ਬੋਲ ਪੰਡੋਰੀ ਦੇ…ਨਿਰਮਲ ਸਿੰਘ ਪੰਡੋਰੀ…22.3.26
ਜਦੋਂ ਕਿਸੇ ਪਿੰਡ ਜਾਂ ਸ਼ਹਿਰ ਵਿੱਚ ਕੋਈ ਆਮ ਵਿਅਕਤੀ ਆਤਮਹੱਤਿਆ ਕਰਨ ਵੇਲੇ ਸੂਸਾਈਡ ਨੋਟ ਵਿੱਚ ਕਿਸੇ ਹੋਰ ਆਮ ਵਿਅਕਤੀ ਦਾ ਨਾਮ ਲਿਖ ਦੇਵੇ ਜਾਂ ਉਸਦਾ ਨਾਮ ਵੀਡੀਓ ਕਲਿੱਪ ਵਿੱਚ ਬੋਲ ਦੇਵੇ ਤਾਂ ਪੁਲਿਸ ਉਸ ਦੀ ਮੌਤ ਤੋਂ ਬਾਅਦ ਮਿਲੇ ਸੂਸਾਈਡ ਨੋਟ ਜਾਂ ਵੀਡੀਓ ਕਲਿੱਪ ਦੇ ਆਧਾਰ ‘ਤੇ ਸੰਬੰਧਤ ਵਿਅਕਤੀ ਦੇ ਖ਼ਿਲਾਫ਼ ਸਭ ਤੋਂ ਪਹਿਲਾਂ ਐਫਆਈਆਰ ਦਰਜ ਕਰਦੀ ਹੈ… ਪੋਸਟਮਾਰਟਮ ਕਰਵਾ ਕੇ ਲਾਸ਼ ਵਾਰਸਾਂ ਦੇ ਹਵਾਲੇ ਕਰ ਦਿੱਤੀ ਜਾਂਦੀ ਹੈ ਤੇ ਉਹ ਸਸਕਾਰ ਕਰ ਦਿੰਦੇ ਹਨ… ਇਸ ਤੋਂ ਬਾਅਦ ਕਾਨੂੰਨੀ ਕਾਰਵਾਈ ਸ਼ੁਰੂ ਹੁੰਦੀ ਹੈ…ਪੁਲਿਸ ਦੋਸ਼ੀ ਨੂੰ ਗ੍ਰਿਫ਼ਤਾਰ ਕਰਨ ਦੀ ਕਾਰਵਾਈ ਸ਼ੁਰੂ ਕਰਦੀ ਹੈ ਪ੍ਰੰਤੂ ਦੋਸ਼ੀ ਠਹਿਰਾਇਆ ਗਿਆ ਵਿਅਕਤੀ ਪੁਲਿਸ ਤੋਂ ਦੂਰ ਭੱਜਦਾ ਹੈ ਅਤੇ ਬਾਹਰੋਂ ਬਾਹਰ ਜ਼ਮਾਨਤ ਕਰਵਾਉਣ ਦੀ ਕੋਸ਼ਿਸ਼ ਕਰਦਾ ਹੈ… ਕਈ ਵਾਰ ਪੁਲਿਸ ਵੀ ਦੋਸ਼ੀ ਨੂੰ ਜ਼ਮਾਨਤ ਕਰਵਾਉਣ ਲਈ ਸਮਾਂ ਦੇ ਦਿੰਦੀ ਹੈ ਜੇਕਰ ਉਸਦੀ ਜ਼ਮਾਨਤ ਹੋ ਜਾਵੇ ਤਾਂ ਵਾਹ ਭਲੀ ਨਹੀਂ ਉਹ ਆਪਣੇ ਆਪ ਪੇਸ਼ ਹੋ ਜਾਂਦਾ ਹੈ ਅਤੇ ਪੁਲਿਸ ਉਸ ਨੂੰ ਗ੍ਰਿਫ਼ਤਾਰ ਕਰਕੇ ਜੇਲ੍ਹ ਭੇਜ ਦਿੰਦੀ ਹੈ…. ਇੱਕ ਹੋਰ ਪੱਖ ਵੀ ਹੈ ਕਿ ਦੋਸ਼ੀ ਠਹਿਰਾਇਆ ਗਿਆ ਵਿਅਕਤੀ ਆਪਣੇ ਖ਼ਿਲਾਫ਼ ਪੁਲਿਸ ਕਾਰਵਾਈ ਦਰਜ ਹੋਣ ਤੋਂ ਬਾਅਦ ਉੱਚ ਅਧਿਕਾਰੀਆਂ ਕੋਲ ਪੜਤਾਲੀਆ ਦਰਖ਼ਾਸਤ ਦਿੰਦਾ ਹੈ… ਕਈ ਵਾਰ ਪੁਲਿਸ ਪੜ੍ਹਤਾਲ ਦੌਰਾਨ ਵਿਅਕਤੀ ਨੂੰ ਕੱਢ ਵੀ ਦਿੰਦੀ ਹੈ… ਕਿਸੇ ਦੀ ਆਤਮ ਹੱਤਿਆ ਦੇ ਮਾਮਲੇ ਵਿੱਚ ਇਹ ਦੋਵੇਂ ਪੱਖ ਹੀ ਅਕਸਰ ਸਾਹਮਣੇ ਆਉਂਦੇ ਹਨ… ਫਿਰ ਪਤਾ ਨਹੀਂ ਕਿਉਂ ਲਾਲਜੀਤ ਸਿੰਘ ਭੁੱਲਰ ਦੇ ਮਾਮਲੇ ਵਿੱਚ ਹਕੂਮਤੀ ਧਿਰ ਵੱਲੋਂ ਐਨਾ ਰੌਲਾ ਪਾਇਆ ਜਾ ਰਿਹਾ ਹੈ… ਜੇ ਮਰਨ ਵਾਲੇ ਨੇ ਭੁੱਲਰ ਦਾ ਨਾਮ ਲਿਆ ਤਾਂ ਉਸ ਦੇ ਖ਼ਿਲਾਫ਼ ਸਭ ਤੋਂ ਪਹਿਲਾਂ ਐਫਆਈਆਰ ਦਰਜ ਤਾਂ ਹੋਣੀ ਹੀ ਸੀ… ਬਾਕੀ ਕਾਰਵਾਈ ਉਸੇ ਤਰੀਕੇ ਨਾਲ ਹੀ ਹੋਣੀ ਚਾਹੀਦੀ ਹੈ ਜਿਵੇਂ ਆਤਮ ਹੱਤਿਆ ਦੇ ਮਾਮਲੇ ‘ਚ ਕਿਸੇ ਆਮ ਵਿਅਕਤੀ ਦੇ ਖ਼ਿਲਾਫ਼ ਹੁੰਦੀ ਹੈ… ਜਿਹੜੇ ਵਿਅਕਤੀ ਇਸ ਮਾਮਲੇ ‘ਚ ਵਿਰੋਧੀ ਧਿਰ ਦੇ ਆਗੂਆਂ ਦੀ ਭੂਮਿਕਾ ‘ਤੇ ਉਂਗਲਾਂ ਚੁੱਕ ਰਹੇ ਹਨ ਉਹ ਇਹ ਭਲੀਭਾਂਤ ਜਾਣਦੇ ਹਨ ਕਿ ਲਾਲਜੀਤ ਸਿੰਘ ਭੁੱਲਰ ਇੱਕ ਤਾਕਤਵਰ ਮੰਤਰੀ ਹੈ ਅਤੇ ਪੁਲਿਸ ਉਸਦੇ ਖ਼ਿਲਾਫ਼ ਕਾਰਵਾਈ ਕਰਨ ਤੋਂ ਝਿਜਕੇਗੀ.. ਐਫਆਈਆਰ ਦਰਜ ਕਰਨ ਤੋਂ ਬਾਅਦ ਵੀ ਪੁਲਿਸ ਭੁੱਲਰ ਅਤੇ ਹੋਰਾਂ ਦੇ ਖ਼ਿਲਾਫ਼ ਸਹੀ ਤਰੀਕੇ ਨਾਲ ਕਾਰਵਾਈ ਨਹੀਂ ਕਰੇਗੀ ਕਿਉਂਕਿ ਅਗਲੇ ਦੇ ਹੱਥ ਸੱਤਾ ਦਾ ਜ਼ੋਰ ਹੈ… ਵਿਰੋਧੀ ਧਿਰ ਦੇ ਆਗੂ ਵੀ ਸੱਤਾ ਦਾ ਜ਼ੋਰ ਖੁਦ ਸੱਤਾ ਵਿੱਚ ਹੁੰਦੇ ਹੋਏ ਵੇਖ/ਹੰਢਾ ਚੁੱਕੇ ਹਨ… ਉਹਨਾਂ ਨੂੰ ਪਤਾ ਹੈ ਕਿ ਜਦੋਂ ਸੱਤਾ ਧਿਰ ਦਾ ਕੋਈ ਵੱਡਾ ਆਗੂ ਇਸ ਤਰ੍ਹਾਂ ਦੇ ਮਾਮਲੇ ਵਿੱਚ ਫਸ ਜਾਂਦਾ ਹੈ ਤਾਂ ਹਕੂਮਤ ਕੀ ਕਰਦੀ ਹੁੰਦੀ ਹੈ… ਪੁਲਿਸ ਨੂੰ ਇਸ ਮਾਮਲੇ ਵਿੱਚ ਵੀ ਤੁਰੰਤ ਐਫਆਈਆਰ ਦਰਜ ਕਰਨੀ ਚਾਹੀਦੀ ਸੀ…ਐਫਆਈਆਰ ਦਰਜ ਹੋਣ ਵਿੱਚ ਦੇਰੀ ਨੇ ਸਰਕਾਰ ‘ਤੇ ਸਵਾਲ ਖੜੇ ਕੀਤੇ ਹਨ… ਪੀੜ੍ਹਤ ਪਰਿਵਾਰ ਅਤੇ ਲੋਕਾਂ ਦੇ ਮਨਾਂ ਵਿੱਚ ਡਰ ਹੈ ਕਿ ਜਿਸ ਤਰ੍ਹਾਂ ਪੁਲਿਸ ਨੇ ਐਫ ਆਈ ਆਰ ਦਰਜ ਕਰਨ ਵਿੱਚ ਆਨਾਕਨੀ ਕੀਤੀ ਉਸੇ ਤਰ੍ਹਾਂ ਹੁਣ ਪੁਲਿਸ ਅਗਲੀ ਕਾਰਵਾਈ ਕਰਨ ਵਿੱਚ ਵੀ ਦੇਰ ਕਰੇਗੀ ਜਾਂ ਦੋਸ਼ੀਆਂ ਨੂੰ ਬਚਾਉਣ ਖ਼ਾਤਰ ਹਰ ਹੀਲਾ ਵਸੀਲਾ ਵਰਤਿਆ ਜਾਵੇਗਾ…ਇਸ ਵਰਤਾਰੇ ਨੂੰ ਹੀ ਹਕੂਮਤ ਕਿਹਾ ਜਾਂਦਾ ਹੈ..ਤੇ ਹਰ ਹਕੂਮਤ ਵੇਲੇ ਇਹੋ ਜਿਹੀਆਂ ਘਟਨਾਵਾਂ ‘ਚ ਇਹੋ ਵਰਤਾਰੇ ਵਾਪਰਦੇ ਰਹੇ ਹਨ…ਰੰਗ ਬਦਲਣ ਨਾਲ ਵਰਤਾਰੇ ਕਦੇ ਨਹੀਂ ਬਦਲੇ…ਜਿੱਥੇ ਕਿਤੇ ਅਤੇ ਜਦੋਂ ਤੱਕ ਪੁਲਿਸ ਵੀ ਕਲਮ ਹਕੂਮਤ ਦੇ ਹੱਥ ਵਿੱਚ ਰਹੇਗੀ…ਇਹੋ ਹੀ ਹੁੰਦਾ ਰਹੇਗਾ…!
