ਚੰਡੀਗੜ੍ਹ,29 ਅਗਸਤ, Gee98 news service
-ਸਾਡੇ ਮੁਲਕ ਦੇ ਕਾਨੂੰਨ ਦੀਆਂ ਖ਼ਾਮੀਆਂ ਅਕਸਰ ਸਾਹਮਣੇ ਆਉਂਦੀਆਂ ਰਹਿੰਦੀਆਂ ਹਨ, ਇਨਾਂ ਖ਼ਾਮੀਆਂ ਕਰਕੇ ਕਈ ਵਾਰੀ ਕੁਝ ਨਿਰਦੋਸ਼ ਸਾਰੀ ਜ਼ਿੰਦਗੀ ਜੇਲ੍ਹ ਵਿੱਚ ਸੜਦੇ ਰਹਿੰਦੇ ਹਨ। ਅਜਿਹੀ ਇੱਕ ਘਟਨਾ ਬਿਹਾਰ ਤੋਂ ਸਾਹਮਣੇ ਆਈ ਹੈ ਜਿੱਥੋਂ ਦੀ ਬਕਸਰ ਜੇਲ੍ਹ ਵਿੱਚ ਬੰਦ ਇੱਕ ਕੈਦੀ ਵੱਲੋਂ ਲਿਖਿਆ ਪੱਤਰ ਵਾਇਰਲ ਹੋਣ ਤੋਂ ਬਾਅਦ ਬਿਹਾਰ ਦੇ ਪ੍ਰਸ਼ਾਸਨ ਵਿੱਚ ਤਰਥੱਲੀ ਮੱਚ ਗਈ ਹੈ। ਬਿਹਾਰ ਦੀ ਬਕਸਰ ਜੇਲ੍ਹ ਵਿੱਚ ਬੰਦ ਕੈਦੀ ਸੁਨੀਲ ਤਿਵਾਰੀ ਵੱਲੋਂ ਇਹ ਪੱਤਰ ਇੱਕ ਪੈਂਫਲਿਟ ਦੇ ਰੂਪ ਵਿੱਚ ਵਾਇਰਲ ਹੋ ਰਿਹਾ ਹੈ। ਕੈਦੀ ਨੇ ਖੁਲਾਸਾ ਕੀਤਾ ਹੈ ਕਿ ਆਪਣੀ ਜਿਹੜੀ ਪਤਨੀ ਦੇ ਕਤਲ ਵਿੱਚ ਉਹ 13 ਸਾਲ ਤੋਂ ਸਜ਼ਾ ਕੱਟ ਰਿਹਾ ਉਸ ਦੀ ਉਹ ਪਤਨੀ ਜਿੰਦਾ ਹੈ। ਕੈਦੀ ਨੇ ਆਪਣੇ ਪੱਤਰ ਵਿੱਚ ਇਹ ਵੀ ਸਨਸਨੀਖੇਜ ਖੁਲਾਸਾ ਕੀਤਾ ਕਿ ਉਸਦੀ ਮਾਂ ਵੀ ਆਪਣੀ ਨੂੰਹ ਦੇ ਕਤਲ ਵਿੱਚ ਸਜ਼ਾ ਕੱਟਦੀ ਹੋਈ ਜੇਲ੍ਹ ਵਿੱਚ ਹੀ ਮਰ ਗਈ। ਕੈਦੀ ਦਾ ਕਹਿਣਾ ਹੈ ਕਿ ਉਹ ਇਹ ਚਿੱਠੀ ਬਕਸਰ ਜੇਲ੍ਹ ਦੇ ਗਾਂਧੀ ਵਾਰਡ ਤੋਂ ਲਿਖ ਰਿਹਾ ਹੈ। ਕੈਦੀ ਨੇ ਚਿੱਠੀ ਵਿੱਚ ਲਿਖਿਆ ਕਿ “ਸਾਲ 2011 ਵਿੱਚ ਉਸਦਾ ਵਿਆਹ ਹੋਇਆ, ਉਸਦੀ ਪਤਨੀ ਡੀਏਵੀ ਪਬਲਿਕ ਸਕੂਲ, ਡੁਮਰਾਓ ਵਿੱਚ ਪੜ੍ਹਾਉਂਦੀ ਸੀ। ਦੋਵਾਂ ਦਾ ਇੱਕ ਪੁੱਤਰ ਸੀ, ਸਭ ਕੁਝ ਠੀਕ ਚੱਲ ਰਿਹਾ ਸੀ। ਇਸ ਸਕੂਲ ਦੇ ਪ੍ਰਿੰਸੀਪਲ, ਜੋ ਉਸ ਸਮੇਂ ਅਧਿਆਪਕ ਇੰਚਾਰਜ ਸਨ, ਦਾ ਘਰ ਆਉਣਾ-ਜਾਣਾ ਸੀ। 15 ਅਗਸਤ 2012 ਨੂੰ ਵੀ. ਆਨੰਦ ਨਾਂ ਦੇ ਇਸ ਅਧਿਆਪਕ ਨੂੰ ਉਸਦੀ ਮਾਂ ਨੇ ਉਸਦੀ ਪਤਨੀ ਨਾਲ ਇਤਰਾਜ਼ਯੋਗ ਹਾਲਤ ਵਿੱਚ ਦੇਖਿਆ ਸੀ। ਪੱਤਰ ਵਿੱਚ ਅੱਗੇ ਲਿਖਿਆ ਹੈ ਕਿ ਇਸ ਤੋਂ ਬਾਅਦ ਮਾਂ ਨੇ ਰੌਲਾ ਪਾਉਣਾ ਸ਼ੁਰੂ ਕਰ ਦਿੱਤਾ। ਸਕੂਲ ਟੀਚਰ ਨੇ ਉਸ ਦੀਆਂ ਅੱਖਾਂ ‘ਚ ਕੁਝ ਪਾ ਦਿੱਤਾ ਅਤੇ ਭੱਜ ਗਿਆ, ਜਿਸ ਤੋਂ ਬਾਅਦ ਪਤਨੀ ਵੀ ਘਰ ਛੱਡ ਕੇ ਚਲੀ ਗਈ। ਮੇਰੇ ਸਹੁਰਿਆਂ ਨੇ ਕੇਸ ਦਾਇਰ ਕੀਤਾ, ਜਿਸ ਤੋਂ ਬਾਅਦ ਮੈਨੂੰ ਤੇ ਮਾਂ ਨੂੰ ਉਮਰ ਕੈਦ ਦੀ ਸਜ਼ਾ ਹੋਈ ਅਤੇ ਮੇਰੀ ਮਾਂ ਦੀ ਜੇਲ੍ਹ ਵਿਚ ਮੌਤ ਹੋ ਗਈ। ਸੁਨੀਲ ਤਿਵਾਰੀ ਨਾਂ ਦੇ ਇਸ ਕੈਦੀ ਦਾ ਕਹਿਣਾ ਹੈ ਕਿ ਜਦੋਂ ਮੈਂ ਆਪਣੀ ਪਤਨੀ ਕੰਚਨ ਤਿਵਾਰੀ ਨੂੰ ਫੇਸਬੁੱਕ ‘ਤੇ ਦੇਖਿਆ ਤਾਂ ਮੈਂ ਹੈਰਾਨ ਰਹਿ ਗਿਆ। ਉਸਨੇ ਆਪਣਾ ਨਾਮ ਬਦਲ ਕੇ ਸ਼੍ਰੀਪਥੀ ਵਾਸਵੀ ਰੱਖ ਲਿਆ ਹੈ।ਸੁਨੀਲ ਨੇ ਅੱਗੇ ਲਿਖਿਆ ਕਿ ਵੀ. ਆਨੰਦ ਹੁਣ ਉਸੇ ਸਕੂਲ ਦੇ ਪ੍ਰਿੰਸੀਪਲ ਹਨ ਅਤੇ ਮੇਰੀ ਪਤਨੀ ਵੀ ਉਸੇ ਸਕੂਲ ਵਿੱਚ ਪੜ੍ਹਾ ਰਹੀ ਹੈ। ਜਿਸ ਪਤਨੀ ਦੀ ਹੱਤਿਆ ਦੀ ਸਜ਼ਾ ਮੈਂ ਕੱਟ ਰਿਹਾ ਹਾਂ ਉਹ ਜ਼ਿੰਦਾ ਹੈ ਪਰ ਮੈਂ ਜੇਲ੍ਹ ਵਿਚ ਹਾਂ। ਕੈਦੀ ਨੇ ਪੱਤਰ ਵਿੱਚ ਖੁਲਾਸਾ ਕੀਤਾ ਕਿ “ਮੇਰੇ ਦੋਸਤ ਨੇ ਵੀ ਕੰਚਨ ਤਿਵਾਰੀ ਦੇ ਘਰ ਪਹੁੰਚ ਕੇ ਜਾਂਚ ਕੀਤੀ”। ਸੁਨੀਲ ਦਾ ਕਹਿਣਾ ਹੈ ਕਿ ਉਸ ਦੇ ਜ਼ਿੰਦਾ ਹੋਣ ‘ਤੇ ਵੀ ਮੈਂ 13 ਸਾਲ ਜੇਲ੍ਹ ਵਿੱਚ ਰਹਿਣ ਦੀ ਸਜ਼ਾ ਨਹੀਂ ਝੱਲ ਪਾ ਰਿਹਾ।ਸੁਨੀਲ ਨੇ ਲਿਖਿਆ ਕਿ ਸ਼ਾਇਦ ਮੈਂ ਇਹ ਬਰਦਾਸ਼ਤ ਨਹੀਂ ਕਰ ਪਾਵਾਂਗਾ ਅਤੇ ਖੁਦਕੁਸ਼ੀ ਕਰ ਸਕਦਾ ਹਾਂ। ਮੈਂ ਡਰਪੋਕ ਨਹੀਂ ਹਾਂ ਪਰ ਮੇਰੀ ਪਿੱਠ ਵਿੱਚ ਛੁਰਾ ਠੋਕਿਆ ਹੈ ਅਤੇ ਧੋਖਾ ਦੁਸ਼ਮਣ ਨੇ ਨਹੀਂ ਸਗੋਂ ਆਪਣੇ ਹੀ ਲੋਕਾਂ ਨੇ ਕੀਤਾ ਹੈ। ਸੁਨੀਲ ਨੇ ਲੋਕਾਂ ਨੂੰ ਇਸ ਚਿੱਠੀ ਨੂੰ ਵੱਧ ਤੋਂ ਵੱਧ ਸ਼ੇਅਰ ਕਰਨ ਦੀ ਅਪੀਲ ਕੀਤੀ ਹੈ, ਤਾਂ ਜੋ ਲੋਕਾਂ ਨੂੰ ਪਤਾ ਲੱਗ ਸਕੇ ਕਿ ਸਮਾਜ ਵਿੱਚ ਸਿਰਫ਼ ਔਰਤਾਂ ਹੀ ਤਸ਼ੱਦਦ ਨਹੀਂ ਸਹਿੰਦਿਆਂ ਮਰਦ ਵੀ ਇਸਦਾ ਸ਼ਿਕਾਰ ਹੁੰਦੇ ਹਨ। ਇਸ ਪੱਤਰ ਦੇ ਵਾਇਰਲ ਹੋਣ ਤੋਂ ਬਾਅਦ ਪ੍ਰਸ਼ਾਸਨ ਵਿੱਚ ਦਹਿਸ਼ਤ ਦਾ ਮਾਹੌਲ ਹੈ। ਬਕਸਰ ਦੇ ਐਸਪੀ ਮਨੀਸ਼ ਕੁਮਾਰ ਨੇ ਦੱਸਿਆ ਕਿ ਅਜਿਹੇ ਪੈਂਫਲੇਟ ਵੰਡਣ ਦੀ ਸੂਚਨਾ ਮਿਲੀ ਹੈ। ਮਾਮਲੇ ਦੀ ਜਾਂਚ ਲਈ ਸਿਟੀ ਥਾਣਾ ਮੁਖੀ ਨੂੰ ਹਦਾਇਤਾਂ ਦਿੱਤੀਆਂ ਗਈਆਂ ਹਨ। ਜਾਂਚ ਤੋਂ ਬਾਅਦ ਜੋ ਵੀ ਤੱਥ ਸਾਹਮਣੇ ਆਉਣਗੇ, ਕਾਰਵਾਈ ਕੀਤੀ ਜਾਵੇਗੀ।
Menu
