ਚੰਡੀਗੜ੍ਹ,25, ਮਈ, Gee98 News service
-ਪੰਜਾਬ ਪੁਲਿਸ ਵੱਲੋਂ ਕਿਸੇ ਵੀ ਗ੍ਰਿਫ਼ਤਾਰ ਵਿਅਕਤੀ ਦਾ ਰਿਮਾਂਡ ਲੈਣਾ ਜਾਂ ਨਾ ਲੈਣਾ, ਉਸ ਨੂੰ ਕੁੱਟਣਾ ਜਾਂ ਨਾ ਕੁੱਟਣ ਸਬੰਧੀ ਲੱਖਾਂ ਰੁਪਏ ਦੇ ਲੈਣ ਦੇਣ ਹੋਣ ਦੇ ਦੋਸ਼ ਪੰਜਾਬ ਦੇ ਇੱਕ ਸਾਬਕਾ ਮੰਤਰੀ ਲਗਾਏ ਹਨ। ਸਾਬਕਾ ਸਿਹਤ ਮੰਤਰੀ ਪ੍ਰੋ. ਲਕਸ਼ਮੀਕਾਂਤਾ ਚਾਵਲਾ ਨੇ ਕਿਹਾ ਕਿ ਪੰਜਾਬ ‘ਚ ਸੀਆਈਏ ਸਟਾਫ਼ ਤੇ ਪੁਲਿਸ ਵੱਲੋਂ ਰਿਮਾਂਡ ਲੈਣਾ ਜਾਂ ਨਾ ਲੈਣਾ, ਫੜ ਕੇ ਕੁੱਟਣਾ ਜਾਂ ਨਾ ਕੁੱਟਣਾ ਇਕ ਇੰਡਸਟਰੀ ਹੈ ਤੇ ਇਸ ਦੇ ਨਾਂ ‘ਤੇ ਲੱਖਾਂ ਰੁਪਈਆਂ ਦਾ ਲੈਣ-ਦੇਣ ਹੁੰਦਾ ਹੈ। ਅਸਲੀ ਗੱਲ ਤਾਂ ਇਹ ਹੈ ਕਿ ਕੋਈ ਸੁਣਨ ਨੂੰ ਤਿਆਰ ਨਹੀਂ। ਸਾਬਕਾ ਸਿਹਤ ਮੰਤਰੀ ਨੇ ਕਿਹਾ ਕਿ ਉਹਨਾਂ ਨੇ ਇਸ ਮਾਮਲੇ ਚ ਪੁਲਿਸ ਨੂੰ ਕਈ ਵਾਰ ਲਿਖਿਆ ਹੈ ਕਿ ਜਿਨ੍ਹਾਂ ਦਾ ਕੰਮ ਰਿਮਾਂਡ ਲੈਣਾ ਤੇ ਆਪਣੀ ਹਿਰਾਸਤ ‘ਚ ਰੱਖ ਕੇ ਪੁੱਛਗਿੱਛ ਕਰਨਾ ਹੈ ਤੇ ਕੀ ਉਨ੍ਹਾਂ ‘ਤੇ ਕੋਈ ਕੰਟਰੋਲ ਹੈ ਜਾਂ ਨਹੀਂ ? ਰਿਮਾਂਡ ਨਾ ਮੰਗਣ ਦੀ ਵੀ ਰਿਸ਼ਵਤ ਚੱਲਦੀ ਹੈ ਤੇ ਰਿਮਾਂਡ ਮੰਗਣ ਦੀ ਵੀ। ਰਿਮਾਂਡ ‘ਤੇ ਲੈ ਕੇ ਕਿਸ ਤਰ੍ਹਾਂ ਦੀ ਪੁੱਛਗਿੱਛ ਕਰਨੀ ਹੈ, ਇਹ ਵੀ ਪੁਲਿਸ ਦੀ ਇੱਛਾ ਜਾਂ ਜੇਕਰ ਕਿਸੇ ਨੇ ਚਾਂਦੀ ਦੀ ਚਾਬੀ ਲਗਾਈ ਹੈ ਤਾਂ ਉਸ ਦੀ ਇੱਛਾ ‘ਤੇ ਚੱਲਦਾ ਹੈ। ਪ੍ਰੋਫੈਸਰ ਚਾਵਲਾਂ ਲਈ ਸਰਕਾਰ ਨੂੰ ਸਲਾਹ ਦਿੱਤੀ ਕਿ ਸੀਆਈਏ ਸਟਾਫ਼ ਦਾ ਤਾਂ ਜੇਕਰ ਸਰਕਾਰ ਨੇ ਕੰਟਰੋਲ ਰੱਖਣਾ ਹੈ ਤਾਂ ਇਕ ਮਹੀਨੇ ਤੋਂ ਜ਼ਿਆਦਾ ਕਿਸੇ ਵੀ ਪੁਲਿਸ ਮੁਲਾਜ਼ਮ, ਅਧਿਕਾਰੀ ਨੂੰ ਇਸ ਮਹਿਕਮੇ ‘ਚ ਨਾ ਰਹਿਣ ਦਿੱਤਾ ਜਾਵੇ। ਮੈਂ ਬਹੁਤ ਪਹਿਲਾਂ ਵੀ ਲਿਖਿਆ ਸੀ ਕਿ ਪੁਲਿਸ ਥਾਣਿਆਂ ਦੇ ਮੁਨਸ਼ੀ ਤਿੰਨ ਮਹੀਨੇ ਤੋਂ ਜ਼ਿਆਦਾ ਇਕ ਸੀਟ ‘ਤੇ ਨਾ ਰੱਖੇ ਜਾਣ।
