ਚੰਡੀਗੜ੍ਹ,28 ਫਰਵਰੀ, Gee98 News service
-ਆਮ ਤੌਰ ‘ਤੇ ਸੱਸ ਅਤੇ ਨੂੰਹ ਦੇ ਰਿਸ਼ਤੇ ਨੂੰ ਨਕਾਰਾਤਮਿਕ ਨਜ਼ਰੀਏ ਤੋਂ ਹੀ ਦੇਖਿਆ ਜਾਂਦਾ ਹੈ, ਅਜਿਹਾ ਸ਼ਾਇਦ ਇਸ ਕਰਕੇ ਵੀ ਹੈ ਕਿਉਂਕਿ ਬਹੁ ਗਿਣਤੀ ਘਰਾਂ ਵਿੱਚ ਨੂੰਹ ਨੂੰ ਧੀ ਵਾਲਾ ਰੁਤਬਾ ਨਹੀਂ ਦਿੱਤਾ ਜਾਂਦਾ। ਸੱਸ ਤੇ ਨੂੰਹ ਦੇ ਰਿਸ਼ਤੇ ਨੂੰ ਅਕਸਰ ਝਗੜੇ ਦੇ ਰੂਪ ਵਿੱਚ ਹੀ ਦੇਖਿਆ ਜਾਂਦਾ ਹੈ ਪ੍ਰੰਤੂ ਜਲੰਧਰ ਸ਼ਹਿਰ ਤੋਂ ਇੱਕ ਅਜਿਹੀ ਖ਼ਬਰ ਸਾਹਮਣੇ ਆ ਰਹੀ ਹੈ ਜਿਸ ਨੇ ਹਰ ਇੱਕ ਦੀਆਂ ਅੱਖਾਂ ਨਮ ਕਰ ਦਿੱਤੀਆਂ। ਜਲੰਧਰ ‘ਚ ਮਿੱਠਾਪੁਰ ਦੀਆਂ ਰਹਿਣ ਵਾਲੀਆਂ ਸੱਸ ਅਤੇ ਨੂੰਹ ਨਾਲ ਵਾਪਰੀ ਘਟਨਾ ਨੇ ਉਕਤ ਧਾਰਨਾ ਨੂੰ ਗਲਤ ਕਰ ਦਿੱਤਾ ਹੈ। ਵੇਰਵੇ ਅਨੁਸਾਰ ਬੁੱਧਵਾਰ ਰਾਤ ਸਮੇਂ 83 ਸਾਲ ਦੀ ਬਜ਼ੁਰਗ ਔਰਤ ਨਿਰਮਲਾ ਟੰਡਨ ਦੀ ਸਿਹਤ ਅਚਾਨਕ ਵਿਗੜ ਗਈ, ਜਿਸਨੂੰ ਪਰਿਵਾਰ ਵਾਲੇ ਹਸਪਤਾਲ ਲੈ ਗਏ ਜਿੱਥੇ ਨਿਰਮਲਾ ਟੰਡਨ ਦੀ ਮੌਤ ਹੋ ਗਈ। ਜਦੋਂ ਨਿਰਮਲਾ ਟੰਡਨ ਦੀ ਲਾਸ਼ ਘਰ ਲਿਆਂਦੀ ਗਈ ਤਾਂ ਉਸ ਦੀ ਨੂੰਹ 58 ਸਾਲਾ ਆਰਤੀ ਟੰਡਨ ਆਪਣੀ ਸੱਸ ਦੀ ਮੌਤ ਦੇ ਗ਼ਮ ਵਿਚ ਬੇਹੋਸ਼ ਹੋ ਗਈ। ਉਸ ਨੂੰ ਵੀ ਹਸਪਤਾਲ ਲਿਜਾਇਆ ਗਿਆ ਜਿੱਥੇ ਉਸ ਦੀ ਵੀ ਮੌਤ ਹੋ ਗਈ। ਆਰਤੀ ਦੇ ਪਤੀ ਅਸ਼ੋਕ ਟੰਡਨ ਦੀ 10 ਸਾਲ ਪਹਿਲਾਂ ਮੌਤ ਹੋ ਗਈ ਸੀ ਤੇ ਉਸ ਦੇ ਦੋ ਬੱਚੇ ਹਨ, ਦੋਵੇਂ ਵਿਆਹੇ ਹੋਏ ਹਨ। ਆਰਤੀ ਆਪਣੀ ਸੱਸ ਦਾ ਖਾਸ ਧਿਆਨ ਰੱਖਦੀ ਸੀ ਤੇ ਦੋਵੇਂ ਆਪਣੇ ਖਾਲੀ ਸਮੇਂ ‘ਚ ਇਕ ਦੂਜੇ ਨਾਲ ਗੱਲਾਂ ਕਰਦੀਆਂ ਸਨ। ਆਰਤੀ ਦੇ ਜੇਠ ਰਾਕੇਸ਼ ਟੰਡਨ ਨੇ ਦੱਸਿਆ ਕਿ ਉਹ ਕੰਮ ਲਈ ਬਾਹਰ ਰਹਿੰਦਾ ਸੀ, ਇਸ ਲਈ ਉਸ ਦੀ ਭਰਜਾਈ ਉਸ ਦੀ ਮਾਂ ਦਾ ਬਹੁਤ ਧਿਆਨ ਰੱਖਦੀ ਸੀ ਤੇ ਉਸ ਦੀ ਮਾਂ ਵੀ ਉਸ ਨੂੰ ਆਪਣੀ ਨੂੰਹ ਵਾਂਗ ਨਹੀਂ ਸਗੋਂ ਆਪਣੀ ਧੀ ਵਾਂਗ ਸਮਝਦੀ ਸੀ।
