ਚੰਡੀਗੜ੍ਹ,8 ਦਸੰਬਰ, Gee98 news service
-ਭਾਵੇਂ ਫਿਲਮ ਇੰਡਸਟਰੀ ਦੀ ਗੱਲ ਹੋਵੇ ਜਾਂ ਫਿਰ ਸੰਗੀਤ ਜਗਤ ਦੀ ਹਮੇਸ਼ਾ ਔਰਤ ਕਲਾਕਾਰਾਂ ਨਾਲ ਧੱਕੇਸ਼ਾਹੀ ਦੀ ਚਰਚਾ ਅਕਸਰ ਹੁੰਦੀ ਰਹਿੰਦੀ ਹੈ। ਪੰਜਾਬੀ ਸੰਗੀਤ ਜਗਤ ਵਿੱਚ ਵੀ ਔਰਤ ਕਲਾਕਾਰਾਂ ਨਾਲ ਸਰੀਰਿਕ ਅਤੇ ਵਿੱਤੀ ਧੱਕੇਸ਼ਾਹੀ ਦੀਆਂ ਖ਼ਬਰਾਂ ਅਕਸਰ ਆਉਂਦੀਆਂ ਰਹਿੰਦੀਆਂ ਹਨ। ਹੁਣ ਇੱਕ ਪ੍ਰਸਿੱਧ ਕਲਾਕਾਰ ਨੇ ਖੁਦ ਇਹ ਖੁਲਾਸਾ ਕੀਤਾ ਹੈ ਕਿ ਸੰਗੀਤ ਜਗਤ ਵਿੱਚ ਔਰਤ ਕਲਾਕਾਰ ਨੂੰ ਬਣਦਾ ਮਿਹਨਤਾਨਾ ਨਹੀਂ ਦਿੱਤਾ ਜਾਂਦਾ। ਅਜੋਕੇ ਦੌਰ ‘ਚ ਸੁਪਰ ਹਿੱਟ ਕਲਾਕਾਰ ਗੁਰਲੇਜ ਅਖ਼ਤਰ ਨੇ ਕਿਹਾ ਕਿ “ਹਮੇਸ਼ਾ ਮਰਦ ਕਲਾਕਾਰ ਨਾਲੋਂ ਔਰਤ ਕਲਾਕਾਰ ਨੂੰ ਅੱਧੀ ਪੇਮੈਂਟ ਦਿੱਤੀ ਜਾਂਦੀ ਹੈ। ਗੁਰਲੇਜ ਅਖ਼ਤਰ ਨੇ ਕਿਹਾ ਕਿ ਉਸ ਨੇ ਕਈ ਕਲਾਕਾਰਾਂ ਨਾਲ ਕੁਝ ਅਜਿਹੇ ਗੀਤ ਦਿੱਤੇ ਹਨ ਜਿਹੜੇ ਕਿ ਸੁਪਰ ਡੁਪਰ ਹਿੱਟ ਹੋਏ ਹਨ ਪ੍ਰੰਤੂ ਜੇਕਰ ਇਹਨਾਂ ਗੀਤਾਂ ਦੀ ਪੇਮੈਂਟ ਦੀ ਗੱਲ ਕੀਤੀ ਜਾਵੇ ਤਾਂ ਮਰਦ ਕਲਾਕਾਰਾਂ ਨਾਲੋਂ ਉਸ ਦੀ ਪੇਮੈਂਟ ਬਹੁਤ ਜ਼ਿਆਦਾ ਘੱਟ ਹੈ। ਗੁਰਲੇਜ ਅਖ਼ਤਰ ਨੇ ਕਿਹਾ, “ਮੈਂ ਜਿਸ ਨਾਲ ਵੀ ਗਾਣੇ ਕੀਤੇ ਹਨ ਉਹ ਹਿੱਟ ਚੱਲ ਰਹੇ ਆਂ, ਜਿਸ ਨਾਲ ਮੈਂ ਗਾਣਾ ਕਰਦੀ ਹਾਂ, ਉਸ ਦਾ ਰੇਟ 20 