ਚੰਡੀਗੜ੍ਹ,18 ਅਗਸਤ-ਵਿਧਾਨ ਸਭਾ ਹਲਕਾ ਸ੍ਰੀ ਹਰਗੋਬਿੰਦਪੁਰ ਤੋਂ ਆਮ ਆਦਮੀ ਪਾਰਟੀ ਦੇ ਵਿਧਾਇਕ ਅਮਰਪਾਲ ਸਿੰਘ ‘ਤੇ ਆਪਣੇ ਦਫ਼ਤਰ ਵਿੱਚ ਪੰਜਾਬ ਪੁਲਿਸ ਦੇ ਸਬ-ਇੰਸਪੈਕਟਰ ਦੀ ਕੁੱਟਮਾਰ ਦੀ ਯੋਜਨਾ ਵਿੱਚ ਸ਼ਾਮਲ ਹੋਣ ਦੇ ਗੰਭੀਰ ਦੋਸ਼ ਲੱਗੇ ਹਨ । ਇਹ ਘਟਨਾ 14 ਅਗਸਤ ਦੀ ਦੱਸੀ ਜਾ ਰਹੀ ਹੈ ਜਦੋਂ ਵਿਧਾਇਕ ਅਮਰਪਾਲ ਸਿੰਘ ਨੇ ਸਬ ਇੰਸਪੈਕਟਰ ਕੈਲਾਸ਼ ਚੰਦਰ ਨੂੰ ਫੋਨ ਕਰਕੇ ਆਪਣੇ ਦਫ਼ਤਰ ਬੁਲਾਇਆ। ਜਦੋਂ ਇੰਸਪੈਕਟਰ ਵਿਧਾਇਕ ਦੇ ਦਫ਼ਤਰ ਵਿੱਚ ਪੁੱਜਿਆ ਤਾਂ ਉੱਥੇ ਪਹਿਲਾਂ ਤੋਂ ਹੀ ਹਾਜ਼ਰ ਵਿਧਾਇਕ ਦੇ ਕੁਝ ਸਾਥੀਆਂ ਨੇ ਸਬ ਇੰਸਪੈਕਟਰ ਦੀ ਕੁੱਟਮਾਰ ਕੀਤੀ। ਸਥਾਨਕ ਪੁਲਸ ਨੇ ਇਸ ਮਾਮਲੇ ਵਿੱਚ ਸਬ ਇੰਸਪੈਕਟਰ ਦੇ ਬਿਆਨਾਂ ‘ਤੇ FIR ਦਰਜ ਕੀਤੀ ਹੈ। ਵਿਧਾਇਕ ਅਮਰਪਾਲ ਸਿੰਘ ਨੇ ਵੀ ਮੰਨਿਆ ਹੈ ਕਿ ਉਸਨੇ ਇੱਕ ਕੇਸ ਦੇ ਰਾਜ਼ੀਨਾਮੇ ਸਬੰਧੀ ਫੋਨ ਕਰਕੇ ਇੰਸਪੈਕਟਰ ਨੂੰ ਆਪਣੇ ਦਫ਼ਤਰ ਬੁਲਾਇਆ ਸੀ ਪਰ ਉਸਦੀ ਕੁੱਟਮਾਰ ਵਿੱਚ ਉਸ ਦਾ ਕੋਈ ਹੱਥ ਨਹੀਂ ਹੈ। ਵਿਧਾਇਕ ਨੇ ਕਿਹਾ ਕਿ ਜਦੋਂ ਸਬ ਇੰਸਪੈਕਟਰ ਨਾਲ ਉਸ ਦੇ ਦਫ਼ਤਰ ਵਿੱਚ ਕੁੱਟਮਾਰ ਹੋਈ ਤਾਂ ਉਹ ਦੂਸਰੇ ਕਮਰੇ ਵਿੱਚ ਸੀ। ਪੁਲਿਸ ਵੱਲੋਂ ਦਰਜ ਐਫਆਈਆਰ ਸਬੰਧੀ ਵਿਧਾਇਕ ਨੇ ਕਿਹਾ ਕਿ “ਪੁਲਿਸ ਨੇ ਟੈਕਨੀਕਲ ਢੰਗਾਂ ਨਾਲ ਐਫਆਈਆਰ ਕਰਨੀ ਹੁੰਦੀ ਹੈ ਜਿਸ ਕਰਕੇ ਉਸ ਦਾ ਨਾਮ ਐਫਆਈਆਰ ਵਿੱਚ ਆਇਆ ਹੈ। ਸਬ ਇੰਸਪੈਕਟਰ ਕੈਲਾਸ਼ ਚੰਦਰ ਨੇ ਵੀ ਕਿਹਾ ਹੈ ਕਿ ਭਾਵੇਂ ਵਿਧਾਇਕ ਨੇ ਸਿੱਧੇ ਤੌਰ ‘ਤੇ ਹੀ ਉਸ ‘ਤੇ ਹੱਥ ਨਹੀਂ ਚੁੱਕਿਆ ਪ੍ਰੰਤੂ ਉਸਨੂੰ ਫ਼ੋਨ ਕਰਕੇ ਵਿਧਾਇਕ ਨੇ ਹੀ ਬੁਲਾਇਆ ਸੀ ।
Menu
