ਬਰਨਾਲਾ,05 ਨਵੰਬਰ (ਨਿਰਮਲ ਸਿੰਘ ਪੰਡੋਰੀ) :
ਸ਼ਿਵ ਸੈਨਾ ਆਗੂ ਸੁਧੀਰ ਸੂਰੀ ਦੇ ਕਤਲ ਨੇ ਪੰਜਾਬ ’ਚ ਕਾਨੂੰਨ ਵਿਵਸਥਾ ਨੂੰ ਸਵਾਲਾਂ ਦੇ ਘੇਰੇ ’ਚ ਲਿਆਂਦਾ ਹੈ। ਉੱਚ ਸੁਰੱਖਿਆ ਪ੍ਰਾਪਤ ਘੇਰੇ ਵਿੱਚ ਰਹਿਣ ਵਾਲੇ ਕਿਸੇ ਆਗੂ ਦੀ ਹੱਤਿਆ ਨੇ ਪੁਲਿਸ ਪ੍ਰਬੰਧਾਂ ਉੱਪਰ ਵੀ ਸਵਾਲ ਖੜੇ ਕੀਤੇ ਹਨ। ਸੁਧੀਰ ਸੂਰੀ ਹਮੇਸ਼ਾ ਵਿਵਾਦਗ੍ਰਸਤ ਆਗੂ ਰਿਹਾ ਹੈ ਜੋ ਸਿੱਖ ਧਰਮ ਦੇ ਖਿਲਾਫ਼ ਜਾਂ ਕੁਝ ਸਿੱਖ ਆਗੂਆਂ ਦੇ ਖਿਲਾਫ਼ ਭੜਕਾਊ ਬਿਆਨ ਦਿੰਦਾ ਰਿਹਾ ਹੈ ਇਸੇ ਕਰਕੇ ਸੂਰੀ ਕੱਟੜ ਸਿੱਖ ਜਥੇਬੰਦੀਆਂ ਦੇ ਨਿਸ਼ਾਨੇ ’ਤੇ ਸੀ। ਵਿਦੇਸ਼ ਬੈਠੇ ਖਾਲਿਸਤਾਨੀ ਪੱਖੀ ਲਖਵੀਰ ਸਿੰਘ ਲੰਡਾ ਨੇ ਸੂਰੀ ਦੇ ਕਤਲ ਦੀ ਜ਼ਿੰਮੇਵਾਰੀ ਸੋਸ਼ਲ ਮੀਡੀਆ ’ਤੇ ਪੋਸਟ ਪਾ ਕੇ ਲਈ ਹੈ ਭਾਵੇਂ ਕਿ ਪੁਲਿਸ ਨੇ ਲੰਡਾ ਦੀ ਇਸ ਪੋਸਟ ਦੀ ਤਸਦੀਕ ਨਹੀਂ ਕੀਤੀ ਪੰ੍ਰਤੂ ਲੰਘ ਚੁੱਕੇ ਸਮੇਂ ਵਿੱਚ ਵਿਦੇਸ਼ ਬੈਠੇ ਖਾਲਿਸਤਾਨੀ ਪੱਖੀਆਂ ਤੋਂ ਸੂਰੀ ਨੂੰ ਧਮਕੀਆਂ ਮਿਲਦੀਆਂ ਰਹੀਆਂ ਹਨ। ਸੂਰੀ ਨੂੰ ਕਤਲ ਕਰਨ ਵਾਲੇ ਨੌਜਵਾਨ ਸੰਦੀਪ ਸਿੰਘ ਦੀ ਗੱਡੀ ’ਚੋਂ ਮਿਲਿਆ ਇੱਕ ਕਿਤਾਬਚਾ ਵੀ ਇਹ ਸਪੱਸ਼ਟ ਕਰ ਦਿੰਦਾ ਹੈ ਕਿ ਸੂਰੀ ਦਾ ਕਤਲ ਯੋਜਨਾਬੱਧ ਤਰੀਕੇ ਨਾਲ ਕੀਤਾ ਗਿਆ ਹੈ। ਜਿਸ ਦਾ ਕਾਰਨ ਉਸ ਵੱਲੋਂ ਸਿੱਖ ਕੌਮ ਦੇ ਖਿਲਾਫ਼ ਦਿੱਤੇ ਜਾਂਦੇ ਬਿਆਨ ਮੰਨੇ ਜਾ ਰਹੇ ਹਨ। ਹਮਲਾਵਰ ਸੰਦੀਪ ਸਿੰਘ ਦੀ ਗੱਡੀ ’ਚੋਂ ਮਿਲੇ ਕਿਤਾਬਚੇ ਨੇ ਪੁਲਿਸ ਦੇ ਰੌਂਗਟੇ ਖੜੇ ਕਰ ਦਿੱਤੇ ਹਨ, ਇਸ ਕਿਤਾਬਚੇ ਵਿੱਚ ਡੇਰਾ ਸਿਰਸਾ ਮੁਖੀ, ਮਨਜਿੰਦਰ ਸਿੰਘ ਬਿੱਟਾ ਸਮੇਤ ਕੁਝ ਹੋਰ ਆਗੂਆਂ ਦੀ ਤਸਵੀਰਾਂ ਹਨ ਅਤੇ ਕੁਝ ਤਸਵੀਰਾਂ ਉੱਪਰ ਕਰਾਸ ਦੇ ਨਿਸ਼ਾਨ ਵੀ ਲੱਗੇ ਹੋਏ ਹਨ। ਸੂਰੀ ਦੇ ਕਤਲ ਤੋਂ ਬਾਅਦ ਪੰਜਾਬ ’ਚ ਅਮਨ ਕਾਨੂੰਨ ਦੀ ਸਥਿਤੀ ਤਣਾਅਪੂਰਨ ਹੋਣ ਦੇ ਆਸਾਰ ਹਨ। ਦੂਜੇ ਪਾਸੇ ਸੂਰੀ ਦੇ ਪਰਿਵਾਰ ਨੇ ਆਪਣੇ ਵੱਲੋਂ ਰੱਖੀਆਂ ਚਾਰ ਮੰਗਾਂ ਪੂਰੀਆਂ ਹੋਣ ਤੱਕ ਹੀ ਪੋਸਟਮਾਰਟਮ ਕਰਵਾਉਣ ਦੀ ਗੱਲ ਕਹੀ ਹੈ। ਸੂਰੀ ਦੇ ਪਰਿਵਾਰ ਨੇ ਸੂਰੀ ਨੂੰ ਸ਼ਹੀਦ ਦਾ ਦਰਜਾ, ਸੀਬੀਆਈ ਜਾਂਚ ,ਏਸੀਪੀ ਨੌਂਰਥ ਅਤੇ ਦੋ ਐਐਚਓਜ਼ ਨੂੰ ਸਸਪੈਂਡ ਕਰਨ ਦੀ ਮੰਗ ਰੱਖੀ ਹੈ। ਸੂਰੀ ਦੇ ਕਤਲ ਦੀ ਘਟਨਾ ਤੋਂ ਬਾਅਦ ਪੰਜਾਬ ਦੇ ਡੀਜੀਪੀ ਗੌਰਵ ਯਾਦਵ ਤੁਰੰਤ ਸ੍ਰੀ ਅੰਮਿ੍ਰਤਸਰ ਪੁੱਜੇ ਜਿਸ ਤੋਂ ਸਪੱਸ਼ਟ ਹੁੰਦਾ ਹੈ ਕਿ ਪੁਲਿਸ ਇਸ ਕਤਲ ਤੋਂ ਬਾਅਦ ਪੈਦਾ ਹੋਣ ਵਾਲੀ ਸਥਿਤੀ ਸੰਬੰਧੀ ਪੂਰੀ ਸੁਚੇਤ ਹੈ। ਡੀਜੀਪੀ ਪੰਜਾਬ ਨੇ ਸੂਬੇ ਦੇ ਲੋਕਾਂ ਨੂੰ ਅਫਵਾਹਾਂ ਤੋਂ ਸੁਚੇਤ ਰਹਿਣ ਦੀ ਅਪੀਲ ਕੀਤੀ ਹੈ।
