ਚੰਡੀਗੜ੍ਹ,23 ਮਾਰਚ, Gee98 news service-
-ਕੇਂਦਰ ਸਰਕਾਰ ਨੇ ਏਅਰਲਾਈਨਜ਼ ਕੰਪਨੀਆਂ ਨੂੰ ਘਰੇਲੂ ਉਡਾਣਾਂ ਲਈ ਕਿਰਾਇਆ ਵਧਾਉਣ ਦੀ ਇਜਾਜ਼ਤ ਦੇ ਦਿੱਤੀ ਹੈ। ਕੇਂਦਰੀ ਹਵਾਬਾਜ਼ੀ ਮੰਤਰਾਲੇ ਵੱਲੋਂ ਏਅਰਲਾਈਨਜ਼ ਕੰਪਨੀਆਂ ‘ਤੇ ਕਿਰਾਏ ਦੀ ਉਪਰਲੀ ਸੀਮਾ ‘ਤੇ ਲਗਾਈ ਰੋਕ ਖ਼ਤਮ ਕਰਨ ਦਾ ਐਲਾਨ ਕੀਤਾ ਗਿਆ ਹੈ ਭਾਵ ਕਿ ਹੁਣ ਏਅਰਲਾਈਨਜ਼ ਕੰਪਨੀਆਂ ਸਥਿਤੀ ਦੇ ਅਨੁਸਾਰ ਕਿਰਾਇਆ ਵਧਾ ਸਕਦੀਆਂ ਹਨ। ਦੱਸ ਦੇਈਏ ਕਿ ਸਰਕਾਰ ਨੇ ਏਅਰਲਾਈਨਜ਼ ਕੰਪਨੀਆਂ ਲਈ ਕਿਰਾਏ ਦੀ ਉੱਪਰਲੀ ਸੀਮਾ 18000 ਤੱਕ ਨਿਸ਼ਚਿਤ ਕੀਤੀ ਹੋਈ ਸੀ। ਸਰਕਾਰ ਦੇ ਫੈਸਲੇ ਤੋਂ ਬਾਅਦ ਹੁਣ ਏਅਰਲਾਈਨਜ਼ ਕੰਪਨੀਆਂ ਘਰੇਲੂ ਉਡਾਨਾਂ ਲਈ ਸੀਟਾਂ ਦੀ ਸਮਰੱਥਾ ਅਤੇ ਹੋਰ ਹਾਲਾਤਾਂ ਮੁਤਾਬਕ ਕਿਰਾਇਆ ਵਧਾ ਸਕਦੀਆਂ ਹਨ। ਦੂਜੇ ਪਾਸੇ ਸਰਕਾਰ ਦਾ ਇਹ ਵੀ ਕਹਿਣਾ ਹੈ ਕਿ ਸਥਿਤੀ ‘ਤੇ ਲਗਾਤਾਰ ਨਜ਼ਰ ਵੀ ਰੱਖੀ ਜਾਵੇਗੀ, ਤਾਂ ਜੋ ਕੰਪਨੀਆਂ ਲੋਡ ਤੋਂ ਵੱਧ ਕਿਰਾਇਆ ਨਾ ਵਧਾ ਸਕਣ । ਸਰਕਾਰ ਦੇ ਇਸ ਫੈਸਲੇ ਦਾ ਅਸਰ 1 ਅਪ੍ਰੈਲ ਤੋਂ ਬਾਅਦ ਸਾਹਮਣੇ ਆ ਸਕਦਾ ਹੈ। ਅਮਰੀਕਾ ਇਜ਼ਰਾਈਲ ਅਤੇ ਈਰਾਨ ਜੰਗ ਦੇ ਚੱਲਦਿਆਂ 1 ਅਪ੍ਰੈਲ ਤੋਂ ਬਾਅਦ ਜਹਾਜ਼ਾਂ ਵਿੱਚ ਵਰਤੇ ਜਾਣ ਵਾਲੇ ਤੇਲ ਦੀਆਂ ਕੀਮਤਾਂ ‘ਤੇ ਨਜ਼ਰ ਟਿਕੀ ਰਹੇਗੀ ਜੇਕਰ ਇਹਨਾਂ ਵਿੱਚ ਵਾਧਾ ਹੁੰਦਾ ਤਾਂ ਘਰੇਲੂ ਉਡਾਣਾਂ ਲਈ ਏਅਰਲਾਈਨਜ਼ ਕੰਪਨੀਆਂ ਕਿਰਾਏ ‘ਚ ਵਾਧਾ ਕਰ ਸਕਦੀਆਂ ਹਨ।
