ਬਰਨਾਲਾ 30 ਦਸੰਬਰ (ਨਿਰਮਲ ਸਿੰਘ ਪੰਡੋਰੀ ) – ਵੀਰਵਾਰ ਪੰਜਾਬ ਦੀ ਰਾਜਨੀਤੀ ’ਚ ਦੋਵੇਂ ਮਜੀਠੀਆ ਚਰਚਿਤ ਰਹੇ । ਇੱਕ ਪਾਸੇ ਨਸ਼ਾ ਤਸਕਰੀ ਦੇ ਮਾਮਲੇ ’ਚ ਸਲਾਖ਼ਾਂ ਪਿੱਛੇ ਜਾਣ ਤੋਂ ਬਚਣ ਲਈ ਕਾਨੂੰਨੀ ਚਾਰਾਜੋਈ ਕਰ ਰਹੇ ਬਿਕਰਮ ਸਿੰਘ ਮਜੀਠੀਆ ਨੂੰ ਕੋਈ ਰਾਹਤ ਨਹੀਂ ਮਿਲੀ ਅਤੇ ਦੂਜੇ ਪਾਸੇ ਇੱਕ ਹੋਰ ਮਜੀਠੀਆ ਨੇ ਵੱਡਾ ਆਹੁਦਾ ਛੱਡ ਕੇ ਧਮਾਕਾ ਕਰ ਦਿੱਤਾ। ਬਿਕਰਮ ਸਿੰਘ ਮਜੀਠੀਆ ਦੀ ਜ਼ਮਾਨਤ ਅਰਜ਼ੀ ’ਤੇ ਸੁਣਵਾਈ 5 ਜਨਵਰੀ ਤੱਕ ਅੱਗੇ ਪੈ ਗਈ ਹੈ ਭਾਵ ਬਿਕਰਮ ਮਜੀਠੀਆ ਦੀ ਨਵੇਂ ਸਾਲ ਦੀ ਨਵੀਂ ਸਵੇਰ ਪੁਲਿਸ ਤੋਂ ਲੁਕ ਛਿਪ ਕੇ ਹੀ ਚੜੇਗੀ। ਦੂਜੇ ਪਾਸੇ ਕਾਂਗਰਸ ਦੇ ਧੜੱਲੇਦਾਰ ਆਗੂ ਪਨਗਰੇਨ ਦੇ ਚੇਅਰਮੈਨ ਲਾਲੀ ਮਜੀਠੀਆ ਨੇ ਅਸਤੀਫ਼ਾ ਦੇ ਕੇ ਕਾਂਗਰਸ ਦੀ ਚੂਲ ਹੋਰ ਢਿੱਲੀ ਕਰ ਦਿੱਤੀ ਹੈ ਕਿਉਂਕਿ ਲਾਲੀ ਮਜੀਠੀਆ ਆਪਣੇ ਹਲਕੇ ’ਚ ਤਕੜਾ ਜਨਆਧਾਰ ਰੱਖਦੇ ਹਨ ਅਤੇ ਉਹ ਬਿਕਰਮ ਮਜੀਠੀਆ ਨਾਲ ਸਿੱਧੀ ਟੱਕਰ ਵੀ ਲੈਂਦੇ ਰਹੇ ਹਨ। ਲਾਲੀ ਮਜੀਠੀਆ ਦੇ ਅਸਤੀਫ਼ੇ ਤੋਂ ਬਾਅਦ ਚਰਚਾ ਛਿੜ ਪਈ ਹੈ ਕਿ ‘‘ਤਾਏ ਦੀ ਧੀ ਚੱਲੀ, ਮੈਂ ਕਿਉਂ ਰਹਾਂ ਕੱਲੀ’’ ਕਹਾਵਤ ਅਨੁਸਾਰ ਲਾਲੀ ਮਜੀਠੀਆ ਵੀ ਓਧਰ ਹੀ ਜਾਵੇਗਾ , ਜਿੱਧਰ ਪੰਜਾਬ ਦੇ ਬਹੁਤੇ ਆਗੂ ਜਾ ਰਹੇ ਹਨ।
Menu
