ਬਰਨਾਲੇ ਨਾਲ ਜੁੜੀਆਂ ਗੁਰਪ੍ਰੀਤ ਸਿੰਘ ਹਰੀਨੌ ਕਤਲ ਕਾਂਡ ਦੀਆਂ ਤਾਰਾਂ…ਦੋ ਨੌਜਵਾਨ ਕਾਬੂ

ਚੰਡੀਗੜ੍ਹ,10 ਨਵੰਬਰ, Gee98 news service
-ਵਾਰਿਸ ਪੰਜਾਬ ਦੇ ਜਥੇਬੰਦੀ ਦੇ ਫਾਊਂਡਰ ਮੈਂਬਰ ਗੁਰਪ੍ਰੀਤ ਸਿੰਘ ਹਰੀਨੌ ਦੇ ਕਤਲ ਮਾਮਲੇ ਦੀਆਂ ਸਿੱਧੀਆਂ ਤਾਰਾਂ ਬਰਨਾਲਾ ਨਾਲ ਜੁੜ ਚੁੱਕੀਆਂ ਹਨ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਪੁਲਿਸ ਨੇ ਗੁਰਪ੍ਰੀਤ ਸਿੰਘ ਹਰੀਨੌ ਕਤਲ ਮਾਮਲੇ ਨਾਲ ਸੰਬੰਧਿਤ ਬਰਨਾਲਾ ਦੇ ਦੋ ਨੌਜਵਾਨਾਂ ਨੂੰ ਖਰੜ ਤੋਂ ਗ੍ਰਿਫਤਾਰ ਕੀਤਾ ਹੈ। ਜਾਣਕਾਰੀ ਇਹ ਵੀ ਹੈ ਕਿ ਇਹੀ ਉਹ ਦੋਵੇਂ ਸ਼ੂਟਰ ਹਨ ਜਿਨ੍ਹਾਂ ਨੇ ਗੁਰਪ੍ਰੀਤ ਸਿੰਘ ਨੂੰ ਸਿੱਧੀਆਂ ਗੋਲੀਆਂ ਮਾਰੀਆਂ। ਬਰਨਾਲਾ ਨਾਲ ਸੰਬੰਧਿਤ ਪੁਲਿਸ ਅਧਿਕਾਰੀ ਇਸ ਮਾਮਲੇ ਦੀ ਸਿੱਧੀ ਜਾਣਕਾਰੀ ਦੇਣ ਤੋਂ ਕੰਨੀ ਕਤਰਾ ਰਹੇ ਹਨ ਪ੍ਰੰਤੂ ਇਹ ਸਾਹਮਣੇ ਆ ਰਿਹਾ ਹੈ ਕਿ ਅਨਮੋਲਪ੍ਰੀਤ ਸਿੰਘ ਅਤੇ ਨਵਜੋਤ ਸਿੰਘ ਨਾਮ ਦੇ ਦੋ ਨੌਜਵਾਨਾਂ ਨੂੰ ਖਰੜ ਤੋਂ ਗ੍ਰਿਫਤਾਰ ਕੀਤਾ ਗਿਆ ਜਿਹੜੇ ਕਿ ਬਰਨਾਲਾ ਦੇ ਰਹਿਣ ਵਾਲੇ ਹਨ। ਜਿਕਰਯੋਗ ਹੈ ਕਿ ਇਸ ਕਤਲ ਕਾਂਡ ਦੇ ਨਾਲ ਸੰਬੰਧਿਤ ਪੁਲਿਸ ਪਹਿਲਾਂ ਹੀ ਬਿਲਾਲ ਅਹਿਮਦ, ਅਰਸ਼ਦੀਪ ਝੰਡੂ ਅਤੇ ਗੁਰ ਅਮਰ ਸਿੰਘ ਨੂੰ ਗ੍ਰਿਫ਼ਤਾਰ ਕਰ ਚੁੱਕੀ ਹੈ ਜਿਨਾਂ ਉੱਪਰ ਕਤਲ ਤੋਂ ਪਹਿਲਾਂ ਰੇਕੀ ਕਰਨ ਦੇ ਦੋਸ਼ ਹਨ। ਗੁਰਪ੍ਰੀਤ ਸਿੰਘ ਹਰੀਨੌ ਵਾਰਿਸ ਪੰਜਾਬ ਦੇ ਜਥੇਬੰਦੀ ਦੇ ਫਾਊਂਡਰ ਅਤੇ ਦੀਪ ਸਿੱਧੂ ਦੇ ਵਿਸਵਾਸ਼ਪਾਤਰ ਮੈਂਬਰਾਂ ਵਿੱਚੋਂ ਵੀ ਸੀ, ਜਿਸ ਦਾ ਕਤਲ 9 ਅਕਤੂਬਰ ਨੂੰ ਹੋਇਆ ਸੀ। ਭਰੋਸੇਯੋਗ ਸੂਤਰਾਂ ਅਨੁਸਾਰ ਗੁਰਪ੍ਰੀਤ ਸਿੰਘ ਦੇ ਕਤਲ ਮਾਮਲੇ ਦੀ ਜਾਂਚ ਕਰ ਰਹੀਆਂ ਟੀਮਾਂ ਜਦੋਂ ਕਾਤਲਾਂ ਦੀ ਪੈੜ ਨੱਪ ਰਹੀਆਂ ਸਨ ਤਾਂ ਕਾਤਲਾਂ ਦੀ ਲੋਕੇਸ਼ਨ ਬਰਨਾਲੲ ਤੱਕ ਆ ਕੇ ਰੁਕ ਰਹੀ ਸੀ। ਗੁਰਪ੍ਰੀਤ ਸਿੰਘ ਹਰੀਨੌ ਦੇ ਕਤਲ ਦਾ ਮਾਮਲਾ ਕੋਈ ਆਮ ਮਾਮਲਾ ਨਹੀਂ ਹੈ ਕਿਉਂਕਿ ਇਸ ਮਾਮਲੇ ਵਿੱਚ ਵਾਰਿਸ ਪੰਜਾਬ ਜਥੇਬੰਦੀ ਦੇ ਜੇਲ੍ਹ ਵਿੱਚ ਬੰਦ ਮੁਖੀ ਅੰਮ੍ਰਿਤਪਾਲ ਸਿੰਘ ਨੂੰ ਵੀ ਜੋੜਿਆ ਗਿਆ ਹੈ। ਇੱਕ ਪਾਸੇ ਸਿੱਖ ਜਥੇਬੰਦੀਆਂ ਇਸ ਕਤਲ ਨੂੰ ਵਾਰਿਸ ਪੰਜਾਬ ਦੇ ਜਥੇਬੰਦੀ ਵਿੱਚ ਦੁਫਾੜ ਦੀ ਸਾਜ਼ਿਸ਼ ਦੱਸ ਰਹੀਆਂ ਹਨ, ਦੂਜੇ ਪਾਸੇ ਏਜੰਸੀਆਂ ਵੱਲੋਂ ਇਸ ਕਤਲ ਕਾਂਡ ਦੀਆਂ ਤਾਰਾਂ ਵਿਦੇਸ਼ ਬੈਠੇ ਗੈਂਗਸਟਰ ਅਰਸ਼ ਡੱਲੇ ਨਾਲ ਜੋੜੀਆਂ ਜਾ ਰਹੀਆਂ ਹਨ ਜਿਸ ਤੋਂ ਹੋਰ ਵੀ ਡੂੰਘੇ ਸੰਕੇਤ ਮਿਲਦੇ ਹਨ। ਜੇਕਰ ਏਜੰਸੀਆਂ ਦੀ ਪੜਤਾਲ ਮੁਤਾਬਕ ਗੁਰਪ੍ਰੀਤ ਸਿੰਘ ਦੇ ਕਤਲ ਕਾਂਡ ਦੀਆਂ ਤਾਰਾਂ ਅਰਸ਼ ਡੱਲੇ ਨਾਲ ਜੁੜਦੀਆਂ ਹਨ ਤਾਂ ਸਵਾਲ ਇਹ ਵੀ ਉੱਠਦੇ ਹਨ ਕਿ ਬਰਨਾਲਾ ਨਾਲ ਸੰਬੰਧਿਤ ਉਕਤ ਦੋਵੇਂ ਸ਼ੂਟਰਾਂ ਤੱਕ ਅਰਸ਼ ਡੱਲੇ ਦੀ ਪਹੁੰਚ ਕਿਵੇਂ ਹੋਈ, ਜੋ ਗੁਰਪ੍ਰੀਤ ਦੇ ਕਤਲ ਕਾਂਡ ਦੀ ਕਹਾਣੀ ਤੋਂ ਵੱਖਰੀ ਪੜ੍ਹਤਾਲ ਦੀ ਮੰਗ ਕਰਦਾ ਹੈ।