ਚੰਡੀਗੜ੍ਹ, 1 ਅਕਤੂਬਰ, Gee98 News service-
-ਤਲਾਕ ਦੇ ਮਾਮਲੇ ‘ਚ ਕੁੜੀ ਵਾਲਿਆਂ ਦੇ ਪਰਿਵਾਰ ਤੋਂ 30 ਲੱਖ ਰੁਪਏ ਦੀ ਰਿਸ਼ਵਤ ਮੰਗਣ ਦੇ ਮਾਮਲੇ ‘ਚ CBI ਨੇ ਬਠਿੰਡਾ ਦੇ ਇੱਕ ਜੱਜ ਨੂੰ ਵੀ ਪੁੱਛਗਿੱਛ ਵਿੱਚ ਸ਼ਾਮਿਲ ਕਰ ਲਿਆ ਹੈ। ਹਾਈਕੋਰਟ ਦੀ ਇਜਾਜ਼ਤ ਨਾਲ ਸੀਬੀਆਈ ਦੀ ਟੀਮ ਨੇ ਬਠਿੰਡਾ ਦੇ ਸੰਬੰਧਿਤ ਜੱਜ ਤੋਂ ਬਠਿੰਡਾ ਜਾ ਕੇ ਇੱਕ ਬੰਦ ਕਮਰੇ ਵਿੱਚ ਕਈ ਘੰਟੇ ਪੁੱਛਗਿੱਛ ਕੀਤੀ। ਇਸ ਮਾਮਲੇ ਦੇ ਵੇਰਵੇ ਅਨੁਸਾਰ ਫਿਰੋਜ਼ਪੁਰ ਦੇ ਰਹਿਣ ਵਾਲੇ ਹਰਸਿਮਰਨਜੀਤ ਸਿੰਘ ਨੇ ਸੀਬੀਆਈ ਨੂੰ ਸ਼ਿਕਾਇਤ ਦਿੱਤੀ ਸੀ ਕਿ ਉਸ ਦੀ ਚਚੇਰੀ ਭੈਣ ਸੰਦੀਪ ਕੌਰ ਦਾ ਬਠਿੰਡਾ ਦੀ ਅਦਾਲਤ ਵਿੱਚ ਤਲਾਕ ਦਾ ਕੇਸ ਚੱਲ ਰਿਹਾ ਹੈ ਜਿੱਥੇ ਐਡਵੋਕੇਟ ਜਤਿਨ ਸਾਲਵਾਨ ਨੇ ਜੱਜ ਦੇ ਨਾਮ ‘ਤੇ 30 ਲੱਖ ਰੁਪਏ ਦੀ ਰਿਸ਼ਵਤ ਮੰਗੀ ਅਤੇ ਕਿਹਾ ਕਿ ਜੇਕਰ ਤਲਾਕ ਦਾ ਫੈਸਲਾ ਕੁੜੀ ਦੇ ਪੱਖ ਵਿੱਚ ਕਰਵਾਉਣਾ ਹੈ ਤਾਂ ਜੱਜ ਨੂੰ 30 ਲੱਖ ਰੁਪਏ ਦੇਣੇ ਪੈਣਗੇ। ਐਡਵੋਕੇਟ ਜਤਿਨ ਸਾਲਵਾਨ ਵਾਰ-ਵਾਰ ਕੁੜੀ ਵਾਲਿਆਂ ਦੇ ਪਰਿਵਾਰ ‘ਤੇ ਦਬਾਅ ਪਾ ਰਿਹਾ ਸੀ ਕਿ ਫੈਸਲਾ ਆਪਣੇ ਪੱਖ ਵਿੱਚ ਕਰਵਾਉਣ ਲਈ 30 ਲੱਖ ਰੁਪਏ ਜੱਜ ਨੂੰ ਦੇਣੇ ਪੈਣਗੇ ਅਤੇ ਐਡਵੋਕੇਟ ਜਤਿਨ ਨੇ ਕੁੜੀ ਦੇ ਪਰਿਵਾਰ ਨੂੰ ਇਹ ਵੀ ਕਿਹਾ ਕਿ ਜਦੋਂ ਪੈਸੇ ਦੇ ਦਿੱਤੇ ਜਾਣਗੇ ਤਾਂ ਜੱਜ ਦਾ ਇੱਕ ਖਾਸ ਆਦਮੀ ਪੈਸੇ ਲੈ ਜਾਵੇਗਾ ਅਤੇ ਉਸ ਤੋਂ ਬਾਅਦ ਫੈਸਲਾ ਕੁੜੀ ਵਾਲਿਆਂ ਦੇ ਹੱਕ ਵਿੱਚ ਹੋ ਜਾਵੇਗਾ।