ਲੱਖ, 30 ਲੱਖ, 50 ਲੱਖ ਵੀ ਹੋ ਜਾਂਦਾ ਅਤੇ ਗੁਲਰੇਜ਼ ਅਖਤਰ ਦਾ ਰੇਟ ਤਾਂ ਉਹੀ ਹੈ। ਉਹ ਤਾਂ ਅਸੀਂ ਆਪਣੀ ਸਿਆਣਪ ਨਾਲ ਕੰਮ ਕਰ ਰਹੇ ਹਾਂ, ਜੇਕਰ ਦੇਖਿਆ ਜਾਵੇ ਤਾਂ ਕੋਈ ਵੀ ਪਹਿਲੇ ਬੋਲ ਉਤੇ ਤੁਹਾਡੇ ਦੁਆਰਾ ਮੰਗੇ ਹੋਏ ਪੈਸੇ ਨਹੀਂ ਦਿੰਦਾ, ਅਗਲੇ ਨੇ ਅੱਗੋਂ ਜ਼ਰੂਰ ਕਹਿਣਾ ਹੈ ਕਿ ਇੰਨਾ ਰੇਟ ਚੱਕਤਾ ਤੁਸੀਂ ? ਆਪਣੀ ਗੱਲਬਾਤ ਜਾਰੀ ਰੱਖਦੇ ਹੋਏ ਗਾਇਕਾ ਨੇ ਅੱਗੇ ਕਿਹਾ, ‘ਇਹ ਗੱਲ ਬਿਲਕੁੱਲ ਸਹੀ ਹੈ ਕਿ ਕੁੜੀਆਂ ਨੂੰ ਉਨੀ ਪੈਮੇਂਟ ਨਹੀਂ ਮਿਲਦੀ, ਜਿੰਨੀ ਹੋਣੀ ਚਾਹੀਦੀ ਹੈ, ਇਸ ਮੁਕਾਮ ਉਤੇ ਆ ਕੇ ਵੀ ਤੁਹਾਨੂੰ ਮੂੰਹ ਮੰਗੀ ਪੈਮੇਂਟ ਕਦੇ ਨਹੀਂ ਮਿਲਦੀ।’ ਜੇਕਰ ਗੁਰਲੇਜ ਅਖ਼ਤਰ ਦੀ ਪਰਫਾਰਮੈਂਸ ਦੀ ਗੱਲ ਕੀਤੀ ਜਾਵੇ ਤਾਂ ਅਜੋਕੇ ਦੌਰ ਦੀ ਉਹ ਇੱਕੋ ਇੱਕ ਪੰਜਾਬੀ ਗਾਇਕਾ ਹੈ ਜਿਹੜੀ ਸਭ ਤੋਂ ਵੱਧ ਸੁਣੀ ਜਾ ਰਹੀ ਹੈ। ਪੰਜਾਬੀ ਦੇ ਕੁਝ ਅਜਿਹੇ ਗਾਇਕ ਜਿਨਾਂ ਦੇ ਨਾਲ ਗੁਰਲੇਜ ਅਖ਼ਤਰ ਨੇ ਗੀਤ ਗਾਏ ਉਹਨਾਂ ਦੀ ਚੜ੍ਹਤ ਵਿੱਚ ਗੁਰਲੇਜ ਅਖ਼ਤਰ ਦੀ ਆਵਾਜ਼ ਅਤੇ ਅੰਦਾਜ਼ ਦਾ ਵੱਡਾ ਯੋਗਦਾਨ ਹੈ। ਇਕ ਪ੍ਰਸਿੱਧ ਗਾਇਕਾ ਵੱਲੋਂ ਔਰਤ ਕਲਾਕਾਰਾਂ ਦੇ ਮਿਹਨਤਾਨੇ ਸਬੰਧੀ ਕੀਤੀ ਟਿੱਪਣੀ ਧਿਆਨ ਮੰਗਦੀ ਹੈ ਤੇ ਇਸ ਸਬੰਧੀ ਚਰਚਾ ਹੋਣੀ ਸੁਭਾਵਿਕ ਹੈ।
