ਚੰਡੀਗੜ੍ਹ,31 ਦਸੰਬਰ, Gee98 News service
-ਪੰਜਾਬ ਪੁਲਿਸ ਦੇ ਇੱਕ ਧਾਕੜ ਅਫ਼ਸਰ ਅਤੇ ਇੱਕ A ਸ਼੍ਰੇਣੀ ਦੇ ਗੈਂਗਸਟਰ ਦੀ ਸੋਸ਼ਲ ਮੀਡੀਆ ਤੇ ਵਾਇਰਲ ਹੋ ਰਹੀ ਆਡੀਓ ਚਰਚਾ ਦਾ ਵਿਸ਼ਾ ਬਣੀ ਹੋਈ ਹੈ। ਪੁਲਿਸ ਦੇ ਡੀਐਸਪੀ ਵਿਕਰਮਜੀਤ ਸਿੰਘ ਬਰਾੜ ਅਤੇ ਗੈਂਗਸਟਰ ਗੋਲਡੀ ਬਰਾੜ ਦੀ ਇਹ ਆਡੀਓ ਕਰੀਬ 10 ਮਿੰਟਾਂ ਦੀ ਹੈ ਜਿਸ ਵਿੱਚ ਡੀਐਸਪੀ ਬਰਾੜ ਅਤੇ ਗੈਂਗਸਟਰ ਗੋਲਡੀ ਬਰਾੜ ਆਪਸ ਵਿੱਚ ਕਾਫੀ ਬਹਿਸਬਾਜੀ ਕਰ ਰਹੇ ਹਨ। ਆਡੀਓ ਵਿੱਚ ਸੁਣਿਆ ਜਾ ਸਕਦਾ ਹੈ ਕਿ ਗੋਲਡੀ ਬਰਾੜ ਕਿਸੇ ਭੂਪੀ ਰਾਣਾ ਤੇ ਅਜੇ ਰਾਣਾ ਦੇ ਕਤਲ ਦੀ ਜ਼ਿੰਮੇਵਾਰੀ ਲੈਂਦਾ ਹੋਇਆ ਡੀਐਸਪੀ ਬਰਾੜ ਨੂੰ ਕਹਿ ਰਿਹਾ ਹੈ ਕਿ “ਤੁਸੀਂ ਉਸ ਨੂੰ ਆਪਣਾ ਮੁਖਬਰ ਬਣਾਇਆ ਹੋਇਆ ਸੀ, ਤੁਸੀਂ ਜਿੰਨੇ ਸਾਡੇ ਬੰਦਿਆਂ ਨੂੰ ਮੁਖਬਰ ਬਣਾਓਗੇ ਅਸੀਂ ਸਾਰਿਆਂ ਨੂੰ ਮਾਰਾਂਗੇ”। ਦੂਜੇ ਪਾਸੇ ਡੀਐਸਪੀ ਬਰਾੜ ਵੱਲੋਂ ਗੋਲਡੀ ਬਰਾੜ ਨੂੰ ਕਿਹਾ ਜਾ ਰਿਹਾ ਕਿ “ਪੰਜਾਬ ਪੁਲਿਸ ਨੂੰ ਕਿਸੇ ਮੁਖ਼ਬਰ ਦੀ ਲੋੜ ਨਹੀਂ, ਪੰਜਾਬ ਪੁਲਿਸ ਆਪਣੇ ਆਪ ਵਿੱਚ ਹੀ ਵਧੇਰੀ ਸਮਰੱਥ ਹੈ। ਡੀਐਸਪੀ ਬਰਾੜ ਆਡੀਓ ਵਿੱਚ ਕਹਿ ਰਿਹਾ ਹੈ ਕਿ “ਜਿਹੜਾ ਕਾਨੂੰਨ ਵਿਰੋਧੀ ਕੰਮ ਕਰੇਗਾ ਉਹਦੇ ਨਾਲ ਪੰਜਾਬ ਪੁਲਿਸ ਸਖਤੀ ਨਾਲ ਨਜਿਠੇਗੀ,,, ਮਾੜੇ ਕੰਮ ਕਰਨ ਵਾਲੇ ਨੂੰ ਕਿਸੇ ਨੂੰ ਵੀ ਨਹੀਂ ਬਖਸ਼ਿਆ ਜਾਵੇਗਾ”। ਗੈਂਗਸਟਰਾਂ ਦੇ ਖ਼ਿਲਾਫ਼ ਪੰਜਾਬ ਪੁਲਿਸ ਵੱਲੋਂ ਮੋਹਰੀ ਭੂਮਿਕਾ ਨਿਭਾਉਣ ਵਾਲੇ ਇੱਕ ਅਫ਼ਸਰ ਦੀ ਇਹ ਆਡੀਓ ਇਸ ਕਰਕੇ ਵੀ ਚਰਚਾ ਦਾ ਵਿਸ਼ਾ ਬਣੀ ਹੋਈ ਹੈ ਕਿਉਂਕਿ ਇਹ ਆਡੀਓ ਕਈ ਤਰ੍ਹਾਂ ਦੇ ਸਵਾਲ ਖੜੇ ਕਰ ਰਹੀ ਹੈ। ਆਡੀਓ ਵਿੱਚ ਗੋਲਡੀ ਬਰਾੜ ਦਾ ਡੀਐਸਪੀ ਬਰਾੜ ਨੂੰ ਇਹ ਕਹਿਣਾ ਕਿ “ਤੁਸੀਂ ਸਾਡੇ ਬੰਦਿਆਂ ਨੂੰ ਮੁਖ਼ਬਰ ਬਣਾਇਆ ਹੋਇਆ ਹੈ ਸਪੱਸ਼ਟ ਕਰਦਾ ਹੈ ਕਿ ਵੱਡੇ ਗੈਂਗਸਟਰਾਂ ਤੱਕ ਪਹੁੰਚਣ ਲਈ ਪੁਲਿਸ ਅਧਿਕਾਰੀ ਛੋਟੇ ਗੈਂਗਸਟਰਾਂ ਨੂੰ ਵਰਤ ਰਹੇ ਹਨ, ਯਕੀਨਨ ਇਸ ਪ੍ਰਕਿਰਿਆ ਦੌਰਾਨ ਪੁਲਿਸ ਅਧਿਕਾਰੀਆਂ ਦਾ ਗਿਰੋਹ ਦੇ ਮੈਂਬਰਾਂ ਨਾਲ ਸੰਪਰਕ ਬਣਿਆ ਰਹਿੰਦਾ ਹੋਵੇਗਾ ਜਿਸ ਦੀ ਭਿਣਕ ਜਦੋਂ ਗਿਰੋਹ ਦੇ ਮੁਖੀ ਨੂੰ ਲੱਗਦੀ ਹੈ ਤਾਂ ਉਹਨਾਂ ਨੂੰ ਪੁਲਿਸ ਦੇ ਮੁਖਬਰ ਦਾ ਖਿਤਾਬ ਦੇ ਕੇ ਮਾਰ ਦਿੱਤਾ ਜਾਂਦਾ ਹੈ। ਦੱਸ ਦੇਈਏ ਕਿ ਗੋਲਡੀ ਬਰਾੜ ਸਿੱਧੂ ਮੂਸੇਵਾਲਾ ਦੇ ਕਤਲ ਦਾ ਮੁੱਖ ਸਾਜਿਸ਼ਕਾਰ ਹੈ ਜੋ ਉਸ ਵੇਲੇ ਕੈਨੇਡਾ ਵਿੱਚ ਸੀ ਅਤੇ ਅੱਜਕੱਲ੍ਹ ਅਮਰੀਕਾ ਵਿੱਚ ਰਹਿ ਰਿਹਾ ਹੈ। ਡੀਐਸਪੀ ਵਿਕਰਮਜੀਤ ਸਿੰਘ ਬਰਾੜ ਗੈਂਗਸਟਰਾਂ ਤੇ ਮਾੜੇ ਅਨਸਰਾਂ ਖਿਲਾਫ਼ ਕਾਰਵਾਈ ਕਰਨ ਵਿੱਚ ਮੋਹਰੀ ਨਾਮ ਹੈ ਤੇ ਹੁਣ ਤੱਕ ਉਸ ਵੱਲੋਂ ਕਈ ਖਤਰਨਾਕ ਗੈਂਗਸਟਰਾਂ ਦਾ ਐਨਕਾਉਂਟਰ ਕੀਤਾ ਜਾ ਚੁੱਕਿਆ ਹੈ ਅਤੇ ਇਹਨਾਂ ਨੂੰ ਜੇਲ੍ਹਾਂ ਵਿੱਚ ਬੰਦ ਕੀਤਾ ਗਿਆ ਹੈ। ਡੀਐਸਪੀ ਬਰਾੜ ਅਤੇ ਗੋਲਡੀ ਬਰਾੜ ਦੀ ਇਸ ਆਡੀਓ ਨੂੰ ਵਾਰ-ਵਾਰ ਸੁਣਨ ਤੋਂ ਬਾਅਦ ਅਜਿਹਾ ਵੀ ਲੱਗਦਾ ਹੈ ਜਿਵੇਂ ਪਹਿਲਾਂ ਵੀ ਡੀਐਸਪੀ ਬਰਾੜ ਅਤੇ ਗੋਲਡੀ ਬਰਾੜ ਦੀ ਫੋਨ ‘ਤੇ ਗੱਲਬਾਤ ਹੋਈ ਹੋਵੇ। ਬਹਰਹਾਲ ! ਇਹ ਆਡੀਓ ਸ਼ੋਸ਼ਲ ਮੀਡੀਆ ‘ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਹੀ ਹੈ। ਭਾਵੇਂ ਕਿ ਪੰਜਾਬ ਪੁਲਿਸ ਨੇ ਆਪਣੇ ਪੱਧਰ ‘ਤੇ ਇਸ ਆਡੀਓ ਦੀ ਅਧਿਕਾਰਤ ਤੌਰ ‘ਤੇ ਪੁਸ਼ਟੀ ਨਹੀਂ ਕੀਤੀ।
ਸਬੰਧਤ ਖਬਰ
