ਚੰਡੀਗੜ੍ਹ,10 ਅਕਤੂਬਰ, Gee98 news service
-ਚੋਣ ਹਾਰਨ ਤੋਂ ਬਾਅਦ ਹਰਿਆਣਾ ਦੇ ਇੱਕ ਵਿਧਾਇਕ ਨੇ ਆਪਣੇ ਹਲਕੇ ਦੀਆਂ ਸਕੂਲ ਕਾਲਜ ਜਾਂਦੀਆਂ ਧੀਆਂ ਲਈ ਸ਼ੁਰੂ ਕੀਤੀ ਇੱਕ ਵੱਡੀ ਸਹੂਲਤ ਬੰਦ ਕਰ ਦਿੱਤੀ ਹੈ। ਹਰਿਆਣਾ ਦੇ ਰੋਹਤਕ ਦੀ ਮਹਿਮ ਸੀਟ ਤੋਂ ਚੋਣ ਹਾਰਨ ਵਾਲੇ ਸਾਬਕਾ ਵਿਧਾਇਕ ਬਲਰਾਜ ਕੁੰਡੂ ਨੇ ਲੜਕੀਆਂ ਲਈ ਮੁਫਤ ਬੱਸ ਸੇਵਾ ਬੰਦ ਕਰ ਦਿੱਤੀ ਹੈ। ਹਰਿਆਣਾ ਜਨਸੇਵਕ ਪਾਰਟੀ ਦੇ ਆਗੂ ਬਲਰਾਜ ਕੁੰਡੂ ਨੇ ਮਹਿਮ ਵਿਧਾਨ ਸਭਾ ਹਲਕੇ ਦੇ ਪਿੰਡਾਂ ਤੋਂ ਮਹਿਮ ਅਤੇ ਰੋਹਤਕ ਦੇ ਸਕੂਲਾਂ, ਕਾਲਜਾਂ ਅਤੇ ਯੂਨੀਵਰਸਿਟੀਆਂ ਵਿੱਚ ਪੜਦੀਆਂ ਲੜਕੀਆਂ ਨੂੰ ਲਿਜਾਣ ਲਈ 18 ਬੱਸਾਂ ਮੁਫਤ ਚਲਾਈਆਂ ਸਨ ਜਿਨਾਂ ਨੂੰ ਉਸਨੇ ਚੋਣ ਹਾਰਨ ਤੋਂ ਬਾਅਦ ਬੰਦ ਕਰ ਦਿੱਤਾ ਹੈ। ਚੋਣ ਹਾਰਨ ਤੋਂ ਬਾਅਦ ਕੁੰਡੂ ਨੇ ਆਪਣੇ ਸਮਰਥਕਾਂ ਦਾ ਇਕੱਠ ਬੁਲਾਇਆ ਅਤੇ ਵਿਦਿਆਰਥਣਾਂ ਲਈ ਸ਼ੁਰੂ ਕੀਤੀਆਂ ਇਹ ਸਾਰੀਆਂ ਬੱਸਾਂ ਤੁਰੰਤ ਬੰਦ ਕਰਨ ਦਾ ਐਲਾਨ ਕੀਤਾ। ਬਲਰਾਜ ਕੂੰਡੂ ਦਾ ਕਹਿਣਾ ਹੈ ਕਿ ਉਸ ਦੇ ਸਮਰਥਕ ਚੋਣ ਹਾਰਨ ਕਰਕੇ ਨਾਰਾਜ਼ ਹਨ ਅਤੇ ਉਸਦੇ ਸਮਰਥਕਾਂ ਦਾ ਕਹਿਣਾ ਹੈ ਕਿ ਨਵੇਂ ਚੁਣੇ ਗਏ ਵਿਧਾਇਕ ਨੂੰ ਹੁਣੇ ਤੋਂ ਹੀ ਲੜਕੀਆਂ ਲਈ ਬੱਸਾਂ ਸ਼ੁਰੂ ਕਰਨੀਆਂ ਚਾਹੀਦੀਆਂ ਹਨ। ਬਲਰਾਜ ਕੁੰਡੂ ਨੇ ਕਿਹਾ ਕਿ ਉਨ੍ਹਾਂ ਦਾ ਮਨ ਬਹੁਤ ਦੁਖੀ ਹੈ। ਉਨ੍ਹਾਂ ਨੇ ਸਮਾਜ ਸੇਵਾ ਨੂੰ ਰਾਜਨੀਤੀ ਲਈ ਨਹੀਂ ਚੁਣਿਆ ਪਰ ਸਮਰਥਕਾਂ ਦਾ ਕਹਿਣਾ ਹੈ ਕਿ ਨਵੇਂ ਵਿਧਾਇਕ ਨੂੰ ਕੁਝ ਸਾਲਾਂ ਲਈ ਧੀਆਂ ਲਈ ਬੱਸਾਂ ਚਲਾਉਣ ਦਾ ਮੌਕਾ ਦਿੱਤਾ ਜਾਣਾ ਚਾਹੀਦਾ ਹੈ। ਬਲਰਾਜ ਕੁੰਡੂ ਨੇ 2017-18 ਵਿੱਚ ਲੜਕੀਆਂ ਲਈ ਮੁਫਤ ਬੱਸਾਂ ਸ਼ੁਰੂ ਕੀਤੀਆਂ ਸਨ। ਪਹਿਲਾਂ 8 ਬੱਸਾਂ ਚਲਾਈਆਂ ਗਈਆਂ ਸਨ ਅਤੇ ਬਾਅਦ ਵਿੱਚ ਬੱਸਾਂ ਦੀ ਗਿਣਤੀ ਵਿੱਚ ਲਗਾਤਾਰ ਵਾਧਾ ਕੀਤਾ ਗਿਆ ਅਤੇ ਹੁਣ 18 ਬੱਸਾਂ ਚੱਲ ਰਹੀਆਂ ਸਨ। ਲਗਭਗ 40-42 ਪਿੰਡਾਂ ਦੀਆਂ ਕੁੜੀਆਂ ਇਨ੍ਹਾਂ ਬੱਸਾਂ ਰਾਹੀਂ ਸਕੂਲ, ਕਾਲਜ ਅਤੇ ਯੂਨੀਵਰਸਿਟੀ ਜਾਂਦੀਆਂ ਸਨ। ਜਿਸ ਕਾਰਨ ਲੜਕੀਆਂ ਨੂੰ ਵੀ ਸਹੂਲਤਾਂ ਮਿਲੀਆਂ ਅਤੇ ਪਰਿਵਾਰ ‘ਤੇ ਕੋਈ ਆਰਥਿਕ ਬੋਝ ਨਹੀਂ ਪਿਆ। ਇਨ੍ਹਾਂ ਬੱਸਾਂ ਵਿੱਚ ਕੁੜੀਆਂ ਰੋਜ਼ ਰੋਹਤਕ ਵਿੱਚ ਆਪਣੇ ਕਾਲਜਾਂ ਅਤੇ ਯੂਨੀਵਰਸਿਟੀਆਂ ਨੂੰ ਜਾਂਦੀਆਂ ਸਨ। ਲੜਕੀਆਂ ਦਾ ਪਿੰਡ ਰੋਹਤਕ ਸ਼ਹਿਰ ਤੋਂ 30-40 ਕਿਲੋਮੀਟਰ ਦੀ ਦੂਰੀ ‘ਤੇ ਹੈ ਅਤੇ ਲਗਭਗ ਇਕ ਬੱਸ ਰੋਜ਼ਾਨਾ 100 ਕਿਲੋਮੀਟਰ ਦਾ ਸਫਰ ਕਰਦੀ ਸੀ। ਬੱਸਾਂ ਬੰਦ ਹੋਣ ਤੋਂ ਬਾਅਦ ਲੜਕੀਆਂ ਕੋਲ ਰੋਡਵੇਜ਼ ਦੀਆਂ ਬੱਸਾਂ, ਪ੍ਰਾਈਵੇਟ ਬੱਸਾਂ, ਆਟੋ ਜਾਂ ਪ੍ਰਾਈਵੇਟ ਵਾਹਨਾਂ ਵਿੱਚ ਪੜ੍ਹਨ ਜਾਣ ਦਾ ਬਦਲ ਰਹਿ ਗਿਆ ਹੈ। ਅਜਿਹੇ ‘ਚ ਰੋਹਤਕ ‘ਚ ਪੜ੍ਹਨ ਲਈ ਆਉਣ ਵਾਲੀਆਂ ਲੜਕੀਆਂ ਨੂੰ ਪਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪਵੇਗਾ। ਮਹਿਮ ਤੋਂ ਆਜ਼ਾਦ ਉਮੀਦਵਾਰ ਰਾਧਾ ਅਹਿਲਾਵਤ ਨੇ ਕਿਹਾ ਕਿ ਬਲਰਾਜ ਕੂੰਡੂ ਦੀ ਅਖੌਤੀ ਸਮਾਜ ਸੇਵਾ ਦਾ ਸੱਚ ਸਾਹਮਣੇ ਆ ਗਿਆ ਹੈ।
Menu
