ਚੰਡੀਗੜ੍ਹ, 3 ਜਨਵਰੀ, Gee98 news service
-ਦੇਸੀ ਘਿਓ ਖਾਣ ਦੇ ਸ਼ੌਕੀਨਾਂ ਲਈ ਇੱਕ ਚਿੰਤਾਜਨਕ ਖ਼ਬਰ ਹੈ। ਪੁਲਿਸ ਨੇ ਆਗਰਾ ਵਿੱਚ ਨਕਲੀ ਘਿਓ ਬਣਾਉਣ ਵਾਲੀਆਂ ਤਿੰਨ ਫੈਕਟਰੀਆਂ ਦਾ ਪਰਦਾਫਾਸ਼ ਕੀਤਾ ਗਿਆ ਹੈ, ਜਿੱਥੇ ਪਤੰਜਲੀ, ਅਮੂਲ ਅਤੇ ਪਾਰਸ ਵਰਗੇ 18 ਵੱਡੇ ਬ੍ਰਾਂਡਾਂ ਦੇ ਨਾਂ ‘ਤੇ ਉੱਤਰੀ ਭਾਰਤ ਦੇ ਵੱਖ-ਵੱਖ ਸੂਬਿਆਂ ‘ਚ ਨਕਲੀ ਘਿਓ ਤਿਆਰ ਕਰਕੇ ਸਪਲਾਈ ਕੀਤਾ ਜਾ ਰਿਹਾ ਸੀ। ਜਾਂਚ ਦੌਰਾਨ ਸਾਹਮਣੇ ਆਇਆ ਕਿ ਨਕਲੀ ਘਿਓ ਬਣਾਉਣ ਵਿਚ ਯੂਰੀਆ, ਪਾਮ ਆਇਲ ਅਤੇ ਹੋਰ ਖਤਰਨਾਕ ਰਸਾਇਣਾਂ ਦੀ ਵਰਤੋਂ ਕੀਤੀ ਜਾ ਰਹੀ ਸੀ। 2 ਜਨਵਰੀ ਨੂੰ ਪੁਲਿਸ ਨੇ ਤਾਜਗੰਜ ਥਾਣਾ ਖੇਤਰ ‘ਚ ਤਿੰਨ ਗੈਰ-ਕਾਨੂੰਨੀ ਫੈਕਟਰੀਆਂ ‘ਤੇ ਛਾਪੇਮਾਰੀ ਕੀਤੀ ਸੀ। ਇਹ ਫੈਕਟਰੀਆਂ ‘ਸ਼ਿਆਮ ਐਗਰੋ’ ਦੇ ਨਾਂ ‘ਤੇ ਰਜਿਸਟਰਡ ਸਨ ਅਤੇ ਇਨ੍ਹਾਂ ਦਾ ਮਾਲਕ ਗਵਾਲੀਅਰ ਦਾ ਨੀਰਜ ਅਗਰਵਾਲ ਦੱਸਿਆ ਜਾਂਦਾ ਹੈ। ਪਹਿਲੀ ਫੈਕਟਰੀ ਵਿੱਚ ਨਕਲੀ ਘਿਓ ਬਣਾਇਆ ਗਿਆ, ਦੂਜੀ ਵਿੱਚ ਕੱਚਾ ਮਾਲ ਰੱਖਿਆ ਗਿਆ ਅਤੇ ਤੀਜੀ ਫੈਕਟਰੀ ਵਿੱਚ ਤਿਆਰ ਘਿਓ ਦਾ ਸਟਾਕ ਰੱਖਿਆ ਗਿਆ।