ਬਰਨਾਲਾ, 04 ਜੂਨ (ਨਿਰਮਲ ਸਿੰਘ ਪੰਡੋਰੀ) :-
ਆਖ਼ਿਰ ! ਸਾਬਕਾ ਕਾਂਗਰਸੀ ਆਗੂ ਕੇਵਲ ਸਿੰਘ ਢਿੱਲੋਂ ਨੇ ਆਪਣੇ ਸਿਆਸੀ ਭਵਿੱਖ ਦਾ ਫ਼ੈਸਲਾ ਕਰ ਹੀ ਲਿਆ ਹੈ। ਭਾਜਪਾ ਦੇ ਰਣਨੀਤੀਕਾਰ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਦੀ ਚੰਡੀਗੜ ਫੇਰੀ ਦੌਰਾਨ ਕੇਵਲ ਸਿੰਘ ਢਿੱਲੋਂ ਨੇ ਕਮਲ ਦੇ ਫੁੱਲ ਦੀਆਂ ਪੰਖੜੀਆਂ ਨੂੰ ਛੋਹਿਆ। ਚੇਤੇ ਰਹੇ ਕਿ ਲੰਘੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਢਿੱਲੋਂ ਦਾ ਕਾਂਗਰਸ ਨਾਲੋਂ ਨਾਤਾ ਟੁੱਟ ਗਿਆ ਸੀ, ਜਦ ਕਾਂਗਰਸ ਨੇ ਬਰਨਾਲਾ ਤੋਂ ਮੁਨੀਸ ਬਾਂਸਲ ਨੂੰ ਟਿਕਟ ਦੇ ਦਿੱਤੀ ਸੀ। ਵਿਧਾਨ ਸਭਾ ਚੋਣਾਂ ਦੌਰਾਨ ਕੇਵਲ ਸਿੰਘ ਢਿੱਲੋਂ ਨੇ ਆਪਣੀ ਗੁਪਤ ਰਣਨੀਤੀ ਤਹਿਤ ਆਪਣੀ ਹਾਜ਼ਰੀ ਦਰਜ ਕਰਵਾਈ ਅਤੇ ਫ਼ੇਰ ਢਿੱਲੋਂ ਸਿਆਸੀ ਸਰਗਰਮੀਆਂ ਤੋਂ ਦੂਰ ਰਹਿਣ ਲੱਗ ਪਏ। ਭਗਵੰਤ ਮਾਨ ਸਰਕਾਰ ਵੱਲੋਂ ਢਿੱਲੋਂ ਦੇ ਸਾਰੇ ਸੁਰੱਖਿਆ ਕਰਮੀ ਵਾਪਸ ਲੈਣ ਤੋਂ ਬਾਅਦ ਢਿੱਲੋਂ ਦੇ ਸਿਆਸੀ ਭਵਿੱਖ ਦੀ ਚਰਚਾ ਦੀ ਇਬਾਰਤ ਨੇ ਢਿੱਲੋਂ ਨੂੰ ਸਿਆਸੀ ਰਾਹ ’ਤੇ ਚੱਲਦੇ ਰਹਿਣ ਲਈ ਝੰਜੋੜਿਆ ਅਤੇ ਕੇਵਲ ਸਿੰਘ ਢਿੱਲੋਂ ਨੇ ਕੈਪਟਨ ਸਰਕਾਰ ਵੇਲੇ ਦੇ ਆਪਣੇ ਨੇੜਲੇ ਸਾਥੀਆਂ ਨਾਲ ਭਾਜਪਾ ਦਾ ਪੱਲੂ ਫੜ ਲਿਆ। ਹੁਣ ਦੇਖਣਯੋਗ ਹੋਵੇਗਾ ਕਿ ਕਾਂਗਰਸ ਦੇ ਰਾਜ ਮੌਕੇ ਕੇਵਲ ਸਿੰਘ ਢਿੱਲੋਂ ਦੀ ਤਾਕਤ ਬਲਬੂਤੇ ਸੱਤਾ ਦਾ ਸੁੱਖ਼ ਮਾਨਣ ਵਾਲੇ ਬਰਨਾਲਾ ਨਾਲ ਸੰਬੰਧਿਤ ਕਾਂਗਰਸੀ ‘ਹੱਥ’ ਛੱਡ ਕੇ ਕੇਵਲ ਸਿੰਘ ਢਿੱਲੋਂ ਨਾਲ ਜੁੜਦੇ ਹਨ ਜਾਂ ਨਹੀਂ। ਬਰਨਾਲਾ ਤੋਂ ਕਾਂਗਰਸ ਦੇ ਹਲਕਾ ਇੰਚਾਰਜ ਮੁਨੀਸ ਬਾਂਸਲ ਲਈ ਵੀ ਇਨ੍ਹਾਂ ਕਾਂਗਰਸੀ ਆਗੂਆਂ ਨੂੰ ਆਪਣੇ ਨਾਲ ਜੋੜ ਕੇ ਰੱਖਣ ਦੀ ਚੁਣੌਤੀ ਬਣੀ ਰਹੇਗੀ, ਕਿਉਂਕਿ ਇਹ ਆਗੂ ‘ਚੌਧਰ ਦਾ ਲੌਲੀਪੋਪ’ ਚੂਸਣ ਦੇ ਆਦੀ ਰਹੇ ਹਨ,ਫਿਰ ਭਾਵੇਂ ਚੌਧਰ ਰਾਜ ਪੱਧਰੀ ਹੋਵੇ ਜਾਂ ਦੇਸ਼ ਪੱਧਰੀ ਹੋਵੇ। ਕੇਵਲ ਸਿੰਘ ਢਿੋਲੋਂ ਦੀ ਭਾਜਪਾ ’ਚ ਸ਼ਮੂਲੀਅਤ ਤੋਂ ਬਾਅਦ ਇਨ੍ਹਾਂ ਆਗੂਆਂ ਨਾਲ ਗੱਲ ਕਰਨ ’ਤੇ ‘ਆਫ਼ ਦੀ ਰਿਕਾਰਡ’ ਇਨਾਂ ਆਗੂਆਂ ਨੇ ਕਿਹਾ ਕਿ ਉਹ ਕਾਂਗਰਸ ਪਾਰਟੀ ਨਾਲ ਜੁੜੇ ਹੋਏ ਸਨ, ਨਾ ਕਿ ਕਿਸੇ ਵਿਅਕਤੀ ਵਿਸੇਸ਼ ਨਾਲ ਜੁੜੇ ਹੋਏ ਸਨ ਪ੍ਰ੍ਰੰਤੂ ਇਹ ਵੀ ਕੰਧ ’ਤੇ ਲਿਖੇ ਵਾਂਗ ਸੱਚ ਹੈ ਕਿ ਅਤੀਤ ਵਿੱਚ ਇਹ ਆਗੂੁ ਹਵਾ ਦੇ ਰੁੱਖ ਨਾਲ ਬਦਲਦੇ ਰਹੇ ਹਨ। ਕੇਵਲ ਸਿੰਘ ਢਿੱਲੋਂ ਦੇ ਤਾਜ਼ਾ ਫ਼ੈਸਲੇ ਤੋਂ ਬਾਅਦ ਹੁਣ ਬਰਨਾਲਾ ਜ਼ਿਲ੍ਹੇ ’ਚ ਢਿੱਲੋਂ ਬਨਾਮ ਬਾਂਸਲ ਠੰਡੀ ਸਿਆਸੀ ਜੰਗ ਸ਼ੁਰੂ ਹੋਣ ਤੋਂ ਵੀ ਇਨਕਾਰ ਨਹੀਂ ਕੀਤਾ ਜਾ ਸਕਦਾ।
