਨਹੀਂ ਕਰਨੀ ਚਾਹੀਦੀ ਜਿਸ ਨਾਲ ਜਥੇਬੰਦੀ ਦਾ ਅਕਸ ਖਰਾਬ ਹੁੰਦਾ ਹੋਵੇ। ਅਜਿਹੀ ਇੱਕ ਘਟਨਾ ਜ਼ਿਲ੍ਹਾ ਤਰਨਤਰਨ ਦੇ ਪਿੰਡ ਰੂੜੀਵਾਲਾ ਵਿਖੇ ਵਾਪਰੀ ਜਿੱਥੇ ਇੱਕ ਭੂਆ ਤੇ ਦੋ ਭਤੀਜਿਆਂ ਦੇ ਵਿਚਕਾਰ ਚਾਰ ਏਕੜ ਜਮੀਨ ਦਾ ਰੌਲਾ ਚੱਲ ਰਿਹਾ ਸੀ। ਪਿੰਡ ਦੇ ਸਰਪੰਚ ਤੇ ਦੱਸਣ ਅਨੁਸਾਰ ਪਿੰਡ ਦੇ ਵਸਨੀਕ ਬਲਵੰਤ ਸਿੰਘ ਅਤੇ ਭਗਵੰਤ ਸਿੰਘ ਦੋ ਭਰਾਵਾਂ ਦਾ ਆਪਣੀ ਭੂਆ ਬਲਵੀਰ ਕੌਰ ਨਾਲ ਜ਼ਮੀਨ ਦਾ ਰੌਲਾ ਚੱਲ ਰਿਹਾ ਸੀ। ਪਰਿਵਾਰ ਕੋਲ ਕੁੱਲ 12 ਏਕੜ ਜ਼ਮੀਨ ਹੈ ਅਤੇ ਤਿੰਨਾਂ ਜਣਿਆਂ ਨੂੰ ਚਾਰ-ਚਾਰ ਏਕੜ ਜ਼ਮੀਨ ਆਉਂਦੀ ਹੈ। ਇਹ ਜ਼ਮੀਨ ਦੋ ਥਾਵਾਂ ‘ਤੇ ਹੈ, ਭੂਆ ਬਲਵੀਰ ਕੌਰ ਸ਼ੁਰੂ ਤੋਂ ਹੀ ਦੋ ਏਕੜ ਜ਼ਮੀਨ ਪਿੰਡ ਦੇ ਨੇੜੇ ਲੱਗਦੇ ਰਕਬੇ ਵਿੱਚੋਂ ਵਾਹੀ ਕਰ ਰਹੀ ਸੀ ਅਤੇ ਦੋ ਏਕੜ ਦੂਜੇ ਰਕਬੇ ਵਿੱਚੋਂ ਵਾਹੀ ਕਰ ਰਹੀ ਸੀ ਪ੍ਰੰਤੂ ਹੁਣ ਭੂਆ ਪਿੰਡ ਦੇ ਨੇੜੇ ਚਾਰ ਏਕੜ ਸਾਰੀ ਜ਼ਮੀਨ ‘ਤੇ ਹੀ ਕਬਜ਼ਾ ਕਰਨਾ ਚਾਹੁੰਦੀ ਸੀ ਤੇ ਅਤੇ ਪਿੰਡ ਨੇੜਲੀ ਜ਼ਮੀਨ ਵਿੱਚ ਭਤੀਜਿਆਂ ਨੂੰ ਵੜਨ ਤੋਂ ਰੋਕਦੀ ਸੀ। ਬੀਤੇ ਦਿਨ ਭੂਆ ਬਲਵੀਰ ਕੌਰ ਕਿਸਾਨ ਯੂਨੀਅਨ ਦੇ ਵੱਡੀ ਗਿਣਤੀ ਵਿੱਚ ਆਗੂਆਂ ਤੇ ਕੁਝ ਵਰਕਰਾਂ ਨੂੰ ਲੈ ਕੇ ਆਈ ਅਤੇ ਉਹਨਾਂ ਨੇ ਟਰੈਕਟਰਾਂ ਨਾਲ ਜ਼ਮੀਨ ਵਾਹੁਣੀ ਸ਼ੁਰੂ ਕਰ ਦਿੱਤੀ। ਇਸ ਦੀ ਭਿਣਕ ਜਦੋਂ ਭਤੀਜਿਆਂ ਨੂੰ ਲੱਗੀ ਤਾਂ ਉਹ ਮੌਕੇ ‘ਤੇ ਪੁੱਜੇ ਅਤੇ ਕਿਸਾਨ ਯੂਨੀਅਨ ਦੇ ਆਗੂਆਂ ਨੂੰ ਅਜਿਹਾ ਕਰਨ ਤੋਂ ਰੋਕਿਆ ਪਰੰਤੂ ਉਹਨਾਂ ਦੀ ਯੂਨੀਅਨ ਦੇ ਵਰਕਰਾਂ ਵੱਲੋਂ ਕੁੱਟਮਾਰ ਕੀਤੀ ਗਈ। ਇਸ ਗੱਲ ਦਾ ਪਤਾ ਲੱਗਦੇ ਹੀ ਪਿੰਡ ਵਾਲੇ ਭਤੀਜਿਆਂ ਦੀ ਮਦਦ ‘ਤੇ ਆ ਗਏ ਅਤੇ ਧੱਕੇ ਨਾਲ ਕਬਜ਼ਾ ਲੈਣ ਆਏ ਯੂਨੀਅਨ ਦੇ ਵਰਕਰ ਅਤੇ ਪਿੰਡ ਵਾਲੇ ਆਹਮੋ ਸਾਹਮਣੇ ਹੋ ਗਏ। ਪਿੰਡ ਵਾਲਿਆਂ ਦੀ ਗਿਣਤੀ ਜ਼ਿਆਦਾ ਹੋਣ ਕਰਕੇ ਯੂਨੀਅਨ ਦੇ ਵਰਕਰਾਂ ਦੀ ਪਿੰਡ ਵਾਲਿਆਂ ਨੇ ਡਾਂਗਾਂ ਨਾਲ ਚੰਗੀ ਆਓ ਭਗਤ ਕੀਤੀ ਅਤੇ ਯੂਨੀਅਨ ਦੇ ਆਗੂਆਂ ਤੇ ਵਰਕਰਾਂ ਨੂੰ ਆਪਣੀ ਜਾਨ ਬਚਾ ਕੇ ਭੱਜਣਾ ਪਿਆ। ਇਸ ਘਟਨਾ ਦੀ ਸੋਸ਼ਲ ਮੀਡੀਆ ‘ਤੇ ਵੀ ਖੂਬ ਚਰਚਾ ਹੋ ਰਹੀ ਹੈ। ਅਜਿਹੀਆਂ ਘਟਨਾਵਾਂ ਜਥੇਬੰਦੀਆਂ ਦੇ ਅਕਸ ਨੂੰ ਖਰਾਬ ਕਰਦੀਆਂ ਹਨ। ਚਰਚਾ ਇਹ ਵੀ ਹੁੰਦੀ ਰਹਿੰਦੀ ਹੈ ਕਿ ਯੂਨੀਅਨ ਦੇ ਹੇਠਲੇ ਪੱਧਰ ਦੇ ਕੁਝ ਆਗੂ ਇੱਕ ਧਿਰ ਨਾਲ ਲੈਣ-ਦੇਣ ਕਰ ਲੈਂਦੇ ਹਨ ਅਤੇ ਦੂਜੀ ਧਿਰ ਉੱਪਰ ਧਰਨੇ ਲਾ ਕੇ ਦਬਾਅ ਬਣਾ ਕੇ “ਕਥਿਤ ਸਮਝੌਤਾ” ਕਰਵਾਉਂਦੇ ਹਨ ਅਤੇ ਸਮਝੌਤੇ ਦੀ ਭੇਲੀ ਵਿੱਚੋਂ ਗੁੜ ਦੀ ਰੋੜੀ ਲੈ ਲੈਂਦੇ ਹਨ। ਕਈ ਵਾਰ ਕਿਸਾਨਾਂ ਤੇ ਆੜਤੀਆਂ ਦੇ ਲੈਣ ਦੇਣ ਦੇ ਮਾਮਲੇ ਵਿੱਚ ਵੀ ਅਜਿਹੇ ਕਥਿਤ ਸਮਝੌਤਿਆਂ ਦੀ ਕਨਸੋਅ ਬਾਹਰ ਨਿਕਲ ਚੁੱਕੀ ਹੈ। ਕਿਸਾਨ ਜਥੇਬੰਦੀਆਂ ਦੇ ਵੱਡੇ ਆਗੂਆਂ ਨੂੰ ਇਸ ਮਸਲੇ ਵੱਲ ਧਿਆਨ ਦੇ ਕੇ ਇਹ ਚਰਚਾ ਠੱਪ ਕਰਨੀ ਚਾਹੀਦੀ ਹੈ ਕਿਉਂਕਿ ਸਮਾਜਿਕ ਸਮਝੌਤਿਆਂ ਦੀ ਆੜ ਹੇਠ ਕੁਝ ਜਥੇਬੰਦੀਆਂ ਦੀ ਕੁਝ ਆਗੂਆਂ ਵੱਲੋਂ ਕਈ ਵਾਰ ਨਜਾਇਜ਼ ਹੀ ਧੱਕੇਸ਼ਾਹੀ ਕੀਤੀ ਜਾਂਦੀ ਹੈ। ਕੁੱਲ ਮਿਲਾ ਕੇ ਇਸਦਾ ਅਸਰ ਜਥੇਬੰਦੀਆਂ ਦੇ ਮਿਸ਼ਨ ‘ਤੇ ਪੈਂਦਾ ਹੈ ਅਤੇ ਕਈ ਵਾਰ ਭਾਈਚਾਰਕ ਸਾਂਝ ਵੀ ਖ਼ਤਰੇ ਵਿੱਚ ਪੈ ਜਾਂਦੀ ਹੈ।
