ਬਰਨਾਲਾ,24 ਮਾਰਚ (ਨਿਰਮਲ ਸਿੰਘ ਪੰਡੋਰੀ)-
-Gee98 news service
-ਭਾਈਚਾਰਕ ਏਕਤਾ ਨੂੰ ਮਜਬੂਤ ਕਰਨ ਦੀ ਪਰੰਪਰਾ ਅਤੇ ਵਾਤਾਵਰਣ ਨੂੰ ਸ਼ੁੱਧ ਰੱਖਣ ਪ੍ਰਤੀ ਆਪਣੀ ਜ਼ਿੰਮੇਵਾਰੀ ਦੀ ਭਾਵਨਾ ਨੂੰ ਬਰਕਰਾਰ ਰੱਖਦੇ ਹੋਏ ਬਰਨਾਲਾ ਦੇ ਨਾਨਕਸਰ ਰੋਡ ‘ਤੇ ਬਣੀ ਗਰੀਨ ਕਾਲੋਨੀ ਦੇ ਪਰਿਵਾਰ ਨੇ ਹੋਲੀ ਦਾ ਤਿਉਹਾਰ ਵਿਲੱਖਣਤਾ ਨਾਲ ਗਰੀਨ ਕਲੋਨੀ ਫੇਸ-2 ਵਿਚ ਧੂਮ ਧਾਮ ਨਾਲ ਮਨਾਇਆ। ਇਸ ਮੌਕੇ ਬਰਨਾਲਾ ਦੀ ਪ੍ਰਸਿੱਧ ਧਾਰਮਿਕ ਹਸਤੀ ਪੰਡਿਤ ਸ੍ਰੀ ਸ਼ਿਵ ਕੁਮਾਰ ਗੌੜ ਜੀ ਦੀ ਅਗਵਾਈ ਹੇਠ ਪੂਰੇ ਵਿਧੀ ਵਿਧਾਨ ਸਹਿਤ ਦੇਵੀ ਦੇਵਤਿਆਂ ਦੀ ਪੂਜਾ ਕੀਤੀ ਗਈ। ਇਸ ਪੂਰੇ ਸ਼ਾਨਦਾਰ ਸਮਾਗਮ ਦੀ ਰਹਿਨੁਮਾਈ ਗਰੀਨ ਪਰਿਵਾਰ ਦੇ ਸੰਸਥਾਪਕ ਸੇਠ ਲਖਪਤ ਰਾਏ ਜੀ ਨੇ ਕੀਤੀ ਜਿਨਾਂ ਨੇ ਪੂਜਾ ਸਮੇਂ ਜੋਤੀ ਪ੍ਰਚੰਡ ਕਰਨ ਦੀ ਰਸਮ ਦੀ ਅਦਾ ਕੀਤੀ। ਇਸ ਮੌਕੇ ਪ੍ਰਸਿੱਧ ਭਜਨ ਗਾਇਕ ਸ੍ਰੀ ਵਿਨੋਦ ਰਾਠੌਰ ਨੇ ਆਪਣੇ ਸੁਰੀਲੀ ਆਵਾਜ਼ ਵਿੱਚ ਧਾਰਮਿਕ ਰਚਨਾਵਾਂ ਨਾਲ ਹਾਜ਼ਰੀਨ ਨੂੰ ਰੂਹਾਨੀਅਤ ਨਾਲ ਜੋੜਿਆ। ਹੋਲੀ ਦੇ ਇਸ ਵਿਲੱਖਣ ਤਿਉਹਾਰ ਵਿੱਚ ਵੱਡੀ ਗਿਣਤੀ ਵਿੱਚ ਸ਼ਾਮਿਲ ਹੋਈਆਂ ਗਰੀਨ ਪਰਿਵਾਰ ਦੀਆਂ ਮਹਿਲਾਵਾਂ ਨੇ ਧਾਰਮਿਕ ਰਹੁ ਰੀਤਾਂ ਅਨੁਸਾਰ ਸ਼ਰਧਾ ਸਮੇਤ ਇਸ ਸਮਾਗਮ ਵਿੱਚ ਸ਼ਮੂਲੀਅਤ ਕਰਕੇ ਇਸ ਸਮਾਗਮ ਨੂੰ ਰੂਹਾਨੀਅਤ ਦੇ ਸਿਰੇ ‘ਤੇ ਪਹੁੰਚਦਾ ਕੀਤਾ। ਇਸ ਵਿਲੱਖਣ ਸਮਾਗਮ ਵਿੱਚ ਗਰੀਨ ਪਰਿਵਾਰ ਤੋਂ ਇਲਾਵਾ ਸ਼ਹਿਰ ਦੀਆਂ ਨਾਮਵਰ ਹਸਤੀਆਂ ਨੇ ਵੀ ਸ਼ਮੂਲੀਅਤ ਕੀਤੀ। ਹੋਲੀ ਮਨਾਉਣ ਦੇ ਇਸ ਵਿਲੱਖਣ ਸਮਾਗਮ ਵਿੱਚ ਰੰਗਾਂ ਦੀ ਬਜਾਏ ਫੁੱਲਾਂ ਨਾਲ ਹੋਲੀ ਖੇਡੀ ਗਈ ਜਿਸ ਵਿੱਚ ਹਾਜ਼ਰੀਨ ਨੇ ਇੱਕ ਦੂਜੇ ਉੱਪਰ ਗੁਲਾਬ ਸਮੇਤ ਵੱਖ-ਵੱਖ ਤਰ੍ਹਾਂ ਦੇ ਫੁੱਲ ਬਰਸਾਏ। ਇਸ ਮੌਕੇ ਹਾਜ਼ਰੀਨ ਲਈ ਸ਼ਾਨਦਾਰ ਪ੍ਰੀਤੀ ਭੋਜਨ ਦਾ ਪ੍ਰਬੰਧ ਵੀ ਕੀਤਾ ਗਿਆ ਸੀ। ਗਰੀਨ ਪਰਿਵਾਰ ਵੱਲੋਂ ਕਰਵਾਇਆ ਇਹ ਵਿਲੱਖਣ ਹੋਲੀ ਦਾ ਤਿਉਹਾਰ ਸਮੁੱਚੇ ਗਰੀਨ ਪਰਿਵਾਰ ਦੀ ਏਕਤਾ ਵਿੱਚ ਮੀਲ ਦਾ ਪੱਥਰ ਸਾਬਤ ਹੁੰਦਾ ਹੋਇਆ ਆਪਣੀਆਂ ਅਮਿਟ ਯਾਦਾਂ ਛੱਡ ਗਿਆ।