ਸ਼ਿਕਾਇਤਕਰਤਾ ਹਰਸਿਮਰਨਜੀਤ ਸਿੰਘ ਨੇ ਐਡਵੋਕੇਟ ਜਤਿਨ ਨੂੰ ਪੈਸੇ ਘੱਟ ਕਰਨ ਦੀ ਗੱਲ ਕਹੀ ਤਾਂ ਐਡਵੋਕੇਟ ਜਤਿਨ ਨੇ ਕਿਹਾ ਕਿ ‘ਰਿਸ਼ਵਤ ਦੇ ਪੈਸੇ ਕਦੇ ਘੱਟ ਨਹੀਂ ਹੁੰਦੇ’, ਜਿਸ ਤੋਂ ਬਾਅਦ ਹਰਸਿਮਰਨਜੀਤ ਸਿੰਘ ਨੇ ਇਸ ਮਾਮਲੇ ਵਿੱਚ ਸੀਬੀਆਈ ਨਾਲ ਸੰਪਰਕ ਕੀਤਾ। ਸੀਬੀਆਈ ਨੇ 14 ਅਗਸਤ ਨੂੰ ਸ਼ਿਕਾਇਤ ਦਰਜ ਕਰਨ ਤੋਂ ਬਾਅਦ ਇੱਕ ਜਾਲ ਵਿਛਾਇਆ ਅਤੇ ਰਿਸ਼ਵਤ ਦੀ ਪਹਿਲੀ ਕਿਸ਼ਤ 5 ਲੱਖ ਰੁਪਏ ਲੈਂਦੇ ਹੋਏ ਐਡਵੋਕੇਟ ਜਤਿਨ ਸਾਲਵਾਨ ਅਤੇ ਉਸਦੇ ਸਾਥੀ ਸਤਨਾਮ ਸਿੰਘ ਨੂੰ ਰੰਗੇ ਹੱਥੀਂ ਗ੍ਰਿਫ਼ਤਾਰ ਕੀਤਾ। ਹੁਣ ਇਸ ਮਾਮਲੇ ਵਿੱਚ ਸੀਬੀਆਈ ਨੇ ਸੰਬੰਧਿਤ ਜੱਜ ਨੂੰ ਵੀ ਸ਼ਾਮਿਲ ਕੀਤਾ ਹੈ ਕਿਉਂਕਿ ਸੀਬੀਆਈ ਕੋਲ ਰਿਸ਼ਵਤ ਮੰਗਣ ਸਬੰਧੀ ਇੱਕ ਆਡੀਓ ਹੈ ਜਿਸ ਵਿੱਚ ਸਬੰਧਿਤ ਵਕੀਲ ਵਾਰ ਵਾਰ ਉਸੇ ਜੱਜ ਦਾ ਨਾਮ ਲੈ ਰਿਹਾ ਜਿਸ ਕੋਲ ਤਲਾਕ ਦੇ ਕੇਸ ਦੀ ਸੁਣਵਾਈ ਚੱਲ ਰਹੀ ਸੀ। ਸੀਬੀਆਈ ਨੇ ਜੱਜ ਤੋਂ ਲੱਗਭੱਗ 20 ਸਵਾਲ ਪੁੱਛੇ ਜਿਨਾਂ ਦਾ ਜਵਾਬ ਦਿੰਦੇ ਹੋਏ ਜੱਜ ਨੇ ਸਾਰੇ ਦੋਸ਼ਾਂ ਤੋਂ ਇਨਕਾਰ ਕਰ ਦਿੱਤਾ, ਫਿਰ ਵੀ ਮੰਨਿਆ ਜਾ ਰਿਹਾ ਹੈ ਕਿ ਰਿਸ਼ਵਤ ਮੰਗਣ ਨਾਲ ਸੰਬੰਧਿਤ ਆਡੀਓ ‘ਚ ਵਾਰ ਵਾਰ ਜੱਜ ਦਾ ਨਾਮ ਆਉਣ ਕਰਕੇ ਸਬੰਧਿਤ ਜੱਜ ਦੀਆਂ ਮੁਸ਼ਕਿਲਾਂ ਵੱਧ ਸਕਦੀਆਂ ਹਨ।
