ਚੰਡੀਗੜ੍ਹ,6 ਜਨਵਰੀ, Gee98 news service
-ਜੇਕਰ ਤੁਸੀਂ ਆਧਾਰ ਕਾਰਡ ਵਿੱਚ ਆਪਣੇ ਨਾਮ ਦੀ ਤਬਦੀਲੀ ਕਰਵਾਉਣਾ ਚਾਹੁੰਦੇ ਹਾਂ ਤਾਂ ਇਹ ਖ਼ਬਰ ਤੁਹਾਡੇ ਲਈ ਅਹਿਮ ਹੈ ਕਿਉਂਕਿ ਯੂਨੀਕ ਆਈਡੈਂਟੀਫਿਕੇਸ਼ਨ ਅਥਾਰਟੀ ਆਫ ਇੰਡੀਆ UIDAI ਨੇ ਆਧਾਰ ਕਾਰਡ ‘ਤੇ ਨਾਮ ਬਦਲਣ ਦੀ ਪ੍ਰਕਿਰਿਆ ਵੀ ਬਦਲ ਦਿੱਤੀ ਹੈ। ਨਵੇਂ ਨਿਯਮਾਂ ਦੇ ਤਹਿਤ, UIDAI ਨੇ ਆਧਾਰ ਕਾਰਡ ਵਿੱਚ ਨਾਮ ਠੀਕ ਕਰਨ ਦੇ ਮੌਕੇ ਸੀਮਤ ਕਰ ਦਿੱਤੇ ਹਨ। ਜਿਸ ਦੇ ਤਹਿਤ ਹੁਣ ਤੁਸੀਂ ਆਧਾਰ ਕਾਰਡ ‘ਚ ਆਪਣਾ ਨਾਂ ਸਿਰਫ ਦੋ ਵਾਰ ਹੀ ਬਦਲ ਸਕੋਗੇ। ਇਸ ਕਾਰਨ ਹੁਣ ਉਪਭੋਗਤਾਵਾਂ ਨੂੰ ਆਧਾਰ ਕਾਰਡ ਬਣਾਉਂਦੇ ਸਮੇਂ ਹੋਰ ਸਾਵਧਾਨ ਰਹਿਣ ਦੀ ਲੋੜ ਹੈ। ਨਵੇਂ ਬਦਲਾਅ ਤੋਂ ਬਾਅਦ, ਉਪਭੋਗਤਾਵਾਂ ਲਈ ਆਧਾਰ ਕਾਰਡ ਵਿੱਚ ਨਾਮ ਬਦਲਣ ਲਈ ਗੈਜੇਟ ਨੋਟੀਫਿਕੇਸ਼ਨ ਦੇਣਾ ਲਾਜ਼ਮੀ ਹੋਵੇਗਾ। ਦੱਸਿਆ ਜਾ ਰਿਹਾ ਹੈ ਕਿ ਭਾਵੇਂ ਆਧਾਰ ਕਾਰਡ ‘ਤੇ ਨਾਂ ‘ਚ ਮਾਮੂਲੀ ਬਦਲਾਅ ਹੋਵੇ ਜਾਂ ਪੂਰੇ ਨਾਮ ‘ਚ ਬਦਲਾਅ, ਦੋਵਾਂ ਮਾਮਲਿਆਂ ‘ਚ ਗੈਜੇਟ ਨੋਟੀਫਿਕੇਸ਼ਨ ਦੀ ਲੋੜ ਹੋਵੇਗੀ। ਇਸ ਤੋਂ ਇਲਾਵਾ, ਉਪਭੋਗਤਾਵਾਂ ਨੂੰ ਕਈ ਹੋਰ ਦਸਤਾਵੇਜ਼ ਵੀ ਪ੍ਰਦਾਨ ਕਰਨੇ ਪੈਣਗੇ ਜਿਵੇਂ ਕਿ ਪੂਰੇ ਨਾਮ ਦੇ ਵੇਰਵੇ ਵਾਲਾ ਪੈਨ ਕਾਰਡ, ਵੋਟਰ ਆਈ.ਡੀ, ਡਰਾਈਵਿੰਗ ਲਾਇਸੈਂਸ, ਸਰਵਿਸ ਆਈ.ਡੀ ਕਾਰਡ ਜਾਂ ਪਾਸਪੋਰਟ। ਇਨ੍ਹਾਂ ਨਵੇਂ ਨਿਯਮਾਂ ਦਾ ਮਕਸਦ ਸੁਰੱਖਿਆ ਵਧਾਉਣਾ ਅਤੇ ਆਧਾਰ ਕਾਰਡ ਦੇ ਆਧਾਰ ‘ਤੇ ਹੋਣ ਵਾਲੀ ਧੋਖਾਧੜੀ ਨੂੰ ਰੋਕਣਾ ਹੈ। ਇਸ ਲਈ ਆਧਾਰ ਕਾਰਡ ‘ਤੇ ਨਾਮ ਦਰੁਸਤ ਕਰਨ ਦੀ ਪ੍ਰਕਿਰਿਆ ਵੀ ਬਦਲ ਦਿੱਤੀ ਗਈ ਹੈ। UIDAI ਨੇ ਨਾਮ ਬਦਲਣ ਦੀ ਪ੍ਰਕਿਰਿਆ ਨੂੰ ਮੁਸ਼ਕਲ ਬਣਾ ਦਿੱਤਾ ਹੈ ਅਤੇ ਦੂਜੇ ਪਾਸੇ ਪਤਾ ਅਤੇ ਹੋਰ ਵੇਰਵਿਆਂ ਨੂੰ ਅਪਡੇਟ ਕਰਨ ਦੀ ਪ੍ਰਕਿਰਿਆ ਨੂੰ ਵੀ ਆਸਾਨ ਬਣਾ ਦਿੱਤਾ ਹੈ। ਜਿਸ ਕਾਰਨ ਹੁਣ ਤੁਸੀਂ ਆਸਾਨੀ ਨਾਲ ਆਪਣਾ ਪਤਾ ਅਪਡੇਟ ਕਰ ਸਕਦੇ ਹੋ।
