ਬਰਨਾਲਾ 30 ਅਪ੍ਰੈਲ ( ਨਿਰਮਲ ਸਿੰਘ ਪੰਡੋਰੀ )-
ਸ਼ਹਿਰ ਬਰਨਾਲਾ ਦੀਆਂ ਕੁਝ ਸਮੱਸਿਆਵਾਂ ਅਜਿਹੀਆਂ ਹਨ ਜਿਹੜੀਆਂ ਵੇਖਣ ਨੂੰ ਤਾਂ ਛੋਟੀਆਂ ਲੱਗਦੀਆਂ ਹਨ ਪਰ ਇਨ੍ਹਾਂ ਸਮੱਸਿਆਵਾਂ ਦੀ ਮਾਰ ‘ਚ ਆਏ ਕਿਸੇ ਵੀ ਵਿਅਕਤੀ ਦੀ ਜਾਨ ਤੱਕ ਵੀ ਜਾ ਸਕਦੀ ਹੈ । ਸਿਤਮਜ਼ਰੀਫ਼ੀ ਤਾਂ ਇਹ ਹੈ ਕਿ ਸਥਾਨਕ ਪ੍ਰਸ਼ਾਸਨਿਕ ਅਧਿਕਾਰੀਆਂ ਦੇ ਧਿਆਨ ਵਿੱਚ ਹੋਣ ਦੇ ਬਾਵਜੂਦ ਵੀ ਇਨ੍ਹਾਂ ਸਮੱਸਿਆਵਾਂ ਦਾ ਹੱਲ ਨਹੀਂ ਕੀਤਾ ਜਾ ਰਿਹਾ ਹੈ । ਇਹਨਾਂ ਸਮੱਸਿਆਵਾਂ ਬਾਰੇ ਕੁੱਝ ਜਾਗਰੂਕ ਨਾਗਰਿਕਾਂ ਨੇ ਨਿੱਜੀ ਤੌਰ ‘ਤੇ ਅਤੇ ਲਿਖਤੀ ਤੌਰ ‘ਤੇ ਅਧਿਕਾਰੀਆਂ ਦੇ ਧਿਆਨ ਵਿੱਚ ਕਈ ਵਾਰ ਲਿਆਂਦਾ ਹੈ । ਪ੍ਰਿੰਟ ਮੀਡੀਆ ਦੇ ਚੋਟੀ ਦੇ ਅਦਾਰਿਆਂ ਨੇ ਵੀ ਇਨ੍ਹਾਂ ਸਮੱਸਿਆਵਾਂ ਨੂੰ ਕਈ ਵਾਰ ਛਾਪਿਆ ਹੈ ਪ੍ਰੰਤੂ ਇਸਦੇ ਬਾਵਜੂਦ ਵੀ ਜ਼ਿੰਮੇਵਾਰ ਅਧਿਕਾਰੀ ਅੱਖਾਂ ਬੰਦ ਕਰੀ ਬੈਠੇ ਹਨ । ਅਜਿਹੀ ਹੀ ਇੱਕ ਸਮੱਸਿਆ ਕਚਹਿਰੀ ਚੌਂਕ ਤੋਂ ਪੱਕਾ ਕਾਲਜ ਰੋਡ ਤੱਕ ਬਣੇ ਓਵਰਬ੍ਰਿਜ ਦੇ ਉੱਪਰ ਪਏ ਵੱਡੇ-ਵੱਡੇ ਟੋਏ ਹਨ ਜਿਹਨਾਂ ਦੀ ਬਦੌਲਤ ਕਈ ਵਾਰ ਲੋਕ ਹਾਦਸਿਆਂ ਦਾ ਸ਼ਿਕਾਰ ਹੋ ਚੁੱਕੇ ਹਨ ਪ੍ਰੰਤੂ ਪ੍ਰਸਾਸ਼ਨ ਸ਼ਾਇਦ ਕਿਸੇ ਵੱਡੇ ਹਾਦਸੇ ਦੀ ਉਡੀਕ ਵਿਚ ਹੈ, ਇਸੇ ਕਰ ਕੇ ਓਵਰਬ੍ਰਿਜ ਦੇ ਉੱਪਰ ਬਣੇ ਇਹ ਟੋਏ ਭਰੇ ਨਹੀਂ ਜਾ ਰਹੇ । ਜ਼ਿਕਰਯੋਗ ਹੈ ਕਿ ਸ਼ਹਿਰ ਵਿੱਚ ਮਿਉਂਸਪਲ ਕਮੇਟੀ ਜਾਂ ਨਗਰ ਸੁਧਾਰ ਟਰੱਸਟ ਵੱਲੋਂ ਸੜਕਾਂ ‘ਤੇ ਪ੍ਰੀਮਿਕਸ ਪਾਉਣ ਦਾ ਕੰਮ ਕਈ ਵਾਰ ਚੱਲ ਚੁੱਕਿਆ ਹੈ ਜਿੱਥੋਂ 8-10 ਟੋਕਰੇ ਪ੍ਰੀਮਿਕਸ ਦੇ ਲੈ ਕੇ ਇਨ੍ਹਾਂ ਟੋਇਆਂ ਵਿੱਚ ਪਾਏ ਜਾ ਸਕਦੇ ਹਨ ਭਾਵ ਕਿ ਇਹ ਟੋਏ ਭਰਨ ਦੀ ਖ਼ਾਤਰ ਸਪੈਸ਼ਲ ਲੁੱਕ ਪਲਾਂਟ ਲਗਾਉਣ ਦੀ ਲੋੜ ਨਹੀਂ । ਇਥੇ ਇਹ ਵੀ ਵਿਸ਼ੇਸ਼ ਤੌਰ ‘ਤੇ ਜ਼ਿਕਰਯੋਗ ਹੈ ਕਿ ਇਹ ਵੱਡੇ-ਵੱਡੇ ਟੋਇਆਂ ਵਾਲਾ ਓਵਰਬ੍ਰਿਜ ਕੈਬਨਿਟ ਮੰਤਰੀ ਮੀਤ ਹੇਅਰ ਦੀ ਕੋਠੀ ਦੇ ਸਾਹਮਣੇ ਬਣਿਆ ਹੋਇਆ ਹੈ ਅਤੇ ਸ਼ਹਿਰ ਦੀ ਫੇਰੀ ਦੌਰਾਨ ਮੰਤਰੀ ਜੀ ਦੀ ਗੱਡੀ ਕਈ ਵਾਰ ਇਸ ਓਵਰਬ੍ਰਿਜ ਦੇ ਉਪਰੋਂ ਲੰਘ ਚੁੱਕੀ ਹੈ। ਲੋਕਾਂ ਦੀ ਮੰਗ ਹੈ ਕਿ ਦੋ ਪਹੀਆ ਵਾਹਨ ਚਾਲਕਾਂ ਦੀਆਂ ਹੱਡੀਆਂ-ਪਸਲੀਆਂ ਭੰਨ ਰਹੇ ਇਨ੍ਹਾਂ ਟੋਇਆਂ ਨੂੰ ਪ੍ਰੀਮਿਕਸ ਪਾ ਕੇ ਤੁਰੰਤ ਭਰਿਆ ਜਾਵੇ ।
