ਬਰਨਾਲਾ,17 ਮਾਰਚ, Gee98 news service
-ਬੀਤੇ ਕੱਲ੍ਹ ਸ਼ਾਮ ਕਰੀਬ ਪੰਜ ਕੁ ਵਜੇ ਬਰਨਾਲਾ ਦੇ ਬੱਸ ਅੱਡੇ ਵਿੱਚ ਪੁਲਿਸ ਚੌਂਕੀ ਤੋਂ ਕੁਝ ਕਦਮਾਂ ਦੀ ਦੂਰੀ ‘ਤੇ ਕੁਝ ਨੌਜਵਾਨਾਂ ਨੇ ਬੜੀ ਨਿਡਰਤਾ ਨਾਲ ਲੁੱਟ ਖੋਹ ਦੀ ਵਾਰਦਾਤ ਨੂੰ ਅੰਜਾਮ ਦਿੱਤਾ। ਘਟਨਾ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਫਰੀਦਕੋਟ ਡਿੱਪੂ ਦੀ ਪੀਆਰਟੀਸੀ ਦੀ ਇੱਕ ਬੱਸ ਦੇ ਕੰਡਕਟਰ ਤਹਿਸੀਲਦਾਰ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਦੀ ਬੱਸ ਸਵੇਰੇ ਜੈਤੋਂ ਤੋਂ ਚੱਲ ਕੇ ਵਾਇਆ ਬਰਨਾਲਾ ਚੰਡੀਗੜ੍ਹ ਜਾਂਦੀ ਹੈ ਅਤੇ ਵਾਪਸ ਚੰਡੀਗੜ੍ਹ ਤੋਂ ਵਾਇਆ ਬਰਨਾਲਾ, ਜੈਤੋਂ ਆਉਂਦੀ ਹੈ। ਉਹਨਾਂ ਦੱਸਿਆ ਕਿ ਜਦ ਉਹ ਬਰਨਾਲਾ ਬੱਸ ਅੱਡੇ ਸ਼ਾਮ ਕਰੀਬ ਪੰਜ ਕੁ ਵਜੇ ਪੁੱਜੇ ਤਾਂ ਫਰੀਦਕੋਟ ਕਾਊਂਟਰ ‘ਤੇ ਡਰਾਈਵਰ ਬੱਸ ਲਗਾ ਕੇ ਬਾਥਰੂਮ ਚਲਾ ਗਿਆ ਅਤੇ ਉਹ ਇਸ ਦੌਰਾਨ ਸਵਾਰੀਆਂ ਦੀਆਂ ਟਿਕਟਾਂ ਕੱਟਣ ਲੱਗ ਪਿਆ। ਇਸ ਦੌਰਾਨ ਬੱਸ ਵਿੱਚ ਚਾਰ ਪੰਜ ਨੌਜਵਾਨ ਸਵਾਰ ਹੋਏ ਜਿਨਾਂ ਨੇ ਕੰਡਕਟਰ ਤਹਿਸੀਲਦਾਰ ਸਿੰਘ ਦਾ ਬੈਗ ਹੋਣ ਦੀ ਕੋਸ਼ਿਸ਼ ਕੀਤੀ ਅਤੇ ਕਈ ਹੋਰ ਸਵਾਰੀਆਂ ਦੇ ਬੈਗ ਧੱਕੇ ਨਾਲ ਖੋਹਣ ਦੀ ਕੋਸ਼ਿਸ਼ ਵੀ ਕੀਤੀ ਪ੍ਰੰਤੂ ਤਹਿਸੀਲਦਾਰ ਸਿੰਘ ਨੇ ਆਪਣਾ ਪੈਸਿਆਂ ਵਾਲਾ ਬੈਗ ਨਹੀਂ ਛੱਡਿਆ ਅਤੇ ਉਕਤ ਲੁਟੇਰਿਆਂ ਦਾ ਦਲੇਰੀ ਨਾਲ ਬੱਸ ਦੇ ਅੰਦਰ ਹੀ ਮੁਕਾਬਲਾ ਕੀਤਾ। ਇਸ ਦੌਰਾਨ ਉਕਤ ਹਮਲਾਵਰਾਂ/ਲੁਟੇਰਿਆਂ ਵਿੱਚੋਂ ਇੱਕ ਜਣੇ ਨੇ ਤਹਿਸੀਲਦਾਰ ਸਿੰਘ ਦੇ ਸਿਰ ਵਿੱਚ ਲੋਹੇ ਦੀ ਰਾਡ ਮਾਰ ਕੇ ਉਸਨੂੰ ਸਖਤ ਜ਼ਖਮੀ ਕਰ ਦਿੱਤਾ ਅਤੇ ਫਰਾਰ ਹੋ ਗਏ। ਜਖਮੀ ਕੰਡਕਟਰ ਦਾ ਕਹਿਣਾ ਹੈ ਕਿ ਉਕਤ ਨੌਜਵਾਨ ਲੁੱਟ ਖੋਹ ਦੀ ਮਨਸ਼ਾ ਨਾਲ ਹੀ ਆਏ ਸਨ ਅਤੇ ਬੱਸ ਦੇ ਅੰਦਰ ਹੀ ਜਿਨਾਂ ਨਾਲ ਉਸ ਦੀ ਝੜਪ ਦੌਰਾਨ ਉਸ ਦੇ ਬੈਗ ਵਿੱਚੋਂ ਕੁਝ ਨਗਦੀ ਬਾਹਰ ਖਿੰਡ ਗਈ ਅਤੇ ਕੁਝ ਨਗਦੀ ਉਹ ਲੈ ਵੀ ਗਏ। ਉਹ ਕਿਤੇ ਹਮਲਾਵਰਾਂ ਦਾ ਕੰਡਕਟਰ ਤਹਿਸੀਲਦਾਰ ਸਿੰਘ ਨੇ ਆਪਣੀ ਜਾਨ ‘ਤੇ ਖੇਡ ਕੇ ਮੁਕਾਬਲਾ ਕੀਤਾ ਜਿਸ ਨਾਲ ਹੋਰ ਸਵਾਰੀਆਂ ਦੀ ਲੁੱਟ ਹੋਣ ਤੋਂ ਬਚ ਗਈ। ਹਮਲੇ ‘ਚ ਜ਼ਖਮੀ ਹੋਏ ਕੰਡਕਟਰ ਤਹਿਸੀਲਦਾਰ ਸਿੰਘ ਨੂੰ ਬਰਨਾਲਾ ਦੇ ਸਿਵਲ ਹਸਪਤਾਲ ਦਾਖਲ ਕਰਵਾਇਆ ਗਿਆ ਹੈ, ਜਿੱਥੇ ਉਸਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦੇ ਹੋਏ ਉਕਤ ਘਟਨਾ ਦੀ ਜਾਣਕਾਰੀ ਦਿੱਤੀ। ਇਸ ਸਬੰਧੀ ਜਦ ਪੁਲਿਸ ਚੌਂਕੀ ਇੰਚਾਰਜ ਏਐਸਆਈ ਚਰਨਜੀਤ ਸਿੰਘ ਨਾਲ ਗੱਲ ਕੀਤੀ ਤਾਂ ਉਹਨਾਂ ਕਿਹਾ ਕਿ ਮਾਮਲਾ ਉਹਨਾਂ ਦੇ ਧਿਆਨ ਵਿੱਚ ਹੈ ਅਤੇ ਜ਼ਖਮੀ ਕੰਡਕਟਰ ਦੇ ਬਿਆਨਾਂ ਦੇ ਆਧਾਰ ‘ਤੇ ਬਣਦੀ ਕਾਰਵਾਈ ਕੀਤੀ ਜਾਵੇਗੀ। ਚੌਂਕੀ ਇੰਚਾਰਜ ਨੇ ਕਿਹਾ ਕਿ ਉਹ ਇਸ ਮਾਮਲੇ ਦੀ ਗੰਭੀਰਤਾ ਨਾਲ ਪੜ੍ਹਤਾਲ ਕਰ ਰਹੇ ਹਨ।
ਫੋਟੋ ਕੈਪਸ਼ਨ-ਸਿਵਲ ਹਸਪਤਾਲ ਵਿੱਚ ਦਾਖਲ ਘਟਨਾ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਕੰਡਕਟਰ ਤਹਿਸੀਲਦਾਰ ਸਿੰਘ।
Menu
