ਸੀਬੀਐੱਸਈ ਦੇ ਅੰਗਰੇਜ਼ੀ ਦੇ ਪੇਪਰ ਸਬੰਧੀ ਵਿਵਾਦ ਸ਼ੁਰੂ

ਚੰਡੀਗੜ੍ਹ-(ਜ਼ੀ98 ਨਿਊਜ਼)- ਸੀਬੀਐਸਈ ਵੱਲੋਂ ਬਾਰ੍ਹਵੀਂ ਕਲਾਸ ਦੀ ਅੰਗਰੇਜ਼ੀ ਵਿਸ਼ੇ ਦੀ ਪ੍ਰੀਖਿਆ ‘ਚ ਕੁਝ ਪ੍ਰਸ਼ਨਾਂ ਦੇ ਉੱਤਰਾਂ ਦੀਆਂ ਆਪਸ਼ਨਾਂ ਮਿਲਦੀਆਂ ਜੁਲਦੀਆਂ ਹੋਣ ਕਾਰਨ ਪੇਪਰ ਸੈਟਿੰਗ ਪਾਲਿਸੀ ‘ਤੇ ਵਿਵਾਦ ਹੋ ਰਿਹਾ ਹੈ। 3 ਦਸੰਬਰ ਨੂੰ ਹੋਈ ਅੰਗਰੇਜ਼ੀ ਵਿਸ਼ੇ ਦੀ ਪ੍ਰੀਖਿਆ ਵਿੱਚ ਸੈਕਸ਼ਨ-ਏ, ਭਾਗ ਪਹਿਲਾ ਦੇ ਪ੍ਰਸ਼ਨ 1 ਅਤੇ 7 ਵਿੱਚ ਏ ਅਤੇ ਸੀ ਆਪਸ਼ਨਾਂ ਦੇ ਅਰਥ ਲਗਭਗ ਮਿਲਦੇ ਜੁਲਦੇ ਹਨ। ਇਸੇ ਤਰ੍ਹਾਂ ਸੈਕਸ਼ਨ ਬੀ ਦੇ ਭਾਗ ਤੀਜਾ ਦੇ ਪ੍ਰਸ਼ਨ ਵੀ ਵਿੱਚ ਵੀ ਇਹੋ ਸਮੱਸਿਆ ਹੈ। ਭਾਗ ਚੌਥਾ ਦੇ ਪ੍ਰਸ਼ਨ 25, 28, 29 ਅਤੇ 30 ਦੇ ਉੱਤਰਾਂ ਦੀਆਂ ਆਪਸ਼ਨਾਂ ਵੀ ਆਪਸ ਵਿੱਚ ਮਿਲਦੀਆਂ ਜੁਲਦੀਆਂ ਹੋਣ ਕਾਰਨ ਵਿਦਿਆਰਥੀਆਂ ਨੂੰ ਉਲਝਾਉਣ ਵਾਲੀਆਂ ਹਨ। ਸੀਬੀਐਸਈ ਦੀ ਪਾਲਿਸੀ ਅਨੁਸਾਰ ਵਿਦਿਆਰਥੀ ਨੇ ਦਿੱਤੀਆਂ ਆਪਸ਼ਨਾਂ ਵਿੱਚੋਂ ਸਹੀ ਆਪਸ਼ਨ ਵਾਲਾ ਖਾਨਾ ਭਰਨਾ ਹੈ ਪ੍ਰੰਤੂ ਅੰਗਰੇਜ਼ੀ ਵਿਸ਼ੇ ਦੇ ਪੇਪਰ ਵਿੱਚ ਪ੍ਰਸ਼ਨਾਂ ਦੇ ਉੱਤਰਾਂ ਦੀਆਂ ਆਪਸ਼ਨਾਂ ਮਿਲਦੀਆਂ-ਜੁਲਦੀਆਂ ਹੋਣ ਕਾਰਨ ਵਿਦਿਆਰਥੀਆਂ ਨੂੰ ਪੇਪਰ ਹੱਲ ਕਰਨ ਵਿੱਚ ਉਲਝਣਾਂ ਦਾ ਸਾਹਮਣਾ ਕਰਨਾ ਪਿਆ ਹੈ । ਜਿਸ ਸਬੰਧੀ ਵਿਦਿਆਰਥੀਆਂ ਨੇ ਸੰਬੰਧਤ ਪ੍ਰਸ਼ਨਾਂ ਦੇ ਗ੍ਰੇਸ ਅੰਕ ਲੈਣ ਲਈ ਟਵਿੱਟਰ ‘ਤੇ ਵੀ ਮੁਹਿੰਮ ਸ਼ੁਰੂ ਕਰ ਦਿੱਤੀ ਹੈ। ਇਸ ਸੰਬੰਧ ਵਿਚ ਅਧਿਆਪਕ ਜਥੇਬੰਦੀਆਂ ਨੇ ਸੀਬੀਐੱਸਈ ਨੂੰ ਅੱਗੇ ਤੋਂ ਅਜਿਹੀਆਂ ਗਲਤੀਆਂ ਤੋਂ ਬਚਣ ਦੀ ਸਲਾਹ ਦਿੰਦੇ ਹੋਏ ਅੰਗਰੇਜ਼ੀ ਦੇ ਪੇਪਰ ‘ਚ ਗਲਤੀਆਂ ਦੇ ਗਰੇਸ ਅੰਕ ਦੇਣ ਜਾਂ ਪੇਪਰ ਦੁਬਾਰਾ ਲੈਣ ਦੀ ਮੰਗ ਵੀ ਕੀਤੀ ਹੈ।