ਬਰਨਾਲਾ, 3 ਮਾਰਚ ( ਨਿਰਮਲ ਸਿੰਘ ਪੰਡੋਰੀ )-
ਸ਼ਹਿਰ ਦੇ ਕੱਚਾ ਕਾਲਜ ਦੇ ਇੱਕ ਬੇਕਰੀ ਹਾਊਸ ‘ਤੇ ਸਿਹਤ ਵਿਭਾਗ ਦੀ ਟੀਮ ਦੀ ਛਾਪਾਮਾਰੀ ਨੇ ਖਾਣ ਪੀਣ ਦੀਆਂ ਦੁਕਾਨਾਂ ‘ਤੇ ਵਿਕ ਰਹੇ ਸਮਾਨ ਦੇ ਹਾਲਾਤਾਂ ਦੀ ਪੋਲ ਖੋਲ੍ਹ ਦਿੱਤੀ। ਸ਼ਹਿਰ ਦੀ ਮਸ਼ਹੂਰ ਇਸ ਬੇਕਰੀ ‘ਤੇ ਉੰਝ ਭਾਵੇਂ ਸ਼ੀਸ਼ਿਆਂ ਦੇ ਕੈਬਿਨ ਵਿੱਚ ਕੇਕ, ਪੇਸਟੀਆਂ ਅਤੇ ਹੋਰ ਖਾਣ ਪੀਣ ਦੀਆਂ ਚੀਜ਼ਾਂ ਸਜਾ ਕੇ ਰੱਖੀਆਂ ਹਨ ਪ੍ਰੰਤੂ ਜਦ ਸਿਹਤ ਵਿਭਾਗ ਦੀ ਟੀਮ ਨੇ ਸ਼ਿਕਾਇਤ ਮਿਲਣ ਤੋਂ ਬਾਅਦ ਛਾਪਾਮਾਰੀ ਕਰਕੇ ਸਮਾਨ ਬਣਾਉਣ ਵਾਲੀ ਥਾਂ ਦੀ ਚੈਕਿੰਗ ਕੀਤੀ ਤਾਂ ਮੌਕੇ ‘ਤੇ ਗੰਦਗੀ ਅਤੇ ਮਾੜੇ ਹਾਲਾਤ ਵੇਖ ਕੇ ਟੀਮ ਦੇ ਵੀ ਹੋਸ਼ ਉੱਡ ਗਏ ਅਤੇ ਚੈਕਿੰਗ ਅਧਿਕਾਰੀਆਂ ਨੇ ਮੌਕੇ ‘ਤੇ ਹੀ ਬੇਕਰੀ ਦਾ ਚਲਾਨ ਵੀ ਕੱਟ ਦਿੱਤਾ। ਸਿਹਤ ਵਿਭਾਗ ਦੀ ਟੀਮ ਨੇ ਇਹ ਕਾਰਵਾਈ ਸ਼ਹਿਰ ਦੀ ਨਾਮਵਰ ਹਸਤੀ ਕੌਂਸਲਰ ਨਰਿੰਦਰ ਗਰਗ ਨੀਟਾ ਦੀ ਸ਼ਿਕਾਇਤ ਤੋਂ ਬਾਅਦ ਕੀਤੀ। ਆਪਣੇ ਵੱਲੋਂ ਕੀਤੀ ਸ਼ਿਕਾਇਤ ਦੀ ਪੁਸ਼ਟੀ ਕਰਦੇ ਹੋਏ ਕੌਂਸਲਰ ਨੀਟਾ ਨੇ ਦੱਸਿਆ ਕਿ ਉਹਨਾਂ ਨੇ ਕੱਚਾ ਕਾਲਜ ਰੋਡ ਸਥਿਤ ਕੇਕਰੀ ਤੋਂ ਆਪਣੇ ਬੱਚੇ ਦੇ ਜਨਮਦਿਨ ਮੌਕੇ ਦੋ ਕੇਕ ਖਰੀਦੇ ਸਨ, ਜਦੋਂ ਕੇਕ ਕੱਟਣ ਤੋਂ ਬਾਅਦ ਬੱਚੇ ਕੇਕ ਖਾਣ ਲੱਗੇ ਤਾਂ ਕੇਕ ਵਿੱਚੋਂ ਬਦਬੂ ਮਾਰ ਰਹੀ ਸੀ ਜਿਸ ਤੋਂ ਬਾਅਦ ਉਸਦਾ ਬੇਟਾ ਉਕਤ ਬੇਕਰੀ ‘ਤੇ ਖਰਾਬ ਕੇਕ ਦਾ ਉਲਾਂਭਾ ਦੇਣ ਗਿਆ ਪ੍ਰੰਤੂ ਅੱਗੇ ਕਾਊਂਂਟਰ ‘ਤੇ ਬੈਠੀ ਇੱਕ ਮਹਿਲਾ ਨੇ ਕਿਹਾ ਕਿ “ਸਾਡਾ ਤਾਂ ਸਾਰਾ ਸਮਾਨ ਠੀਕ ਠਾਕ ਹੈ ਜੇ ਤੁਹਾਨੂੰ ਕੋਈ ਸਮੱਸਿਆ ਹੈ ਤਾਂ ਤੁਸੀਂ ਸਾਡਾ ਸੈਂਪਲ ਭਰਵਾ ਕੇ ਵੇਖ ਲਵੋ”। ਕੌਂਸਲਰ ਦੇ ਪਰਿਵਾਰ ਦਾ ਉਲਾਂਭਾ ਮੰਨਣ ਦੀ ਬਜਾਏ ਬੇਕਰੀ ਵਾਲਿਆਂ ਦੇ ਰੁੱਖੇ ਰਵੱਈਏ ਤੋਂ ਬਾਅਦ ਕੌਂਸਲਰ ਨੀਟਾ ਨੇ ਸੰਬੰਧਿਤ ਅਧਿਕਾਰੀਆਂ ਨੂੰ ਸ਼ਿਕਾਇਤ ਕੀਤੀ ਜਿਸ ਤੋਂ ਬਾਅਦ ਸਿਹਤ ਇੰਸਪੈਕਟਰ ਚਰਨਜੀਤ ਸਿੰਘ ਦੀ ਅਗਵਾਈ ਹੇਠਲੀ ਟੀਮ ਨੇ ਬੇਕਰੀ ‘ਤੇ ਚੈਕਿੰਗ ਕੀਤੀ। ਜਦੋਂ ਸਿਹਤ ਵਿਭਾਗ ਦੀ ਟੀਮ ਪਹਿਲੀ ਮੰਜ਼ਿਲ ‘ਤੇ ਖਾਣ ਪੀਣ ਦਾ ਸਮਾਨ ਤਿਆਰ ਕਰਨ ਵਾਲੀ ਜਗ੍ਹਾ ‘ਤੇ ਪੁੱਜੀ ਤਾਂ ਉਥੇ ਸਫ਼ਾਈ ਦੇ ਮਾਪਦੰਡ ਛਿੱਕੇ ਟੰਗੇ ਹੋਏ ਸਨ।
ਟੀਮ ਨੇ ਵੇਖਿਆ ਕਿ ਕੇਕ ਅਤੇ ਹੋਰ ਸਮਾਨ ਤਿਆਰ ਕਰਨ ਲਈ ਜ਼ਰੂਰੀ ਮਾਪਦੰਡਾਂ ਦੀ ਪਾਲਣਾ ਵੀ ਨਹੀਂ ਕੀਤੀ ਜਾ ਰਹੀ ਸੀ ਜਿਸ ਤੋਂ ਬਾਅਦ ਵਿਭਾਗ ਨੇ ਕੁਝ ਸੈਂਪਲ ਭਰੇ ਅਤੇ ਜਿਨਾਂ ਨੂੰ ਸੀਲ ਕਰਕੇ ਜਾਂਚ ਲਈ ਸਟੇਟ ਫੂਡ ਲੈਬਾਰਟਰੀ ਭੇਜ ਦਿੱਤਾ ਗਿਆ ਹੈ। ਸਿਹਤ ਵਿਭਾਗ ਦੀ ਟੀਮ ਦੀ ਚੈਕਿੰਗ ਦੌਰਾਨ ਜਿੱਥੇ ਗੰਦਗੀ ਪੱਖੋਂ ਮਾੜੇ ਹਾਲਾਤ ਸਾਹਮਣੇ ਆਏ ਉੱਥੇ ਖਾਣ ਪੀਣ ਦੀਆਂ ਚੀਜ਼ਾਂ ਤਿਆਰ ਕਰਨ ਸਬੰਧੀ ਨਿਯਮਾਂ ਦੀ ਵੀ ਉਲੰਘਣਾ ਸਾਹਮਣੇ ਆਈ ਅਤੇ ਕੁਝ ਜ਼ਰੂਰੀ ਦਸਤਾਵੇਜ਼ ਵੀ ਬੇਕਰੀ ਹਾਊਸ ਦੇ ਮਾਲਕ ਮੌਕੇ ‘ਤੇ ਪੇਸ਼ ਨਾ ਕਰ ਸਕੇ। ਇਸ ਸਬੰਧੀ ਇੰਸਪੈਕਟਰ ਚਰਨਜੀਤ ਸਿੰਘ ਨੇ ਦੱਸਿਆ ਕਿ ਬੇਕਰੀ ‘ਤੇ ਵਰਤੀ ਜਾ ਰਹੀ ਲਾਪਰਵਾਹੀ ਨੂੰ ਗੰਭੀਰਤਾ ਨਾਲ ਲੈਂਦਿਆ ਮੌਕੇ ‘ਤੇ ਹੀ ਬਣਦਾ ਚਲਾਨ ਕੱਟਿਆ ਹੈ। ਅਧਿਕਾਰੀਆਂ ਨੇ ਦੱਸਿਆ ਕਿ ਇਹ ਕੇਸ ਹੁਣ ਵਧੀਕ ਡਿਪਟੀ ਕਮਿਸ਼ਨਰ ਬਰਨਾਲਾ ਦੀ ਅਦਾਲਤ ’ਚ ਚੱਲੇਗਾ। ਜੇਕਰ ਲੈਬ ਦੀ ਰਿਪੋਰਟ ’ਚ ਸੈਂਪਲ ਫੇਲ੍ਹ ਪਾਏ ਜਾਂਦੇ ਹਨ ਤਾਂ ਭਾਰੀ ਜੁਰਮਾਨੇ ਦੇ ਨਾਲ-ਨਾਲ ਦੁਕਾਨ ਸੀਲ ਕਰਨ ਤੱਕ ਦੀ ਕਾਰਵਾਈ ਵੀ ਹੋ ਸਕਦੀ ਹੈ।
ਹੁਣ ਸਵਾਲ ਇਹ ਵੀ ਉਠਦੇ ਹਨ ਕਿ ਭਾਵੇਂ ਸ਼ਹਿਰ ਦੀ ਇੱਕ ਨਾਮਵਰ ਹਸਤੀ ਵੱਲੋਂ ਸ਼ਿਕਾਇਤ ਕਰਨ ਤੋਂ ਬਾਅਦ ਟੀਮ ਨੇ ਚੈਕਿੰਗ ਕੀਤੀ ਤੇ ਕਾਰਵਾਈ ਵੀ ਕਰ ਦਿੱਤੀ ਪ੍ਰੰਤੂ ਸ਼ਹਿਰ ਵਿੱਚ ਅਜਿਹੀਆਂ ਬਹੁਤ ਹੋਰ ਦੁਕਾਨਾਂ ਵੀ ਹਨ ਜਿੱਥੇ ਖਾਣ ਪੀਣ ਦੀਆਂ ਚੀਜ਼ਾਂ ਤਿਆਰ ਕਰਨ ਸਬੰਧੀ ਮਾਪਦੰਡਾਂ ਦੀ ਪਾਲਣਾ ਨਹੀਂ ਕੀਤੀ ਜਾ ਰਹੀ। ਕੀ ਇਹਨਾਂ ਦੁਕਾਨਾਂ ਦੀ ਸਿਹਤ ਵਿਭਾਗ ਦੀ ਟੀਮ ਵੱਲੋਂ ਰੂਟੀਨ ਚੈਕਿੰਗ ਕੀਤੀ ਜਾਂਦੀ ਹੈ ? ਕੀ ਇਸ ਬੇਕਰੀ ਦੀ ਪਹਿਲਾਂ ਸਿਹਤ ਵਿਭਾਗ ਦੀ ਟੀਮ ਨੇ ਕਿਤੇ ਚੈਕਿੰਗ ਕੀਤੀ ਸੀ ? ਜੇਕਰ ਕੀਤੀ ਸੀ ਤਾਂ ਜ਼ਰੂਰੀ ਦਸਤਾਵੇਜਾਂ ਦੀ ਕਮੀ ਨੂੰ ਅੱਖੋਂ ਪਰੋਖੇ ਕਿਉਂ ਕੀਤਾ ਗਿਆ ? ਖਾਣ ਪੀਣ ਦੀਆਂ ਚੀਜ਼ਾਂ ਤਿਆਰ ਕਰਨ ਵਾਲੀਆਂ ਇਹਨਾਂ ਬੇਕਰੀਆਂ ਵੱਲੋਂ ਨਿਯਮਾਂ ਦੀ ਉਲੰਘਣਾ ਸਬੰਧੀ ਸਿਹਤ ਵਿਭਾਗ ਦੀ ਟੀਮ ਵੱਲੋਂ ਵਰਤੀ ਜਾ ਰਹੀ ਲਾਪਰਵਾਹੀ ਲਈ ਜ਼ਿੰਮੇਵਾਰ ਕੌਣ ਹੈ ? ਇਥੇ ਇਹ ਜ਼ਿਕਰ ਕਰਨਾ ਵੀ ਜਰੂਰੀ ਹੈ ਕਿ ਬਰਨਾਲਾ ‘ਚ ਸੈਂਪਲ ਭਰਨ ਵਾਲੀ ਟੀਮ ਦੇ ਕੁਝ ਮੁਲਾਜ਼ਮਾਂ ਵੱਲੋਂ ਦੁਕਾਨਦਾਰਾਂ ਤੋਂ “ਮੁੱਠੀ ਗਰਮ” ਕਰਨ ਦੀ ਚਰਚਾ ਵੀ ਅਕਸਰ ਚਲਦੀ ਰਹਿੰਦੀ ਹੈ ਜਿਸ ਨੂੰ ਉਕਤ ਬੇਕਰੀ ਦੇ ਹਾਲਾਤਾਂ ਨੇ ਕਾਫ਼ੀ ਹੱਦ ਤੱਕ ਸਾਬਤ ਕੀਤਾ ਹੈ।
ਫੋਟੋ ਕੈਪਸ਼ਨ- ਸੰਕੇਤਕ ਫੋਟੋ
