ਗਰੀਬੀ ਦੀ ਇੰਤਹਾ : ਸਸਕਾਰ ਜੋਗੇ ਪੈਸੇ ਨਹੀਂ ਸਨ…ਪਿਤਾ ਨੇ ਘਰ ‘ਚ ਹੀ ਦੱਬ ਦਿੱਤੀ ਪੁੱਤਰ ਦੀ ਲਾਸ਼

ਚੰਡੀਗੜ੍ਹ,10 ਦਸੰਬਰ-ਆਰਥਿਕ ਤੰਗੀ ਦੀ ਇੱਕ ਵੱਡੀ ਤਰਾਸਦੀ ਦੀ ਮਿਸਾਲ ਵਜੋਂ ਪਟਿਆਲਾ ਵਿਖੇ ਇੱਕ ਵਿਅਕਤੀ ਨੇ ਸਸਕਾਰ ਜੋਗੇ ਪੈਸੇ ਨਾ ਹੋਣ ਕਾਰਨ ਆਪਣੀ ਨੌਜਵਾਨ ਪੁੱਤਰ ਦੀ ਲਾਸ਼ ਨੂੰ ਘਰ ‘ਚ ਹੀ ਦੱਬ ਦਿੱਤਾ। ਇਸ ਗੱਲ ਦਾ ਪਤਾ ਉਦੋਂ ਲੱਗਾ ਜਦੋਂ ਰਿਸ਼ਤੇਦਾਰਾਂ ਨੇ ਬਿਮਾਰ ਪੁੱਤਰ ਦੀ ਮਿਜਾਜਪੁਰਸੀ ਲਈ ਫੋਨ ਕੀਤਾ ਤਾਂ ਅੱਗੋਂ ਮ੍ਰਿਤਕ ਨੌਜਵਾਨ ਦੀ ਭੈਣ ਨੇ ਰਿਸ਼ਤੇਦਾਰਾਂ ਨੂੰ ਦੱਸਿਆ ਕਿ ਉਸਦੀ ਮੌਤ ਹੋ ਗਈ ਹੈ ਤੇ ਪਿਤਾ ਨੇ ਉਸ ਨੂੰ ਘਰ ਵਿੱਚ ਹੀ ਦੱਬ ਦਿੱਤਾ ਹੈ ਕਿਉਂਕਿ ਸਸਕਾਰ ਕਰਨ ਲਈ ਪੈਸੇ ਨਹੀਂ ਸਨ। ਇਹ ਮਾਮਲਾ ਜ਼ਿਲ੍ਹਾ ਪਟਿਆਲਾ ਦੇ ਬਡੂੰਗਰ ਦੀ ਜੈ ਜਵਾਨ ਕਲੋਨੀ ਨਾਲ ਸੰਬੰਧਿਤ ਹੈ। ਮ੍ਰਿਤਕ ਨੌਜਵਾਨ ਲਵੀ ਦੇ ਰਿਸ਼ਤੇ ਵਿੱਚ ਮਾਸੜ ਤੇ ਮਾਸੀ ਲੱਗਦੇ ਰਘਵੀਰ ਸਿੰਘ ਅਤੇ ਗੁਰਮੀਤ ਕੌਰ ਨੇ ਦੱਸਿਆ ਕਿ ਲਵੀ ਦਿਮਾਗੀ ਤੌਰ ‘ਤੇ ਠੀਕ ਨਹੀਂ ਸੀ ਅਤੇ ਪਿਛਲੇ ਇੱਕ ਮਹੀਨੇ ਤੋਂ ਉਸਨੇ ਖਾਣਾ ਪੀਣਾ ਛੱਡ ਦਿੱਤਾ ਸੀ ਜਿਸ ਦੀ ਮਿਜਾਜਪੁਰਸੀ ਲਈ ਜਦ ਫੋਨ ਕੀਤਾ ਤਾਂ ਉਕਤ ਘਟਨਾ ਦਾ ਖੁਲਾਸਾ ਹੋਇਆ। ਮ੍ਰਿਤਕ ਨੌਜਵਾਨ ਲਵੀ ਦਾ ਪਿਤਾ ਭਗਵਾਨਦਾਸ ਇੱਕ ਕਮਰੇ ਦੇ ਮਕਾਨ ‘ਚ ਆਪਣੀ ਪਤਨੀ, ਦੋ ਬੇਟੀਆਂ ਤੇ ਇੱਕ ਪੁੱਤਰ ਨਾਲ ਰਹਿ ਰਿਹਾ ਹੈ। ਇਹ ਇੱਕ ਕਮਰਾ ਵੀ ਉਸ ਨੂੰ ਲੋਕਾਂ ਨੇ ਆਰਥਿਕ ਮਦਦ ਕਰਕੇ ਹੀ ਬਣਾ ਕੇ ਦਿੱਤਾ ਸੀ। ਜਿਸ ਖਾਲੀ ਜਗ੍ਹਾ ਵਿੱਚ ਆਪਣੇ ਉਸਨੇ ਪੁੱਤਰ ਦੀ ਲਾਸ਼ ਨੂੰ ਦੱਬਿਆ, ਉਹ ਜਗ੍ਹਾ ਉਸਦੇ ਭਰਾ ਦੀ ਹੈ। ਰਿਸ਼ਤੇਦਾਰਾਂ ਵੱਲੋਂ ਪੁਲਿਸ ਨੂੰ ਸੂਚਿਤ ਕਰਨ ਤੋਂ ਬਾਅਦ ਚਾਰ ਫੁੱਟ ਡੂੰਘੇ ਟੋਏ ਵਿੱਚੋਂ ਲਾਸ਼ ਕੱਢ ਕੇ ਉਸ ਦਾ ਸਸਕਾਰ ਕੀਤਾ ਗਿਆ। ਇਸ ਮਾਮਲੇ ਵਿੱਚ ਐਸਪੀ ਸਿਟੀ ਮੁਹੰਮਦ ਸਰਫਰਾਜ ਆਲਮ ਨੇ ਕਿਹਾ ਕਿ ਉਹਨਾਂ ਨਿੱਜੀ ਤੌਰ ‘ਤੇ ਸਾਰੇ ਮਾਮਲੇ ਦੀ ਪੜ੍ਹਤਾਲ ਕੀਤੀ ਹੈ, ਲਾਸ਼ ਨੂੰ ਦੱਬਣ ਦੇ ਕਾਰਨ ਸਹੀ ਪਾਏ ਜਾਣ ਤੋਂ ਬਾਅਦ ਇਸ ਮਾਮਲੇ ‘ਚ ਪੁਲਿਸ ਵੱਲੋਂ ਕੋਈ ਕਾਰਵਾਈ ਨਹੀਂ ਕੀਤੀ ਜਾ ਰਹੀ।