ਬਰਨਾਲਾ ,29 ਮਾਰਚ (ਨਿਰਮਲ ਸਿੰਘ ਪੰਡੋਰੀ)-
-ਜ਼ਿਲ੍ਹੇ ਦੇ ਪਿੰਡ ਫਰਵਾਹੀ ਵਿਖੇ ਜੈੱਕ ਲਗਾ ਕੇ ਉੱਚੀ ਚੁੱਕੀ ਜਾ ਰਹੀ ਕੋਠੀ ਡਿੱਗਣ ਕਾਰਨ ਮਲਬੇ ਹੇਠ ਦੱਬ ਕੇ ਮਰੇ ਤਿੰਨ ਮਜ਼ਦੂਰਾਂ ਦੀ ਮੌਤ ਦੇ ਮਾਮਲੇ ਵਿੱਚ ਬਰਨਾਲਾ ਪੁਲਿਸ ਨੇ ਸਦਰ ਥਾਣਾ ਵਿਖੇ ਠੇਕੇਦਾਰ ਰਣਜੀਤ ਸਿੰਘ ਦੇ ਖ਼ਿਲਾਫ਼ ਮੁਕੱਦਮਾ ਦਰਜ ਕੀਤਾ ਹੈ। ਇਸ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਐਸਐਚਓ ਜਗਜੀਤ ਸਿੰਘ ਨੇ ਦੱਸਿਆ ਕਿ ਬਰਨਾਲਾ ਦੇ ਕਿਰਤ ਇੰਸਪੈਕਟਰ ਮਨਪ੍ਰੀਤ ਸਿੰਘ ਅਤੇ ਤਹਿਸੀਲਦਾਰ ਕੁਲਦੀਪ ਸਿੰਘ ਵੱਲੋਂ ਦਿੱਤੀ ਅਰਜ਼ੀ ਦੇ ਆਧਾਰ ‘ਤੇ ਉਕਤ ਮਾਮਲੇ ਵਿੱਚ ਠੇਕੇਦਾਰ ਰਣਜੀਤ ਸਿੰਘ ਵਾਸੀ SBS ਨਗਰ ਮੋਗਾ ਦੇ ਖ਼ਿਲਾਫ਼ BNS ਐਕਟ 2023 ਦੀ ਧਾਰਾ 106(1) ਅਧੀਨ FIR ਦਰਜ ਕੀਤੀ ਗਈ ਹੈ। ਦੱਸ ਦੇਈਏ ਕਿ ਪਿੰਡ ਫਰਵਾਹੀ ਵਿਖੇ ਵਿਸ਼ਾਲ ਗੋਇਲ ਪੁੱਤਰ ਜੀਵਨ ਕੁਮਾਰ ਦੀ ਕੋਠੀ ਨੂੰ ਜੈਂਕ ਲਗਾ ਕੇ ਉੱਪਰ ਚੱਕਣ ਦਾ ਕੰਮ ਕੀਤਾ ਜਾ ਰਿਹਾ ਸੀ ਜਿਸ ਦਾ ਠੇਕਾ ਉਕਤ ਰਣਜੀਤ ਸਿੰਘ ਨੇ ਲਿਆ ਹੋਇਆ ਸੀ ਜਿੱਥੇ ਰਣਜੀਤ ਸਿੰਘ ਦੇ ਕਹਿਣ ‘ਤੇ ਕੁਝ ਮਜ਼ਦੂਰ ਕੋਠੀ ਨੂੰ ਜੈੱਕ ਲਗਾ ਕੇ ਉੱਪਰ ਚੁੱਕਣ ਦਾ ਕੰਮ ਕਰ ਰਹੇ ਸਨ। ਇਨਾਂ ਮਜ਼ਦੂਰਾਂ ਵਿੱਚੋਂ ਤਿੰਨ ਮਜ਼ਦੂਰ ਵਰਿੰਦਰ ਸਿੰਘ ਵਾਸੀ ਪਿੰਡ ਦੁਸਾਂਝ ਜ਼ਿਲ੍ਹਾ ਮੋਗਾ, ਰਜਨੀਸ਼ ਸਿੰਘ ਵਾਸੀ ਪਿੰਡ ਡਾਲਾ ਜਿਲਾ ਮੋਗਾ ਅਤੇ ਪ੍ਰਿੰਸ ਵਾਸੀ ਐਸਬੀਐਸ ਨਗਰ ਮੋਗਾ ਕੋਠੀ ਦੇ ਅੰਦਰ ਹੀ ਸੁੱਤੇ ਹੋਏ ਸਨ ਤਾਂ 29 ਮਾਰਚ ਸਵੇਰੇ ਵਕਤ ਕਰੀਬ ਸਵਾ ਕੁ ਚਾਰ ਵਜੇ ਕੋਠੀ ਅਚਾਨਕ ਡਿੱਗ ਪਈ ਜਿਸਦੇ ਮਲਬੇ ਹੇਠ ਅੰਦਰ ਸੁੱਤੇ ਪਏ ਉਕਤ ਤਿੰਨੋਂ ਮਜ਼ਦੂਰ ਦੱਬ ਗਏ ਜਿਨਾਂ ਨੂੰ ਪਿੰਡ ਵਾਲਿਆਂ ਦੀ ਮਦਦ ਨਾਲ ਪੁਲਿਸ ਨੇ ਸਿਵਲ ਹਸਪਤਾਲ ਬਰਨਾਲਾ ਦਾਖਲ ਕਰਵਾਇਆ ਜਿੱਥੇ ਡਾਕਟਰ ਨੇ ਤਿੰਨਾਂ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਇਸ ਵੱਡੀ ਘਟਨਾ ਦਾ ਨੋਟਿਸ ਲੈਂਦੇ ਹੋਏ ਜ਼ਿਲ੍ਹਾ ਪ੍ਰਸ਼ਾਸਨ ਵੱਲੋਂ ਕੀਤੀ ਕਾਰਵਾਈ ਤਹਿਤ ਮਨਪ੍ਰੀਤ ਸਿੰਘ ਕਿਰਤ ਇੰਸਪੈਕਟਰ ਅਤੇ ਕੁਲਦੀਪ ਸਿੰਘ ਤਹਿਸੀਲਦਾਰ ਨੇ ਬਣਦੀ ਕਾਨੂੰਨੀ ਕਾਰਵਾਈ ਲਈ ਇਕ ਅਰਜ਼ੀ ਪੁਲਿਸ ਵਿਭਾਗ ਨੂੰ ਦਿੱਤੀ ਸੀ ਜਿਸ ਤਹਿਤ ਥਾਣਾ ਸਦਰ ਵਿਖੇ ਉਕਤ ਘਟਨਾ ਦਾ ਜ਼ਿੰਮੇਵਾਰ ਮੰਨਦੇ ਹੋਏ ਰਣਜੀਤ ਸਿੰਘ ਠੇਕੇਦਾਰ ਦੇ ਖ਼ਿਲਾਫ਼ ਐਫਆਈਆਰ ਦਰਜ ਕੀਤੀ ਗਈ ਹੈ।
