ਬਣ ਗਿਆ ਨਵਾਂ ਰੂਟ : ਪੰਜਾਬ ਤੋਂ ਦਿੱਲੀ ਅਤੇ ਦਿੱਲੀ ਤੋਂ ਹਰਿਆਣਾ.. ਤੇ ਫ਼ੇਰ ਹਰਿਆਣਾ ਤੋਂ ਪੰਜਾਬ
ਬਰਨਾਲਾ, 24 ਮਈ (ਨਿਰਮਲ ਸਿੰਘ ਪੰਡੋਰੀ) :–
ਪੰਜਾਬ ਦੀ ਪਨਬੱਸ ਵਿੱਚ ਆਉਟਸੋਰਸ ਦੇ ਅਧਾਰ ’ਤੇ ਕੰਮ ਕਰ ਰਹੇ ਵਰਕਸ਼ਾਪ ਸਟਾਫ਼ ਨੂੰ ਪੰਜਾਬ ਸਰਕਾਰ ਵੱਲੋਂ ਪਟਿਆਲਾ ਦੀ ਕੰਪਨੀ ਤੋਂ ਬਦਲ ਕੇ ਹਿਸਾਰ ਦੀ ਕੰਪਨੀ ਦੇ ਸਪੁੁਰਦ ਕਰ ਦਿੱਤਾ ਗਿਆ ਹੈ। ਸੂਬੇ ਦੇ ਡੀਪੂ ਮੈਨੇਜ਼ਰਾਂ ਨੂੰ ਕਾਰਜਕਾਰੀ ਡਾਇਰੈਕਟਰ (ਪ੍ਰਸਾਸ਼ਨ) ਪਨਬੱਸ ਵੱਲੋਂ ਪੱਤਰ ਲਿਖ ਕੇ ਜਾਣੂ ਕਰਵਾਇਆ ਗਿਆ ਹੈ ਕਿ ਮੈਸਰਜ਼ ਐਸ ਐਸ ਸਰਵਿਸ਼ ਪ੍ਰੋਵਾਈਡਰ ਪਟਿਆਲਾ ਨਾਲ ਪਨਬੱਸ ਦੇ ਆਉਟਸੋਰਸ ਵਰਕਸ਼ਾਪ ਸਟਾਫ਼ ਦਾ ਐਗਰੀਮੈਂਟ 31 ਮਈ 2022 ਨੂੰ ਖ਼ਤਮ ਹੋਣ ਤੋਂ ਬਾਅਦ ਮੈਸਰਜ਼ ਸਾਈਰਾਮ ਸਕਿਊਰਟੀ ਐੱਡ ਪਲੈਸਮੈਂਟ ਸਰਵਿਸਜ਼ ਹਿਸਾਰ (ਹਰਿਆਣਾ) ਨਾਲ ਨਵਾਂ ਐਗਰੀਮੈਂਟ ਕੀਤਾ ਜਾ ਚੁੱਕਾ ਹੈ। ਪੱਤਰ ਵਿੱਚ ਡੀਪੂ ਮੈਨੇਜਰਾਂ ਨੂੰ ਸਖ਼ਤ ਹਦਾਇਤ ਕੀਤੀ ਗਈ ਹੈ ਕਿ 31 ਮਈ ਤੋਂ ਬਾਅਦ ਪਨਬੱਸ ਦਾ ਵਰਕਸ਼ਾਪ ਸਟਾਫ਼ ਮੈਸਰਜ਼ ਐਸਐਸ ਸਰਵਿਸ਼ ਪ੍ਰੋਵਾਈਡਰ ਪਟਿਆਲਾ ਤੋਂ ਮੈਸਰਜ਼ ਸਾਈਰਾਮ ਸਕਿਊਰਟੀ ਐੱਡ ਪਲੈਸਮੈਂਟ ਸਰਵਿਸਜ਼ ਹਿਸਾਰ ਹਰਿਆਣਾ ਵਿੱਚ ਟਰਾਂਸਫਰ ਕਰਨ ਦੀ ਕਾਰਵਾਈ ਅਮਲ ਵਿੱਚ ਲਿਆਦੀ ਜਾਵੇ। ਪੱਤਰ ਵਿੱਚ ਹਿਸਾਰ ਕੰਪਨੀ ਦੇ ਨੁਮਾਇੰਦਿਆਂ ਨਾਲ ਪੂਰਾ ਤਾਲਮੇਲ ਅਤੇ ਸਹਿਯੋਗ ਕਰਨ, ਲੋੜੀਂਦਾ ਰਿਕਾਰਡ ਕੰਪਨੀ ਨੂੰ ਮੁਹੱਈਆ ਕਰਵਾਉਣ ਦੀ ਹਦਾਇਤ ਵੀ ਦਿੱਤੀ ਗਈ ਹੈ। ਪੰਜਾਬ ਸਰਕਾਰ ਦੇ ਇਸ ਫ਼ੈਸਲੇ ਉੱਪਰ ਉਂਗਲਾਂ ਉੱਠਣੀਆਂ ਸੁਭਾਵਿਕ ਹਨ,ਕਿਉਂਕਿ ਕੰਨੋ-ਕੰਨੀ ਚਰਚਾ ਹੋ ਰਹੀ ਹੈ ਕਿ ਮੈਸਰਜ਼ ਸਾਈਰਾਮ ਸਕਿਊਰਟੀ ਐੱਡ ਪਲੈਸਮੈਂਟ ਸਰਵਿਸਜ਼ ਹਿਸਾਰ ਹਰਿਆਣਾ ਕੰਪਨੀ ਦੇ ਮਾਲਕਾਂ ਦੀ ਤਾਰ ‘ਆਪ’ ਦੇ ਸੁਪਰੀਮੋ ਨਾਲ ਸਿੱਧੇ ਤੌਰ ’ਤੇ ਜੁੜੀ ਹੋਈ ਹੈ। ਵਿਰੋਧੀਆਂ ਵੱਲੋਂ ‘ਆਪ’ ਸਰਕਾਰ ਦੇ ਉਕਤ ਫ਼ੈਸਲੇ ਨੂੰ ਪੰਜਾਬ ਤੋਂ ਦਿੱਲੀ, ਦਿੱਲੀ ਤੋਂ ਹਰਿਆਣਾ ਅਤੇ ਹਰਿਆਣਾ ਤੋਂ ਪੰਜਾਬ ਰੂਟ ਵੀ ਕਿਹਾ ਜਾ ਰਿਹਾ ਹੈ।
