ਚੰਡੀਗੜ੍ਹ,11 ਜੂਨ, Gee98 News service
-ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਨੇ ਇਕ ਮਹੱਤਵਪੂਰਨ ਫੈਸਲੇ ‘ਚ ਸਪੱਸ਼ਟ ਕੀਤਾ ਹੈ ਕਿ ਕਿਸੇ ਅਪਰਾਧੀ ਦੇ ਟਿਕਾਣੇ ਦੀ ਜਾਣਕਾਰੀ ਰੱਖਣਾ ਇਸ ਗੱਲ ਦਾ ਸਬੂਤ ਨਹੀਂ ਹੈ ਕਿ ਕਿਸੇ ਨੇ ਅਪਰਾਧੀ ਨੂੰ ਪਨਾਹ ਦਿੱਤੀ ਹੈ। ਹਾਈ ਕੋਰਟ ਨੇ ਕਿਹਾ ਕਿ ਜਦ ਤਕ ਇਹ ਸਾਬਤ ਨਾ ਹੋ ਜਾਵੇ ਕਿ ਮੁਲਜ਼ਮ ਨੇ ਅਪਰਾਧੀ ਨੂੰ ਗ੍ਰਿਫਤਾਰੀ ਤੋਂ ਬਚਾਉਣ ਦੇ ਉਦੇਸ਼ ਨਾਲ ਮਦਦ ਪ੍ਰਦਾਨ ਕੀਤੀ ਹੈ, ਤਦ ਤਕ ਉਸ ‘ਤੇ ਭਾਰਤੀ ਦੰਡਾਵਲੀ ਦੀ ਧਾਰਾ 212 ਜਾਂ 216 ਤਹਿਤ ਕਾਰਵਾਈ ਨਹੀਂ ਕੀਤੀ ਜਾ ਸਕਦੀ। ਇਹ ਟਿੱਪਣੀ ਜਸਟਿਸ ਮਨੀਸ਼ਾ ਬਤਰਾ ਨੇ ਫਗਵਾੜਾ ਦੇ ਪੁਲਿਸ ਨੂੰ ਲੋੜੀਦੇ ਇੱਕ ਵਿਅਕਤੀ ਦੇ ਪਿਤਾ ਅਤੇ ਭਰਾ ਵੱਲੋਂ ਦਾਇਰ ਪਟੀਸ਼ਨ ਦੀ ਸੁਣਵਾਈ ਕਰਦੇ ਹੋਏ ਕੀਤੀ।
ਮਾਮਲੇ ‘ਚ ਇਸਤਗਾਸਾ ਧਿਰ ਦਾ ਦੋਸ਼ ਸੀ ਕਿ ਜਦ ਪੁਲਿਸ ਵਿਆਹੁਤਾ ਵਿਵਾਦ ਨਾਲ ਜੁੜੇ ਇਕ ਮੁਕੱਦਮੇ ‘ਚ ਮੁਲਜ਼ਮ ਹਰੀਸ਼ ਕਾਂਡਾ ਦੀ ਗ੍ਰਿਫਤਾਰੀ ਲਈ ਵਾਰੰਟ ਦੀ ਤਾਮੀਲ ਕਰਨ ਪਹੁੰਚੀ ਤਾਂ ਉਨ੍ਹਾਂ ਨੂੰ ਦੱਸਿਆ ਗਿਆ ਕਿ ਹਰੀਸ਼ ਅਕਸਰ ਆਪਣੇ ਪਿਤਾ ਦੇ ਘਰ ਅਜੀਬ ਸਮੇਂ ‘ਤੇ ਆਉਂਦਾ-ਜਾਂਦਾ ਹੈ। ਦੋਸ਼ ਲਗਾਇਆ ਗਿਆ ਕਿ ਪਿਤਾ ਅਤੇ ਭਰਾ ਮਿਲ ਕੇ ਹਰੀਸ਼ ਨੂੰ ਛੁਪਾ ਰਹੇ ਹਨ ਤੇ ਉਸਨੂੰ ਕਾਨੂੰਨੀ ਕਾਰਵਾਈ ਤੋਂ ਬਚਾ ਰਹੇ ਹਨ। ਪੁਲਿਸ ਨੇ ਮੁਲਜ਼ਮ ਹਰੀਸ਼ ਕਾਂਡਾ ਦੇ ਪਿਤਾ ਅਤੇ ਭਰਾ ਉਪਰ ਇਸੇ ਕਰਕੇ ਹੀ ਐਫ ਆਈ ਆਰ ਦਰਜ ਕਰ ਦਿੱਤੀ ਕਿ ਉਹ ਹਰੀਸ਼ ਕਾਂਡਾ ਨੂੰ ਪੁਲਿਸ ਕਾਰਵਾਈ ਤੋਂ ਬਚਾ ਰਹੇ ਹਨ। ਆਪਣੇ ਖ਼ਿਲਾਫ਼ ਦਰਜ ਕਾਰਵਾਈ ਤੋਂ ਬਾਅਦ ਹਰੀਸ਼ ਕਾਂਡਾ ਦੇ ਪਿਤਾ ਅਤੇ ਭਰਾ ਨੇ ਹਾਈਕੋਰਟ ਦਾ ਰੁਖ ਕੀਤਾ ਜਿੱਥੇ ਉਹਨਾਂ ਦੀ ਸੁਣਵਾਈ ਕਰਦੇ ਹੋਏ ਹਾਈਕੋਰਟ ਨੇ ਵਿਸਥਾਰ ਨਾਲ ਭਾਰਤੀ ਦੰਡਾਵਲੀ ਦੀ ਧਾਰਾ 212 ਦੀ ਵਿਆਖਿਆ ਕੀਤੀ, ਜਿਸ ਵਿਚ ਕਿਹਾ ਗਿਆ ਹੈ ਕਿ ਕਿਸੇ ਵਿਅਕਤੀ ਨੂੰ ਤਦ ਹੀ ਦੋਸ਼ੀ ਠਹਿਰਾਇਆ ਜਾ ਸਕਦਾ ਹੈ ਜਦ ਉਹ ਜਾਣਬੁਝ ਕੇ ਕਿਸੇ ਅਪਰਾਧੀ ਨੂੰ ਛੁਪਾਉਂਦਾ ਹੈ ਜਾਂ ਉਸਨੂੰ ਸਜ਼ਾ ਤੋਂ ਬਚਾਉਣ ਦੇ ਮਕਸਦ ਨਾਲ ਉਸਦੀ ਮਦਦ ਕਰਦਾ ਹੈ।
ਹਾਈ ਕੋਰਟ ਨੇ ਇਹ ਵੀ ਕਿਹਾ ਕਿ ਕਿਸੇ ਵਿਅਕਤੀ ਨੂੰ ‘ਸਹਿ-ਅਪਰਾਧੀ’ ਠਹਿਰਾਉਣ ਲਈ ਇਹ ਦਿਖਾਉਣਾ ਜ਼ਰੂਰੀ ਹੈ ਕਿ ਉਸਨੇ ਜਾਣਬੁਂਝ ਕੇ ਜਾਂ ਅਪ੍ਰਤੱਖ ਤੌਰ ‘ਤੇ ਅਪਰਾਧੀ ਦੀ ਮਦਦ ਕੀਤੀ, ਸਿਰਫ਼ ਇਸ ਗੱਲ ਦੀ ਜਾਣਕਾਰੀ ਕਿ ਅਪਰਾਧੀ ਕਿੱਥੇ ਹੈ, ਅਪਰਾਧ ਨਹੀਂ ਮੰਨੀ ਜਾ ਸਕਦੀ ਜਦ ਤਕ ਇਹ ਸਾਬਤ ਨਾ ਹੋ ਜਾਵੇ ਕਿ ਮੁਲਜ਼ਮ ਨੇ ਗ੍ਰਿਫਤਾਰੀ ਤੋਂ ਬਚਾਉਣ ਲਈ ਕੁਝ ਕੀਤਾ। ਕੋਰਟ ਨੇ ਫੈਸਲਾ ਦਿੰਦੇ ਹੋਏ ਕਿਹਾ ਕਿ ਰਿਕਾਰਡ ‘ਚ ਅਜਿਹਾ ਕੋਈ ਗਵਾਹ ਨਹੀਂ ਹੈ ਜਿਸ ਤੋਂ ਇਹ ਨਤੀਜਾ ਕੱਢਿਆ ਜਾ ਸਕੇ ਕਿ ਪਟੀਸ਼ਨਰ ਨੇ ਆਪਣੇ ਪੁੱਤਰ ਨੂੰ ਗ੍ਰਿਫ਼ਤਾਰੀ ਤੋਂ ਬਚਾਉਣ ਲਈ ਕੋਈ ਠੋਸ ਕਦਮ ਉਠਾਇਆ ਹੋਵੇ। ਉਨ੍ਹਾਂ ਨਾ ਉਸਨੂੰ ਸ਼ਰਨ ਦਿੱਤੀ, ਨਾ ਛੁਪਾਇਆ ਤੇ ਨਾ ਹੀ ਕਿਸੇ ਕਿਸਮ ਦੀ ਕਾਨੂੰਨੀ ਸਹਾਇਤਾ ਨਾਲ ਉਸਨੂੰ ਬਚਾਇਆ। ਇਨ੍ਹਾਂ ਹਾਲਾਤ ਨੂੰ ਦੇਖਦਿਆਂ ਅਦਾਲਤ ਨੇ ਐਫਆਈਆਰ ਨੂੰ ਰੱਦ ਕਰਦਿਆਂ ਪਟੀਸ਼ਨਰ ਨੂੰ ਰਾਹਤ ਦਿੱਤੀ। ਦੱਸ ਦੇਈਏ ਕਿ ਪੁਲਿਸ ਨੂੰ ਲੋੜੀਂਦੇ ਮੁਲਜ਼ਮ ਹਰੀਸ਼ ਕਾਂਡਾ ਦਾ ਆਪਣੀ ਪਤਨੀ ਨਾਲ ਪਰਿਵਾਰਿਕ ਝਗੜਾ ਸੀ ਜਿਸ ਦੇ ਚਲਦਿਆਂ ਪੁਲਿਸ ਨੇ ਹਰੀਸ਼ ਕਾਂਡਾ ਦੇ ਖ਼ਿਲਾਫ਼ ਐਫਆਈਆਰ ਦਰਜ ਕੀਤੀ ਸੀ।
Menu
