ਚੰਡੀਗੜ੍ਹ,5 ਸਤੰਬਰ, Gee98 news service
-ਪੰਜਾਬ ਦੇ ਇੱਕ ਹੋਰ ਵਿਧਾਇਕ ਨੇ ਵਿਧਾਇਕੀ ਤੋਂ ਅਸਤੀਫ਼ਾ ਦੇਣ ਦੀ ਚਿਤਾਵਨੀ ਦਿੱਤੀ ਹੈ, ਜੇਕਰ ਅਜਿਹਾ ਹੋਇਆ ਤਾਂ ਲੋਕ ਸਭਾ ਲਈ ਚੁਣੇ ਗਏ ਚਾਰ ਵਿਧਾਇਕਾਂ ਦੀਆਂ ਖਾਲੀ ਸੀਟਾਂ ‘ਤੇ ਹੋਣ ਵਾਲੀ ਜ਼ਿਮਨੀ ਚੋਣ ਦੇ ਨਾਲ ਇੱਕ ਹੋਰ ਹਲਕੇ ਵਿੱਚ ਜ਼ਿਮਨੀ ਚੋਣ ਹੋ ਸਕਦੀ ਹੈ। ਸਹਿਕਾਰੀ ਖੰਡ ਮਿੱਲ ਭੋਗਪੁਰ ‘ਚ ਲੱਗ ਰਹੇ ਬਾਇਓ ਸੀਐੱਨਜੀ ਪਲਾਂਟ ਨੂੰ ਲੈ ਕੇ ਵਿਧਾਇਕ ਸੁਖਵਿੰਦਰ ਸਿੰਘ ਕੋਟਲੀ ਨੇ ਅਸਤੀਫ਼ਾ ਤੱਕ ਦੇਣ ਦੀ ਗੱਲ ਕਹੀ ਹੈ। ਇਸ ਸੀਐਨਜੀ ਪਲਾਂਟ ਦੇ ਮੁੱਦੇ ‘ਤੇ ਵਿਧਾਨ ਸਭਾ ਸੈਸ਼ਨ ਦੇ ਤੀਜੇ ਦਿਨ ਜੰਮ ਕੇ ਹੰਗਾਮਾ ਵੀ ਹੋਇਆ। ਭੋਗਪੁਰ ਦੀ ਖੰਡ ਮਿੱਲ ਵਿੱਚ ਲੱਗ ਰਹੇ ਇਸ ਸੀਐਨਜੀ ਪਲਾਂਟ ਦਾ ਵਿਧਾਇਕ ਕੋਟਲੀ ਵਿਰੋਧ ਕਰ ਰਹੇ ਹਨ। ਵਿਧਾਇਕ ਸੁਖਵਿੰਦਰ ਸਿੰਘ ਕੋਟਲੀ ਨੇ ਜ਼ੀਰੋ ਆਵਰ ਦੌਰਾਨ ਪੰਜਾਬ ਵਿਧਾਨ ਸਭਾ ‘ਚ ਬੋਲਦਿਆਂ ਕਿਹਾ ਕਿ ਭੋਗਪੁਰ ਇਲਾਕੇ ਦੇ ਲੋਕਾਂ ਵੱਲੋਂ ਖੰਡ ਮਿੱਲ ਬਣਾਉਣ ਲਈ ਲਗਭਗ 100 ਏਕੜ ਜ਼ਮੀਨ ਸਰਕਾਰ ਨੂੰ ਦਿੱਤੀ ਸੀ ਤਾਂਕਿ ਉਸ ਜ਼ਮੀਨ ‘ਚ ਖੰਡ ਮਿੱਲ ਲੱਗੇ, ਕਿਸਾਨ ਗੰਨੇ ਦੀਆਂ ਟਰਾਲੀਆਂ ਖੜ੍ਹੀਆਂ ਕਰ ਸਕਣ, ਬਾਕੀ ਬਚੀ ਜ਼ਮੀਨ ਉੱਪਰ ਕਿਸਾਨਾਂ ਨੂੰ ਗੰਨੇ ਦੀਆਂ ਨਵੀਆਂ ਕਿਸਮਾਂ ਉਗਾਉਣ ‘ਚ ਸਹੂਲਤ ਮਿਲ ਸਕੇ। ਵਿਧਾਇਕ ਕੋਟਲੀ ਨੇ ਪੰਜਾਬ ਸਰਕਾਰ ਕੋਲੋਂ ਸਵਾਲ ਕੀਤਾ ਕਿ ਪਲਾਂਟ ਲੱਗਣ ਨਾਲ ਮਿੱਲ ਕੋਲ ਜ਼ਮੀਨ ਨਹੀ ਬਚੇਗੀ, ਗੰਨੇ ਦੀਆਂ ਨਵੀਆਂ ਖੋਜਾਂ ਲਈ ਗੰਨਾਂ ਕਿੱਥੇ ਪੈਦਾ ਕੀਤਾ ਜਾਵੇਗਾ, ਜਲੰਧਰ ਸ਼ਹਿਰ ਦਾ ਕੂੜਾ ਤੇ ਨਕੋਦਰ ਮਿੱਲ ਤੇ ਨਵਾਂਸ਼ਹਿਰ ਮਿੱਲ ਦਾ ਵੇਸਟਜ ਇੱਥੇ ਕਿਉਂ ਆਵੇ, ਮਿੱਲ ਦੇ ਚੱਲਣ ਵੇਲੇ ਗੰਨੇ ਦੀਆਂ ਟਰਾਲੀਆਂ ਖੜੀਆਂ ਕਰਨ ਨੂੰ ਜਗਾ ਨਹੀ ਹੁੰਦੀ, ਜਦੋ 300-400 ਗੱਡੀਆਂ ਜਲੰਧਰ ਤੋਂ ਕੂੜੇ ਤੇ ਨਵਾਂਸ਼ਹਿਰ ਤੇ ਨਕੋਦਰ ਮਿੱਲ ਤੋਂ ਵੇਸਟਜ ਰੋਜਾਨਾਂ ਹੋਰ ਆਵੇਗੀ ਤੇ ਕੂੜੇ ਤੇ ਵੇਸਟਜ ਨਾਲ ਡੰਪ ਬਣੇਗਾ ਤੇ ਜੀਟੀ ਰੋਡ ਤੇ ਸ਼ਹਿਰ ਤੇ ਇਲਾਕੇ ਅੰਦਰ ਟ੍ਰੈਫਿਕ ਦੀ ਮੁਸ਼ਕਲ ਹੋਵੇਗੀ, ਪ੍ਰਦੂਸ਼ਨ ਹੋਵੇਗਾ ਤੇ ਪਲਾਂਟ ਦਾ ਗੰਦਾ ਪਾਣੀ ਜ਼ਮੀਨ ਅੰਦਰ ਜਾ ਕੇ ਪੀਣ ਵਾਲੇ ਪਾਣੀ ਨੂੰ ਖ਼ਰਾਬ ਕਰੇਗਾ ਤੇ ਗਰੀਨ ਜ਼ੋਨ ‘ਚ ਆਇਆ ਇਹ ਇਲਾਕਾ ਤਬਾਹ ਹੋ ਜਾਵੇਗਾ। ਉਨ੍ਹਾਂ ਸਾਫ਼ ਸ਼ਬਦਾਂ ‘ਚ ਕਿਹਾ ਕਿ ਖੰਡ ਮਿੱਲ ਦੇ ਚੇਅਰਮੈਨ ਤੇ ਪਲਾਂਟ ਮਾਲਕਾਂ ਦੇ ਵਿਚਕਾਰ ਪਲਾਂਟ ਲੱਗਣ ਦਾ ਸਮਝੌਤਾ ਰੱਦ ਕੀਤਾ ਜਾਵੇ। ਉਨ੍ਹਾਂ ਨਾਲ ਹੀ ਇਹ ਚਿਤਾਵਨੀ ਵੀ ਦਿੱਤੀ ਕਿ ਜੇਕਰ ਆਦਮਪੁਰ ਹਲਕੇ ਦੇ ਲੋਕਾਂ ਦੀ ਮਰਜ਼ੀ ਦੇ ਖ਼ਿਲਾਫ਼ ਇਹ ਪਲਾਂਟ ਲਗਾਉਣ ਦੀ ਕੋਸ਼ਿਸ਼ ਵੀ ਕੀਤੀ ਤਾਂ ਇਸ ਨੂੰ ਲੱਗਣ ਨਹੀਂ ਦਿਆਂਗਾ। ਉਨ੍ਹਾਂ ਨਾਲ ਹੀ ਕਿਹਾ ਕਿ ਇਸ ਮੁੱਦੇ ਲਈ ਜੇਕਰ ਪੰਜਾਬ ਵਿਧਾਨ ਸਭਾ ਤੋਂ ਅਸਤੀਫ਼ਾ ਵੀ ਦੇਣਾ ਪਿਆ ਤਾਂ ਪਿੱਛੇ ਨਹੀਂ ਹਟਾਂਗਾ।
Menu
