-ਛੋਟੀਆਂ ਸਨਅਤਾਂ ਹੋ ਰਹੀਆਂ ਹਨ ਬੰਦ
ਚੰਡੀਗੜ੍ਹ 16 ਜੂਨ-ਪੰਜਾਬ ‘ਚ ਅਮਨ-ਕਾਨੂੰਨ ਦੇ ਮਾੜੇ ਹਾਲਾਤਾਂ ਦਾ ਅਸਰ ਪੰਜਾਬ ਦੀ ਇੰਡਸਟਰੀ ਉੱਪਰ ਬੁਰੀ ਤਰ੍ਹਾਂ ਪੈ ਰਿਹਾ ਹੈ। ਇਹ ਕੌੜੀ ਸੱਚਾਈ ਹੈ ਕਿ ਪੰਜਾਬ ਦੇ ਸਨਅਤਕਾਰ ਦੂਜੇ ਸੂਬਿਆਂ ‘ਚ ਨਿਵੇਸ਼ ਕਰ ਰਹੇ ਹਨ ਅਤੇ ਹੌਲੀ-ਹੌਲੀ ਪੰਜਾਬ ਦੀ ਛੋਟੀ ਇੰਡਸਟਰੀ ਬੰਦ ਹੋ ਰਹੀ ਹੈ । ਹੈਰਾਨੀ ਇਸ ਗੱਲ ਦੀ ਵੀ ਹੈ ਕਿ ਪੰਜਾਬ ਦੀ ਵਿਰੋਧੀ ਧਿਰ ਦੇ ਏਜੰਡੇ ‘ਤੇ ਵੀ ਪੰਜਾਬ ਦੀ ਇੰਡਸਟਰੀ ਨਹੀਂ ਹੈ । ਪੰਜਾਬ ਦੇ ਵਿਰੋਧੀ ਧਿਰ ਦੇ ਆਗੂ ਵੀ ਸੂਬੇ ਦੇ ਮੁੱਖ ਮੰਤਰੀ ਅਤੇ ਹੋਰ ਮੰਤਰੀਆਂ ਨਾਲ ਟਵੀਟ-ਟਵੀਟ ਖੇਲਣ ‘ਤੇ ਲੱਗੇ ਹੋਏ ਹਨ । ਪ੍ਰਾਪਤ ਜਾਣਕਾਰੀ ਅਨੁਸਾਰ ਪੰਜਾਬ ਦੇ ਕਾਰੋਬਾਰੀਆਂ ਨੇ ਪਿਛਲੇ ਥੋੜ੍ਹੇ ਸਮੇਂ ਵਿੱਚ ਹੀ ਲਗਭਗ ਦੋ ਲੱਖ ਕਰੋੜ ਦਾ ਨਿਵੇਸ਼ ਉੱਤਰ ਪ੍ਰਦੇਸ਼ ਵਿੱਚ ਕੀਤਾ ਹੈ । ਪੰਜਾਬ ਦੇ ਵੱਡੇ ਕਾਰੋਬਾਰੀ ਹੀਰੋ ਸਾਇਕਲ, ਏਵਨ ਸਾਇਕਲ, ਵਰਧਮਾਨ ਅਤੇ ਕੁਝ ਹੋਰ ਵੱਡੇ ਕਾਰੋਬਾਰੀ ਉਤਰ ਪ੍ਰਦੇਸ਼ ਵਿੱਚ ਨਿਵੇਸ਼ ਕਰਨ ਲਈ ਪ੍ਰਵਾਨਗੀ ਦੇ ਰਹੇ ਹਨ । ਸੂਬੇ ‘ਚ ਛੋਟੀਆਂ ਸਨਅਤਾਂ ਹੌਲੀ-ਹੌਲੀ ਬੰਦ ਹੋ ਰਹੀਆਂ ਹਨ ਜਾਂ ਕੁਝ ਪੂਰੀ ਤਰਾਂ ਬੰਦ ਹੋ ਚੁੱਕੀਆਂ ਹਨ । ਇਹ ਵੀ ਧਿਆਨਦੇਣ ਯੋਗ ਹੈ ਕਿ ਇਹ ਸਾਰਾ ਕੁਝ ਪੰਜਾਬ ਸਰਕਾਰ ਵੱਲੋਂ ਨਵੀਂ ਸਨਅਤੀ ਨੀਤੀ ਲਿਆਉਣ ਤੋਂ ਬਾਅਦ ਹੋ ਰਿਹਾ ਹੈ । ਪੰਜਾਬ ਦੇ ਕਾਰੋਬਾਰੀਆਂ ਵੱਲੋਂ ਪੰਜਾਬ ਤੋਂ ਬਾਹਰ ਨਿਵੇਸ਼ ਕਰਨ ਦੇ ਦੋ ਮੁੱਖ ਕਾਰਨ ਬਣਦੇ ਜਾ ਰਹੇ ਹਨ । ਇਕ ਤਾਂ ਬਿਜਲੀ ਦਰਾਂ ਅਤੇ ਦੂਜਾ ਪੰਜਾਬ ਦੇ ਮਾੜੇ ਅਮਨ-ਕਾਨੂੰਨ ਦੇ ਹਾਲਾਤ, ਇਹਨਾਂ ਕਰਕੇ ਕਾਰੋਬਾਰੀ ਲੱਖਾਂ-ਕਰੋੜਾਂ ਰੁਪਏ ਦਾ ਨਿਵੇਸ਼ ਪੰਜਾਬ ‘ਚ ਕਰਨ ਤੋਂ ਡਰੇ ਹੋਏ ਹਨ । ਪੰਜਾਬ ਸਰਕਾਰ ਭਾਵੇਂ ਦਾਅਵੇ ਕਰ ਰਹੀ ਹੈ ਤੇ ਸੂਬੇ ‘ਚ ਨਵੇਂ ਕਾਰੋਬਾਰੀ ਆਪਣੇ ਉਦਯੋਗ ਸਥਾਪਤ ਕਰਨ ਲਈ ਉਤਸ਼ਾਹਿਤ ਹਨ ਪ੍ਰੰਤੂ ਸਵਾਲ ਪੈਦਾ ਹੁੰਦਾ ਹੈ ਕਿ ਜੇਕਰ ਪੁਰਾਣੇ ਕਾਰੋਬਾਰੀ ਹੀ ਹਾਲਾਤਾਂ ਤੋਂ ਖੁਸ਼ ਨਹੀਂ ਹਨ ਤਾਂ ਨਵੇਂ ਕਾਰੋਬਾਰੀ ਕਿਵੇਂ ਉਤਸ਼ਾਹਿਤ ਹੋਣਗੇ । ਪੰਜਾਬ ਸਰਕਾਰ ਸੂਬੇ ਵਿਚ ਬੰਦ ਹੋ ਰਹੀਆਂ ਛੋਟੀਆਂ ਸਨਅਤਾਂ ਜਾਂ ਬੰਦ ਹੋ ਚੁੱਕੀਆਂ ਸਨਅਤਾਂ ਦੇ ਅੰਕੜੇ ਵੀ ਲੁਕਾ ਰਹੀ ਹੈ । ਪੰਜਾਬ ਦੇ ਕਾਰੋਬਾਰੀਆਂ ਦਾ ਕਹਿਣਾ ਹੈ ਕਿ ਜਿਹੜੀਆਂ ਸਹੂਲਤਾਂ ਅਤੇ ਰਿਆਇਤਾਂ ਉਨ੍ਹਾਂ ਨੂੰ ਚਾਹੀਦੀਆਂ ਹਨ ਜੇਕਰ ਉਹ ਬਾਹਰਲੇ ਸੂਬੇ ਵਿੱਚ ਮਿਲਣਗੀਆਂ ਤਾਂ ਪੰਜਾਬ ਤੋ ਇੰਡਸਟਰੀ ਪਲਾਇਨ ਜ਼ਰੂਰ ਕਰੇਗੀ । ਦੂਜੇ ਪਾਸੇ ਪੰਜਾਬ ਸਰਕਾਰ ਨੇ ਕਾਰੋਬਾਰੀਆਂ ਲਈ ਗਰੀਨ ਅਸ਼ਟਾਮ ਨੀਤੀ ਲਿਆਂਦੀ ਹੈ, ਜਿਸ ਵਿਚ ਇਹ ਦਾਅਵਾ ਕੀਤਾ ਗਿਆ ਹੈ ਕਿ 15 ਦਿਨਾਂ ਦੇ ਅੰਦਰ-ਅੰਦਰ ਕਾਰੋਬਾਰੀਆਂ ਦਾ ਨਵਾਂ ਉਦਯੋਗ ਲਾਉਣ ਲਈ ਰਾਹ ਪੱਧਰਾ ਹੋਵੇਗਾ ਅਤੇ ਉਨ੍ਹਾਂ ਨੂੰ ਪ੍ਰਦੂਸ਼ਨ ਕੰਟਰੋਲ ਬੋਰਡ, ਜੀਐਸਟੀ ਵਿਭਾਗ, ਸਥਾਨਕ ਪ੍ਰਸ਼ਾਸਨ, ਨਹਿਰੀ ਵਿਭਾਗ, ਜੰਗਲਾਤ ਵਿਭਾਗ ਅਤੇ ਹੋਰ ਵਿਭਾਗਾਂ ਕੋਲ ਵੱਖੋ ਵੱਖਰੇ ਤੌਰ ‘ਤੇ NOC ਲਈ ਨਹੀਂ ਜਾਣਾ ਪਵੇਗਾ ਪ੍ਰੰਤੂ ਸਰਕਾਰ ਲਈ ਇਹ ਚਿੰਤਾ ਦੀ ਗੱਲ ਹੈ ਕਿ ਅਜੇ ਤੱਕ ਸਿਰਫ ਪੰਜ ਕਾਰੋਬਾਰੀਆਂ ਨੇ ਹੀ ਗਰੀਨ ਅਸ਼ਟਾਮ ਨੀਤੀ ਲਈ ਅਪਲਾਈ ਕੀਤਾ ਹੈ । ਬਹਰਹਾਲ ! ਸੂਬੇ ਚੋਂ ਪਲਾਇਨ ਹੋ ਰਹੀ ਹੈ ਇੰਡਸਟਰੀ ਨੂੰ ਰੋਕਣ ਲਈ ਪੰਜਾਬ ਸਰਕਾਰ ਨੂੰ ਸਾਰਥਕ ਉਪਰਾਲੇ ਕਰਨੇ ਪੈਣਗੇ, ਜੇਕਰ ਅਜਿਹਾ ਨਾ ਹੋਇਆ ਤਾਂ ਆਰਥਿਕ ਖੇਤਰ ਵਿੱਚ ਪੰਜਾਬ ਨੂੰ ਵੱਡੀ ਸੱਟ ਵੱਜੇਗੀ, ਸਗੋਂ ਰੁਜ਼ਗਾਰ ਨਾਲ ਜੁੜਿਆ ਵੱਡਾ ਸੰਕਟ ਵੀ ਖੜ੍ਹਾ ਹੋਵੇਗਾ ।
