ਬਰਨਾਲਾ,29 ਦਸੰਬਰ (ਨਿਰਮਲ ਸਿੰਘ ਪੰਡੋਰੀ)-
-ਕਿਸਾਨਾਂ ਦੀਆਂ ਮੰਗਾਂ ਸਬੰਧੀ ਸੰਯੁਕਤ ਕਿਸਾਨ ਮੋਰਚਾ (ਗ਼ੈਰ ਰਾਜਨੀਤਿਕ) ਵੱਲੋਂ 30 ਦਸੰਬਰ ਦਿੱਤੇ ਪੰਜਾਬ ਬੰਦ ਦੇ ਸੱਦੇ ਦੇ ਮੱਦੇਨਜ਼ਰ ਬਰਨਾਲਾ ਪੁਲਿਸ ਵੱਲੋਂ ਆਮ ਲੋਕਾਂ ਦੀ ਸਹੂਲਤ ਲਈ ਆਵਾਜਾਈ ਦੇ ਬਦਲਵੇਂ ਰੂਟਾਂ ਦਾ ਪ੍ਰਬੰਧ ਕੀਤਾ ਗਿਆ ਹੈ। ਬਰਨਾਲਾ ਪੁਲਿਸ ਵੱਲੋਂ ਬਰਨਾਲਾ ਤੋਂ ਸੰਗਰੂਰ ਜਾਣ ਵਾਲੇ ਵਾਹਨਾਂ ਲਈ ਮੇਨ ਹਾਈਵੇ ਤੋਂ ਪਿੰਡ ਹਰੀਗੜ੍ਹ ਤੋਂ ਭੈਣੀ ਮਹਿਰਾਜ ਅਤੇ ਫਿਰ ਕੁੰਨਰਾਂ ਪਿਕਟ ਮੇਨ ਹਾਈਵੇ ਤੱਕ ਰੂਟ ਦਿੱਤਾ ਗਿਆ ਹੈ। ਇਸੇ ਤਰ੍ਹਾਂ ਸੰਗਰੂਰ ਤੋਂ ਬਰਨਾਲਾ ਵਾਹਨਾਂ ਲਈ ਪਿੰਡ ਬਡਬਰ ਤੋਂ ਪਿੰਡ ਲੋਹਾ ਖੇੜਾ ਰੋਡ ਪਿੰਡ ਭੂਰੇ ਤੋਂ ਹਰੀਗੜ ਨਹਿਰ ਦੇ ਪੁਲ ਤੱਕ ਰੂਟ ਦਿੱਤਾ ਗਿਆ ਹੈ। ਇਸੇ ਤਰ੍ਹਾਂ ਬਰਨਾਲਾ ਤੋਂ ਬਠਿੰਡਾ ਲਈ ਮੇਨ ਹਾਈਵੇ ਤੋਂ ਪਿੰਡ ਮਹਿਤਾ ਤੋਂ ਪਿੰਡ ਤਾਜੋਕੇ ਤੋਂ ਪਿੰਡ ਘੜੈਲਾ ਤੋਂ ਪਿੰਡ ਘੜੈਲੀ ਮੇਨ ਹਾਈਵੇ ਤੱਕ ਰੂਟ ਦਿੱਤਾ ਗਿਆ ਹੈ। ਬਠਿੰਡਾ ਤੋਂ ਬਰਨਾਲਾ ਵੱਲ ਆਉਣ ਵਾਲੇ ਵਾਹਨਾਂ ਲਈ ਸਬ ਰੋਡ ਤਹਿਸੀਲ ਦਫਤਰ ਤਪਾ ਤੋਂ ਪਿੰਡ ਘੁੰਨਸ ਤੋਂ ਮੇਨ ਹਾਈਵੇ ਤੱਕ ਰੋਡ ਦਿੱਤਾ ਗਿਆ ਹੈ। ਬਰਨਾਲਾ ਤੋਂ ਮਾਨਸਾ ਜਾਣ ਵਾਲੇ ਵਾਹਨਾਂ ਲਈ ਮੇਨ ਰੋਡ ਤੋਂ ਲਿੰਕ ਰੋਡ ਪਿੰਡ ਫਤਿਹਗੜ੍ਹ ਛੰਨਾ ਤੋਂ ਪਿੰਡ ਕਾਹਨੇਕੇ ਤੋਂ ਰੂੜੇਕੇ ਮੇਨ ਰੋਡ ਤੱਕ ਰੂਟ ਦਿੱਤਾ ਗਿਆ ਹੈ। ਇਸੇ ਤਰ੍ਹਾਂ ਮਾਨਸਾ ਤੋਂ ਬਰਨਾਲਾ ਆਉਣ ਵਾਲੇ ਵਾਹਨਾਂ ਲਈ ਮੇਨ ਰੋਡ ਮਹਿਤਾ ਮੋੜ ਤੋਂ ਪਿੰਡ ਧੌਲਾ ਤੋਂ ਅਨਾਜ ਮੰਡੀ ਧੌਲਾ ਤੋਂ ਮੇਨ ਰੋਡ ਤੱਕ ਰੂਟ ਦਿੱਤਾ ਗਿਆ ਹੈ। ਇਸੇ ਤਰ੍ਹਾਂ ਬਰਨਾਲਾ ਤੋਂ ਲੁਧਿਆਣਾ ਜਾਣ ਲਈ ਭੱਦਲਵੱਡ ਤੋਂ ਪਿੰਡ ਠੀਕਰੀਵਾਲਾ ਤੋਂ ਪਿੰਡ ਚੌਹਾਨ ਕੇ ਕਲਾਂ ਤੋਂ ਪਿੰਡ ਸਹਿਜੜਾ ਮੇਨ ਰੋਡ ਦਾ ਰੋਡ ਦਿੱਤਾ ਗਿਆ ਹੈ। ਲੁਧਿਆਣਾ ਤੋਂ ਬਰਨਾਲਾ ਵੱਲ ਆਉਣ ਵਾਲੇ ਵਾਹਨਾਂ ਲਈ ਮੇਨ ਰੋਡ ਬੱਸ ਸਟੈਂਡ ਸਹੌਰ ਤੋਂ ਪਿੰਡ ਹਮੀਦੀ ਤੋਂ ਪਿੰਡ ਭੱਦਲਵੱਡ ਮੇਨ ਰੋਡ ਤੱਕ ਰੂਟ ਦਿੱਤਾ ਗਿਆ ਹੈ। ਬਰਨਾਲਾ ਪੁਲਿਸ ਵੱਲੋਂ ਆਮ ਲੋਕਾਂ ਨੂੰ ਅਪੀਲ ਕੀਤੀ ਗਈ ਹੈ ਕਿ ਸਫਰ ਦੌਰਾਨ ਕਿਸੇ ਵੀ ਮੁਸ਼ਕਿਲ ਤੋਂ ਬਚਣ ਲਈ ਪੁਲਿਸ ਵੱਲੋਂ ਦਿੱਤੇ ਗਏ ਰੂਟਾਂ ਦੀ ਵਰਤੋਂ ਹੀ ਕੀਤੀ ਜਾਵੇ।
