ਚੰਡੀਗੜ, 02 ਜਨਵਰੀ (ਜੀ98 ਨਿਊਜ਼) : ਲੁਧਿਆਣਾ ਕੋਰਟ ਕੰਪਲੈਕਸ ਵਿੱਚ ਬੰਬ ਧਮਾਕੇ ਸੰਬੰਧੀ ਹਰ ਰੋਜ਼ ਨਵੇਂ ਖ਼ੁਲਾਸੇ ਹੋ ਰਹੇ ਹਨ। ਜਾਂਚ ਏਜੰਸੀਆਂ ਮੁੁਲਜ਼ਮ ਦੇ ਵਿਦੇਸ਼ੀ ਬੈਠੇ ਗਰਮ-ਖ਼ਿਆਲੀਆਂ ਨਾਲ ਸੰਬੰਧਾਂ ਬਾਰੇ ਘੋਖ਼ ਪੜਤਾਲ ਕਰ ਰਹੀਆਂ ਹਨ। ਸਾਹਮਣੇ ਆ ਰਹੇ ਤੱਥਾਂ ਤੋਂ ਸਪੱਸ਼ਟ ਹੋ ਰਿਹਾ ਹੈ ਕਿ ਘਟਨਾ ਨੂੰ ਅੰਜਾਮ ਦੇਣ ਵਾਲਾ ਸਾਬਕਾ ਪੁਲਿਸ ਮੁਲਾਜ਼ਮ ਗਗਨਦੀਪ ਸਿੰਘ ਲੰਮੇ ਸਮੇਂ ਤੋਂ ਇਸ ਕੰਮ ਲਈ ਮੁਹਾਰਤ ਹਾਸਿਲ ਕਰ ਰਿਹਾ ਸੀ। ਇਹ ਹੈਰਾਨੀਜਨਕ ਤੱਥ ਵੀ ਸਾਹਮਣੇ ਆਏ ਹਨ ਕਿ ਮੁਲਜ਼ਮ 4 ਦਸੰਬਰ ਨੂੰ ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਦੀ ਖੰਨਾ ਰੈਲੀ ਵਿੱਚ ਗਿਆ ਸੀ। ਮੁਲਜ਼ਮ ਦੇ ਕੁਝ ਚੋਟੀ ਦੇ ਪੁਲਿਸ ਅਫ਼ਸਰਾਂ ਸਮੇਤ ਹੋਰ ਪੁਲਿਸ ਮੁਲਾਜ਼ਮਾਂ ਨਾਲ ਜ਼ਿਆਦਾ ਫੋਨ ਸੰਪਰਕ ਬਣੇ ਰਹਿਣ ਦੀ ਗੱਲ ਸਾਹਮਣੇ ਆਉਣ ਤੋਂ ਬਾਅਦ ਜਾਂਚ ਏਜੰਸੀਆਂ ਆਪਣਾ ਘੇਰਾ ਪੰਜਾਬ ਪੁਲਿਸ ਵੱਲ ਵਧਾ ਰਹੀਆਂ ਹਨ। ਸਾਬਕਾ ਪੁਲਿਸ ਮੁਲਾਜ਼ਮ ਦਾ ਬੰਬ ਬਲਾਸਟ ਵਰਗੀ ਘਟਨਾ ਨੂੰ ਅੰਜ਼ਾਮ ਦੇਣਾ ਤਾਂ ਚਿੰਤਾਜਨਕ ਹੈ ਹੀ ਸਗੋਂ ਅਜਿਹੇ ਵਿਅਕਤੀ ਦਾ ਹੋਰ ਪੁਲਿਸ ਮੁਲਾਜ਼ਮਾਂ ਦੇ ਜ਼ਿਆਦਾ ਸੰਪਰਕ ਵਿੱਚ ਰਹਿਣਾ ਵੀ ਚਿੰਤਾਜਨਕ ਹੈ। ਇਸ ਚਿੰਤਾ ਦਾ ਇੱਕ ਪਹਿਲੂ ਇਹ ਵੀ ਹੈ ਕਿ ਮੁਲਜ਼ਮ ਗਗਨਦੀਪ ਸਿੰਘ ਚਿੱਟਾ ਵੇਚਣ ਦੇ ਦੋਸ਼ ਵਿੱਚ ਨੌਕਰੀ ਤੋਂ ਕੱਢਿਆ ਗਿਆ ਸੀ ਅਤੇ ਉਹ ਜ਼ਮਾਨਤ ‘ਤੇ ਜੇਲ ਤੋਂ ਬਾਹਰ ਆਇਆ ਸੀ। ਅਜਿਹੇ ਅਪਰਾਧਿਕ ਬਿਰਤੀ ਵਾਲੇ ਵਿਅਕਤੀ ਨਾਲ ਮੌਜੂਦਾ ਪੁਲਿਸ ਮੁਲਾਜ਼ਮਾਂ ਦੀ ਸਾਂਝ ਨੇ ਪੁਲਿਸ ਫੋਰਸ ਦੀ ਕਾਰਜਪ੍ਰਣਾਲੀ ਨੂੰ ਵੀ ਸਵਾਲਾਂ ਦੇ ਘੇਰੇ ਵਿੱਚ ਖੜਾ ਕੀਤਾ ਹੈ। ਅਕਸਰ ਪੁਲਿਸ ਅਪਰਾਧੀਆਂ ਦੇ ਪਰਿਵਾਰਕ ਮੈਂਬਰਾਂ , ਮਿੱਤਰਾਂ/ਰਿਸ਼ਤੇਦਾਰਾਂ ਦੇ ਫੋਨ ਨੰਬਰ ਟਰੇਸ ਕਰਦੀ ਹੈ ਜਾਂ ਪੁੱਛਗਿੱਛ ਲਈ ਵਾਰ-ਵਾਰ ਥਾਣੇ ਬਲਾਉਦੀ ਹੈ ਪੰ੍ਰਤੂ ਪੁਲਿਸ ਫੋਰਸ ਦੇ ਆਪਣੇ ਘਰ ਵਿੱਚ ਹੀ ਜੁਰਮ ਦੀ ਗਾਥਾ ਲਿਖੀ ਜਾਂਦੀ ਹੋਵੇ ਅਤੇ ਪਲਿਸ ਨੂੰ ਇਸ ਦੀ ਭਿਣਕ ਵੀ ਨਾ ਹੋਵੇ, ਇਹ ਚਿੰਤਾਜਨਕ ਹੈ ।
