ਬਰਨਾਲਾ ,18 ਮਈ, Gee98 News service-
ਬਰਨਾਲਾ ਦੇ ਸਿਟੀ ਥਾਣਾ-1 ਵਿੱਚ ਦਰਜ FIR ਨੰਬਰ 131 ਮਿਤੀ 26 ਮਾਰਚ 2026 ਅਧੀਨ ਧਾਰਾ 3/4/5 ਇਮੋਰਲ ਟਰੈਫਕਿੰਗ ਐਕਟ ‘ਚ ਨਾਮਜ਼ਦ ਜਸਵੀਰ ਕੌਰ ਔਰ ਉਰਫ਼ ਰਾਜਵਿੰਦਰ ਕੌਰ ਨੇ ਬਰਨਾਲਾ ਪੁਲਿਸ ਵੱਲੋਂ ਆਪਣੇ ਖ਼ਿਲਾਫ਼ ਦਰਜ ਕੀਤੀ FIR ‘ਤੇ ਵੱਡੇ ਸਵਾਲ ਖੜੇ ਕਰਦੇ ਹੋਏ ਇੱਕ ਥਾਣੇ ਦੇ ਐਸਐਚਓ ਉੱਪਰ ਵੀ ਗੰਭੀਰ ਦੋਸ਼ ਲਗਾਏ ਹਨ। ਬੀਤੇ ਕੱਲ੍ਹ ਇੱਕ ਹੋਟਲ ‘ਚ ਪ੍ਰੈਸ ਕਾਨਫਰੰਸ ਦੌਰਾਨ ਜਸਵੀਰ ਕੌਰ ਉਰਫ਼ ਰਾਜਵਿੰਦਰ ਕੌਰ ਨੇ ਸਬ ਇੰਸਪੈਕਟਰ ਸ਼ਰੀਫ ਖ਼ਾਨ (ਤਤਕਾਲੀ ਐਸਐਚਓ ਥਾਣਾ ਤਪਾ) ਮੌਜੂਦਾ ਤਾਇਨਾਤੀ ਥਾਣਾ ਸਿਟੀ 2 ਉੱਪਰ ਗੰਭੀਰ ਦੋਸ਼ ਲਗਾਉਂਦੇ ਹੋਏ ਕਿਹਾ ਕਿ 26 ਮਾਰਚ 2026 ਨੂੰ ਵਕਤ ਕਰੀਬ 12 ਵਜੇ ਦੁਪਹਿਰ ਸਬ ਇੰਸਪੈਕਟਰ ਸ਼ਰੀਫ ਖ਼ਾਨ ਖਾਨ ਨੇ ਬਿਨਾਂ ਵਰਦੀ ਪੁਲਿਸ ਪਾਰਟੀ ਸਮੇਤ ਉਸਦੇ ਘਰ ਰੇਡ ਕੀਤੀ। ਜਸਵੀਰ ਕੌਰ ਨੇ ਦੱਸਿਆ ਕਿ 26 ਮਾਰਚ ਨੂੰ ਮਲੇਰ ਕੋਟਲਾ ਵਿਖੇ ਹੈਦਰ ਸੇਖ ਦੀ ਦਰਗਾਹ ਤੇ ਜਾਣ ਲਈ ਉਸਦੇ ਘਰ ਉਸ ਦੇ ਕੁਝ ਹੋਰ ਕਰੀਬੀ ਵੀ ਪੁੱਜੇ ਹੋਏ ਸਨ, ਤਾਂ ਅਚਾਨਕ ਸਬ ਇੰਸਪੈਕਟਰ ਸਰੀਰ ਖਾਨ ਨੇ ਪੁਲਿਸ ਪਾਰਟੀ ਸਮੇਤ ਉਸ ਦੇ ਘਰ ਰੇਡ ਕੀਤੀ।