ਬਰਨਾਲਾ, 23 ਅਕਤੂਬਰ (ਮੰਗਲ ਸਿੰਘ) :
ਪੰਜਾਬ ਸਰਕਾਬਰ ਵੱਲੋਂ ਅਧਿਆਪਕਾਂ ਦੀਆਂ ਮੰਗਾਂ ਪ੍ਰਤੀ ਬੇਰੁਖੀ ਤੋਂ ਅੱਕੇ ਅਧਿਆਪਕਾਂ ਨੇ ਦੀਵਾਲੀ ਰੋਸ ਵਜੋਂ ਮਨਾਉਂਦੇ ਹੋਏ ਕੈਬਨਿਟ ਮੰਤਰੀ ਮੀਤ ਹੇਅਰ ਦੀ ਰਿਹਾਇਸ਼ ਅੱਗੇ ਅਰਥੀ ਫੂਕ ਮੁਜ਼ਾਹਰਾ ਕੀਤਾ। ਡੈਮੋਕ੍ਰੇਟਿਕ ਟੀਚਰਜ਼ ਫਰੰਟ (ਡੀ.ਟੀ.ਐਫ.) ਪੰਜਾਬ, ਈ.ਟੀ.ਟੀ. ਟੈੱਟ ਪਾਸ ਅਧਿਆਪਕ ਐਸੋ: 6505 (ਜੈ ਸਿੰਘ ਵਾਲਾ) ਅਤੇ ਓ.ਡੀ.ਐੱਲ. ਅਧਿਆਪਕ ਯੂਨੀਅਨ (3442, 7654) ਵੱਲੋਂ ਅਧਿਆਪਕ ਵਰਗ ਦੀਆਂ ਚਿਰਾਂ ਤੋਂ ਲਟਕਦੀਆਂ ਮੰਗਾਂ ਮਨਵਾਉਣ ਲਈ ਸਰਕਾਰ ਖਿਲਾਫ਼ ਰੋਸ ਮੁਜ਼ਾਹਾਰੇ ਕੀਤੇ ਜਾ ਰਹੇ ਹਨ। ਇਸ ਸੰਬੰਧੀ ਗੱਲਬਾਤ ਕਰਦਿਆਂ ਡੀ.ਟੀ.ਐਫ. ਦੇ ਜ਼ਿਲ੍ਹਾ ਪ੍ਰਧਾਨ ਰਾਜੀਵ ਬਰਨਾਲਾ ਤੇ ਜ਼ਿਲ੍ਹਾ ਜਨਰਲ ਸਕੱਤਰ ਨਿਰਮਲ ਚੁਹਾਣਕੇ, 6505 ਈਟੀਟੀ ਦੇ ਸੋਹਣ ਸਿੰਘ ਤੇ ਮਲਕੀਤ ਸਿੰਘ ਅਤੇ ਓਡੀਐੱਲ ਯੂਨੀਅਨ ਦੇ ਬਲਜਿੰਦਰ ਫਰਵਾਹੀ ਤੇ ਤਜਿੰਦਰ ਕੁਤਬਾ ਨੇ ਦੱਸਿਆ ਕਿ ਸਿੱਖਿਆ ਮੰਤਰੀ ਵੱਲੋਂ 12 ਅਕਤੂਬਰ ਨੂੰ ਚੰਡੀਗੜ ਵਿਖੇ ਹੋਈ ਮੀਟਿੰਗ ਦੌਰਾਨ ਸੰਜੀਦਗੀ ਨਾਲ ਮਾਮਲੇ ਹੱਲ ਕਰਨ ਦੀ ਥਾਂ ਧਮਕੀਆਂ ਰਾਹੀਂ ਸਕੂਲ ਸਿੱਖਿਆ ਵਿਭਾਗ ਨੂੰ ਧਰਨਾ ਮੁਕਤ ਕਰਨ ਵਰਗਾ ਗ਼ੈਰ ਜ਼ਮਹੂਰੀ ਬਿਆਨ ਦਿੱਤਾ ਗਿਆ ਹੈ, ਜੋ ਨਿੰਦਣਯੋਗ ਹੈ। ਆਗੂਆਂ ਨੇ ਕਿਹਾ ਕਿ ਅਧਿਆਪਕ ਵਰਗ ਦੇ ਮਸਲਿਆਂ ਸੰਬੰਧੀ ਘੋਰ ਬੇਇਨਸਾਫ਼ੀ ਅਤੇ ਪੱਖਪਾਤ ਵਾਲੇ ਰਵੱਈਏ ਕਾਰਨ ਵਿਸ਼ੇਸ਼ ਪੈਨਲ ਮੀਟਿੰਗ ਕਰਕੇ ਫੈਸਲਾਕੁੰਨ ਗੱਲਬਾਤ ਰਾਹੀਂ ਇਨਸਾਫ ਨਾ ਮਿਲਣ ਦੀ ਸੂਰਤ ਵਿੱਚ ਸਿੱਖਿਆ ਮੰਤਰੀ ਖ਼ਿਲਾਫ਼ ਤਿੱਖੇ ਸੰਘਰਸ਼ ਜਾਰੀ ਰੱਖਿਆ ਜਾਵੇਗਾ । ਅਧਿਆਪਕ ਆਗੂਆਂ ਨੇ 6 ਨਵੰਬਰ ਨੂੰ ਸੂਬਾਈ ਰੈਲੀ ਕਰਕੇ ਸਿੱਖਿਆ ਮੰਤਰੀ ਦੀ ਅਨੰਦਪੁਰ ਸਾਹਿਬ ਰਿਹਾਇਸ ਘੇਰਨ ਦੀ ਚੇਤਾਵਨੀ ਦਿੱਤੀ। ਇਸ ਮੌਕੇ ਬਲਜਿੰਦਰ ਪ੍ਰਭੂ, ਲਖਵੀਰ ਠੁੱਲੀਵਾਲ, ਅਵਤਾਰ ਸਿੰਘ ਖਾਲਸਾ, ਰਮਨਦੀਪ ਸੰਧੂ, ਸਤਪਾਲ ਤਪਾ, ਰਘਬੀਰ ਕਰਮਗੜ, ਮਨਮੋਹਨ ਭੱਠਲ,ਪ੍ਰਦੀਪ ਬਖਤਗੜ, ਸੁਰਿੰਦਰ ਤਪਾ, ਪਲਵਿੰਦਰ ਠੀਕਰੀਵਾਲਾ, ਸੁਖਪ੍ਰੀਤ ਬੜੀ, ਜਸਵੀਰ ਰਾਮਗੜ, ਰਘਬੀਰ ਮਹਿਤਾ, ਪਰਮਜੀਤ ਝਲੂਰ ਅਤੇ ਭਰਾਤਰੀ ਜਥੇਬੰਦੀਆਂ ਵੱਲੋਂ ਖੁਸਮਿੰਦਰਪਾਲ ਹੰਢਿਆਇਆ, ਖੁਸਵਿੰਦਰ ਲੀਲ ,ਮਹਿਮਾ ਸਿੰਘ ਢਿੱਲੋਂ,ਗੁਲਾਬ ਸਿੰਘ, ਹਰਪ੍ਰੀਤ ਭੁੱਲਰਹੇੜੀ, ਮੰਗਲ ਸਿੰਘ, ਜਗਜੀਤ ਉੱਭਾ, ਰਮਨਦੀਪ ਠੀਕਰੀਵਾਲਾ, ਸੁਖਦੇਵ ਸਿੰਘ ਆਦਿ ਹਾਜ਼ਰ ਸਨ।