ਛਾਪੇਮਾਰੀ ਦੌਰਾਨ ਕਰੀਬ 2500 ਕਿਲੋ ਕੱਚਾ ਮਾਲ, ਨਕਲੀ ਘਿਓ, 18 ਵੱਡੇ ਬ੍ਰਾਂਡਾਂ ਦੇ ਸਟਿੱਕਰ ਅਤੇ ਪੈਕੇਜਿੰਗ ਸਮੱਗਰੀ ਜ਼ਬਤ ਕੀਤੀ ਗਈ। ਪੁਲਿਸ ਨੇ ਫੈਕਟਰੀ ਵਿੱਚ ਕੰਮ ਕਰਦੇ ਚਾਰ ਮਜ਼ਦੂਰਾਂ ਅਤੇ ਇੱਕ ਮੈਨੇਜਰ ਨੂੰ ਹਿਰਾਸਤ ਵਿੱਚ ਲਿਆ ਹੈ। ਪੁੱਛਗਿੱਛ ਦੌਰਾਨ ਖੁਲਾਸਾ ਹੋਇਆ ਕਿ ਤਿਆਰ ਨਕਲੀ ਘਿਓ ਉੱਤਰ ਪ੍ਰਦੇਸ਼, ਰਾਜਸਥਾਨ, ਹਰਿਆਣਾ, ਜੰਮੂ-ਕਸ਼ਮੀਰ ਅਤੇ ਉੱਤਰਾਖੰਡ ਆਦਿ ਰਾਜਾਂ ਨੂੰ ਭੇਜਿਆ ਜਾ ਰਿਹਾ ਸੀ।
ਡੀਸੀਪੀ ਨਗਰ ਸੂਰਜ ਕੁਮਾਰ ਰਾਏ ਨੇ ਦੱਸਿਆ ਕਿ ਨਕਲੀ ਘਿਓ ਦੇ ਸੈਂਪਲ ਗੁਣਵੱਤਾ ਜਾਂਚ ਲਈ ਖੁਰਾਕ ਵਿਭਾਗ ਨੂੰ ਭੇਜੇ ਗਏ ਹਨ। ਇਸ ਮਾਮਲੇ ਵਿੱਚ ਦੋਸ਼ੀਆਂ ਖਿਲਾਫ ਸਖਤ ਕਾਰਵਾਈ ਕੀਤੀ ਜਾਵੇਗੀ ਅਤੇ ਨਕਲੀ ਉਤਪਾਦਾਂ ਦੀ ਸਪਲਾਈ ਚੇਨ ਦਾ ਪੂਰੀ ਤਰ੍ਹਾਂ ਖੁਲਾਸਾ ਕੀਤਾ ਜਾਵੇਗਾ। ਦੇਸ਼ ਦੇ ਕਈ ਸੂਬਿਆਂ ਵਿੱਚ ਪਤੰਜਲੀ, ਅਮੁਲ, ਪਾਰਸ ਅਤੇ ਹੋਰ ਵੱਡੇ ਬਰਾਂਡਾਂ ਦਾ ਦੇਸੀ ਘਿਓ ਲੋਕ ਵੱਡੀ ਮਾਤਰਾ ਵਿੱਚ ਵਰਤਦੇ ਹਨ। ਇਹਨਾਂ ਬਰਾਂਡਾਂ ਦਾ ਨਕਲੀ ਘਿਓ ਬਾਜ਼ਾਰ ਵਿੱਚ ਵਿਕਣ ਦੀਆਂ ਖ਼ਬਰਾਂ ਤੋਂ ਬਾਅਦ ਲੋਕਾਂ ‘ਚ ਚਿੰਤਾ ਫੈਲਣੀ ਸੁਭਾਵਿਕ ਹੀ ਹੈ। ਜੇਕਰ ਤੁਸੀਂ ਵੀ ਇਹਨਾਂ ਬਰਾਂਡਾਂ ਦਾ ਦੇਸੀ ਘਿਓ ਵਰਤਦੇ ਹੋ ਤਾਂ ਅਸਲੀ ਨਕਲੀ ਦੀ ਪੜ੍ਹਤਾਲ ਜਰੂਰ ਕਰ ਲੈਣੀ ਚਾਹੀਦੀ ਹੈ।
