-ਬਿਨਾਂ ATM ਕਾਰਡ ਤੋਂ ਨਿਕਲਣਗੇ ਨੋਟ
ਚੰਡੀਗੜ੍ਹ,6 ਜੂਨ – ਜੇਕਰ ਤੁਸੀਂ ਆਪਣਾ ATM ਕਾਰਡ ਘਰ ਭੁੱਲ ਆਏ ਹੋ ਅਤੇ ਘਰ ਤੋਂ ਬਾਹਰ ਨੂੰ ਪੈਸਿਆਂ ਦੀ ਜ਼ਰੂਰਤ ਹੈ ਤਾਂ ਘਬਰਾਉਣ ਦੀ ਲੋੜ ਨਹੀਂ । ਬੈਂਕ ਦੇ ATM ਕਾਰਡ ਦੀ ਸਹੂਲਤ ਵਰਤਣ ਵਾਲਿਆਂ ਨੂੰ ਹੁਣ ATM ਦੀਆਂ ਮਸ਼ੀਨਾਂ ਵਿੱਚੋ ਏਟੀਐਮ ਕਾਰਡ ਤੋਂ ਬਗੈਰ ਪੈਸੇ ਕਢਵਾਉਣ ਦੀ ਸੁਵਿਧਾ ਮਿਲੇਗੀ । ਬੈਂਕ ਦੇ ਗਾਹਕ ਬੈਂਕ ਦੇ ਏ ਟੀ ਐਮ ਚੋਂ UPI ਦਾ ਇਸਤੇਮਾਲ ਕਰਕੇ ਨਗਦ ਪੈਸੇ ਕਢਵਾ ਸਕਦੇ ਹਨ । ਇਹ ਸਹੂਲਤ ਜਨਤਕ ਖੇਤਰ ਦੇ “ਬੈਂਕ ਆਫ਼ ਬੜੌਦਾ” ਨੇ ਦਿੱਤੀ ਹੈ ਅਤੇ ਇਹ ਸੋਮਵਾਰ ਨੂੰ ਸ਼ੁਰੂ ਵੀ ਹੋ ਚੁੱਕੀ ਹੈ । ਬੈਂਕ ਨੇ ਕਿਹਾ ਕਿ ਉਸ ਦੀ ਆਈ.ਸੀ.ਸੀ.ਡਬਿਲਊ. ਸਹੂਲਤ ਦਾ ਲਾਭ ਲੈ ਕੇ ਉਸ ਦੇ ਗ੍ਰਾਹਕਾਂ ਨਾਲ ਭੀਮ ਯੂ.ਪੀ.ਆਈ. ਅਤੇ ਹੋਰ ਯੂ.ਪੀ.ਆਈ. ਐਪ ਪ੍ਰਯੋਗ ਕਰਨ ਵਾਲੇ ਹੋਰ ਬੈਂਕਾਂ ਦੇ ਗ੍ਰਾਹਕ ਵੀ ਏ.ਟੀ.ਐਮ. ‘ਚੋਂ ਨਕਦੀ ਕਢਵਾ ਸਕਣਗੇ। ਬੈਂਕ ਆਫ਼ ਬੜੌਦਾ ਦੇ ਏ.ਟੀ.ਐਮ. ‘ਚੋਂ ਨਕਦ ਨਿਕਾਸੀ ਲਈ ਗ੍ਰਾਹਕਾਂ ਨੂੰ ਡੈਬਿਟ ਕਾਰਡ ਦਾ ਪ੍ਰਯੋਗ ਕਰਨ ਦੀ ਜ਼ਰੂਰਤ ਨਹੀਂ ਹੋਵੇਗੀ। ਇਸ ਸੇਵਾ ਦਾ ਪ੍ਰਯੋਗ ਕਰਨ ਲਈ ਗ੍ਰਾਹਕ ਨੂੰ ਬੈਂਕ ਆਫ਼ ਬੜੌਦਾ ਦੇ ਏ.ਟੀ.ਐਮ. ‘ਤੇ ‘ਯੂ.ਪੀ.ਆਈ. ਨਕਦ ਨਿਕਾਸੀ’ ਦਾ ਬਦਲ ਚੁਣਨਾ ਹੋਵੇਗਾ। ਫਿਰ ਉਸ ਨੂੰ ਕੱਢੀ ਜਾਣ ਵਾਲੀ ਰਕਮ ਨੂੰ ਦਰਜ ਕਰਨ ਤੋਂ ਬਾਅਦ ਏ.ਟੀ.ਐਮ. ਦੀ ਸਕ੍ਰੀਨ ‘ਤੇ ਕਿਊ.ਆਰ. ਕੋਡ ਦਿਸੇਗਾ ਜਿਸ ਨੂੰ ਕਿਸੇ ਵੀ ਯੂ.ਪੀ.ਆਈ. ਐਪ ਨਾਲ ਸਕੈਨ ਕਰ ਕੇ ਨੋਟ ਕਢਵਾਏ ਜਾ ਸਕਣਗੇ।ਇਸ ਸਹੂਲਤ ਤਹਿਤ ਇਕ ਦਿਨ ‘ਚ ਗ੍ਰਾਹਕ ਦੋ ਵਾਰੀ ਵੱਧ ਤੋਂ ਵੱਧ 5000 ਰੁਪਏ ਕਢਵਾ ਸਕਦਾ ਹੈ।
