ਬਰਨਾਲਾ,14 ਨਵੰਬਰ (ਨਿਰਮਲ ਸਿੰਘ ਪੰਡੋਰੀ)-
-ਬਰਨਾਲਾ ਹਲਕੇ ਦੀ ਜ਼ਿਮਨੀ ਚੋਣ ਦੀਆਂ ਸਰਗਰਮੀਆਂ ਪੂਰੇ ਜ਼ੋਰਾਂ ‘ਤੇ ਹਨ। ਚੋਣ ਪ੍ਰਚਾਰ ਦੌਰਾਨ ਜੋੜ ਤੋੜ ਦੀ ਰਾਜਨੀਤੀ ਦੇ ਰੰਗ ਵੀ ਸਾਹਮਣੇ ਆ ਰਹੇ ਹਨ। ਚੋਣ ਸੱਥਾਂ ਵਿੱਚ ਆਗੂਆਂ ਵੱਲੋਂ ਇੱਕ ਦੂਜੇ ਦੀਆਂ ਪੋਲਾਂ ਖੋਲ੍ਹੀਆਂ ਜਾ ਰਹੀਆਂ ਹਨ। ਜੇਕਰ ਸੱਤਾਧਾਰੀ ਪਾਰਟੀ ਦੀ ਗੱਲ ਕੀਤੀ ਜਾਵੇ ਤਾਂ ਕੱਲ੍ਹ ਤੱਕ ਜਿਹੜੇ ਇੱਕ ਦੂਜੇ ਦੇ ਸਾਹ ਵਿੱਚ ਸਾਹ ਲੈਂਦੇ ਸੀ, ਸਿਆਸੀ ਈਰਖਾ ਨੇ ਉਹਨਾਂ ਨੂੰ ਇੱਕ ਦੂਜੇ ਦੀਆਂ ਅੱਖਾਂ ਵਿੱਚ ਰੜਕਣ ਲਾ ਦਿੱਤਾ ਹੈ। ਸੋਸ਼ਲ ਮੀਡੀਆ ‘ਤੇ ਵੀ ਸ਼ੁਰੂ ਹੋਈ ਜੰਗ ‘ਚ ਇੱਕ ਦੂਜੇ ਦੇ ਖਿਲਾਫ਼ ਸ਼ਬਦਾਂ ਦੇ ਤੀਰ ਛੱਡੇ ਜਾ ਰਹੇ ਹਨ। ਸ਼ਬਦੀ ਜੰਗ ਦੌਰਾਨ ਸ਼ੇਅਰੋ ਸ਼ਾਇਰੀ ਦੇ ਕਾਰਤੂਸ ਜਿੱਥੇ ਇੱਕ ਦੂਜੇ ਦੀਆਂ ਭਾਵਨਾਵਾਂ ਨੂੰ ਛਲਣੀ ਕਰ ਰਹੇ ਹਨ ਉਥੇ ਵੋਟਰਾਂ ਦਾ ਧਿਆਨ ਵੀ ਖਿੱਚ ਰਹੇ ਹਨ। ਮੈਂਬਰ ਪਾਰਲੀਮੈਂਟ ਮੀਤ ਹੇਅਰ ਦੇ ਓਐਸਡੀ ਹਸਨਪ੍ਰੀਤ ਭਾਰਦਵਾਜ ਦੀ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਰਹੀ ਇੱਕ ਪੋਸਟ ਚਰਚਾ ਦਾ ਵਿਸ਼ਾ ਬਣੀ ਹੋਈ ਹੈ। ਉੰਝ ਭਾਵੇਂ ਹਸਨਪ੍ਰੀਤ ਨੇ ਆਪਣੀ ਪੋਸਟ ਵਿੱਚ ਕਿਸੇ ਦਾ ਨਾਮ ਨਹੀਂ ਲਿਖਿਆ ਪ੍ਰੰਤੂ ਹਸਨਪ੍ਰੀਤ ਵੱਲੋਂ ਆਪਣੇ ਫੇਸਬੁੱਕ ਅਕਾਊਂਟ ‘ਤੇ ਪੋਸਟ ਕੀਤੀਆਂ ਕਿਸੇ ਮਸ਼ਹੂਰ ਸ਼ਾਇਰ ਦੀਆਂ ਇਹ ਲਾਈਨਾਂ ਪੜ੍ਹ ਕੇ ਹਸਨਪ੍ਰੀਤ ਦਾ ਇਸ਼ਾਰਾ ਸਪੱਸ਼ਟ ਹੋ ਜਾਂਦਾ ਹੈ। ਹਸਨਪ੍ਰੀਤ ਭਾਰਦਵਾਜ ਵੱਲੋਂ ਪਾਈ ਪੋਸਟ ਦੀਆਂ ਇਹ ਲਾਈਨਾਂ…”ਬੜੇ ਹੀ ਅਜਬ ਤੇਰੇ ਗ਼ਰਾਂ ਦੇ ਲੋਕ ਡਿੱਠੇ ਨੇ…ਅੰਦਰੋਂ ਨਮਕੀਨ ਹਨ ਬਹੁਤ ਬਾਹਰੋਂ ਬਹੁਤ ਮਿੱਠੇ ਨੇ… ਤੂੰ ਫੜਾਂ ਨਾ ਮਾਰਿਆ ਕਰ ਮੇਰਾ ਤਖ਼ੱਲਸ ਜਾਗ ਪੈਂਦਾ…ਸਾਡੇ ਕੋਲ ਤੇਰੇ ਢੇਰ ਸਾਰੇ ਕੱਚੇ ਚਿੱਠੇ ਨੇ”..! ਇਹ ਲਾਈਨਾਂ ਪੜ੍ਹ ਕੇ ਸਪੱਸ਼ਟ ਹੋ ਜਾਂਦਾ ਕਿ ਹਸਨਪ੍ਰੀਤ ਭਾਰਦਵਾਜ ਦਾ ਇਸ਼ਾਰਾ ਆਪਣੇ ਕੱਲ੍ਹ ਦੇ ਮਿੱਤਰ ਅਤੇ ਅੱਜ ਦੇ ਸਿਆਸੀ ਵਿਰੋਧੀ ਵੱਲ ਹੀ ਹੈ। ਹੁਣ ਲੋਕਾਂ ਦੇ ਮਨਾਂ ‘ਚ ਸਵਾਲ ਇਹ ਉੱਠਦਾ ਹੈ ਕਿ ਇਹਨਾਂ ਕੱਚੇ ਚਿੱਠਿਆਂ ਦਾ ਜ਼ਿਕਰ ਉਸ ਵੇਲੇ ਕਿਉਂ ਨਹੀਂ ਕੀਤਾ ਗਿਆ ਜਦੋਂ ਇਸ ਸ਼ਬਦੀ ਜੰਗ ਦੇ ਕਮਾਂਡਰ ਵੋਟਾਂ ਤੋਂ ਪਹਿਲਾਂ ਟਰੱਕ ਵਾਲੇ ਭਾਈ ਨਾਲ ਬਗਲਗੀਰ ਸਨ। ਸਵਾਲ ਇਹ ਵੀ ਹੈ ਕਿ ਕੀ ਇਹ ਕੱਚੇ ਚਿੱਠੇ ਸੂਬੇ ‘ਚ “ਆਪ” ਦੀ ਸਰਕਾਰ ਬਣਨ ਤੋਂ ਪਹਿਲਾਂ ਦੇ ਹਨ ਜਾਂ ਫਿਰ ਬਾਅਦ ਵਿੱਚ ਲਿਖੇ ਗਏ। ਜੇਕਰ ਇਹ ਕੱਚੇ ਚਿੱਠੇ “ਆਪ” ਸਰਕਾਰ ਬਣਨ ਤੋਂ ਪਹਿਲਾਂ ਦੇ ਹਨ ਤਾਂ ਇਹ ਯਕੀਨਨ ਵਿਅਕਤੀਗਤ ਹੋਣਗੇ ਪਰੰਤੂ ਜੇਕਰ ਇਹ ਸਰਕਾਰ ਬਣਨ ਤੋਂ ਬਾਅਦ ਦੇ ਹਨ ਤਾਂ ਇਹਨਾਂ ‘ਚ ਸੱਤਾ ਪਾਵਰ ਦੀ ਦੁਰਵਰਤੋਂ ਸਾਫ਼ ਝਲਕਦੀ ਹੋਵੇਗੀ। ਹੁਣ ਸਵਾਲ ਇਹ ਵੀ ਹੈ ਕਿ ਜੇਕਰ ਇਹ ਕੱਚੇ ਚਿੱਠੇ ਸੱਤਾਪਾਵਰ ਦੀ ਸਿਆਹੀ ਦੀ ਵਰਤੋਂ ਕਰਦੇ ਹੋਏ ਲਿਖੇ ਗਏ ਹਨ ਤਾਂ ਇਹਨਾਂ ਚਿੱਠਿਆਂ ਦੀ ਇਬਾਰਤ ਜਨਤਕ ਹੋਣੀ ਚਾਹੀਦੀ ਹੈ। ਕੀ ਇਹਨਾਂ ਚਿੱਠਿਆਂ ਦੀ ਇਬਾਰਤ ਜਨਤਕ ਹੋਵੇਗੀ ਜਾਂ ਫਿਰ ਇਹ ਚੋਣ ਪ੍ਰਚਾਰ ਦੌਰਾਨ ਵੋਟਰਾਂ ਨੂੰ ਭਰਮਾਉਣ ਦੀ ਇੱਕ ਰਣਨੀਤੀ ਹੀ ਹੈ ?
Menu