ਉਸ ਨੇ ਦੱਸਿਆ ਕਿ ਉਸ ਵੇਲੇ ਸਬ ਇੰਸਪੈਕਟਰ ਥਾਣਾ ਤਪਾ ਵਿਖੇ ਤਾਇਨਾਤ ਸੀ ਅਤੇ ਜਿਸ ਕਰਕੇ ਉਸਦਾ ਘਰ ਥਾਣਾ ਤਪਾ ਦੇ ਖੇਤਰ ਵਿੱਚ ਨਹੀਂ ਆਉਂਦਾ ਇਸ ਦੇ ਬਾਵਜੂਦ ਵੀ ਉਸਦੇ ਘਰ ਰੇਡ ਕਰਨ ਸਬੰਧੀ SI ਸ਼ਰੀਫ ਖਾਨ ਨੇ ਮੁਕਾਮੀ ਥਾਣਾ ਸਿਟੀ-1 ਬਰਨਾਲਾ ਵਿਖੇ ਕੋਈ ਰਪਟ ਦਰਜ ਨਹੀਂ ਕਰਵਾਈ ਸੀ। ਜਸਵੀਰ ਕੌਰ ਨੇ ਕਿਹਾ ਕਿ ਉਕਤ ਪੁਲਿਸ ਅਫ਼ਸਰ ਨੇ ਪੁਲਿਸ ਪਾਰਟੀ ਸਮੇਤ ਬਿਨਾਂ ਕਿਸੇ ਸਰਚ ਵਾਰੰਟ ਤੋਂ ਗ਼ੈਰ ਕਾਨੂੰਨੀ ਢੰਗ ਨਾਲ ਉਸਦੇ ਸਾਰੇ ਘਰ ਦੀ ਤਲਾਸ਼ੀ ਲੈਣੀ ਸ਼ੁਰੂ ਕਰ ਦਿੱਤੀ ਪ੍ਰੰਤੂ ਜਦੋਂ ਉਸ ਨੂੰ ਤਲਾਸ਼ੀ ਦਾ ਕਾਰਨ ਪੁੱਛਿਆ ਗਿਆ ਤਾਂ ਉਸਨੇ ਮੇਰੀ ਅਤੇ ਮੇਰੀ ਨਾਬਾਲਿਗ ਬੇਟੀ ਦੀ ਕੁੱਟਮਾਰ ਕੀਤੀ।
ਜਸਵੀਰ ਕੌਰ ਨੇ ਪ੍ਰੈਸ ਕਾਨਫਰੰਸ ਦੌਰਾਨ ਇਹ ਵੀ ਦੋਸ਼ ਲਗਾਏ ਕਿ ਸ਼ਰੀਫ ਖ਼ਾਨ ਨੇ ਮੌਕੇ ‘ਤੇ ਹਾਜ਼ਰ ਉਸ ਦੇ ਕੁਝ ਰਿਸ਼ਤੇਦਾਰਾਂ, ਉਸਦੀ ਸਹੇਲੀ ਮਨਪ੍ਰੀਤ ਕੌਰ ਪਤਨੀ ਹੈਪੀ ਸਿੰਘ ਵਾਸੀ ਪੱਖੋ ਕਲਾਂ (ਬਰਨਾਲਾ) ਅਤੇ ਉਸਦੇ ਬੱਚਿਆਂ ਅਨਮੋਲਪ੍ਰੀਤ ਕੌਰ (11) ਸਾਲ ਅਤੇ ਪੁੱਤਰ ਚਰਨਕਮਲ ਸਿੰਘ 5 ਸਾਲ ਨੂੰ ਇੱਕ ਕਮਰੇ ਵਿੱਚ ਬੰਦ ਕਰ ਦਿੱਤਾ ਅਤੇ ਰੌਲਾ ਨਾ ਪਾਉਣ ਦੀ ਧਮਕੀ ਦਿੱਤੀ। ਉਹਨਾਂ ਕਿਹਾ ਕਿ ਐਸਐਚਓ ਨੇ ਮੌਕੇ ‘ਤੇ ਹਾਜ਼ਰ ਸਾਰਿਆਂ ਦੇ ਮੋਬਾਈਲ ਫੋਨ ਵੀ ਆਪਣੇ ਕਬਜ਼ੇ ਵਿੱਚ ਕਰ ਲਏ। ਜਸਵੀਰ ਕੌਰ ਨੇ ਇਹ ਵੀ ਦੋਸ਼ ਲਗਾਏ ਕਿ SI ਸ਼ਰੀਫ਼ ਖ਼ਾਨ ਉਸ ਦੇ ਸਾਹਮਣੇ ਉਸ ਦੇ ਘਰ ਦੇ ਸਟੋਰ ਵਿੱਚ ਜਾ ਕੇ ਗੋਦਰੇਜ ਦੀ ਅਲਮਾਰੀ ਵਿੱਚੋਂ 50,000 ਦੀ ਨਗਦੀ ਅਤੇ ਅੱਧਾ ਤੋਲਾ ਸੋਨੇ ਦੀ ਅੰਗੂਠੀ ਵੀ ਚੁੱਕ ਕੇ ਆਪਣੀ ਜੇਬ ਵਿੱਚ ਪਾ ਲਈ ਅਤੇ ਮੌਕੇ ‘ਤੇ ਹਾਜ਼ਰ ਉਨਾਂ ਨੂੰ ਹੈਦਰ ਸੇਖ ਦੀ ਦਰਗਾਹ ਤੇ ਲਿਜਾਣ ਵਾਸਤੇ ਆਏ ਕੁਲਵਿੰਦਰ ਸਿੰਘ ਅਸਪਾਲਕਲਾਂ ਦੀ ਜੇਬ ਵਿੱਚੋਂ 5000 ਰੁਪਏ ਵੀ ਕੱਢ ਕੇ ਆਪਣੀ ਜੇਬ ਵਿੱਚ ਪਾ ਲਏ। ਉਹਨਾਂ ਦੋਸ਼ ਲਗਾਏ ਕਿ ਸਬ ਇੰਸਪੈਕਟਰ ਸ਼ਰੀਫ ਖ਼ਾਨ ਉਹਨਾਂ ਦੇ ਘਰ ਲੱਗੇ ਸੀਸੀਟੀਵੀ ਕੈਮਰਿਆਂ ਦਾ DVR ਲੈ ਗਿਆ ਅਤੇ ਰੋਕਣ ‘ਤੇ ਉਸਨੇ ਉਸ ਨਾਲ ਬਦਤਮੀਜ਼ੀ ਕੀਤੀ ਅਤੇ ਜਾਤੀ ਸੂਚਕ ਸ਼ਬਦਾਂ ਦੀ ਵਰਤੋਂ ਕਰਦੇ ਹੋਏ ਗਾਲੀ ਗਲੋਚ ਵੀ ਕੀਤਾ। ਜਸਬੀਰ ਕੌਰ ਨੇ ਦੱਸਿਆ ਕਿ ਜਦ ਉਸ ਨੇ ਪੁਲਿਸ ਅਫ਼ਸਰ ਦੀ ਧੱਕੇਸ਼ਾਹੀ ਦੇ ਖ਼ਿਲਾਫ਼ ਰੌਲਾ ਪਾਉਣਾ ਸ਼ੁਰੂ ਕਰ ਦਿੱਤਾ ਤਾਂ ਉਕਤ ਸਬ ਇੰਸਪੈਕਟਰ ਅਫ਼ਸਰ ਨੇ ਮੌਕੇ ‘ਤੇ ਫੋਨ ਕਰਕੇ ਮੁਕਾਮੀ ਪੁਲਿਸ ਨੂੰ ਵੀ ਬੁਲਾ ਲਿਆ ਜਿਸ ਤੋਂ ਬਾਅਦ ਉਸ ਨੂੰ, ਉਸ ਦੀ ਸਹੇਲੀ ਅਤੇ ਉਸ ਦੇ ਘਰ ਵਿੱਚ ਹਾਜ਼ਰ ਹੋਰ ਕਰੀਬੀਆਂ ਨੂੰ ਪੁਲਿਸ ਬੱਸ ਸਟੈਂਡ ਚੌਂਕੀ ਬਰਨਾਲਾ ਵਿਖੇ ਲੈ ਗਈ। ਉਹਨਾਂ ਦੋਸ਼ ਲਗਾਇਆ ਕਿ ਪੁਲਿਸ ਨੇ ਬਿਨਾਂ ਕਿਸੇ ਸਰਚ ਵਾਰੰਟ ਤੋਂ ਉਹਨਾਂ ਦੇ ਘਰ ਰੇਡ ਕੀਤੀ ਅਤੇ ਮੌਕੇ ‘ਤੇ 55000 ਦੀ ਨਗਦੀ ਅਤੇ ਸੋਨੇ ਦੀ ਅੰਗੂਠੀ ਚੋਰੀ ਕਰਨ ਦੀਆਂ ਘਟਨਾਵਾਂ ‘ਤੇ ਪਰਦਾ ਪਾਉਣ ਲਈ ਉਸਦੇ ਖਿਲਾਫ਼ ਇਮੋਰਲ ਟਰੈਫਿਕਿੰਗ ਐਕਟ ਦੇ ਤਹਿਤ ਐਫਆਈਆਰ ਦਰਜ ਕਰਕੇ ਉਸਨੂੰ ਜੇਲ੍ਹ ਭੇਜ ਦਿੱਤਾ। ਜਸਵੀਰ ਕੌਰ ਨੇ ਦੱਸਿਆ ਕਿ ਜਦੋਂ ਉਹ ਜ਼ਮਾਨਤ ਹੋਣ ਉਪਰੰਤ ਆਪਣੇ ਘਰ ਵਿੱਚੋਂ ਚੁੱਕੀ ਨਗਦੀ, ਸੋਨੇ ਦੀ ਅੰਗੂਠੀ ਅਤੇ ਡੀਵੀਆਰ ਲੈਣ ਲਈ ਪੁਲਿਸ ਚੌਕੀ ਬੱਸ ਸਟੈਂਡ ਬਰਨਾਲਾ ਗਈ ਤਾਂ ਉਥੋਂ ਪਤਾ ਲੱਗਿਆ ਕਿ ਐਸਐਚਓ ਸ਼ਰੀਫ਼ ਖ਼ਾਨ ਨੇ ਇਹ ਨਗਦੀ ਅਤੇ ਅੰਗੂਠੀ ਸਮੇਤ ਡੀਵੀਆਰ ਦੀ ਕੋਈ ਬਰਾਮਦਗੀ ਹੀ ਨਹੀਂ ਪਾਈ। ਜਸਵੀਰ ਕੌਰ ਨੇ ਕਿਹਾ ਕਿ ਜਦ ਉਸ ਨੇ ਸਬ ਇੰਸਪੈਕਟਰ ਸ਼ਰੀਫ ਖਾਨ ਦੇ ਫੋਨ ਨੰਬਰ ‘ਤੇ ਇਸ ਸਬੰਧੀ ਪੁੱਛਿਆ ਤਾਂ ਉਸਨੇ ਆਪਣੀ ਜ਼ੁਬਾਨ ਬੰਦ ਰੱਖਣ ਅਤੇ ਹੋਰ ਕੇਸ ਦਰਜ ਕਰਨ ਦੀਆਂ ਧਮਕੀਆਂ ਦਿੱਤੀਆਂ।
ਇਸ ਸਾਰੇ ਘਟਨਾਕ੍ਰਮ ਦੀ ਵਜ੍ਹਾ ਰੰਜਿਸ਼ ਦੱਸਦੇ ਹੋਏ ਜਸਵੀਰ ਕੌਰ ਨੇ ਕਿਹਾ ਕਿ ਉਸ ਦੇ ਪਤੀ ਹੌਲਦਾਰ ਗੁਲਾਬ ਸਿੰਘ ਦੀ ਪਹਿਲੀ ਪਤਨੀ ਸਰਕਾਰੀ ਅਧਿਆਪਕ ਬੇਅੰਤ ਕੌਰ ਵਾਸੀ ਟੱਲੇਵਾਲ ਹਾਲ ਆਬਾਦ ਗੁਰਦਾਸਪੁਰ ਦੇ ਖ਼ਿਲਾਫ਼ ਬਰਨਾਲਾ ਦੀ ਇੱਕ ਅਦਾਲਤ ‘ਚ ਕੇਸ ਪੈਂਡਿੰਗ ਹੈ ਜਿਸ ਦੀ ਪੈਰਵਾਈ ਉਹ ਕਰ ਰਹੀ ਹੈ। ਜਦਕਿ ਸ਼ਰੀਫ ਖਾਨ ਇਸ ਮਾਮਲੇ ‘ਚ ਬੇਅੰਤ ਕੌਰ ਦੀ ਮਦਦ ਕਰ ਰਿਹਾ ਹੈ ਅਤੇ ਉਸ ਉਪਰ ਕੇਸ ਵਾਪਸ ਲੈਣ ਸਬੰਧੀ ਦਬਾਅ ਬਣਾ ਰਿਹਾ ਹੈ। ਉਸਨੇ ਦੱਸਿਆ ਕਿ ਇਸੇ ਕੇਸ ਸਬੰਧੀ ਮਾਰਚ 2026 ਦੇ ਪਹਿਲੇ ਹਫ਼ਤੇ ਜਦ ਉਹ ਪੇਸ਼ੀ ‘ਤੇ ਗਈ ਤਾਂ ਉੱਥੇ ਸਬ ਇੰਸਪੈਕਟਰ ਸ਼ਰੀਫ ਖ਼ਾਨ ਉਸ ਨੂੰ ਮਿਲਿਆ ਤੇ ਬੇਅੰਤ ਕੌਰ ਨਾਲ ਚੱਲ ਰਹੇ ਸਾਰੇ ਕੇਸ ਵਾਪਸ ਲੈਣ ਲਈ ਉਸਦੀ ਸਹੇਲੀ ਪਰਮਜੀਤ ਕੌਰ ਪਤਨੀ ਰੂਪ ਸਿੰਘ ਵਾਸੀ ਬਰਨਾਲਾ ਦੀ ਵੀ ਮੌਜੂਦਗੀ ਵਿੱਚ ਕਾਫੀ ਦਬਾਅ ਪਾਇਆ ਸੀ ਪ੍ਰੰਤੂ ਉਸ ਦੇ ਇਨਕਾਰ ਕਰਨ ਤੋਂ ਬਾਅਦ ਸਬ ਇੰਸਪੈਕਟਰ ਸ਼ਰੀਫ ਖ਼ਾਨ ਨੇ ਧਮਕੀ ਦਿੱਤੀ ਕਿ ਜੇਕਰ ਤੂੰ ਕੇਸ ਵਾਪਸ ਨਾ ਲਏ ਤਾਂ ਤੇਰੇ ਖ਼ਿਲਾਫ਼ ਕੋਈ ਕੇਸ ਦਰਜ ਕਰ ਦਿਆਂਗਾ ਜਿਸ ਤੋਂ ਬਾਅਦ 26 ਮਾਰਚ 2026 ਨੂੰ ਸਬ ਇੰਸਪੈਕਟਰ ਸਰੀਫ ਖ਼ਾਨ ਨੇ ਉਸ ਦੇ ਘਰ ਵਿੱਚ ਰੇਡ ਕੀਤੀ ਅਤੇ ਉਸ ਦੇ ਖਿਲਾਫ ਇਮੋਰਲ ਟਰੈਫਿਕਿੰਗ ਐਕਟ ਤਹਿਤ ਮਾਮਲਾ ਬਰਨਾਲਾ ਦੇ ਸਿਟੀ ਥਾਣਾ ਵਿੱਚ ਦਰਜ ਕੀਤਾ ਗਿਆ। ਜਸਵੀਰ ਕੌਰ ਨੇ ਆਪਣੇ ਖ਼ਿਲਾਫ਼ ਪੁਲਿਸ ਵੱਲੋਂ ਲਗਾਏ ਦੇਹ ਵਪਾਰ ਦੇ ਦੋਸ਼ਾਂ ਸਬੰਧੀ ਸਵਾਲ ਚੁੱਕਦੇ ਹੋਏ ਕਿਹਾ ਕਿ ਕੋਈ ਆਪਣੇ ਘਰੇ ਸੀਸੀਟੀਵੀ ਕੈਮਰੇ ਲਗਵਾ ਕੇ ਦੇਹ ਵਪਾਰ ਕਿਵੇਂ ਕਰਵਾਏਗਾ ? ਪ੍ਰੈੱਸ ਕਾਨਫਰੰਸ ਦੌਰਾਨ ਜਸਵੀਰ ਕੌਰ ਉਰਫ ਰਾਜਵਿੰਦਰ ਕੌਰ ਨੇ ਇਸ ਮਾਮਲੇ ਸਬੰਧੀ ਪੰਜਾਬ ਦੇ ਮੁੱਖ ਮੰਤਰੀ, ਪੰਜਾਬ ਦੇ ਡੀਜੀਪੀ, ਚੇਅਰਮੈਨ ਐਸਸੀ ਕਮਿਸ਼ਨ ਪੰਜਾਬ, ਮਨੁੱਖੀ ਅਧਿਕਾਰ ਕਮਿਸ਼ਨ ਪੰਜਾਬ, ਮਹਿਲਾ ਕਮਿਸ਼ਨ ਪੰਜਾਬ ਨੂੰ ਲਿਖੀਆਂ ਦਰਖਾਸਤਾਂ ਦੀਆਂ ਫੋਟੋ ਕਾਪੀਆਂ ਦਿੰਦੇ ਹੋਏ ਇਨਸਾਫ਼ ਦੀ ਮੰਗ ਕੀਤੀ ਹੈ। ਜਸਵੀਰ ਕੌਰ ਨੇ ਉਕਤ ਅਧਿਕਾਰੀਆਂ ਨੂੰ ਲਿਖੀਆਂ ਦਰਖਾਸਤਾਂ ਵਿੱਚ ਇਹ ਵੀ ਮੰਗ ਕੀਤੀ ਹੈ ਕਿ ਬਰਨਾਲਾ ਦੇ ਥਾਣਾ ਸਿਟੀ-1 ਵਿੱਚ ਉਸ ਦੇ ਖ਼ਿਲਾਫ਼ ਦਰਜ ਐਫਆਈਆਰ ਦੀ ਪੜ੍ਹਤਾਲ ਬਰਨਾਲਾ ਤੋਂ ਬਾਹਰ ਕਿਸੇ ਉੱਚ ਅਧਿਕਾਰੀ ਤੋਂ ਕਰਵਾਈ ਜਾਵੇ। ਇਸ ਮਾਮਲੇ ਸਬੰਧੀ ਜਦੋਂ ਸਬ ਇੰਸਪੈਕਟਰ ਸ਼ਰੀਫ ਖ਼ਾਨ ਨਾਲ ਗੱਲ ਕੀਤੀ ਤਾਂ ਉਹਨਾਂ ਜਸਵੀਰ ਕੌਰ ਵੱਲੋਂ ਲਗਾਏ ਸਾਰੇ ਦੋਸ਼ਾਂ ਨੂੰ ਨਕਾਰਦੇ ਹੋਏ ਕਿਹਾ ਕਿ ਇਹ ਸਾਰੇ ਦੋਸ਼ ਬੇਬੁਨਿਆਦ ਅਤੇ ਝੂਠੇ ਹਨ। ਸਬ ਇੰਸਪੈਕਟਰ ਸ਼ਰੀਫ ਖਾਨ ਨੇ ਕਿਹਾ ਕਿ ਉਹਨਾਂ ਦਾ ਇਸ ਮਾਮਲੇ ਨਾਲ ਕੋਈ ਲੈਣਾ ਦੇਣਾ ਨਹੀਂ, ਉਹ ਉਸ ਵੇਲੇ ਤਪਾ ਵਿਖੇ ਤਾਇਨਾਤ ਸਨ ਜਦ ਕਿ ਇਹ ਐਫਆਈਆਰ ਥਾਣਾ ਸਿਟੀ ਵਿੱਚ ਦਰਜ ਹੋਈ ਹੈ।
ਫੋਟੋ ਕੈਪਸ਼ਨ- ਪ੍ਰੈਸ ਕਾਨਫਰੰਸ ਦੌਰਾਨ ਗੱਲਬਾਤ ਕਰਨ ਸਮੇਂ ਜਸਵੀਰ ਕੌਰ ਉਰਫ਼ ਰਾਜਵਿੰਦਰ ਕੌਰ
