ਚੰਡੀਗੜ੍ਹ,20 ਮਾਰਚ, Gee98 News service
-ਪੰਜਾਬ ਨੂੰ ਅੱਜ ਇੱਕ ਅਤਿ ਆਧੁਨਿਕ ਸਟੀਲ ਕਾਰਖਾਨਾ ਮਿਲੇਗਾ। ਟਾਟਾ ਕੰਪਨੀ ਅੱਜ ਲੁਧਿਆਣਾ ‘ਚ ਆਪਣਾ ਅਤੀ ਆਧੁਨਿਕ ਈਕੋ ਫਰੈਂਡਲੀ ਗਰੀਨ ਸਟੀਲ ਪਲਾਂਟ ਸ਼ੁਰੂ ਕਰੇਗੀ। ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਅੱਜ ਲੁਧਿਆਣਾ ਵਿਖੇ ਇਸ ਕਾਰਖਾਨੇ ਦਾ ਉਦਘਾਟਨ ਕਰਨਗੇ। ਟਾਟਾ ਸਟੀਲ ਕੰਪਨੀ ਦਾ ਦੇਸ਼ ਵਿੱਚ ਇਹ ਦੂਜਾ ਰੀਸਾਈਕਲ ਬੇਸਿਡ ਗ੍ਰੀਨ ਸਟੀਲ ਪਲਾਂਟ ਹੈ। ਪੰਜਾਬ ਸਰਕਾਰ ਇਸ ਸਟੀਲ ਕਾਰਖਾਨੇ ਤੋਂ ਕਾਫੀ ਉਤਸ਼ਾਹਿਤ ਹੈ, ਲੱਗਭੱਗ 3200 ਕਰੋੜ ਰੁਪਏ ਦੀ ਲਾਗਤ ਨਾਲ ਬਣਨ ਵਾਲਾ ਇਹ ਸਟੀਲ ਪਲਾਂਟ 2500 ਵਿਅਕਤੀਆਂ ਨੂੰ ਰੁਜ਼ਗਾਰ ਦੇਵੇਗਾ, ਇਸ ਤੋਂ ਇਲਾਵਾ ਅਸਿੱਧੇ ਤੌਰ ‘ਤੇ ਵੀ ਇਸ ਦੇ ਨਾਲ ਹਜ਼ਾਰਾਂ ਵਿਅਕਤੀ ਰੁਜ਼ਗਾਰ ਲਈ ਜੁੜਨਗੇ। ਪੰਜਾਬ ਸਰਕਾਰ ਦਾ ਦਾਅਵਾ ਹੈ ਕਿ ਸਰਕਾਰ ਨੂੰ ਇਸ ਪਲਾਂਟ ਤੋਂ ਸਲਾਨਾ 200 ਤੋਂ ਲੈ ਕੇ 300 ਕਰੋੜ ਰੁਪਏ ਤੱਕ ਦਾ ਟੈਕਸ ਵੱਖ-ਵੱਖ ਮਾਧਿਅਮਾਂ ਤੋਂ ਇਕੱਠਾ ਹੋਵੇਗਾ। ਲੁਧਿਆਣਾ ਦੀ ਹਾਈਟੈਕ ਵੈਲੀ ‘ਚ ਕਰੀਬ 115 ਏਕੜ ਜ਼ਮੀਨ ‘ਤੇ ਲੱਗਿਆ ਇਹ ਪਲਾਂਟ ਸਲਾਨਾ 0.75 ਮਿਲੀਅਨ ਟਨ ਉਤਪਾਦਨ ਕਰੇਗਾ। ਇੱਥੇ ਮੁੱਖ ਤੌਰ ‘ਤੇ ਕਸਟਰੰਕਸ਼ਨ ਸੈਕਟਰ ਦੇ ਲਈ ਟੀਐਮਟੀ ਬਾਰ ਤੇ ਹੋਰ ਸਟੀਲ ਉਤਪਾਦਨ ਤਿਆਰ ਕੀਤੇ ਜਾਣਗੇ।। ਇਲੈਕਟਰੋਨਿਕ ਆਰਕ ਫਰਨੈੱਸ (EAF) ਤਕਨੀਕ ‘ਤੇ ਅਧਾਰਿਤ ਇਸ ਸਟੀਲ ਪਲਾਂਟ ਦੀ ਕਾਰਬਨ ਦੀ ਮਾਤਰਾ ਘੱਟ ਹੋਵੇਗੀ, ਕੋਇਲੇ ਦੀ ਜ਼ਰੂਰਤ ਨਹੀਂ ਪਵੇਗੀ ਅਤੇ ਪਾਣੀ ਦੀ ਖਪਤ ਵੀ ਰਵਾਇਤੀ ਸਟੀਲ ਪਲਾਂਟਸ ਦੀ ਤੁਲਨਾ ਵਿੱਚ ਘੱਟ ਹੋਵੇਗੀ। ਇਸ ਪਲਾਂਟ ਵਿੱਚ ਸਕਰੈਪ ਦੇ ਇਸਤੇਮਾਲ ਦੇ ਕਾਰਨ ਰੀਸਾਈਕਲਿੰਗ ਨੂੰ ਉਤਸ਼ਾਹਿਤ ਮਿਲੇਗਾ। ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਟਾਟਾ ਦੇ ਇਸ ਸਟੀਲ ਪਲਾਂਟ ਵਿੱਚ ਕੱਚੇ ਲੋਹੇ ਦੀ ਬਜਾਏ ਸਕਰੈਪ ਤੋਂ ਸਟੀਲ ਤਿਆਰ ਕੀਤਾ ਜਾਵੇਗਾ ਜਿਸ ਨਾਲ ਰੀਸਾਈਕਲਿੰਗ ਤੇ ਤਕਨੀਕ ਨੂੰ ਉਤਸ਼ਾਹਨ ਮਿਲੇਗਾ ਅਤੇ ਵੇਸਟ ਮੈਨੇਜਮੈਂਟ ਵਿੱਚ ਵੀ ਵੱਡਾ ਸੁਧਾਰ ਹੋਵੇਗਾ। ਇਹ ਵੀ ਦਾਅਵਾ ਕੀਤਾ ਜਾ ਰਿਹਾ ਕਿ ਇਸ ਸਟੀਲ ਪਲਾਂਟ ਵਿੱਚ ਪ੍ਰਦੂਸ਼ਣ ਘੱਟ ਹੋਵੇਗਾ ਕਿਉਂਕਿ ਕੋਇਲੇ ਦੀ ਵਰਤੋਂ ਨਹੀਂ ਹੋਵੇਗੀ।
