- ਹਾਈਕੋਰਟ ਵੱਲੋਂ ਮੀਤ ਪ੍ਰਧਾਨ ਦੀ ਚੋਣ ਲਈ ਹੁਕਮ ਜਾਰੀ
ਬਰਨਾਲਾ,9 ਅਗਸਤ, ਨਿਰਮਲ ਸਿੰਘ ਪੰਡੋਰੀ :-
-ਨਗਰ ਕੌਂਸਲ ਬਰਨਾਲਾ ਦੀ ਕੁਰਸੀ ਦੇ ਆਲੇ ਦੁਆਲੇ ਕੌਂਸਲਰਾਂ ਦੀ ਮਹਿਫ਼ਿਲ ਇੱਕ ਵਾਰੀ ਫੇਰ ਲੱਗਣ ਜਾ ਰਹੀ ਹੈ। ਇੱਕ ਕੌਂਸਲਰ ਦੀ ਪਟੀਸ਼ਨ ਦੀ ਸੁਣਵਾਈ ਕਰਦੇ ਹੋਏ ਮਾਨਯੋਗ ਹਾਈਕੋਰਟ ਨੇ ਪ੍ਰਸ਼ਾਸਨ ਨੂੰ ਨਗਰ ਕੌਂਸਲ ਬਰਨਾਲਾ ਦੇ ਮੀਤ ਪ੍ਰਧਾਨਗੀ ਦੀ ਚੋਣ ਚਾਰ ਹਫ਼ਤਿਆਂ ਵਿੱਚ ਕਰਵਾਉਣ ਦੇ ਹੁਕਮ ਦਿੱਤੇ ਹਨ। ਬਰਨਾਲਾ ਦੀ ਜ਼ਿਮਨੀ ਚੋਣ ਤੋਂ ਪਹਿਲਾਂ ਸੱਤਾਧਿਰ ਲਈ ਇਹ ਇੱਕ ਵੱਡਾ ਸਿਆਸੀ ਇਮਤਿਹਾਨ ਹੋਵੇਗਾ ਜਿਸ ਨੂੰ ਪਾਸ ਕਰਨਾ ਸੱਤਾਧਿਰ ਲਈ ਵੱਡੀ ਸਿਰਦਰਦੀ ਵੀ ਹੋਵੇਗੀ ਕਿਉਂਕਿ ਪਹਿਲਾਂ ਹੀ ਪ੍ਰਧਾਨਗੀ ਦੀ ਚੋਣ ਦੇ ਇਮਤਿਹਾਨ ਵਿੱਚੋਂ ਸੱਤਾਧਿਰ ਫੇਲ ਹੋ ਚੁੱਕੀ ਹੈ। ਬਰਨਾਲੇ ਦੀ ਰਾਜਨੀਤੀ ਸਬੰਧੀ ਚੁਟਕੀਆਂ ਲੈਣ ਵਾਲੇ ਨਗਰ ਕੌਂਸਲ ਦੇ ਮੀਤ ਪ੍ਰਧਾਨਗੀ ਦੀ ਚੋਣ ਨੂੰ ਜ਼ਿਮਨੀ ਚੋਣ ਦਾ ਸੈਮੀਫਾਈਨਲ ਵੀ ਮੰਨ ਰਹੇ ਹਨ। ਸ਼ਾਇਦ ! ਇਸੇ ਕਰਕੇ ਇਹ ਸ਼ੰਕਾ ਵੀ ਜਤਾਈ ਜਾ ਰਹੀ ਹੈ ਕਿ ਹਾਈਕੋਰਟ ਕੋਲੇ ਕਿਸੇ ਆਨੇ ਬਹਾਨੇ ਮੀਤ ਪ੍ਰਧਾਨਗੀ ਦੀ ਚੋਣ ਨੂੰ ਟਾਲਣ ਦੇ ਯਤਨ ਵੀ ਕੀਤੇ ਜਾਣਗੇ। ਅਸਲ ਵਿੱਚ ਨਗਰ ਕੌਸਲ ਬਰਨਾਲਾ ਦੀ ਕੁਰਸੀ ‘ਤੇ ਕਾਬਜ਼ ਹੋਣ ਲਈ ਸੱਤਾਧਿਰ ਲੋੜੀਂਦੇ ਕੌਂਸਲਰਾਂ ਦਾ ਬਹੁਮਤ ਨਾ ਹੋਣ ਦੇ ਬਾਵਜੂਦ ਵੀ ਪਹਿਲਾਂ ਹੀ “ਬੋਕ ਦੇ ਸਿੰਗਾਂ ਨੂੰ ਹੱਥ” ਲਾਉਣ ਵਾਲੀ ਸਥਿਤੀ ਵਿੱਚੋਂ ਗੁਜ਼ਰ ਰਹੀ ਹੈ ਕਿਉਂਕਿ ਪ੍ਰਧਾਨਗੀ ਦੀ ਕੁਰਸੀ ‘ਤੇ ਕਬਜ਼ਾ ਕਰਨ ਲਈ “ਭਾਨੂਵਤੀ ਨੇ ਕਿਣਕਾ ਕਿਣਕਾ ਕਰਕੇ ਕੁਨਬਾ” ਜੋੜਿਆ ਸੀ ਪ੍ਰੰਤੂ ਵਿਰੋਧੀ ਧਿਰ ਨੇ ਹਾਈਕੋਰਟ ਪੁੱਜ ਕੇ ਸੇਵੀਆਂ ‘ਚ ਲੂਣ ਪਾ ਦਿੱਤਾ ਸੀ। ਇੱਥੇ ਇਹ ਵੀ ਦੱਸ ਦੇਈਏ ਕਿ ਮਾਨਯੋਗ ਹਾਈਕੋਰਟ ਨੇ 8 ਅਗਸਤ ਨੂੰ ਪ੍ਰਧਾਨਗੀ ਦੀ ਪਟੀਸ਼ਨ ਸਬੰਧੀ ਸੁਣਵਾਈ ਕਰਦੇ ਹੋਏ 13 ਅਗਸਤ ਤੱਕ ਆਪਣਾ ਫੈਸਲਾ ਸੁਰੱਖਿਅਤ ਰੱਖ ਲਿਆ ਹੈ। ਚਰਚਾ ਇਹ ਵੀ ਹੈ ਕਿ ਜੇਕਰ ਹਾਈਕੋਰਟ ਦਾ ਫੈਸਲਾ ਵਿਰੋਧੀ ਧਿਰ ਦੇ ਪੱਖ ਵਿੱਚ ਆ ਗਿਆ ਅਤੇ ਮੀਤ ਪ੍ਰਧਾਨਗੀ ਦੀ ਕੁਰਸੀ ‘ਤੇ ਵੀ ਵਿਰੋਧੀ ਧਿਰ ਕਾਬਜ਼ ਹੋਣ ਵਿੱਚ ਕਾਮਯਾਬ ਹੋ ਗਈ ਤਾਂ ਜ਼ਿਮਨੀ ਚੋਣ ਤੋਂ ਪਹਿਲਾਂ ਦੇ ਸੈਮੀਫਾਈਨਲ ਦਾ ਡੇਢ ਪੁਆਇੰਟ ਵਿਰੋਧੀ ਧਿਰ ਦੇ ਪੱਖ ਵਿੱਚ ਮੰਨਿਆ ਜਾਵੇਗਾ ਪਰੰਤੂ ਜੇਕਰ ਸੱਤਾਧਿਰ ਦੋਵੇਂ ਕੁਰਸੀਆਂ ‘ਤੇ ਕਾਬਜ਼ ਹੋ ਗਈ ਤਾਂ ਜ਼ਿਮਨੀ ਚੋਣ ਲਈ ਵਿਰੋਧੀਆਂ ਨੂੰ ਆਪਣੇ ਪੱਟਾਂ ਨੂੰ ਹੋਰ ਤੇਲ ਲਾਉਣਾ ਪਵੇਗਾ। ਦੂਜੇ ਪਾਸੇ ਚਰਚਾ ਅਨੁਸਾਰ ਮੀਤ ਪ੍ਰਧਾਨਗੀ ਦੀ ਚੋਣ ਲਈ ਵਿਰੋਧੀ ਧਿਰ ਵੱਲੋਂ ਪਟੀਸ਼ਨਕਰਤਾ ਨੂੰ ਹੀ ਮੈਦਾਨ ਵਿੱਚ ਉਤਾਰਿਆ ਜਾਵੇਗਾ ਜਦਕਿ ਸੱਤਾਧਿਰ ਵੱਲੋਂ ਇੱਕ ਦਲ ਬਦਲੂ ਕੌਂਸਲਰ ਨੂੰ ਥਾਪੀ ਦੇਣ ਦੇ ਚਰਚੇ ਹਨ। ਬਹਰਹਾਲ ! ਨਗਰ ਕੌਂਸਲ ਦੀ ਕੁਰਸੀ ਦੇ ਮਾਮਲੇ ‘ਚ ਲੋਕਾਂ ਲਈ ਇੱਕ ਹੋਰ ਦਿਲਚਸਪ ਗੇਮ ਹੋਣ ਜਾ ਰਹੀ ਹੈ।
ਨਗਰ ਕੌਸਲ ਬਰਨਾਲਾ : ਵੱਡੇ ਮੀਆਂ ਦੀ ਚੋਣ ਤੋਂ ਪਹਿਲਾਂ ਛੋਟੇ ਮੀਆਂ ਦੀ ਚੋਣ ਲਈ ਬੱਝੇਗਾ ਅਖਾੜਾ…ਜ਼ਿਮਨੀ ਚੋਣ ਤੋਂ ਪਹਿਲਾਂ ਹੋਵੇਗਾ ਸੈਮੀਫਾਈਨਲ
