-ਕਿਹਾ, ਵੜਿੰਗ ਦਾ ਮਿਸ਼ਨ ਕਾਂਗਰਸ ਨੂੰ ਪੂਰੀ ਤਰਾਂ ਖ਼ਤਮ ਕਰਨਾ ਹੈ
ਚੰਡੀਗੜ੍ਹ :- ‘ਮੇਰੇ ਪਿਤਾ ਜੀ ਨੂੰ ਤਾਂ ਮੇਰੇ ਦਾਦਾ ਜੀ ਕਹਿ ਕੇ ਗਏ ਸਨ ਕਿ ਕਾਂਗਰਸ ਪਾਰਟੀ ਨਹੀਂ ਛੱਡਣੀ, ਇਸ ਲਈ ਕਾਂਗਰਸ ਵਿੱਚ ਰਹਿਣਾ ਜਾਂ ਨਾ ਰਹਿਣਾ ਮੇਰੇ ਪਿਤਾ ਜੀ ਦਾ ਫ਼ੈਸਲਾ ਹੋਵੇਗਾ ਪ੍ਰੰਤੂ ਮੈਂ ਆਪਣੀ ਜ਼ਮੀਰ ਦੀ ਆਵਾਜ਼ ਦੇ ਉਲਟ ਨਹੀਂ ਚੱਲ ਸਕਦਾ’। ਇਹ ਸ਼ਬਦ ਕਾਂਗਰਸ ਪਾਰਟੀ ’ਚੋਂ ਕੱਢੇ ਕਮਲਜੀਤ ਸਿੰਘ ਬਰਾੜ ਦੇ ਹਨ, ਜਿਨਾਂ ਨੇ ਮੀਡੀਆ ਦੇ ਸਾਹਮਣੇ ਸੂਬਾ ਪ੍ਰਧਾਨ ਰਾਜਾ ਵੜਿੰਗ ’ਤੇ ਤਿੱਖੇ ਹਮਲੇ ਕੀਤੇ । ਬਰਾੜ ਨੇ ਕਿਹਾ ਕਿ ਵਿਧਾਨ ਸਭਾ ਹਲਕਾ ਨਿਹਾਲ ਸਿੰਘ ਵਾਲਾ ਨੂੰ ਪੰਜਾਬ ਦਾ ਮਾਸਕੋ ਕਿਹਾ ਜਾਂਦਾ ਸੀ ਪ੍ਰੰਤੂ ਉਨ੍ਹਾਂ ਦੇ ਪਰਿਵਾਰ ਦੀ ਮਿਹਨਤ ਨੇ ਉੱਥੇ ਕਾਂਗਰਸ ਪਾਰਟੀ ਦਾ ਝੰਡਾ ਝੜਾਇਆ । ਇਸ ਲਈ ਕਾਂਗਰਸ ਪਾਰਟੀ ’ਚੋਂ ਉਨ੍ਹਾਂ ਨੂੰ ਕੱਢਣ ਦੀ ਹਿੰਮਤ ਰਾਜਾ ਵੜਿੰਗ ਵਰਗੇ ਆਗੂਆਂ ਦੀ ਨਹੀਂ ਹੈ ਸਗੋਂ ਉਹ ਆਪ ਹੀ ਕੁਝ ਸਮੇਂ ਤੋਂ ਪਾਰਟੀ ਅੰਦਰ ਸੱਚ ਦੀ ਲੜਾਈ ਲੜਦੇ ਆ ਰਹੇ ਹਨ ਜੋ ਝੂਠ ਦੇ ਪਲੇਟਫਾਰਮ ’ਤੇ ਖੜਨ ਵਾਲਿਆਂ ਨੂੰ ਰਾਸ ਨਹੀਂ ਆਈ ਅਤੇ ਉਨ੍ਹਾਂ ਨੇ ਆਪਣੀ ਡਿਕਟੇਟਰਸ਼ਿੱਪ ਦਾ ਮੁਜ਼ਾਹਰਾ ਕਰਦੇ ਹੋਏ ਆਪਣਾ ਫ਼ੈਸਲਾ ਸੁਣਾ ਦਿੱਤਾ। ਬਰਾੜ ਨੇ ਬੇਬਾਕੀ ਨਾਲ ਤਿੱਖੀ ਭਾਸ਼ਾ ’ਚ ਰਾਜਾ ਵੜਿੰਗ ਦੇ ਪੋਤੜੇ ਫਰੋਲਦੇ ਹੋਏ ਕਿਹਾ ਕਿ ਵੜਿੰਗ ਦਾ ਮਿਸ਼ਨ ਸੂਬੇ ’ਚ ਕਾਂਗਰਸ ਪਾਰਟੀ ਨੂੰ ਪੂਰੀ ਤਰਾਂ ਖ਼ਤਮ ਕਰਕੇ ਭਾਜਪਾ ਜੁਆਇਨ ਕਰਨ ਦਾ ਹੈ।
ਉਨ੍ਹਾਂ ਕਿਹਾ ਕਿ ਵੜਿੰਗ ਚੁਣ-ਚੁਣ ਕੇ ਇਮਾਨਦਾਰ ਕਾਂਗਰਸੀਆਂ ਨੂੰ ਜ਼ਲੀਲ ਕਰਕੇ ਖੁੱਡੇ ਲਾਈਨ ਲਗਾ ਰਿਹਾ ਹੈ। ਬਰਾੜ ਨੇ ਕਿਹਾ ਕਿ ਰਾਜਾ ਵੜਿੰਗ ਦੀ ਭਗਵੰਤ ਮਾਨ ਨਾਲ ਪੂਰੀ ਮਿੱਤਰਤਾ ਹੈ ਇਸ ਲਈ ਸਿੱਧੂ ਮੂਸੇਵਾਲਾ ਦੇ ਕਤਲ ਤੋਂ ਬਾਅਦ ਵੜਿੰਗ ਮੂਸੇਵਾਲਾ ਦਾ ਸਸਕਾਰ ਹੋਣ ਤੱਕ ਉਸ ਦੇ ਘਰ ਹੀ ਬੈਠਾ ਰਿਹਾ ਕਿਉਂਕਿ ਭਗਵੰਤ ਮਾਨ ਚਾਹੁੰਦਾ ਸੀ ਕਿ ਮੂਸੇਵਾਲਾ ਦਾ ਸਸਕਾਰ ਜਲਦੀ ਤੋਂ ਜਲਦੀ ਹੋ ਜਾਵੇ। ਬਰਾੜ ਨੇ ਦਾਅਵਾ ਕੀਤਾ ਕਿ ਵੜਿੰਗ ਜੇਕਰ ਸੱਚਾ ਕਾਂਗਰਸੀ ਹੈ ਤਾਂ ਉਹ ਮੂਸੇਵਾਲਾ ਦੇ ਪਰਿਵਾਰ ਨੂੰ ਇਨਸਾਫ਼ ਦਿਵਾਉਣ ਲਈ ਭਗਵੰਤ ਮਾਨ ਸਰਕਾਰ ਖਿਲਾਫ਼ ਮੋਰਚਾ ਲਗਾ ਕੇ ਦਿਖਾਵੇ। ਉਨ੍ਹਾਂ ਕਿਹਾ ਕਿ ਵੜਿੰਗ ਦੀ ਅਗਾਵਈ ’ਚ ਕਾਂਗਰਸ ਜਲਦੀ ਹੀ ਖ਼ਤਮ ਹੋ ਜਾਵੇਗੀ ਕਿਉਂਕਿ ਸੂਬੇ ਦੇ ਬਹੁਤੇ ਕਾਂਗਕਸੀ ਵੜਿੰਗ ਨੂੰ ਪ੍ਰਧਾਨ ਹੀ ਨਹੀਂ ਮੰਨਦੇ। ਬਰਾੜ ਚੈਲਿੰਜਕੀਤਾ ਰਾਜਾ ਵੜਿੰਗ ਕਿਸੇ ਵੀ ਡਿਬੇਟ ਵਿੱਚ ਉਸ ਦੇ ਸਾਹਮਣੇ ਬੈਠ ਕੇ ਅੱਖ ’ਚ ਅੱਖ ਪਾ ਕੇ ਗੱਲ ਕਰੇ। ਉਨ੍ਹਾਂ ਕਿਹਾ ਕਿ ਉਹ ਰਾਜਾ ਵੜਿੰਗ ਦੇ ਪੁਰਾਣੇ ਮਿੱਤਰ ਹਨ, ਉਸ ਬਾਰੇ ਚੰਗੀ ਤਰਾਂ ਜਾਣਦੇ ਹਨ ਅਤੇ ਆਉਣ ਵਾਲੇ ਦਿਨਾਂ ’ਚ ਉਸ ਦੇ ਕੰਮਾਂ ਦੇ ਹੋਰ ਖੁਲਾਸੇ ਕੀਤੇ ਜਾਣਗੇ। ਇਸ ਮੌਕੇ ਬਰਾੜ ਨੇ ਵੜਿੰਗ ਵੱਲੋਂ ਦਿਆਲ ਸਿੰਘ ਕੌਲਿਆਂਵਾਲੀ ਦੇ ਪਰਿਵਾਰ ਨੂੰ ਕਾਂਗਰਸ ਦੀ ਸਰਕਾਰ ਮੌਕੇ ਆਰਥਿਕ ਫਾਇਦਾ ਪਹੁੰਚਾਉਣ ਦਾ ਜ਼ਿਕਰ ਵੀ ਕੀਤਾ। ਕਮਲਜੀਤ ਸਿੰਘ ਬਰਾੜ ਨੇ ਵੱਖਰੇ ਸਿੱਖ ਰਾਜ ਦੀ ਸਥਾਪਨਾ ਦੀ ਮੰਗ ਦੀ ਹਮਾਇਤ ਕਰਦੇ ਹੋਏ ਕਿਹਾ ਕਿ ਖ਼ਾਲਿਸਤਾਨ ਮੰਗਣ ਵਾਲਿਆਂ ਨੂੰ ਖ਼ਾਲਿਸਤਾਨ ਦੀ ਪ੍ਰਭਿਾਸ਼ਾ ਦੱਸਣੀ ਚਾਹੀਦੀ ਹੈ। ਕਿਉਂਕਿ ਲੋਕ ਖ਼ਾਲਿਸਤਾਨ ਦਾ ਅਰਥ ਕੁਝ ਹੋਰ ਹੀ ਕੱਢ ਰਹੇ ਹਨ ਜਦਕਿ ਸ਼ੁੱਧ ਖਾਲਸਾ ਰਾਜ ਦਾ ਅਨੰਦ ਮਹਾਰਾਜਾ ਰਣਜੀਤ ਸਿੰਘ ਮੌਕੇ ਲੋਕ ਮਾਣ ਚੁੱਕੇ ਹਨ। ਬਰਾੜ ਨੇ ਭਾਵੇਂ ਆਪਣੇ ਭਵਿੱਖ ਦੀ ਰਣਨੀਤੀ ਦਾ ਖੁੱਲ ਕੇ ਖੁਲਾਸਾ ਨਹੀਂ ਕੀਤਾ ਪ੍ਰੰਤੂ ਉਨ੍ਹਾਂ ਕਿਹਾ ਕਿ ਉਹ ਸੱਚ ਦੀ ਰਾਜਨੀਤੀ ’ਤੇ ਪਹਿਰਾ ਦਿੰਦੇ ਰਹਿਣਗੇ।
