- ਸਰਕਾਰ ਖ਼ਿਲਾਫ਼ ਵੱਡਾ ਹੈਰਾਨੀਜਨਕ ਫੈਸਲਾ ਵੀ ਲੈ ਸਕਦੇ ਨੇ ਮੁਲਾਜ਼ਮ
ਬਰਨਾਲਾ,6 ਦਸੰਬਰ (ਨਿਰਮਲ ਸਿੰਘ ਪੰਡੋਰੀ)-
ਪੰਜਾਬ ‘ਚ ਰਵਾਇਤੀ ਸਿਆਸੀ ਪਾਰਟੀਆਂ ਦੀ ਸਿਆਸੀ ਸਫ਼ਾਈ ਵਿੱਚ ਦੱਬ ਕੇ ਝਾੜੂ ਫੇਰਨ ਵਾਲਾ ਪੰਜਾਬ ਦਾ ਮੁਲਾਜ਼ਮ ਵਰਗ ਦੋ ਸਾਲ ਤੋਂ ਘੱਟ ਸਮੇਂ ਵਿੱਚ ਹੀ ਸਰਕਾਰ ਦੇ ਖਿਲਾਫ ਆਰ-ਪਾਰ ਦਾ ਸੰਘਰਸ਼ ਲੜਨ ਦੇ ਰੌਂਅ ਵਿੱਚ ਹੈ। ਭਗਵੰਤ ਮਾਨ ਸਰਕਾਰ ਦੇ ਕਾਰਜਕਾਲ ਦੌਰਾਨ ਮੁਲਾਜ਼ਮ ਵਰਗੇ ਇੱਕ ਤੋਂ ਵੱਧ ਵਾਰ ਕਲਮਛੋੜ ਹੜ੍ਹਤਾਲ ਕਰ ਚੁੱਕਿਆ ਹੈ ਅਤੇ ਮੌਜੂਦਾ ਸਮੇਂ ਦੌਰਾਨ ਵੀ ਕਰੀਬ ਇੱਕ ਮਹੀਨੇ ਤੋਂ ਕਲਮਛੋੜ/ਕੰਪਿਊਟਰ ਬੰਦ ਹੜ੍ਹਤਾਲ ‘ਤੇ ਹੈ। ਸਰਕਾਰ ਦੇ ਰਵੱਈਏ ਕਾਰਨ ਹੁਣ ਤਾਂ ਮੁਲਾਜ਼ਮ ਇਹ ਆਖਣ ਵੀ ਲੱਗ ਪਏ ਹਨ ਕਿ ਉਹ “ਠੱਗੇ” ਗਏ ਹਨ ਭਾਵੇਂ ਕਿ ਇਹ ਅਤਿਕਥਨੀ ਨਹੀਂ ਕਿ ਠੱਗੇ ਜਾਣ ਲਈ ਮੁਲਾਜ਼ਮਾਂ ਨੇ ਵੋਟਾਂ ਰੂਪੀ ਬੋਝੇ ਖ਼ੁਦ ਹੀ ਆਮ ਆਦਮੀ ਪਾਰਟੀ ਦੇ ਅੱਗੇ ਢੇਰੀ ਕੀਤੇ ਸਨ। ਦੂਜੇ ਪਾਸੇ ਸਰਕਾਰ ਵੀ ਝੁਕਣ ਲਈ ਤਿਆਰ ਨਹੀਂ ਹੈ ਜਿਸ ਤੋਂ ਲੱਗਦਾ ਹੈ ਕਿ ਆਉਣ ਵਾਲੇ ਦਿਨਾਂ ‘ਚ ਪੰਜਾਬ ਦੇ ਲੋਕਾਂ ਨੂੰ ਮੁਲਾਜ਼ਮਾਂ ਦੀ ਹੜ੍ਹਤਾਲ ਅਤੇ ਸਰਕਾਰੀ ਜ਼ਿੱਦ ਦੀ ਚੱਕੀ ਦੇ ਪੁੜਾਂ ਵਿਚਕਾਰ “ਪਿਸਣਾ” ਪਵੇਗਾ ਕਿਉਂਕਿ ਮੁਲਾਜ਼ਮ ਕਹਿੰਦੇ ਨੇ ਕਿ ਘੱਟ ਨਾ ਤੋਲੀਂ ਅਤੇ ਸਰਕਾਰ ਆਖ ਰਹੀ ਹੈ ਕਿ ਥੜ੍ਹੇ ‘ਤੇ ਨਾ ਚੜੀਂ ਭਾਵ ਜਿਹੜੀਆਂ ਮੰਗਾਂ ਸਰਕਾਰ ਮੰਨ ਚੁੱਕੀ ਹੈ, ਮੁਲਾਜ਼ਮਾਂ ਦਾ ਕਹਿਣਾ ਹੈ ਕਿ ਉਹਨਾਂ ਨੂੰ ਹਰ ਹਾਲਤ ਵਿੱਚ ਲਾਗੂ ਕਰਵਾਇਆ ਜਾਵੇਗਾ ਪ੍ਰੰਤੂ ਸਰਕਾਰ ਅਜੇ ਵਕਤ ਟਪਾਉਣ ਦੀ ਨੀਤੀ ‘ਤੇ ਚੱਲ ਰਹੀ ਹੈ। ਲੋਕ ਜਦੋਂ ਸਰਕਾਰੀ ਦਫਤਰਾਂ ‘ਚ ਕੰਮ ਲਈ ਆਉਂਦੇ ਹਨ ਤਾਂ “ਆਫ਼ ਦੀ ਰਿਕਾਰਡ” ਟਕੇ-ਟਕੇ ਦੀਆਂ ਗੱਲਾਂ ਕਹਿੰਦੇ ਹਨ ਜਿਨਾਂ ਨੂੰ ਲਿਖਿਆ ਵੀ ਨਹੀਂ ਜਾ ਸਕਦਾ। ਲੋਕਾਂ ਦੇ ਗੁੱਸੇ ਨੂੰ ਮੁਲਾਜ਼ਮ ਇਸ ਤਰਕ ਨਾਲ ਕੱਟ ਰਹੇ ਹਨ ਕਿ ਸਰਕਾਰੀ ਜ਼ਿੱਦ ਕਾਰਨ ਸਾਰਾ ਕੁਝ ਹੋ ਰਿਹਾ ਹੈ ਕਿਉਂਕਿ ਸਰਕਾਰ ਮੁਲਾਜ਼ਮਾਂ ਦੀ ਗੱਲ ਨਹੀਂ ਸੁਣ ਰਹੀ। ਮੁਲਾਜ਼ਮ ਵਰਗ ਦਾ ਕਹਿਣਾ ਹੈ ਕਿ ਉਹਨਾਂ ਦੀਆਂ ਕੁਝ ਮੰਗਾਂ ਤਾਂ ਅਜਿਹੀਆਂ ਹਨ ਜਿਨਾਂ ‘ਤੇ ‘ਹਿੰਗ ਲੱਗੇ ਨਾ ਫਟਕੜੀ’ ਵਾਂਗ ਸਰਕਾਰ ਨੂੰ ਬਹੁਤਾ ਤਰੱਦਦ ਨਹੀਂ ਕਰਨਾ ਪੈਣਾ ਸਗੋਂ ਕੁਝ ਲਿਖਤੀ ਫੈਸਲੇ ਕਰਕੇ ਹੀ ਇਹ ਮੰਗਾਂ ਲਾਗੂ ਕੀਤੀਆਂ ਜਾ ਸਕਦੀਆਂ ਹਨ।
- -ਵੱਡੇ ਅਫ਼ਸਰ ਵੀ ਹਨ ਹੜਤਾਲ ਦੇ ਲਪੇਟੇ ਵਿੱਚ
ਪੰਜਾਬ ਦੇ ਮੁਲਾਜ਼ਮ ਵਰਗ ਦੀ ਹੜ੍ਹਤਾਲ ਦਾ ਅਸਰ ਸਿਰਫ਼ ਆਮ ਲੋਕਾਂ ਉੱਪਰ ਹੀ ਨਹੀਂ ਬਲਕਿ IAS/IPS/PCS/PPS ਅਫ਼ਸਰਾਂ ਉੱਪਰ ਵੀ ਪੈ ਰਿਹਾ ਹੈ। ਖਜ਼ਾਨਾ ਦਫ਼ਤਰ ਦੇ ਮੁਲਾਜ਼ਮਾਂ ਦੀ ਹੜ੍ਹਤਾਲ ਕਾਰਨ ਨਵੰਬਰ ਮਹੀਨੇ ਦੀ ਤਨਖਾਹ ਜਾਰੀ ਨਹੀਂ ਹੋ ਸਕੀ, ਖ਼ੁਦ ਹੜ੍ਹਤਾਲ ‘ਤੇ ਬੈਠੇ ਸਾਰੇ ਮੁਲਾਜ਼ਮਾਂ ਦੀ ਵੀ ਨਵੰਬਰ ਮਹੀਨੇ ਦੀ ਤਨਖਾਹ ਜਾਰੀ ਨਹੀਂ ਹੋ ਸਕੀ ਕਿਉਂਕਿ ਕੰਪਿਊਟਰ ਬੰਦ ਹੜ੍ਹਤਾਲ ਕਾਰਨ ਮੁਲਾਜ਼ਮਾਂ ਨੇ ਤਨਖ਼ਾਹ ਕਢਵਾਉਣ ਨਾਲ ਸੰਬੰਧਿਤ ਕੰਮ ਹੀ ਨਹੀਂ ਕੀਤਾ।
- -ਵੱਡਾ ਹੈਰਾਨੀਜੈਨਕ ਫੈਸਲਾ ਵੀ ਲੈ ਸਕਦੇ ਹਨ ਮੁਲਾਜ਼ਮ
ਅਦਾਰਾ “Gee98 news” ਦੇ ਸੂਤਰਾਂ ਅਨੁਸਾਰ ਪੰਜਾਬ ਸਟੇਟ ਮਨਿਸਟਰੀਅਲ ਸਟਾਫ਼ ਦੇ ਬੈਨਰ ਹੇਠ ਹੜ੍ਹਤਾਲ ‘ਤੇ ਬੈਠਾ ਸਮੁੱਚਾ ਮੁਲਾਜ਼ਮ ਵਰਗ ਆਉਣ ਵਾਲੇ ਦਿਨਾਂ ‘ਚ ਵੱਡਾ ਫੈਸਲਾ ਲੈਂਦੇ ਹੋਏ ਕੁਝ ਦਿਨਾਂ ਦੀ ਸਮੂਹਿਕ ਛੁੱਟੀ ‘ਤੇ ਵੀ ਜਾ ਸਕਦਾ ਹੈ, ਜਿਸ ਨਾਲ ਸਰਕਾਰੀ ਦਫਤਰਾਂ ਦਾ ਪ੍ਰਬੰਧਕੀ ਢਾਂਚਾ ਤਹਿਸ ਨਹਿਸ ਹੋਣ ਦੀ ਸੰਭਾਵਨਾ ਤੋਂ ਇਨਕਾਰ ਨਹੀਂ ਕੀਤਾ ਜਾ ਸਕਦਾ। ਬਹਰਹਾਲ ! ਲੋਕ ਬੇਝਿਜਕ ਇਹ ਆਖ ਰਹੇ ਹਨ ਕਿ ਸਰਕਾਰ ਮੁਲਾਜ਼ਮਾਂ ਦੀਆਂ ਮੰਗਾਂ ਮੰਨੇ ਜਾਂ ਫਿਰ ਇਸ ਹੜ੍ਹਤਾਲ ਦਾ ਕੋਈ ਹੋਰ ਹੱਲ ਕੱਢੇ। ਮੁਲਾਜ਼ਮਾਂ ਦੀ ਹੜ੍ਹਤਾਲ ਰੂਪੀ ਇਹ ਗੇਂਦ ਸਰਕਾਰ ਦੇ ਵਿਹੜੇ ‘ਚ ਹੈ ਹੁਣ ਵੇਖਣਾ ਹੋਵੇਗਾ ਕਿ ਮੁੱਖ ਮੰਤਰੀ ਕਿਹੋ ਜਿਹੀ ਕਿੱਕ ਮਾਰਦੇ ਹਨ ਕਿਉਂਕਿ ਵਿੱਤ ਮੰਤਰੀ ਤਾਂ ਵਿੱਤੀ ਕਿੱਕ ਮਾਰਨ ਤੋਂ ਅਸਮਰੱਥਾ ਜ਼ਾਹਿਰ ਕਰ ਚੁੱਕੇ ਹਨ।
