ਪਿੰਡ ਵਿੱਚ ਕੀਤੇ ਵਿਕਾਸ ਕੰਮਾਂ ਦੇ ਬਿੱਲ ਪਾਸ ਕਰਨ ਲਈ ਰਿਸ਼ਵਤ ਲੈਣ ਵਾਲਾ ਬੀਡੀਪੀਓ ਕਾਬੂ

ਚੰਡੀਗੜ੍ਹ,16 ਦਸੰਬਰ-ਪਿੰਡ ਦੀ ਪੰਚਾਇਤ ਵੱਲੋਂ ਕੀਤੇ ਹੋਏ ਵਿਕਾਸ ਕੰਮਾਂ ਦੇ ਬਿੱਲ ਕਲੀਅਰ ਕਰਨ ਬਦਲੇ ਰਿਸ਼ਵਤ ਲੈਣ ਵਾਲੇ ਬੀਡੀਪੀਓ ਨੂੰ ਪੰਜਾਬ ਪੁਲਿਸ ਨੇ ਗ੍ਰਿਫ਼ਤਾਰ ਕੀਤਾ ਹੈ। ਲੁਧਿਆਣਾ ਜ਼ਿਲ੍ਹੇ ਦੇ ਸਿੱਧਵਾਂ ਬੇਟ ਦੇ ਬੀਡੀਪੀਓ ਬਲਜੀਤ ਸਿੰਘ ਨੇ ਪਿੰਡ ਬਸੈਮੀ ਦੇ ਸਰਪੰਚ ਸੁਖਮਿੰਦਰ ਸਿੰਘ ਤੋਂ ਬਿੱਲ ਕਲੀਅਰ ਕਰਨ ਬਦਲੇ 15000 ਦੀ ਰਿਸ਼ਵਤ ਲਈ ਸੀ। ਸਰਪੰਚ ਵੱਲੋਂ ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ਅਨੁਸਾਰ ਬੀਡੀਪੀਓ ਪਿੰਡ ਵਿੱਚ ਕੀਤੇ ਵਿਕਾਸ ਕੰਮਾਂ ਦੇ ਬਿੱਲ ਕਲੀਅਰ ਨਹੀਂ ਕਰ ਰਿਹਾ ਸੀ ਸਗੋਂ ਬਿੱਲ ਪਾਸ ਕਰਨ ਬਦਲੇ ਰਿਸ਼ਵਤ ਦੀ ਮੰਗ ਕਰ ਰਿਹਾ ਸੀ। ਜਿਸ ਤੋਂ ਬਾਅਦ ਸਰਪੰਚ ਨੇ ਆਪ ਆਗੂ ਐਨ ਐਸ ਕੰਗ ਨਾਲ ਸੰਪਰਕ ਕੀਤਾ। ਆਪ ਆਗੂ ਨੇ ਭ੍ਰਿਸ਼ਟ ਬੀਡੀਪੀਓ ਨੂੰ ਸਬਕ ਸਿਖਾਉਣ ਲਈ ਨੋਟਾਂ ਦੇ ਨੰਬਰ ਨੋਟ ਕਰਕੇ 15000 ਸਰਪੰਚ ਨੂੰ ਦਿੱਤੇ ਅਤੇ ਸਰਪੰਚ ਨੇ ਇਹ ਰਿਸ਼ਵਤ ਦੇ ਰੂਪ ਵਿੱਚ ਬੀਡੀਪੀਓ ਨੂੰ ਦੇ ਦਿੱਤੇ ਜਿਸ ਤੋਂ ਬਾਅਦ ਬੀਡੀਪੀਓ ਨੇ ਇਹ 15000 ਫੜ ਕੇ ਆਪਣੇ ਦਰਾਜ ਵਿੱਚ ਰੱਖ ਲਏ, ਮੌਕੇ ‘ਤੇ ਆਪ ਆਗੂ ਨੇ ਪੁੱਜ ਕੇ ਬੀਡੀਪੀਓ ਦੇ ਦਰਾਜ ਵਿੱਚੋਂ ਉਕਤ ਨੋਟ ਬਰਾਮਦ ਕੀਤੇ ਅਤੇ ਪਹਿਲਾਂ ਲਿਖੇ ਹੋਏ ਨੋਟਾਂ ਦੇ ਨੰਬਰਾਂ ਦਾ ਮਿਲਾਨ ਕੀਤਾ। ਜਿਸ ਤੋਂ ਬਾਅਦ ਆਪ ਆਗੂ ਨੇ ਪੁਲਿਸ ਨੂੰ ਫੋਨ ਕਰਕੇ ਮੌਕੇ ‘ਤੇ ਬੁਲਾਇਆ ਅਤੇ ਪੁਲਿਸ ਨੇ ਬੀਡੀਪੀਓ ਨੂੰ ਗ੍ਰਿਫਤਾਰ ਕਰ ਲਿਆ।