ਚੰਡੀਗੜ੍ਹ,17 ਮਾਰਚ, Gee98 News service-
-ਭਾਰਤੀ ਚੋਣ ਕਮਿਸ਼ਨ ਦੇ ਇੱਕ ਫੈਸਲੇ ਅਨੁਸਾਰ ਪੰਜਾਬ 18 ਮਾਰਚ ਤੋਂ ਅਗਲੇ ਦੋ ਮਹੀਨਿਆਂ ਤੱਕ ਅਫ਼ਸਰਾਂ ਤੋਂ ਸੱਖਣਾ ਹੋ ਜਾਵੇਗਾ । ਦਰਅਸਲ ਭਾਰਤੀ ਚੋਣ ਕਮਿਸ਼ਨ ਨੇ ਪੰਜਾਬ ਦੇ 27 ਆਈਏਐਸ ਅਤੇ 7 ਆਈਪੀਐਸ ਅਧਿਕਾਰੀਆਂ ਦੀ ਪੰਜ ਰਾਜਾਂ ਵਿੱਚ ਹੋਣ ਵਾਲੀਆਂ ਵਿਧਾਨ ਸਭਾ ਚੋਣਾਂ ਵਿੱਚ ਡਿਊਟੀ ਲਗਾ ਦਿੱਤੀ ਹੈ ਅਤੇ ਚੋਣ ਕਮਿਸ਼ਨ ਨੇ ਇਹਨਾਂ ਅਧਿਕਾਰੀਆਂ ਨੂੰ 18 ਮਾਰਚ ਤੋਂ ਆਪਣੀ ਡਿਊਟੀ ਜੁਆਇਨ ਕਰਨ ਦੇ ਹੁਕਮ ਵੀ ਜਾਰੀ ਕੀਤੇ ਹਨ। ਭਾਰਤੀ ਚੋਣ ਕਮਿਸ਼ਨ ਦੇ ਇਹਨਾਂ ਹੁਕਮਾਂ ਤੋਂ ਬਾਅਦ ਪੰਜਾਬ ਸਰਕਾਰ ਵਿੱਚ ਤਰਥੱਲੀ ਮੱਚ ਗਈ ਹੈ ਕਿਉਂਕਿ ਇਹਨਾਂ ਅਧਿਕਾਰੀਆਂ ਵਿੱਚ ਕੁਝ ਅਜਿਹੇ ਸੀਨੀਅਰ ਆਈਏਐਸ ਅਧਿਕਾਰੀ ਵੀ ਹਨ ਜਿਨਾਂ ਨੂੰ ਪੰਜਾਬ ਸਰਕਾਰ ਇੱਕ ਦਿਨ ਦੀ ਛੁੱਟੀ ‘ਤੇ ਵੀ ਨਹੀਂ ਭੇਜ ਸਕਦੀ ਪਰੰਤੂ ਜੇਕਰ ਇਹ ਅਧਿਕਾਰੀ ਲੱਗਭੱਗ ਦੋ ਮਹੀਨੇ ਚੋਣ ਡਿਊਟੀ ‘ਤੇ ਰਹਿਣਗੇ ਤਾਂ ਇਹਨਾਂ ਅਧਿਕਾਰੀਆਂ ਨਾਲ ਜੁੜੇ ਵੱਡੇ ਪ੍ਰੋਜੈਕਟ ਪ੍ਰਭਾਵਿਤ ਹੋਣ ਦੇ ਅਸਾਰ ਹਨ। ਦੂਜੇ ਪਾਸੇ ਪੰਜਾਬ ਸਰਕਾਰ ਚੋਣ ਵਰ੍ਹੇ ਵਿੱਚ ਪਹਿਲਾਂ ਤੋਂ ਚੱਲ ਰਹੇ ਪ੍ਰੋਜੈਕਟਾਂ ਨੂੰ ਜਲਦੀ ਪੂਰਾ ਕਰਨਾ ਚਾਹੁੰਦੀ ਹੈ ਅਤੇ ਨਵੇਂ ਪ੍ਰੋਜੈਕਟ ਵੀ ਜਲਦੀ ਸ਼ੁਰੂ ਕਰਕੇ ਜਲਦੀ ਪੂਰਾ ਕਰਨਾ ਚਾਹੇਗੀ। ਚੋਣ ਕਮਿਸ਼ਨ ਵੱਲੋਂ ਪੱਛਮੀ ਬੰਗਾਲ, ਤਾਮਿਲਨਾਡੂ, ਕੇਰਲ, ਅਸਾਮ ਅਤੇ ਪਾਂਡੂਚੇਰੀ ਵਿੱਚ ਚੋਣ ਡਿਊਟੀ ‘ਤੇ ਭੇਜੇ ਆਈਏਐਸ ਅਫਸਰਾਂ ਵਿੱਚ ਬਹੁਤੇ ਸਕੱਤਰ ਪੱਧਰ ਦੇ ਹਨ। ਜਿਹੜੇ ਪੰਜਾਬ ਦੇ ਵੱਡੇ ਪ੍ਰੋਜੈਕਟਾਂ ਨਾਲ ਸਿੱਧੇ ਤੌਰ ‘ਤੇ ਜੁੜੇ ਹੋਏ ਹਨ।
ਪੰਜਾਬ ਦੇ ਮੁੱਖ ਸਕੱਤਰ ਕੇਏਪੀ ਸਿਨਹਾ ਨੇ ਭਾਰਤੀ ਚੋਣ ਕਮਿਸ਼ਨ ਨੂੰ ਬੇਨਤੀ ਵੀ ਕੀਤੀ ਹੈ ਕਿ ਉਹਨਾਂ ਦੇ ਕਈ ਅਧਿਕਾਰੀਆਂ ਨੂੰ ਚੋਣ ਡਿਊਟੀ ਤੋਂ ਛੋਟ ਦਿੱਤੀ ਜਾਵੇ ਪਰੰਤੂ ਸੂਤਰਾਂ ਅਨੁਸਾਰ ਚੋਣ ਕਮਿਸ਼ਨ ਨੇ ਅਜੇ ਤੱਕ ਪੰਜਾਬ ਸਰਕਾਰ ਨੂੰ ਇਸ ਸਬੰਧੀ ਕੋਈ ਰਾਹਤ ਨਹੀਂ ਦਿੱਤੀ। ਪੰਜਾਬ ਦੇ ਜਿਹੜੇ ਆਈਏਐਸ ਅਧਿਕਾਰੀਆਂ ਦੀ ਭਾਰਤੀ ਚੋਣ ਕਮਿਸ਼ਨ ਨੇ ਵਿਧਾਨ ਸਭਾ ਦੀਆਂ ਚੋਣਾਂ ਵਾਲੇ ਪੰਜ ਵੱਖ-ਵੱਖ ਰਾਜਾਂ ਵਿੱਚ ਡਿਊਟੀ ਲਗਾਈ ਹੈ ਉਹਨਾਂ ਵਿੱਚ ਸ੍ਰੀ ਅਭਿਨਵ ਆਈਏਐਸ, ਸ੍ਰੀ ਅਮਿਤ ਢਾਕਾ, ਅੰਮ੍ਰਿਤ ਸਿੰਘ, ਅਪਨੀਤ ਰਿਆੜ, ਅਰਵਿੰਦ ਕੁਮਾਰ, ਦੀਪਤੀ ਉਪਲ, ਘਨਸਿਆਮ ਥੋਰੀ, ਗੁਰਿੰਦਰਪਾਲ ਸਿੰਘ, ਗੁਰਕਿਰਤ ਕਿਰਪਾਲ ਸਿੰਘ, ਹਰਪ੍ਰੀਤ ਸਿੰਘ, ਜੋਸ਼ੀ ਅਜੀਤ ਬਾਲਾ ਜੀ, ਕੁਲਵੰਤ ਸਿੰਘ ,ਪਰਮਵੀਰ ਸਿੰਘ, ਪਰਮਿੰਦਰ ਪਾਲ ਸਿੰਘ, ਪ੍ਰਿਅੰਕ ਭਾਰਤੀ, ਰਾਹੁਲ ਤਿਵਾੜੀ, ਰਜੀਵ ਪਰਾਸ਼ਰ, ਰਾਮਵੀਰ, ਸੰਦੀਪ ਕੁਮਾਰ, ਸ਼ੀਨਾ ਅਗਰਵਾਲ ,ਸ਼ੌਕਤ ਅਹਿਮਦ ਪਰੇ, ਸੋਨਾਲੀ ਗਿਰੀ, ਸਈਅਦ ਸੇਹਰੋਸ ਅਸਗਰ, ਓਮਾ ਸ਼ੰਕਰ ਗੁਪਤਾ, ਉਪਕਾਰ ਸਿੰਘ, ਵਰੁਣ ਰੂਜਮ, ਵਿਨੇਸ਼ ਸਾਰੰਗਲ (ਸਾਰੇ ਆਈਏਐਸ) ਦੇ ਨਾਮ ਸ਼ਾਮਿਲ ਹਨ। ਇਸ ਤੋਂ ਇਲਾਵਾ ਆਈਪੀਐਸ ਅਧਿਕਾਰੀਆਂ ਵਿੱਚ ਸ੍ਰੀ ਅਖਿਲ ਚੌਧਰੀ, ਅਲਕਾ ਮੀਨਾ, ਆਸ਼ੀਸ਼ ਚੌਧਰੀ, ਬਾਬੂ ਲਾਲ ਮੀਣਾ, ਧਰੁਵ ਦਹੀਆ, ਕੋਸ਼ਤੂਬ ਸ਼ਰਮਾ ਅਤੇ ਐਸ ਭੂਪਤੀ ਦੇ ਨਾਮ ਸ਼ਾਮਿਲ ਹਨ।
