ਚੰਡੀਗੜ, 11 ਜਨਵਰੀ (ਜੀ98 ਨਿਊਜ਼) : ਸਿਆਸਤ ਦੇ ਇੱਕ ਹੰਢੇ ਹੋਏ ਖਿਡਾਰੀ ਨੂੰ ਮਿਲੇ ਚੋਣ ਨਿਸ਼ਾਨ ਦੀ ਚਰਚਾ ਖ਼ੂਬ ਹੋ ਰਹੀ ਹੈ। ਚੋਣ ਕਮਿਸ਼ਨ ਵੱਲੋਂ ਕੈਪਟਨ ਅਮਰਿੰਦਰ ਸਿੰਘ ਦੀ ਪਾਰਟੀ ਪੰਜਾਬ ਲੋਕ ਕਾਂਗਰਸ ਨੂੰ ਚੋਣ ਨਿਸ਼ਾਨ ‘ਹਾਕੀ ਤੇ ਬਾਲ’ ਅਲਾਟ ਕੀਤਾ ਗਿਆ ਹੈ। ਕੈਪਟਨ ਅਮਰਿੰਦਰ ਸਿੰਘ ਨੇ ਮੁੱਖ ਮੰਤਰੀ ਦੇ ਆਹੁਦੇ ਤੋਂ ਹਟਾਏ ਜਾਣ ਤੋਂ ਬਾਅਦ ਆਪਣੀ ਪਾਰਟੀ ਪੰਜਾਬ ਲੋਕ ਕਾਂਗਰਸ ਦਾ ਗਠਨ ਕਰਕੇ ਭਾਜਪਾ ਨਾਲ ਗੱਠਜੋੜ ਕਰ ਲਿਆ ਸੀ। ਚੋਣ ਨਿਸ਼ਾਨ ਹਾਕੀ ਤੇ ਬਾਲ ਮਿਲਣ ਤੋਂ ਬਾਅਦ ਦੇਖਣਯੋਗ ਹੋਵੇਗਾ ਕਿ ਕੈਪਟਨ ਅਮਰਿੰਦਰ ਸਿੰਘ ਸ਼੍ਰੋਮਣੀ ਅਕਾਲੀ ਦਲ, ਕਾਂਗਰਸ ਤੇ ਆਮ ਆਦਮੀ ਪਾਰਟੀ ’ਚੋਂ ਕਿਸ ਪਾਰਟੀ ਦੇ ਫੱਟੇ ਖੜਕਾ ਕੇ ਗੋਲ ਕਰਦੇ ਹਨ। ਇਹ ਤਾਂ ਸਾਫ਼ ਹੈ ਕਿ ਪੰਜਾਬ ਲੋਕ ਕਾਂਗਰਸ ਦਾ ਸੱਤਾ ਤੱਕ ਪੁੱਜਣਾ ਨਾਮੁਮਕਿਨ ਹੈ, ਪ੍ਰੰਤੂ ਇਹ ਵੀ ਸਪੱਸ਼ਟ ਹੈ ਕਿ ਉਕਤ ਤਿੰਨੇ ਪਾਰਟੀਆਂ ਵਿੱਚੋਂ ਸੱਤਾ ਤੱਕ ਪੁੱਜਣ ਵਾਲੀ ਪਾਰਟੀ ਨੂੰ ਕੈਪਟਨ ਅਮਰਿੰਦਰ ਸਿੰਘ ਨਾਲ ਖੇਡ ਕੇ ਹੀ ਅੱਗੇ ਲੰਘਣਾ ਪਵੇਗਾ। ਇਹ ਸਮੇਂ ਦੀ ਬੁੱਕਲ’ ਚ ਹੈ ਕਿ ਕੈਪਟਨ ਅਮਰਿੰਦਰ ਸਿੰਘ ਕਿਸ ਤਰੀਕੇ ਨਾਲ ਕਾਂਗਰਸ ਅਤੇ ਖ਼ਾਸ ਕਰਕੇ ਨਵਜੋਤ ਸਿੰਘ ਸਿੱਧੂ ਨੂੰ ਹਰਾਉਣ ਲਈ ਆਪਣੇ ਖਿਡਾਰੀਆਂ ਨੂੰ ਮੈਦਾਨ ਵਿੱਚ ਉਤਾਰਦੇ ਹਨ, ਕਿਉਂਕਿ ਆਪਣੇ ਐਲਾਨ ਮੁਤਾਬਕ ਕੈਪਟਨ ਇਸ ਵਾਰ ਜਿੱਤਣ ਲਈ ਘੱਟ ਅਤੇ ਕਿਸੇ ਨੂੰ ਹਰਾਉਣ ਲਈ ਵੱਧ ਖੇਡਣਗੇ, ਜਾਂ ਫਿਰ ਇੰਝ ਕਹਿ ਲਵੋਂ ਕਿ ਕੈਪਟਨ ਅਮਰਿੰਦਰ ਸਿੰਘ ਨਾ ਖੇਡਣਗੇ ਤੇ ਨਾ ਖੇਡਣ ਦੇਣਗੇ । ਕਾਂਗਰਸ ਦੇ ਸੰਦਰਭ ਵਿੱਚ ਤਾਂ ਘੱਟੋ-ਘੱਟ ਇਹੋ ਕਿਹਾ ਜਾ ਸਕਦਾ ਹੈ।
