ਚੰਡੀਗੜ੍ਹ,4 ਮਈ, Gee98 News service
-ਪੰਜਾਬੀ ਗਾਇਕ ਸਿੱਧੂ ਮੂਸੇਵਾਲਾ ਕਤਲਕਾਂਡ ਇੱਕ ਵਾਰ ਫੇਰ ਚਰਚਾ ਵਿੱਚ ਹੈ। ਪਾਕਿਸਤਾਨੀ ਡਾਨ ਸ਼ਹਿਜ਼ਾਦ ਭੱਟੀ ਨੇ ਸੋਸ਼ਲ ਮੀਡੀਆ ‘ਤੇ ਆਪਣੀ ਇੱਕ ਵੀਡੀਓ ਅਪਲੋਡ ਕੀਤੀ ਹੈ ਜਿਸ ਵਿੱਚ ਉਸਨੇ ਸਿੱਧੂ ਮੂਸੇਵਾਲਾ ਕਤਲ ਕਾਂਡ ਸਬੰਧੀ ਇੱਕ ਲੁਕਵਾਂ ਖੁਲਾਸਾ ਕੀਤਾ ਹੈ। ਦੱਸ ਦੇਈਏ ਕਿ ਪਹਿਲਗਾਮ ਕਤਲੇਆਮ ਤੋਂ ਬਾਅਦ ਗੈਂਗਸਟਰ ਲਾਰੈਂਸ ਬਿਸ਼ਨੋਈ ਨੇ ਇੱਕ ਵੀਡੀਓ ਵਿੱਚ ਪਾਕਿਸਤਾਨ ਨੂੰ ਧਮਕੀ ਦਿੱਤੀ ਸੀ ਕਿ ਉਹ ਪਹਿਲਗਾਮ ਦਾ ਬਦਲਾ ਲੈਣਗੇ ਅਤੇ ਪਾਕਿਸਤਾਨ ਅੰਦਰ ਵੜ ਕੇ ਲੱਖ ਮੁਸਲਮਾਨਾਂ ਦਾ ਕਤਲੇਆਮ ਕਰਨਗੇ। ਲਾਰੈਂਸ ਬਿਸ਼ਨੋਈ ਦੀ ਇਸ ਵੀਡੀਓ ਤੋਂ ਬਾਅਦ ਉਸਦੇ ਪਾਕਿਸਤਾਨੀ ਦੋਸਤ ਡਾਨ ਸ਼ਹਿਜ਼ਾਦ ਭੱਟੀ ਨੇ ਵੀ ਬਿਸ਼ਨੋਈ ਦੀ ਵੀਡੀਓ ਦਾ ਜਵਾਬ ਦਿੰਦੇ ਹੋਏ ਆਪਣੇ ਸੋਸ਼ਲ ਮੀਡੀਆ ਅਕਾਊਂਂਟ ‘ਤੇ ਇੱਕ ਵੀਡੀਓ ਅਪਲੋਡ ਕੀਤੀ ਜਿਸ ਵਿੱਚ ਉਸਨੇ ਲਾਰੈਂਸ ਬਿਸ਼ਨੋਈ ਨਾਲ ਆਪਣੀ ਯਾਰੀ ਖਤਮ ਕਰਦੇ ਹੋਏ ਚੈਲੇੰਜ ਕੀਤਾ ਹੈ ਕਿ ਉਹ ਪਾਕਿਸਤਾਨ ਵਿੱਚ ਇੱਕ ਵੀ ਮੁਸਲਮਾਨ ਨੂੰ ਨਹੀਂ ਮਾਰ ਸਕੇਗਾ। ਆਪਣੀ ਇਸ ਵੀਡੀਓ ਕਲਿੱਪ ਵਿੱਚ ਜਿੱਥੇ ਡਾਨ ਸ਼ਹਿਜ਼ਾਦ ਭੱਟੀ ਨੇ ਲਾਰੈਂਸ ਬਿਸ਼ਨੋਈ ਸੰਬੰਧੀ ਜਿੱਥੇ ਹੋਰ ਬਹੁਤ ਸਾਰੀਆਂ ਗੱਲਾਂ ਕੀਤੀਆਂ ਹਨ, ਉਥੇ ਹੀ ਸ਼ਹਿਜ਼ਾਦ ਭੱਟੀ ਨੇ ਸਿੱਧੂ ਮੂਸੇਵਾਲਾ ਕਤਲ ਕਾਂਡ ਦਾ ਜ਼ਿਕਰ ਕਰਦੇ ਹੋਏ ਇਹ ਲੁਕਵਾਂ ਖੁਲਾਸਾ ਵੀ ਕੀਤਾ ਕਿ ਸਿੱਧੂ ਮੂਸੇਵਾਲੇ ਦਾ ਕਤਲ ਕਿਉਂ ਕੀਤਾ ਗਿਆ… ਮੂਸੇਵਾਲੇ ਨੂੰ ਕਤਲ ਕਰਨ ਦੇ ਕਿਸਨੇ ਕਿੰਨੇ ਪੈਸੇ ਲਏ ਅਤੇ ਕਿਹੜੇ ਗਾਇਕ ਦੇ ਕਹਿਣ ‘ਤੇ ਉਸਦਾ ਕਤਲ ਕੀਤਾ ਗਿਆ…। ਡਾਨ ਭੱਟੀ ਨੇ ਕਿਹਾ ਕਿ ਉਸ ਕੋਲ ਸਾਰੇ ਸਬੂਤ ਹਨ ਕਿ ਸਿੱਧੂ ਮੂਸੇਵਾਲੇ ਦੇ ਕਾਤਲਾਂ ਨੂੰ ਹਥਿਆਰ ਕਿਸ ਨੇ ਖਰੀਦ ਕੇ ਦਿੱਤੇ। ਭਾਵੇਂ ਕਿ ਇੱਕ ਗੈਂਗਸਟਰ ਦੀਆਂ ਵੀਡੀਓ ਵਿੱਚ ਆਖੀਆਂ ਗੱਲਾਂ ਦੀ ਪੁਸ਼ਟੀ ਅਜੇ ਤੱਕ ਏਜੰਸੀਆਂ ਨੇ ਨਹੀਂ ਕੀਤੀ ਪ੍ਰੰਤੂ ਜੇਕਰ ਡਾਨ ਸ਼ਹਿਜ਼ਾਦ ਭੱਟੀ ਦੀਆਂ ਸਿੱਧੂ ਮੂਸੇਵਾਲੇ ਕਤਲ ਕਾਂਡ ਸਬੰਧੀ ਕੀਤੀਆਂ ਗੱਲਾਂ ਨੂੰ ਸੱਚ ਮੰਨ ਵੀ ਲਿਆ ਜਾਵੇ ਤਾਂ ਇਹ ਵੱਡੇ ਸਵਾਲ ਖੜੇ ਹੁੰਦੇ ਹਨ ਕਿ ਆਖਰ ਪੰਜਾਬ ਦਾ ਕਿਹੜਾ ਉਹ ਗਾਇਕ ਹੈ ਜਿਸ ਦੀ ਸਿੱਧੂ ਮੂਸੇਵਾਲਾ ਕਤਲ ਕਾਂਡ ਵਿੱਚ ਸ਼ਮੂਲੀਅਤ ਹੈ। ਜੇਕਰ ਸ਼ਹਿਜ਼ਾਦ ਭੱਟੀ ਦਾ ਸਿੱਧੂ ਮੂਸੇਵਾਲਾ ਕਤਲ ਕਾਂਡ ਵਿੱਚ ਕਿਸੇ ਗਾਇਕ ਦੀ ਸ਼ਮੂਲੀਅਤ ਦਾ ਦਾਅਵਾ ਸੱਚਾ ਵੀ ਹੈ ਤਾਂ ਇਹ ਗਾਇਕ ਪੰਜਾਬ ਦੀਆਂ ਏਜੰਸੀਆਂ ਤੋਂ ਹੁਣ ਤੱਕ ਕਿਵੇਂ ਬਚਿਆ ਰਿਹਾ। ਕੀ ਪੰਜਾਬ ਦੀਆਂ ਏਜੰਸੀਆਂ ਇਸ ਪੜ੍ਹਤਾਲ ਦੌਰਾਨ ਇਸ ਤੱਥ ਤੱਕ ਪੁੱਜੀਆਂ ਕਿ ਸਿੱਧੂ ਮੂਸੇਵਾਲਾ ਕਤਲ ਕਾਂਡ ਵਿੱਚ ਕਿਸੇ ਗਾਇਕ ਦਾ ਹੱਥ ਹੈ, ਜੇਕਰ ਏਜੰਸੀਆਂ ਉਸ ਗਾਇਕ ਦੇ ਨਾਮ ਤੱਕ ਪੁੱਜੀਆਂ ਵੀ ਹਨ ਤਾਂ ਫਿਰ ਉਸ ਗਾਇਕ ਨੂੰ ਕਿਸ ਦੇ ਕਹਿਣ ‘ਤੇ ਹੱਥ ਨਹੀਂ ਪਾਇਆ ਗਿਆ। ਇੱਕ ਪਾਸੇ ਜਿੱਥੇ ਲਾਰੈਂਸ ਬਿਸ਼ਨੋਈ ਸਿੱਧੂ ਮੂਸੇਵਾਲਾ ਦੇ ਕਤਲ ਦੀ ਜ਼ਿੰਮੇਵਾਰੀ ਲੈਂਦਾ ਹੋਇਆ ਇਹ ਆਖ ਰਿਹਾ ਕਿ ਸਿੱਧੂ ਮੂਸੇਵਾਲਾ ਗੈਂਗਸਟਰਾਂ ਦੇ ਆਪਸੀ ਮਾਮਲਿਆਂ ‘ਚ ਦਖ਼ਲਅੰਦਾਜ਼ੀ ਕਰ ਰਿਹਾ ਸੀ ਪਰੰਤੂ ਦੂਜੇ ਪਾਸੇ ਬਿਸ਼ਨੋਈ ਦਾ ਮਿੱਤਰ ਡਾਨ ਭੱਟੀ ਆਖ ਰਿਹਾ ਕਿ ਸਿੱਧੂ ਮੂਸੇਵਾਲੇ ਦਾ ਕਤਲ ਸਿਰਫ਼ ਪੈਸਿਆਂ ਦੀ ਖਾਤਰ ਕੀਤਾ ਗਿਆ। ਜੇਕਰ ਪਾਕਿਸਤਾਨੀ ਡਾਨ ਸ਼ਹਿਜ਼ਾਦ ਭੱਟੀ ਦੀਆਂ ਗੱਲਾਂ ਵਿੱਚ ਥੋੜੀ ਬਹੁਤੀ ਵੀ ਸੱਚਾਈ ਹੈ ਤਾਂ ਉਸਦੀਆਂ ਇਹ ਗੱਲਾਂ ਸਿੱਧੂ ਮੂਸੇਵਾਲਾ ਕਤਲਕਾਂਡ ਸਬੰਧੀ ਪੰਜਾਬ ਸਰਕਾਰ, ਪੰਜਾਬ ਪੁਲਿਸ ਅਤੇ ਏਜੰਸੀਆਂ ਨੂੰ ਕਟਹਿਰੇ ਵਿੱਚ ਖੜਾ ਕਰਦੀਆਂ ਹਨ।
