-ਰਾਜ ਭਵਨ ਤੇ ਸਰਕਾਰ ਦਾ ਵਿਵਾਦ ਚਿੱਠੀਆਂ ਤੋਂ ਬਾਹਰ ਨਿਕਲਿਆ
ਚੰਡੀਗੜ, 22 ਅਕਤੂਬਰ (ਨਿਰਮਲ ਸਿੰਘ ਪੰਡੋਰੀ) :
ਪੰਜਾਬ ਦੇ ਰਾਜਪਾਲ ਸ੍ਰੀ ਬਨਵਾਰੀ ਲਾਲ ਪੁਰੋਹਿਤ ਨੇ ਖੁਲਾਸਾ ਕੀਤਾ ਕਿ ਉਨਾਂ ਨੂੰ ਖੇਤੀਬਾੜੀ ਯੂਨੀਵਰਸਿਟੀ ਦੇ ਵਾਈਸ ਚਾਂਸਲਰ ਦੀ ਨਿਯੁਕਤੀ ਸੰਬੰਧੀ ਉਸੇ ਵੇਲੇ ਪਤਾ ਲੱਗਿਆ ਜਦ ਇੱਕ ਵਿਅਕਤੀ ਉਨਾਂ ਨੂੰ ਯੂਨੀਵਰਸਿਟੀ ’ਚ ਹੋਣ ਵਾਲੇ ਸਮਾਗਮ ਸੰੰਬੰਧੀ ਮਿਲਣ ਆਇਆ। ਮੁੱਖ ਮੰਤਰੀ ਭਗਵੰਤ ਮਾਨ ਵੱਲੋਂ ਲਿਖੀ ਚਿੱਠੀ ਦੇ ਜਵਾਬ ’ਚ ਇੱਕ ਪ੍ਰੈਸ ਕਾਨਫਰੰਸ ਦੌਰਾਨ ਰਾਜਪਾਲ ਨੇ ਕਿਹਾ ਕਿ ਯੂਨੀਵਰਸਿਟੀ ਦੇ ਵਾਈਸ ਚਾਂਸਲਰ ਦੀ ਨਿਯੁਕਤੀ ਗ਼ੈਰ ਸੰਵਿਧਾਨਕ ਹੈ ਅਤੇ ਮੌਜੂਦਾ ਵੀਸੀ ਨੂੰ ਹਟਾਉਣਾ ਹੀ ਪਵੇਗਾ। ਪੰਜਾਬ ਸਰਕਾਰ ਦੇ ਮੁੱਖ ਮੰਤਰੀ ਅਤੇ ਕੁਝ ਮੰਤਰੀਆਂ ਵੱਲੋਂ ਰਾਜਪਾਲ ਸੰਬੰਧੀ ਵਰਤੀ ਜਾ ਰਹੀ ਭਾਸ਼ਾ ਦਾ ਜਵਾਬ ਦਿੰਦੇ ਹੋਏ ਉਨਾਂ ਕਿਹਾ ਕਿ ਉਨਾਂ ਨੇ ਬਤੌਰ ਰਾਜਪਾਲ ਹੁਣ ਤੱਕ 27 ਵਾਈਸ ਚਾਂਸਲਰ ਨਿਯੁਕਤ ਕੀਤੇ ਹਨ ਇਸ ਲਈ ਉਨਾਂ ਨੂੰ ਯੂਨੀਵਰਸਿਟੀ ਐਕਟ ਨਾ ਸਿਖਾਇਆ ਜਾਵੇ। ਰਾਜਪਾਲ ਨੇ ਕਿਹਾ ਕਿ ਸਖ਼ਤ ਭਾਸ਼ਾ ਉਹ ਵੀ ਵਰਤ ਸਕਦੇ ਹਨ ਪ੍ਰੰਤੂ ਨਹੀਂ ਵਰਤਣਗੇ ਕਿਉਂਕਿ ਉਹ ਸੰਵਿਧਾਨਕ ਅਹੁਦੇ ’ਤੇ ਬੈਠੇ ਹਨ। ਉਨਾਂ ਕਿਹਾ ਕਿ ਜੇਕਰ ਸਰਕਾਰ ਨੇ ਪੀਏਯੂ ਦੇ ਮੌਜੂਦਾ ਵਾਈਸ ਚਾਂਸਲਰ ਨੂੰ ਨਾ ਹਟਾਇਆ ਤਾਂ ਉਹ ਆਪਣੇ ਕਾਨੂੰਨੀ ਸਲਾਹਕਾਰ ਨਾਲ ਮਸ਼ਵਰਾ ਕਰਕੇ ਅਗਲਾ ਕਦਮ ਚੁੱਕਣਗੇ। ਸੂਬੇ ਦੇ ਰਾਜਪਾਲ ਅਤੇ ਮੁੱਖ ਮੰਤਰੀ ਦਰਮਿਆਨ ਸ਼ੁਰੂ ਹੋਇਆ ਵਿਵਾਦ ਚਿੱਠੀਆਂ ਤੋ ਬਾਹਰ ਨਿੱਕਲ ਕੇ ਪੰਜਾਬ ਦੇ ਮੈਦਾਨ ਵਿੱਚ ਆ ਗਿਆ ਹੈ। ਪੰਜਾਬ ਦੇ ਮੰਤਰੀਆਂ ਤੇ ਵਿਧਾਇਕਾਂ ਵੱਲੋਂ ਰਾਜਪਾਲ ਪ੍ਰਤੀ ਗ਼ੈਰ ਸੰਵਿਧਾਨਕ ਭਾਸ਼ਾ ਵਰਤੀ ਜਾ ਰਹੀ ਹੈ। ਇਹ ਵਿਵਾਦ ਆਉਣ ਵਾਲੇ ਦਿਨਾਂ ’ਚ ਘਟਣ ਜਾਂ ਖ਼ਤਮ ਹੋਣ ਦੇ ਆਸਾਰ ਨਹੀਂ ਹਨ ਕਿਉਂਕਿ ਸਰਕਾਰੀ ਧਿਰ ਖੁੱਲੇਆਮ ਕਹਿ ਚੁੱਕੀ ਹੈ ਕਿ ਵੀਸੀ ਨੂੰ ਨਹੀਂ ਹਟਾਇਆ ਜਾਵੇਗਾ ਜਦਕਿ ਰਾਜਪਾਲ ਨੇ ਵੀ ਮੀਡੀਆ ਦੇ ਸਾਹਮਣੇ ਬੇਬਾਕੀ ਨਾਲ ਕਿਹਾ ਕਿ ਵੀਸੀ ਨੂੰ ਹਟਾਉਣਾ ਹੀ ਪਵੇਗਾ।
